Josué 1

₁Qaq co'ollaq mashe ileu so Moisés, maye lamaxashec Ñim Nataxala', nache Ñim Nataxala' detaxaỹapegue' so Josué, maye llalec so Nun, maye maiche ltaua so Moisés, 'eeta':

₂«So ỹamaxashec Moisés mashe ileu, qaq ỹoqo'oye 'am nagui qojec da 'aua'axasoxoolec so tala Jordán, 'arỹa'ata 'enauac ne'ena nhuo' Israel le'ecpi da qanqo'oñiita ye 'alhua maye qami' sanema qome. ₃Qaq sepacchigui qome da ỹa'aqtac maye sanem co'ollaxa so Moisés, da Aỹem qami' sanema 'enauac ye 'alhua maye qauapiilec qome. ₄Nache qami' sanema qome ye 'alhua maye chegoqchiguiña ye toolec 'alhua, qataq aye qasoxonaxapi maye huaña ye Líbano, qataq ivitta'a so auaxai lche le'enaxat Éufrates, qataq imauec ye na'alhua ye hitiitapi, nache ivitta'a aso Auaxai Mediterráneo. ₅Qaq ỹataqta qaica qome ca ishet da 'am dataỹa'aguet qom ñaq 'anca'altauec, qataq Aỹem ỹataqta 'am soota'aguet qome, 'eeta'am ñaqa'en da sheetec da ỹataqta soota'aguet co'ollaxa so Moisés, saishet da 'am salat, ỹataqta 'am sa seỹotec. ₆Qaq ỹataqta 'ana'añaxat qome, qataq 'aua'añaxachigui ye 'arhuel, cha'aye 'am 'aỹa'anem qome yi'iye 'alhua ne'ena nhuo' le'ecpi da yaqto' lalamaxat, cha'aye sanem co'ollaxa da ỹa'aqtac som hua'au lta'alpi. ₇Qalaxaye 'am qome, ỹataqta 'ana'añaxat qataq 'aua'añaxachigui ye 'arhuel, qataq qoqueteguelo qome 'enauaque naua 'ena'ape naua iqataxaco maye 'am ỹanema co'ollaxa so ỹamaxashec Moisés. Naamaye ỹataqta 'auaỹamaxatteque qome, yaqto' 'enauac cam 'auacoolecpi da 'auo'ot ỹataqta ỹaỹamaqchiguiñi. ₈Qataq 'avi'eguelaxattalec qome da 'autaxaỹaxa'n naua nanettrañi nqataxaco. Qataq 'añi'iguelaxattrauec qome naua 'ena'ape naamaye ye na'a'q qataq ye pe, yaqto' 'auo'ot na ỹamaxasoxonaxacpi. Qaq yaqto' 'enauac ca 'auacoolecpi da 'auo'ot ỹataqta ỹaỹamaqchiguiñi. ₉Aỹem 'am samaxalec da 'ana'añaxat, qataq 'aua'añaxachigui ye 'arhuel, nache saishet qome da leuapigui 'arhuel, qataq saishet da 'auqaulleetac, cha'aye Aỹem Nataxala' maye 'Anatamnaxala', Aỹem qome nache 'eetai' da 'am soota'aguet cam 'auataigue.»

₁₀Huaña, nache so Josué ỹanem da la'aqtac 'enauac so lataxala'pi so maiche nhuo' le'ecpi, 'eeta': ₁₁«Qanqo'oñiỹa qome 'enauac nam lanataqa'pi na nhuo' le'ecpi, nache qauamaqailec de'era, 'eeta': ‹Qauqataxañiitai' 'enauac ca npe'lpi qataq cam qanallecpi. Cha'aye qom ñaq nte'etom ca lỹa na'a'q, nache sa'axasoxonaxalec qome so tala Jordán, da yaqto' sonaqalec yi'iye 'alhua maye qomi' ỹanema Ñim Nataxala' maye Qanatamnaxala' da yaqto' ỹataqta qaralamaxat.›»

₁₂Qaq so Josué nataqa'en detaxaỹapegue' so maiche nhuo' le'ecpi maye chegoxoguetpi so Rubén qataq so Gad, qataq som laỹe so maiche nhuo' le'ecpi maye chegoxoguet so Manasés, 'eeta':

₁₃«Qantooñita'aco' qome na lamaxasoxonaxacpi so Moisés, som lamaxashec Ñim Nataxala' co'ollaq 'enapec: Ñim Nataxala' maye Qanatamnaxala'ai qami' ỹanema ne'ena 'alhua da yaqto' qanmachiiuec ₁₄Qalaxaye qano'onaxachiỹañi qome ana qaramoxouaipi qataq na qaỹa'alquipi, qataq na qareloipi da hueta'a qome ne'ena 'alhua maye qami' ỹanema co'ollaxa so Moisés, maye mpa'aỹa'ategue na le'ego ye Jordán. Qalaxaye 'enauac qami' 'añaxaicpi qataq alaataxaicpi, qauacoñiỹa qome ca qaro'ogoxonaxache, nache qaua'aviita'ague da taỹa'ague na qarqaỹaipi da yaqto' qautauañi namayepi, ₁₅ivitta'a da Ñim Nataxala' ỹanem nataqa'en namayepi ca nmataqa', 'eeta'ama qami' da mashe qami' ỹanema, qataq ivitta'a da ỹataqta lalamaxat namayepi yi'iye 'alhua maye Ñim Nataxala' ỹanem qome namayepi. Huaña qome nache ishet da qañi'iguelaqaita na qana'alhuai maye mpa'aỹa'ague na nala' lliguisheguem ye tala Jordán, da yaqto' nache qoñiỹalec ne'ena 'alhua maye qami' ỹanema co'ollaxa so Moisés, som lamaxashec Ñim Nataxala'.»

₁₆Nache somayepi ỹasateguet so Josué, 'eeta':

«'Enauac nam qomi' 'auamaxaleguete so'otaq qome, qataq saxague cam qomi' 'auamaxaguelo. ₁₇Qomi' nache 'eetai' qome da 'am salaxasoxoguet, se'enaxataqtem co'ollaxa da salaxasoxoguet so Moisés. Qalaxaye 'oonolec da seỹaxanaxaua'a, da Ñim Nataxala' maye 'Anatamnaxala' ỹataqta 'am nnaictague' qome, 'eeta'am da 'eetec co'ollaq nnaictague' so Moisés. ₁₈Qaq 'enauac cam 'am dataỹa'aguet, huo'otaq cam saishet da 'am ỹalaxaguet da huo'o ca 'auamaxasoxoolec, camaye qaỹalauat qome. Qaq nacherata da 'ana'añaxat qome qataq 'aua'añaxachigui ye 'arhuel.»