Josué 15

₁Qaq so 'alhua maye taalec co'ollaxa so maiche nhuo' le'ecpi maye chegoxoguetpi so Judá, somaye ivira'a ye loga't ye Edom, maye pa'aỹa'ague da la'añaxa, nache ivitta'a ye toolec 'alhua ye Sin. ₂Qaq yi'iye loga't nache chegoqchiguiña na lsheenec yem pa'aỹa'ague da la'añaxa aso Auaxai Leuaxai, ₃qaq nache quetague' da pa'aỹa'ague da la'añaxa, nache ivitta'a so nqa'aic maye taỹasheguema ye le'enaxat Acrabin, qataq ỹa'axasoxoolec ye toolec 'alhua ye Sin, qataq da pa'aỹa'ague da la'añaxa ye Cadés Barnea. Ime, nache ivitta'a ye Jesrón, ime qataq tasheguemec ye Adar qataq colliiñi da taỹa'a ye Carca. ₄Qaq huaña ye Amón qataq jec, nache taỹauga so La'auaxac ye Egipto, qaq nache loga't aso Auaxai Mediterráneo. Qaq 'eso so loga'tpi so na'alhuapi maye pa'aỹa'ague da la'añaxa. ₅Qaq so loga'tpi maye pa'aỹa'ague da nala' lliguisheguem, nache tachiguiña aso Auaxai Leuaxai, nache ivitta'a ye ltogaxasom so tala Jordán. Qataq chegoqchiguiña yemaye da qaltaq taỹa'ague da pa'aỹa'ague da sheu', ₆nache taỹasheguema ye Bet Joglá qataq ỹa'axasoxoolec na pa'aỹa'ague da sheu' ye Bet Arabá, qaq chegoqchiguiña yemaye da ivira'a añi coma' maye qaỹamata'ac Boán, maye le'enaxat co'ollaxa so llalec so Rubén. ₇Huaña nache se'eso loga't chegoqchiguiña ye ca'amapega't ye Acor, nache taỹasheguema ye Debir, maye datatta ye Gilgal, qataq nalotta yem taỹasheguema ye Adumín, maye pa'aỹa'ague da la'añaxa so la'auaxac, huaña qaltaq ỹa'axasoxoolec ye huaña na npaxaatasheguem 'etaxat ye Ensemes qataq ye Roguel, ₈huaña, nache qaltaq taỹasheguema so ca'amapega't ye Ben Jinón, maye pa'aỹa'ague da la'añaxa ye taỹasheguema ye Jebús, maye nacheye ye Jerusalén, huaña nache qaltaq taỹasheguema na pa'asheguem añi qasoxonaxa maye pa'aỹa'ague da avit ye ca'amapega't ye Hinóm, qataq da pa'aỹa'ague da sheu' ye ca'amapega't ye Refayin, ₉qaq huaña nache se'eso loga't qaltaq ncoleetañi, chegoqotcheguema na pa'asheguem añi qasoxonaxa, nache qaltaq nvittaña ye huaña na npaxaatasheguem 'etaxat ye Neftoa, qataq ivitta'a ye huaqta'a't nỹecpi maye nalec añi qasoxonaxa ye Efrón, ime qaltaq ỹa'axasoxoolec ye Baalá maye nataqa'en le'enaxat Quiriat Yearin. ₁₀Qaq nache huaña ye Baalá, da se'eso loga't qaltaq ñe'eguelaxa nam pa'aỹa'ague da avit, nache ivitta'a añi qasoxonaxa ye Seír, qataq nlectelec ye Quesalón qataq nlectot na loigue añi qasoxonaxa Jearim, da yaqto' qaltaq naỹaña na npa'aguiñi ye Bet Semes qataq nlectelec ye Timná. ₁₁Ime qaltaq jec chegoqchiguiña ye pa'aỹa'ague da sheu' ye ñiguisheguem ye Ecrón, nache coleetauga ye Sicrón, qataq nlectelec añi qasoxonaxa ye Baalá, da yaqto' taỹauga ye Jabnel, nache ivittauga so loigue aso Auaxai Mediterráneo. ₁₂Qaq se'eso loga't tachiguiña ye pa'aỹa'ague da avit, maye loigue aso Auaxai Mediterráneo. Qaq 'enauac ne'ena nache loga'tpi na 'alhuapi maye taỹot so maiche nhuo' le'ecpi maye chegoxoguetpi so Judá, nache qoỹanem somayepi, ỹataqtac qanqa'en ye lcata so maiche lalamaxat llalaqpi somayepi.

