Josué 19

₁Qaq so lỹa 'alhua maye qanallichigui co'ollaxa, nache taalec so llalaqpi so maiche nhuo' le'ecpi maye chegoxoguetpi so Simeón. Qaq se'eso 'alhuapi nache huaigui so 'alhua maye lalamaxat so maiche nhuo' le'ecpi maye chegoxoguetpi so Judá, ₂qaq somaye nache naña so huaqta'a't nỹecpi, Berseba, Sebá, Molada, ₃Jasar Súaj, Balá, Esén, ₄Eltolad, Betul, Jormá, ₅Siclag, Bet Marcabot, Jasar Susá, ₆Bet Lebaot qataq ye Sarujén. Nache da ima'a't se'eso huaqta'a't nỹecpi maye ỹotta'a't naua nañalo, nache ivi' trece, qataq lỹaueegue' so lauoreuapi nma'piolec. ₇Qaq nataqa'en taỹot co'ollaxa somayepi so huaqta'a't nỹecpi ye Rimón, Eter qataq ye Asán, nache da ima'a't se'eso huaqta'a't nỹecpi maye ỹotta'a't naua nañalo, nache ivi' cuatro, qataq lỹaueegue' so lauoreuapi nma'piolec, ₈nache nataqa'en 'enauac so nma'piolec maye nañapi som saqaỹape ye Baalat Ber, maye nacheye ye Ramat, maye huaigui ye Néguev. Qaq 'eso som 'alhuapi maye taỹot da lalamaxat qanqa'en so llalaqpi so maiche nhuo' le'ecpi maye chegoxoguetpi so Simeón. ₉Qaq cha'aye so maiche nhuo' le'ecpi maye chegoxoguetpi so Judá, ỹataqta lta'araic so lalamaxat 'alhua, ỹoqo'oye som chegoxoguetpi so Simeón, qoỹanem so laỹe 'alhua maye huaigui so na'alhua som chegoxoguetpi so Judá.

₁₀Qaq so lỹa 'alhua maye qanallichigui co'ollaxa, nache taalec so llalaqpi so maiche nhuo' le'ecpi maye chegoxoguetpi so Zabulón. Qaq so loga't se'eso 'alhuapi nache ivira'a ye Sarid, ₁₁qaq nache queta, taỹa'ague da pa'aỹa'ague da avit, nache ivitta'a ye Marala, qataq ye Dabeset, nache loga't so la'auaxac maye nalotta ye Jocneán. ₁₂Qaq huaña ye Sarid, nache qaltaq taigue da pa'aỹa'ague da nala' lliguisheguem, nache ivitta'a ye Quislot Tabor, huaña yemaye nache taỹauga ye Daberat, nache qaltaq taỹasheguema ye Jafía. ₁₃Qataq chegoqchiguiña yemaye da qaltaq jec se'eso loga't, nlectot so loigue maye pa'aỹa'ague da yo'oxoñi ye Gat Jéfer, qataq ye Itacasín nache ivitta'a ye Rimón, co'ollaq ime da coleesop ye Neá. ₁₄Qaq so loga't maye pa'aỹa'ague da sheu' se'eso 'alhuapi nache ncoleetaua'a ye Janatón nache ivittauga so ca'amapega't ye Yeftajel. ₁₅Qaq 'eso so doce huaqta'a't nỹecpi maye ỹotta'a't naua nañalo, qataq so lauoreuapi nma'piolec maye huaigui se'eso 'alhua, nache ỹalectauo ye: Catat, Nalal, Simerón, Idala qataq ye Belén. ₁₆Qaq 'eso so 'alhuapi maye taỹot da lalamaxat qanqa'en co'ollaxa so llalaqpi so maiche nhuo' le'ecpi maye chegoxoguetpi so Zabulón, qataq so huaqta'a't nỹecpi maye ỹotta'a't naua nañalo, qataq lỹaueegue' so lauoreuapi nma'piolec.

