Josué 14

₁Qaq 'ena na 'alhuapi maye huaña ye Canaán maye ỹaconeguet co'ollaxa da yaqto' ỹauo'o lalamaxat so Israel le'ecpi. Qaq se'eso 'alhuapi naloqnec co'ollaxa so ntaxaỹaxanaxanec Eleazar, qataq so Josué, nataqa'en so lataxala'pi na maiche nhuo' le'ecpi maye chegoxoguetpi so Israel. ₂Qaq se'eso 'alhuapi co'ollaq qoỹanec, nache qanallichigui da yaqto' qaỹaỹaten ca taalec ñi 'oonolec so nueve, qataq so 'oonolec laỹe so maiche nalamaxat nhuo' le'ecpi, nache qaipacchigui da la'aqtac Ñim Nataxala' maye ỹamaxalec co'ollaxa so Moisés. ₃Qaq so Moisés mashe nale'ena co'ollaxa ỹan ye 'alhua maye pa'aỹa'ague da nala' lliguisheguem da le'ego so tala Jordán, nache ỹami' so maiche nhuo' le'ecpi maye chegoxoguet so Rubén qataq so Gad, nataqa'en so laỹe so maiche nhuo' le'ecpi maye chegoxoguetpi so Manasés. Qalaxaye so chegoxoguetpi so Leví, saishet co'ollaxa da huo'o ca qoỹanem 'alhua. ₄Qaq so chegoxoguetpi so José, qalaq ncolaraxache co'ollaxa dos soua lpa'axaco, som chegoxoguetpi so Manasés qataq so Efraín, qaq so leviitapi qalaq qaica ca taỹot 'alhua nachaqsota so huaqta'a't nỹecpi da yaqto' naigui, qataq so no'onaxapi da yaqto' lquia'aqa' aso lalo huacapi qataq aso qaguetapi. ₅Qaq 'era da 'eetec co'ollaxa so Israel le'ecpi da naloqtenec se'eso 'alhuapi. Nache ipacchigui da la'aqtac Ñim Nataxala' maye ỹamaxalec co'ollaxa so Moisés.

₆Qaq huo'oi co'ollaxa soua chegoxogueta so Judá, da nqo'oora ye Gilgal da yaqto' na'aqtaxaneto so Josué, nache so Caleb som llalec so Yefune, so lauo' le'ec so quenezitapi, 'enapego' so Josué, 'eeta': «'Antoueeta'aco' naua la'aqtaqa Ñim Nataxala' co'ollaq 'enapega so lamaxashec Moisés, co'ollaq huaña ye Cadés Barnea, da qomi' detaqtacoto, 'am qataq aỹem. ₇Qaq aỹem mashe sevi' naua cuarenta vi'iye da ñachaalataxac, co'ollaq so Moisés maye lamaxashec Ñim Nataxala' aỹem ỹamaq. Sachegoqchiguiña ye Cadés Barnea da yaqto' ñemeenaxana ne'ena 'alhuapi, qaq co'ollaq mashe she'eguelaq, nache ỹataqta sa'aqtaxaatem somaye 'enauac na ỹataqta 'eesa ỹauanaqchecpi. ₈Qalaxaye som ñenaictague'pi co'ollaxa ỹataqta icolanaqchet so qaraỹepi, qaq aỹem qalaq ỹataqta saq saxanec Ñim Nataxala' maye Ñatamnaxala'. ₉Huaña, nache so Moisés aỹem ỹanem so la'aqtac da yaqto' qaipacchigui, 'eeta': ‹Ca 'alhuapi maye 'auapelec qome, nacheca qome ca 'aralamaxatpi, nataqa'en ca 'aỹa'alaqpi, cha'aye ỹataqta saq 'axanec Ñim Nataxala' maye Ñatamnaxala'.› ₁₀Qaq mashe inoxoorec soua cuarenta y cinco vi'iye da Ñim Nataxala' ỹa'n ne'enaua la'aqtaqa maye nasaxarec co'ollaxa so Moisés se'eso na'a'q co'ollaq ñaq coleetapeguelec ye toolec 'alhua na Israel le'ecpi. Nache ỹataqta ipacchigui de'era la'aqtac Ñimaye da aỹem qaica cara da ñachaalataxac. Qaq ỹoqo'oye nagui mashe sevi' naua ochenta y cinco vi'iye da ñachaalataxac. ₁₁Qaq ỹataqta ñaq aỹem 'añaxaic da seloqui qataq da sequeuotapigui', 'eeta'am se'eso na'a'q co'ollaq aỹem namaxa da ñemeenaxana ne'ena 'alhua so Moisés. ₁₂Qaq ỹoqo'oye nagui aỹem 'anem ne'ena 'alhua maye huaigui ana qasoxonaxapi maye aỹem ỹachaxanapeguem co'ollaxa se'eso na'a'q Ñim Nataxala'. Qataq nale'ena da 'auaỹateetac da na chegoxoguetpi so shiỹaxaua logoraic maye le'enaxat Anac netaña namaye, qataq na lalamaxat huaqta'a't nỹecpi ỹataqta qanpaxattaua'a. Qalaxaye aỹem huo'o da ñaquitaxac da Ñim Nataxala' aỹem nnaictague' qataq aỹem itaunec da yaqto' sañoxot da so'orauec yemayepi, da yaqto' ipacchigui da la'aqtac Ñimaye.»

₁₃Qaq huaña, nache so Josué talec naqa'en da no'on la'aqtac so Caleb. Ime, nache ỹanem co'ollaxa ye 'alhua Hebrón, da yaqto' ỹataqta lalamaxat naqa'en somaye qataq so llalaqpi. ₁₄Qaq 'era da 'eetec co'ollaxa da ye Hebrón, ivira'a da lalamaxat so Caleb, qataq so lalamaxat llalaqpi, nache ivitta'a nagui, cha'aye so Caleb ỹataqta saq ỹaxanec Ñim Nataxala' maye Natamnaxala' so Israel le'ecpi. ₁₅Qaq da hua'auchiguiñi le'enaxat co'ollaxa ye Hebrón, Quiriat Arbá maye naigui da «Lma' so Logoraic Shiỹaxaua», cha'aye de'era ne'enaxat Arbá, nache le'enaxat so hua'au lta'a so anaquiitapi, so shiỹaxauapi maye logoraicpi qataq 'amaqtaqaicpi.

Qaq co'ollaq ime de'era, nache 'enauac se'eso 'alhuapi huo'o da nlagaxayec.