₁₃So Josué nataqa'en ỹanem co'ollaxa so Caleb som llalec so Yefune, so laỹe na'alhua so maiche nhuo' le'ecpi maye chegoxoguetpi so Judá, da yaqto' qaipacchigui da lamaxasoxonaxac Ñim Nataxala', nache ỹanem ye Hebrón, maye lma' co'ollaxa som chegoxoguetpi so Anac. ₁₄Huaña, nache so Caleb ỹo'oldauec co'ollaxa soua tres chegoxogueta so Anac, som le'enaxat Sesay, Ajimán, qataq so Talmay. ₁₅Huaña qaltaq nqo'ona da iloquiaxan so netaña ye Debir, yem le'enaxat co'ollaxa da Quiriat Séfer. ₁₆Huaña, nache 'enapeco': «Cam ishet da iloquiaxan qataq loxonec ye Quiriat Séfer, nache aỹem sanem qome camaye da ỹauo'o lhua añi ỹale Acsa.»

₁₇Qaq som loxonec se'eso huaqta'a't nỹecpi nacheso so maiche lasoshec somaye, som le'enaxat Otoniel, som llalec so lqaỹa Cenaz. Nache so Caleb ỹanem co'ollaxa somaye da lhua naqa'en aso llale Acsa. ₁₈Qaq co'ollaq mashe yaqta'a da je'c soomaye, nache so Otoniel 'enapega co'ollaxa aso Acsa, 'eeta': «No'on taxa da 'auquiguiỹo'ot ñi 'arta'a da qomi' ỹanema ca laỹe 'alhua maye ishet da qoỹanaxaalec.» Nache asomaye huenoteeguesop co'ollaxa so lalo 'ashena, nache so Caleb inato' asomaye, 'eeta':

«¿Ta'ainco' 'am?»

₁₉Nache asomaye 'enapeco': «Qomye ñeshetaique da 'auauo'o ca aỹem 'aỹa'anem laỹe 'alhua, cha'aye mashe sogote da aỹem 'aỹa'anem ye 'alhua maye huaña ye toolec 'alhua ye Néguev, qalaxaye nagui no'on taxa da aỹem 'aỹa'anem nataqa'en ye 'alhua maye huaña na npaxaatasheguem 'etaxat.»

Nache somaye ỹanem co'ollaxa aso llale Acsa so 'alhua maye huaña na npaxaatasheguem 'etaxat maye naña ye qaỹoqotcheguemec 'alhua, qataq ye pa'aguiñi.

₂₀Qaq 'ena nam lalamaxat 'alhuapi nam maiche nhuo' le'ecpi maye chegoxoguetpi so Judá, qataq qanaloqchiichigui ye lcata so maiche lalamaxat llalaqpi somayepi. ₂₁Qaq som huaqta'a't nỹecpi maye ỹotta'a't naua nañalo maye taỹot somayepi, nache pa'aỹa'ague da la'añaxa ye loga't ye Edom, nache 'ena nam le'enaxatpi, 'eeta': Cabsel, Edar, Jagur, ₂₂Quiná, Dimona, Adada, ₂₃Cedes, Jazor, Itnán, ₂₄Zif, Telén, Bealot, ₂₅Jazor Jadatá, Queriot, Jesrón, qaq da lỹa le'enaxat Jazor, ₂₆Amán, Semá, Molada, ₂₇Jasar Gadá, Jesmón, Bet Pelet, ₂₈Jasar Súaj, Berseba, qataq so lauoreuapi nma'piolec, ₂₉qataq ye Baalá, Iim, Esén, ₃₀Eltolad, Quesil, Jormá, ₃₁Siclag, Madmana, Sansana, ₃₂Lebaot, Siljín qataq ye Rimón. Qaq da ima'a't se'eso huaqta'a't nỹecpi nache ivi' veintinueve ye lcata, qataq lỹaueegue' so lauoreuapi nma'piolec.

₃₃Qaq so huaqta'a't nỹecpi maye naña yem nalochiguiñi 'alhua maye taỹot somayepi, nache le'enaxat: Estaol, Sorá, Asena, ₃₄Zanoaj, Enganín, Tapuaj, Enam, ₃₅Jarmut, Adulán, Soco, Azecá, ₃₆Sagarayin, Aditayin, Gedera qataq ye Guederotayin. Nache da ima'a't se'eso huaqta'a't nỹecpi nache ivi' catorce ye lcata, qataq lỹaueegue' som lauoreuapi nma'piolec.

