So na'alhuapi so chegoxoguetpi so Manasés
1Qaq 'ena na 'alhuapi maye taỹot so maiche nhuo' le'ecpi maye chegoxoguetpi so Manasés, som ỹe llalec so José. Qaq so Maquir som ỹale maye ỹataqta alaataxaic, som llalec ỹe so Manasés, somaye nache lta'a so Galaad, qaq somaye taỹot ye 'alhua Galaad, qataq ye Basán maye pa'aỹa'ague da nala' lliguisheguem so tala Jordán. 2Nataqa'en qanallichigui so 'alhua da yaqto' taỹot qanqa'en so laỹepi llalaqpi so Manasés, nache qanaloqchiichigui ye lcata so maiche lalamaxat llalaqpi somayepi, som: Abiezer, Hélec, Asriel, Siquén, Jéfer qataq so Semida, maye nataqa'en llalqa so Manasés qataq maiche laua'alle so José.
3Qalaxaye so Selofhad, som llalec so Jéfer maye laual so Galaad som llalec so Maquir, maye laual so Manasés, somaye qaica ca llalec ỹale co'ollaxa, nachaqsouate' soua cinco llalel 'alol. Qaq naua le'enaqa'ate soomaye Mahlá, Noá, Hoglá, Milcá qataq aso Tirsa. 4Qaq soomaye nqo'oora co'ollaxa so ntaxaỹaxanaxanec Eleazar, qataq so Josué, nataqa'en so lataxala'pi so maiche nalamaxat nhuo' le'ecpi nache, 'eeta': «Ñim Nataxala' ỹamaxalec co'ollaxa so Moisés da nataqa'en qomi' 'alol, qaỹauo'o qome ca qomi' qoỹanema 'alhua, 'eeta'am da 'eetec da qoỹanem na qarqaỹañicpi.» Huaña, nache so Josué ỹanema soomaye so 'alhua, da 'eeta'am naqa'en so lauo' le'ecpi so lta'a soomaye, da yaqto' ipacchigui da lamaxasoxonaxac Ñim Nataxala'.
5Qaq 'era da 'eetec so maiche nhuo' le'ecpi maye chegoxoguetpi so Manasés, da qoỹanema soua diez 'aleu', nataqa'en ye 'alhua Galaad qataq ye Basán, maye pa'aira'ague da yo'oxoñi ye Jordán, 6cha'aye soua llalel so Manasés, nataqa'en qoỹanema so na'alhua, 'eeta'am qanqa'en da 'eetec so ỹalleppi. Qaq ye 'alhua Galaad mashe qoỹanem co'ollaxa som laỹepi chegoxoguetpi so Manasés. 7Qaq so na'alhuapi so maiche nhuo' le'ecpi maye chegoxoguetpi so Manasés, nache chegoqchiguiña ye Aser, nache ivitta'a ye Micmetat, maye datatta ye Siquén, nache qaltaq jec, nache ivitta'a ye pa'aỹa'ague da la'añaxa, nache ivitta'a ye huaña na npaxaatasheguem 'etaxat ye Tapuaj. 8Qaq yi'iye 'alhuapi ye Tapuaj, yemaye lalamaxat co'ollaxa so chegoxoguetpi so Manasés. Qaq ye huaqta'a't nỹecpi ye Tapuaj maye huaqta'ai' so loga't ye na'alhua so chegoxoguetpi so Manasés, yemaye lalamaxat co'ollaxa so chegoxoguetpi so Efraín. 9Qaq so loga't ye na'alhuapi so chegoxoguetpi so Manasés, nache naỹaña ye pa'aỹa'ague da la'añaxa so la'auaxac ye Caná, qaq se'eso huaqta'a't nỹecpi maye lalamaxat so Efraín nache ỹalectaigui so huaqta'a't nỹecpi maye lalamaxat so Manasés, qaq na'aictaxa co'ollaxa da so loga't ye na'alhua som chegoxoguetpi so Manasés chegoqchiguiña so pa'aỹa'ague da avit so la'auaxac maye taỹauga aso Auaxai Mediterráneo. 