₁₇Qaq so lỹa 'alhua maye qanallichigui co'ollaxa, nache taalec so llalaqpi so maiche nhuo' le'ecpi maye chegoxoguetpi so Isacar. ₁₈Qaq se'eso 'alhuapi, nache lỹaueegue' som huaiguipi huaqta'a't nỹecpi: Jezrel, Quesulot, Sumen, ₁₉Jafarayin, Sijón, Anajarat, ₂₀Rabit, Quisión, Ebes, ₂₁Remet, Enganín, Enadá qataq ye Bet Pasés. ₂₂Qaq naua loga'te, nache ivira'a añi qasoxonaxa Tabor, qataq ye Sajazimá qataq ye Bet Semes, nache loga't so tala Jordán. Nache da ima'a't se'eso huaqta'a't nỹecpi nache ivi' dieciséis, qataq lỹaueegue' so lauoreuapi nma'piolec. ₂₃Qaq 'eso so 'alhuapi maye taỹot co'ollaxa so llalaqpi so maiche nhuo' le'ecpi maye chegoxoguetpi so Isacar, qataq so huaqta'a't nỹecpi, qataq so lauoreuapi nma'piolec.

₂₄Qaq so lỹa 'alhua maye qanallichigui co'ollaxa nache taalec so llalaqpi so maiche nhuo' le'ecpi maye chegoxoguetpi so Aser, ₂₅qataq lỹaueegue' so huaqta'a't nỹecpi ye: Jelcat, Jalí, Betén, Acsaf, ₂₆Alamelec, Amad qataq ye Misal. Qaq so loga't se'eso 'alhuapi, nache ivitta'a añi qasoxonaxa Carmelo maye pa'aỹa'ague da avit qataq ye Sijor Libnat. ₂₇Qaq so loga't maye pa'aỹa'ague da nala' lliguisheguem, nache taỹa'ague da pa'aỹa'ague da sheu', nache ivitta'a ye Bet Dagón, qataq ivira'a ye loga't ye na'alhua so maiche nhuo' le'ecpi maye chegoxoguetpi so Zabulón, qataq ye ca'amapega't ye Yeftajel, Bet Émec qataq ye Neyel, nache napacalec ye Cabul. ₂₈Qaq nache imattalec ye 'alhua ye Abdón, Rejob, Hamón qataq ye Caná, nache ivitta'a so 'amaqtaqaic huaqta'a't nỹecpi ye Sidón. ₂₉Qaq huaña yemaye da se'eso loga't qaltaq ncoleetaua'a ye Ramá, qataq ivitta'a ye Tiro yem huaqta'a't nỹecpi maye ỹataqta sa nsattec na lpaqtaxat, ime qaltaq jec da taỹa'a ye Josá, nache taỹauga aso Auaxai Mediterráneo. Nache qotteguet ye Mahaleb, Aczib, ₃₀Uma, Afec qataq ye Rejob. Nache da ima'a't se'eso huaqta'a't nỹecpi maye ỹotta'a't naua nañalo, nache ivi' veintidós, lỹaueegue' so lauoreuapi nma'piolec. ₃₁Qaq 'eso so 'alhuapi, maye taỹot da lalamaxat qanqa'en so llalaqpi so maiche nhuo' le'ecpi maye chegoxoguetpi so Aser.

₃₂Qaq so lỹa 'alhua maye qanallichigui co'ollaxa, nache taalec so llalaqpi so maiche nhuo' le'ecpi maye chegoxoguetpi so Neftalí. ₃₃Qaq se'eso 'alhuapi nache chegoqchiguiña ye Jélef, Elón Sananín, Adami Néguev qataq ye Jabnel, nache ivitta'a ye Lacún, qataq ivittaxaama so Jordán. ₃₄Qaq so loga't maye taỹa'ague da avit nache taỹa'a ye Aznot Tabor, ime nache taỹa'a ye Jucoc, qaq nache ivira'a da pa'aỹa'ague da la'añaxa, yem na'alhuapi so maiche nhuo' le'ecpi maye chegoxoguetpi so Zabulón, qaq so pa'aỹa'ague da avit nache ivira'a ye na'alhua so chegoxoguetpi so Aser. Qaq so tala Jordán nache pa'aỹa'ague da nala' lliguisheguem. ₃₅Qaq so huaqta'a't nỹecpi maye sa nsattec so lpaqtaxatpi maye taỹot co'ollaxa somayepi, nache le'enaxat: Sidín, Ser, Jamat, Racat, Quinéret, ₃₆nataqa'en ye Adama, Ramá, Jazor, ₃₇Cedes, Edrey, Enjazor, ₃₈Irón, Migdal El, Horem, Bet Anat qataq ye Bet Semes. Nache da ima'a't se'eso huaqta'a't nỹecpi maye ỹotta'a't naua nañalo, nache ivi' diecinueve, qataq lỹaueegue' so lauoreuapi nma'piolec. ₃₉Qaq 'eso so 'alhuapi qataq som huaqta'a't nỹecpi, lỹaueegue' so lauoreuapi nma'piolec, maye taỹot da lalamaxat qanqa'en so llalaqpi so maiche nhuo' le'ecpi maye chegoxoguetpi so Neftalí.

