So na'alhuapi som chegoxoguetpi so Efraín qataq so Manasés
1Qaq so 'alhuapi maye taalec co'ollaxa so maiche nhuo' le'ecpi maye chegoxoguetpi so José, nache chegoqchiguiña ye pa'aỹa'ague da yo'oxoñi aso tala Jordán, yem nalotta ye huaña na npaxaatasheguem 'etaxat ye Jericó, qataq chegoqchiguiña yemaye da taỹauga ye toolec 'alhua, nache queteueegue aye qasoxonaxapi ye Jericó nache ivitta'a ye Betel. 2Qataq chegoqchiguiña ye Betel, maye da lỹa le'enaxat Luz, nache nlectelec 'enauac ye na'alhua so arquiitapi, nache ivitta'a ye Atarot. 3Ime, qataq jec nache ivira'a ye pa'aỹa'ague da avit ye na'alhua so jafletiitapi, nache ivitta'a ye loga't ye Bet Jorón maye npa'aỹañi, qataq ye Guézer, nache taỹauga aso Auaxai Mediterráneo. 4Qaq 'eso som 'alhuapi maye qoỹanem da lalamaxat so maiche nhuo' le'ecpi maye chegoxoguetpi so Manasés qataq so Efraín, som llalqa so José.
5Qaq na loga'tpi som na'alhuapi so maiche nhuo' le'ecpi maye chegoxoguetpi so Efraín, nache imattalec ye pa'aỹa'ague da yo'oxoñi ye Atarot Adar, nache ivitta'a ye pa'asheguem ye Bet Jorón. 6Qataq chegoqchiguiña yemaye, nache ivittauga aso Auaxai Mediterráneo, nache ivitta'a ye loga't maye pa'aỹa'ague da sheu' ye Micmetat. Qaq huaña yemaye qaltaq jec, nache ivira'a ye pa'aỹa'ague da yo'oxoñi, nache ivitta'a ye Tanat Siló, qataq nlectelec ye Yanoja, 7huaña qaltaq naỹaña ye Atarot, qataq ye Nará, nache ivitta'a ye Jericó qataq taỹauga so tala Jordán. 8Qataq chegoqchiguiña ye Tapuaj da qaltaq taỹa'ague da pa'aỹa'ague da avit, nache ivitta'a so la'auaxac ye Caná qataq aso Auaxai Mediterráneo. Qaq 'eso som 'alhuapi maye lalamaxat so maiche nhuo' le'ecpi maye chegoxoguetpi so Efraín, nache qanaloqchiichigui ye lcata so maiche lalamaxat llalaqpi somayepi. 9Qalaxaye nataqa'en huo'o co'ollaxa so huaqta'a't nỹecpi, qataq som lauoreuapi nma'piolec maye huaigui som na'alhua so maiche nhuo' le'ecpi maye chegoxoguetpi so Manasés, da taỹot qanqa'en so maiche nhuo' le'ecpi maye chegoxoguetpi so Efraín. 10Qalaxaye se'eso maiche nhuo' le'ecpi maye chegoxoguetpi so Efraín, saishet da ỹañoxot co'ollaxa da ỹo'orauec so Canaán le'ecpi maye netaña ye Guézer, nacherata da hua'aqta'a da nache netaña yemaye da yaqto' lauoreuapi, qalaxaye desheetenaxaatac naqa'en. Qaq nache ivitta'a nagui da na Canaán le'ecpi da netaña yemaye.
