Joel 3

₁Qaq que'ecaua na'axa'te qom ivita ca laloqo' da ñe'eguelaxat

nam noxonecpi Judá le'ecpi qataq nam Jerusalén le'ecpi,

₂nache llaỹona't qome 'enauac na ỹotta'a't shiỹaxauapi,

nache sauega ye ca'amegue Josafat, yem huaña da ñemit qome namayepi,

souaxat nam ỹo'otecpi co'ollaxa nam ỹalamaxat nhuo' Israel le'ecpi,

da ilagaxaalec nam ỹotta'a't 'alhuapi, qataq namayepi nalogui na ña'alhuapi.

₃Qataq nallechigui co'ollaxa na ỹalamaxat nhuo' le'ecpi,

qataq imen na ñaqpiolec naiguet naqa'en ana quisheguetaxaipi,

qataq ana nogotolepi, naiguet naqa'en na lataxa.

₄Qami' Tiro, Sidón qataq Filistea le'ecpi,

¿negue't ca qoñeetapeguec da sheeta?

¿Peta'a qansheetaique da aỹem qavi'iguelaxachiỹa'aguet?

Qaq da nache qoñeetec de'era,

nache aỹem sa ñaỹaloxon qome da qami'

taleguete ñaqa'en ca qanhuaxanaguiiqui.

₅Cha'aye qami' qauacoñiỹa co'ollaxa

som ỹalamaxat plata qataq oro,

qataq nam ỹataqta no'on nogoxoshetpi maye ỹalamaxat,

nache qaroiua'a anam atamnaxaquipi

maye maiche qaralamaqchi,

₆qataq qaumiñi na Judá le'ecpi,

qataq na Jerusalén le'ecpi,

nache l-latacpi qanqa'eñi na griegopi

nache ca'ai qanqa'aiñi na na'alhua.

₇Qalaxaye aỹem ñe'eguelaxat qome namayepi,

sachegoxotchiguiña nam 'alhuapi maye taỹa co'ollaxa da qaumiñi,

nache da nque'eenaxac na Israel le'ecpi

'eeta'am qome da qanque'eenaxaqui.

₈Nache na qaỹa'alquipi qataq ana qaỹa'allipi,

semenot qome na Judá le'ecpi yaqto' namayepi

imenot qome namayepi na sabeopi,

maye chegaqa'a cam ỹataqta qaỹoqta 'alhua.

Qaq 'era da ỹa'aqtac, Aỹem Nataxala'.

₉Qaq ỹataqta qaua'aqtaxañim qome

de'era nam ỹotta'a't shiỹaxauapi,

qataq qaua'axache qome da huo'o ca alaataxac,

nache qoñiỹapega da anac qome na 'añaxaicpi,

qataq naỹamaxat qome da yaqto' nalat

'enauac nam ỹalleppi maye ỹataqta alaataxaicpi.

₁₀Qataq qanlaxachiiñi na no'onataxanaxatpi,

nache qauo'oche cam ỹeelonecpi,

qataq qanlaxachiiñi na nchegaxanaxatpi,

nache qauo'oche aca taquiaxaipi,

qataq nam shiỹaxauapi maye qaica ca la'añaxac qalaq 'eeta':

«Aỹem, ỹataqta aỹem 'añaxaic.»

₁₁Qaq 'enauac qami' ỹotta'a't shiỹaxauapi

maye qareuoreuai ne'ena 'alhua,

sa qanaỹaloxoñi qome da qauanaqui da qalaỹoñiỹa't.

Qaq 'Am Nataxala', ñaq 'auanacot qome na 'ara'añaxanecpi.

₁₂Qataq naỹamaxat qome nam ỹotta'a't shiỹaxauapi

da taỹa yem ca'amegue Josafat,

cha'aye nache huaña yemaye da Ñim Nataxala'

nmit qome 'enauac nam ỹotta'a't shiỹaxauapi maye qareuoreuapi.

₁₃Cha'aye namayepi ỹataqta qauemaicpi,

ỹoqo'oye 'eeta'am qome qanqa'eñi na trigo

da mashe ỹe nache qauchiqui,

cha'aye mashe ivita ye laloqo' da qanqat nam nañiguishecpi,

nache ỹataqta dapaxa't qanqa'eñi namayepi,

'eeta'am ana uva da qaỹapigui da yaqto' qaỹo'ot na lataxa.

₁₄Qaq ỹataqta qalota nam nhuo' le'ecpi

maye hueta'a ye ca'amegue Nasataxac,

cha'aye mashe nayeetai' cam na'a'q maye lviraxaqui Ñim Nataxala'.

₁₅Qaq huaña nache añi nala'

qataq ñi ca'agoxoic, 'o'm qome,

qaq anam huaqaañipi qaica qome ca le'eraxa.

₁₆Nache qom ivita da qaỹa'axaỹa ca lavilỹaxac Ñim Nataxala',

da chemaqteguisheguema añi qasoxonaxa Sión,

qataq da dellimigui da lavilỹaxac da huaña ye Jerusalén,

nache na piguem qataq ana 'alhua cholaxa'n qome.

Qalaxaye Ñim Nataxala', nacheñi ñim lle'eguenaxala'

qataq npaxattalec nam Israel le'ecpi maye maiche lalamaxatpi.

₁₇Huaña qome, nache qauaỹachiñi

da aỹem Nataxala' maye Qanatamnaxala'ai,

soota'a na Sión, anam ỹataqta qui'itta ñeqasoxonaxa,

nache na Jerusalén ỹataqta qui'itta qome,

qataq saishet da ỹe'eguelaxa da loxonec nam chegaqauecpi.

₁₈Nache que'eca na'a'q, na lataxa qataq na huaca lche',

'eeta'am qome na 'etaxat maye chegaqasheguema

ana qasoxonaxapi qataq anam lcomaraxalatepi,

qataq na la'auaxacpi ye Judá, nlaxagui qome na 'etaxat.

Nache añi atamnaxaqui maye ỹalamaqte

chegoqchiguiña qome na npaxaatasheguem 'etaxat,

da icorelec ye ca'amegue ye Sitín.

₁₉Nache ye Egipto ỹataqta nlachiguiñi qome,

qaq ye Edom ỹe'eguelaxa da toolec 'alhua,

souaxat da iloquiaxan co'ollaxa na Judá le'ecpi,

qataq hualec naqa'en ye na'alhua namayepi,

da icolde'c naua ltago'q nam qaica ca ỹasouaxat.

₂₀Qalaxaye ye Judá qataq ye Jerusalén,

nache 'eetai' qome da netalec nam shiỹaxauapi

qataq cam llalaqpi qome namayepi.

₂₁Qaq aỹem qome, sepalaique lvi'

som qaỹalauatpi co'ollaxa,

nache saishet da sechoxoren nam icoraxatre'c

soua ltago'q som qaica ca ỹasouaxat.

Qaq Aỹem Nataxala', nache sonaña qome ye Sión.