₃₇Qataq so huaqta'a't nỹecpi maye ỹotta'a't naua nañalo ye Senán, Jadasá, Migdal Gad, ₃₈Dileán, Mispá, Yoctel, ₃₉Laquis, Boscat, Eglón, ₄₀Cabón, Lamán, Quitlís, ₄₁Gederot, Bet Dagón, Noamá qataq ye Maceda. Nache da ima'a't se'eso huaqta'a't nỹecpi nache ivi' dieciséis ye lcata, qataq lỹaueegue' som lauoreuapi nma'piolec.

₄₂Qataq so huaqta'a't nỹecpi maye ỹotta'a't naua nañalo ye Libna, Eter, Asán, ₄₃Iftah, Asena, Nesib, ₄₄Keila, Aczib qataq ye Maresa, nache da ima'a't se'eso huaqta'a't nỹecpi, nache ivi' nueve ye lcata, qataq lỹaueegue' so lauoreuapi nma'piolec.

₄₅Nataqa'en so huaqta'a't nỹecpi ye Ecrón, qataq lỹaueegue' na lauoreuapi nma'piolec, ₄₆nache chegoqchiguiña ye Ecrón da ivittauga aso auaxai qataq 'enauac ye 'alhua maye sa qaỹapeque ye Asdod, qataq lỹaueegue' so lauoreuapi nma'piolec.

₄₇Qataq so huaqta'a't nỹecpi ye Asdod, qataq so lauoreuapi nma'piolec, nataqa'en ye Gaza qataq so lauoreuapi nma'piolec, nache ivitta'a so la'auaxac ye Egipto qataq ivira'a so loigue aso Auaxai Mediterráneo.

₄₈Qaq som huaqta'a't nỹecpi maye taỹot som chegoxoguetpi so Judá, maye hualec aye qasoxonaxapi, nache le'enaxat: Samir, Jatir, Soco ₄₉Daná, Quiriat Saná, maye da lỹa le'enaxat Debir, ₅₀Anab, Estemoa, Anim, ₅₁Gosén, Holón qataq ye Gilo, qaq da ima'a't se'eso huaqta'a't nỹecpi, nache ivi' once, qataq lỹaueegue' so lauoreuapi nma'piolec.

₅₂Qaq se'eso laỹe nỹecpi ye Arab, Duma, Esán, ₅₃Yanún, Bet Tapuaj, Afeca, ₅₄Jumetá, Quiriat Arbá, maye da lỹa le'enaxat Hebrón, qataq ye Sior, qaq da ima'a't se'eso huaqta'a't nỹecpi nache ivi' nueve ye lcata, qataq so lauoreuapi nma'piolec.

₅₅Qataq ye huaqta'a't nỹecpi ye Maón, Carmel, Zif, Yutá, ₅₆Jezrel, Jocdeán, Zanoaj, ₅₇Caín, Gabaa qataq ye Timná, qaq da ima'a't se'eso huaqta'a't nỹecpi nache ivi' diez, qataq lỹaueegue' so lauoreuapi nma'piolec.

₅₈Qataq so huaqta'a't nỹecpi ye Jaljul, Betsur, Gedor, ₅₉Marat, Bet Anot qataq ye Eltecón, qaq da ima'a't se'eso huaqta'a't nỹecpi nache ivi' seis, qataq lỹaueegue' so lauoreuapi nma'piolec.

₆₀Nataqa'en so huaqta'a't nỹecpi ye Quiriat Baal, maye lỹa le'enaxat da Quiriat Yearin, qataq ye Rabá, nache lỹaueegue' so lauoreuapi nma'piolec.

₆₁Qaq ye huaqta'a't nỹecpi maye hualec ye toolec 'alhua maye taỹot somayepi nache le'enaxat: Bet Arabá, Midín, Secocá, ₆₂qataq Nibesán, yem huaqta'a't nỹecpi maye Touesat, qataq ye Engadí, qaq da ima'a't se'eso huaqta'a't nỹecpi nache ivi' seis, qataq lỹaueegue' nataqa'en so lauoreuapi nma'piolec.

₆₃Qaq se'eso maiche nhuo' le'ecpi maye chegoxoguetpi so Judá, saishet da ỹañoxot da ỹo'orauec co'ollaxa na Jebús le'ecpi maye netaña ye Jerusalén. Qaq ỹoqo'oye nache ivitta'a nagui da lauoreuapi.