₄₀Qaq so lỹa 'alhua maye pa'atec da qanallichigui co'ollaxa nache taalec so llalaqpi so maiche nhuo' le'ecpi maye chegoxoguetpi so Dan. ₄₁Qaq se'eso 'alhua nache huaigui so huaqta'a't nỹecpi: Sora, Estaol, Ir Semes, ₄₂Sagalbín, Ayalón, Jetla, ₄₃Elón, Timnat, Ecrón, ₄₄Elteque, Guibetón, Baalat, ₄₅Jehúd, Bené Berac, Gat Rimón, ₄₆Mejarcón qataq ye Racón, nataqa'en so 'alhuapi maye nalotta ye Jope. ₄₇Qalaxaye so maiche nhuo' le'ecpi maye chegoxoguetpi so Dan, ila'a da sa nalolec co'ollaxa se'eso 'alhua, nache nqo'ona da iloquiaxan so huaqta'a't nỹecpi ye Lesén, nache ỹacona da yaqto' lalamaxat, co'ollaq ime da ỹalauat 'enauac so netaigui se'eso huaqta'a't nỹecpi. Huaña nache so chegoxoguetpi so Dan, naigui se'eso huaqta'a't nỹecpi nache naralaxat da le'enaxat, ỹanagui da Dan, cha'aye nachera da le'enaxat so hua'au lta'a somayepi. ₄₈Qaq 'eso so 'alhuapi maye taỹot da lalamaxat qanqa'en so llalaqpi so maiche nhuo' le'ecpi maye chegoxoguetpi so Dan, qataq lỹaueegue' nataqa'en so huaqta'a't nỹecpi, qataq so lauoreuapi nma'piolec.

₄₉Qaq so Israel le'ecpi co'ollaq mashe ime da naloqnec se'eso 'alhuapi, maye taỹot ñi 'oonolec se'eso maiche nalamaxat nhuo' le'ecpi, nache somayepi ỹanem nataqa'en so Josué, so 'alhua maye ỹalectaigui so na'alhuapi so laỹepi. ₅₀Qaq nache qaipacchigui da lamaxasoxonaxac co'ollaxa Ñim Nataxala', nache qoỹanem so huaqta'a't nỹecpi ye Timnat Seraj, maye hualec aye qasoxonaxapi maye huaña ye Efraín, maye nacheye yem iỹaxaneua'a co'ollaxa so Josué. Nache so Josué ỹe'eguelaxalec da no'oxoosheguem se'eso huaqta'a't nỹecpi, ime nache naigui co'ollaxa somaye.

₅₁Qaq 'eso so 'alhuapi maye so ntaxaỹaxanaxanec Eleazar, Josué qataq so lataxala'pi so nhuo' le'ecpi ỹo'ot da qanallichigui co'ollaxa, da taỹot qanqa'en ñi 'oonolec se'eso maiche nalamaxat nhuo' Israel le'ecpi, ỹauaachigui qanqa'en Ñim Nataxala', huaña so ñegueuo som npe'l maye huañacnaxa da qanauane' Ñimaye maye naña ye Silo. Qaq huaña co'ollaxa nache ỹataqta nalotec da qoỹanec se'eso 'alhua.