So Job ỹasateguet Ñim Nataxala'
1Nache so Job ỹasateguet Ñim Nataxala', 'eeta':
2«Aỹem saỹateeta da 'aushet da 'auo'ot 'enauacna,
qataq qaica da huo'o ca nqanaxat da huo'o ca 'auo'ot.
3Cha'aye caillaye qoneta': ‹¿Negue't nam na'
maye qaica ca ỹanaiguilo naua iqataxaco,
qamaq naua la'aqtaqa yo'oqta da qaica ca ỹaỹaanapec?›
Cha'aye 'eesa da aỹem sa'axattac co'ollaxa
na lataxacpi maye saishet da saỹaten,
nam lataxaguesat maye qaica ca 'ena'am da lyac,
maye saishet da saỹaten ca llec.
4Qataq 'eesa caillaye da qoneta':
‹'Ana'axaỹaxaachiguiñi qome, cha'aye ñeshetaique da 'am setaxaỹapegue',
nache 'aua'axategue qome ne'ena inataxanaxacpi.›
5Cha'aye aỹem choche 'am sa'aqtapeguelec naxa,
da aỹem qaỹa'aqtaxaatapeguem,
qalaxaye nagui ỹataqta ñema'ai' da 'am seloto'ot.
6Qaq ỹoqo'oye nagui sha'axaneguet
da itaxaỹaxac, souaxat na ỹa'aqtacpi co'ollaxa,
nache ñeso'ongui qome na namoxoỹaxa,
qataq semeelec na ỹaqaic na alo, cha'aye huo'o da ñetogotaxac.»
Ñim Lo'onatac 'Enauacna ỹe'eguelaxatot da lsallaxa so Job
7Qaq Ñim Nataxala' co'ollaq ime da 'eetega so Job, nache 'enapega so Elifaz, 'eeta': «Aỹem ỹataqta 'am salemataỹa qataq soua dos 'anauochaxau', cha'aye qaica da 'eesa da aỹem qaua'axachiita, qaq saishet da qoñiita'am da 'eetec ñi ỹamaxashec Job. 8Qaq qauacoñiiua'alo qome caua siete huaca llalqa, qataq caua siete qagueta lhuaraiqa, nache qanqo'oñiỹa qome ñi ỹamaxashec Job, yaqto' qaỹa'añiiuo da nachetaqtaxanaqte qaỹavigaxatta, qaq ñi ỹamaxashec Job, qami' natameeleguete qome. Nache aỹem saconeguet qome ca nqouagaxaunaxac ñimaye nache saishet da huo'o ca qami' shena'aque, souaxat da saishet da qaua'axache da ỹaỹamaqchiguiñi ỹataxac, cha'aye qami' saishet da qoñiita'am ñi ỹamaxashec Job.»
9Nache so Elifaz, Bildad qataq so Zofar je'c da ỹo'o't da lamaxasoxonaxac Ñim Nataxala', nache Ñimaye ỹasateguet co'ollaxa da nqouagaxaunaxac so Job.
10Qaq so Job co'ollaq ime da natameeleguete soua nauochaxau', nache Ñim Lo'onatac 'Enauacna, ỹe'eguelaxatot somaye da lsallaxa, nache ỹataqta ỹagaqteetec 'enauac nam ỹami', napacalec so hua'auchiguiñi lsallaxa. 11Nache 'enauac so lqaỹañecpi ỹalleppi, 'alpi, nauochaxauapi qataq 'enauac som togoshec nauattonaxauapi, nqo'ona somaye nache qaỹauaxaiguet somaye da qaỹo'ot so nquia'axac huaña so lma'. Nache ỹataqta qaỹa'añaqchettac somaye, souaxat so nque'eenaxac maye namaxa co'ollaxa Ñim Nataxala', nache ñi 'oonolec somayepi huo'o na ỹanem ana qalota alom plata qataq ana nchiguishaqte oro.
12Nache Ñim Lo'onatac 'Enauacna ỹanem da nqouagaxa so Job, soua pa'atrec vi'iye, napacalec naqa'en so hua'autec lsallaxa. Ỹoqo'oye somaye ivi' catorce mil aso lalo qaguetapi, seis mil aso cameellopi, qataq mil so lauegaxanaxala'pi huaca, mil aso 'ashenapi. 13Nataqa'en siete soua llalqa ỹale't, qataq tres soua llale 'alo. 14Qaq aso ỹe llale le'enaxat Yemimá, qaq aso lỹa Quesiyá, qaq aso lỹa Queren Hapuc. 15Qaq ỹataqta qaca aca 'alo 'enauac ye 'alhua maye qanayeetaña, da 'eeta'ama da lyacỹaxa'c soua llalel so Job. Nache somaye ỹataqta ỹaqataxaataleguete soomaye 'enauac da lsallaxa, nache nhuaatra'ai' naqa'en so lqaỹañecpi.
16Qaq co'ollaq ime de'era, nache so Job ivi' soua ciento cuarenta vi'iye da nachaalataxac nache ileu, qataq ivira'a da ỹauaachigui so llalaqpi qataq so llalaqpi so laualpi. 17Nache so Job ivira'a da ỹataqta ỹa'axaiquiolec co'ollaq ileu.