10Nache so na'alhua som chegoxoguetpi so Efraín, pa'aỹa'ague da la'añaxa se'eso la'auaxac, qaq so na'alhuapi som chegoxoguetpi so Manasés, nache pa'aỹa'ague da sheu'. Qaq so loga't so na'alhuapi somaye, nache tachiguiña so loigue aso Auaxai Mediterráneo, qataq ivira'a so loga't so na'alhuapi som chegoxoguetpi so Aser maye pa'aỹa'ague da sheu', qataq pa'aỹa'ague da nala' lliguisheguem so na'alhuapi som chegoxoguetpi so Isacar. 11Nache som chegoxoguetpi so Manasés nataqa'en huo'o co'ollaxa so taỹot huaqta'a't nỹecpi maye huaigui ye na'alhua som chegoxoguetpi so Isacar, qataq som huaqta'a't nỹecpi maye huaigui ye na'alhua som chegoxoguetpi so Aser, nache lỹaueegue' so lauoreuapi nma'piolec: ye Bet Seán, Ibleam, Dor, Endor, Taanac, qataq Meguido qataq soua tres lcomaraxalate. 12Qalaxaye so maiche nhuo' le'ecpi maye chegoxoguetpi so Manasés saishet co'ollaxa da naigui se'eso huaqta'a't nỹecpi, cha'aye sa ỹañoxot da ỹo'orauec so Canaán le'ecpi, ỹoqo'oye somayepi nache netaigui se'eso huaqta'a't nỹecpi. 13Qalaxaye co'ollaq mashe 'añaxaicpi so Israel le'ecpi, nache choche desheetenaxaatac naqa'en se'eso Canaán le'ecpi, qalaxaye saishet da ỹo'orauec.
So chegoxoguetpi so José iỹaxaneua'a da qoỹanem ca laỹe 'alhua
14Qaq so maiche nhuo' le'ecpi maye chegoxoguetpi so José, 'enapega co'ollaxa so Josué, 'eeta':
«¿Ta'ainco' da qomi' 'aỹa'anema ye 'oonolec laỹe ne'ena 'alhuapi ye qomi' qalota, qataq Ñim Nataxala' mashe qomi' taleguete naqa'en co'ollaxa so no'on la'aqtac?»
15Nache so Josué ỹasategueto' somayepi, 'eeta':
«Hua', cha'aye qoñiỹapec da ỹataqta qami' qalota, nache sa qanaloilec ye 'alhua maye hualec aye qasoxonaxapi ye Efraín, qaq ỹoqo'oye qanqo'oñiỹa qome ye aviaqpi maye huaigui ye na'alhua ye ferezeopi qataq ye refaiitapi.»
16Nache somayepi 'enapeco':
«Aja', 'eesa da sa ñaloxolec ayem qasoxonaxapi. Qalaxaye ye Canaán le'ecpi maye netalec ye nalochiguiñi 'alhua, yemayepi huo'o aye nalaataxaquipi laigona lcat, qataq nache 'ena'am ye netaña ye Bet Seán, qataq ye lauoreuapi nma'piolec, qataq yem naña ye ca'amapega't ye Jezrel.»
17Qaq 'era da 'eetec so Josué da ỹasateguet som chegoxoguetpi so José, maye maiche nhuo' le'ecpi maye chegoxogueta soua Efraín qataq so Manasés, nache 'eeta':
«Aja', qami' ỹoqta 'eesa da qami' qalota qataq ỹataqta qami' 'añaxaicpi, ỹoqo'oye saishet da qami' taỹoto catai' laỹolec yi'iye 'alhuapi, 18nacherata da qami' taỹoto 'enauac aye qasoxonaxapi maye imattalec ye aviaqpi da yaqto' qaralamaxache, nache qauqopitaxañiỹapec da qano'onaxacheelec. Qaq yem Canaán le'ecpi qalaq qauo'oyiỹauec qome, na'aictaxa da ỹataqta 'añaxaicpi qataq huo'o aye nalaataxaquipi laigonapi lcat.»
