So huaqta'a't nỹecpi maye lalamaxat so leviitapi
1Qaq som lataxala'pi so maiche nhuo' le'ecpi maye chegoxoguetpi so Leví, nqo'ona co'ollaxa ye Silo, maye huaigui ye 'alhua Canaán da yaqto' detaxaỹapegue' so ntaxaỹaxanaxanec Eleazar, Josué, qataq so lataxala'pi so maiche nalamaxat nhuo' Israel le'ecpi, nache se'eso lataxala'pi som chegoxoguetpi so Leví, 'eeta': 2«Ñim Nataxala', ỹamaxalec co'ollaxa so Moisés da qomi' ỹanema ca huaqta'a't nỹecpi da yaqto' sonaqaigui, qataq ca qano'onaxapi maye lquia'aqa' nam qana'atetpi.» 3Huaña, nache so Israel le'ecpi huo'o som ỹanem so leviitapi som maiche lalamaxat huaqta'a't nỹecpi maye ỹotta'a't naua nañalo, qataq lỹaueegue' naqa'en so no'onaxapi da yaqto' lquia'aqa' so na'atetpi, nache qaipacchigui da lamaxasoxonaxac Ñim Nataxala'.
4Qaq so hua'auchiguiñi qanallichigui huaqta'a't nỹecpi maye taỹot so leviitapi, nache taalec so chegoxoguetpi so Quehat. Qaq se'eso quehatiitapi nache chegoxoguetpi so ntaxaỹaxanaxanec Aarón, nache somayepi taalec so trece som huaqta'a't nỹecpi maye ỹotta'a't naua nañalo, maye lalamaxatpi co'ollaxa so maiche nhuo' le'ecpi maye chegoxoguetpi so Judá, Simeón qataq so Benjamín. 5Qaq so laỹe quehatiitapi, nache taỹot co'ollaxa soua diez huaqta'a't nỹecpi maye ỹotta'a't naua nañalo, maye huaigui so na'alhuapi so chegoxoguetpi so Efraín qataq so Dan, qataq som laỹe so maiche nhuo' le'ecpi maye chegoxoguetpi so Manasés. 6Qaq co'ollaq ime de'era nache so lalamaxat llalaqpi so Guersón, taalec da taỹot so trece so huaqta'a't nỹecpi, maye lalamaxatpi co'ollaxa so maiche nhuo' le'ecpi maye chegoxoguetpi so Isacar, Aser, qataq so Neftalí, qataq som laỹe na maiche nhuo' le'ecpi maye chegoxoguetpi so Manasés, maye naña co'ollaxa ye Basán. 7Qaq so laỹe leviitapi maye lalamaxat llalaqpi so Merari, nache taalec co'ollaxa so doce huaqta'a't nỹecpi maye ỹotta'a't naua nañalo maye lalamaxatpi co'ollaxa so maiche nhuo' le'ecpi maye chegoxoguetpi so Rubén, Gad, qataq so Zabulón.
8Qaq 'era da 'eetec co'ollaxa so Israel le'ecpi da ỹanem so leviitapi so huaqta'a't nỹecpi, lỹaueegue' naqa'en so no'onaxapi maye lquia'aqa' na 'atetpi, nache ipacchigui qanqa'en da lamaxasoxonaxac Ñim Nataxala' co'ollaq ỹamaxalec so Moisés. 9Qaq se'eso huaqta'a't nỹecpi maye ỹotta'a't naua nañalo maye qoỹettañi na le'enaxatpi, nacheso som ỹanecpi co'ollaxa so chegoxoguetpi so Judá qataq so Simeón, 10maye taỹot co'ollaxa so leviitapi maye llalaqpi so Quehat, maye chegoxoguetpi so Aarón, cha'aye nacheso som hua'auchiguiñi da taalec som qanallichiguipi co'ollaxa. 11Qaq so 'alhuapi maye huaña aye qasoxonaxapi maye lalamaxatpi so chegoxoguetpi so Judá, nache qoỹanec ye Hebrón, yem hua'auchiguiñi lma' co'ollaxa som chegoxoguetpi so shiỹaxaua logoraic le'enaxat Anac, qataq lỹaueegue' so no'onaxapi maye lquia'aqa' na 'atetpi. 12Qalaxaye som no'onaxapi lta'araicpi maye ỹasattalec, qataq som lauoreuapi nma'piolec se'eso huaqta'a't nỹecpi, nache mashe qoỹanem co'ollaxa da lalamaxat qanqa'en so Caleb, som llalec so Yefune.
13Qalaxaye saishet da nacheyeta ye Hebrón, yem huaqta'a't nỹecpi maye lle'eguenaqa' cam ilamaxata'a da ỹalauat ca lỹa, cha'aye nataqa'en qoỹanem so chegoxoguetpi so ntaxaỹaxanaxanec Aarón, som huaqta'a't nỹecpi ye Libna, 14Jatir, Estemoa, 15Holón, Debir, 16Ayin, Yutá qataq ye Bet Semes. Qaq se'eso nueve huaqta'a't nỹecpi maye ỹotta'a't naua nañalo, nache huo'o so maiche lalamaxatpi no'onaxapi maye lquia'aqa' so 'atetpi. 17Qaq so maiche nalamaxat nhuo' le'ecpi maye chegoxoguetpi so Benjamín, nache ỹanec ye Gabaón, Geba, 18Anatot qataq ye Almón, qaq nache ivi' cuatro se'eso huaqta'a't nỹecpi maye ỹotta'a't naua nañalo, qataq lỹaueegue' so no'onaxapi maye lquia'aqa' na 'atetpi. 19Qaq da ima'a't se'eso huaqta'a't nỹecpi maye taỹot co'ollaxa som ntaxaỹaxanaxanecpi maye chegoxoguetpi so Aarón, nache ivi' trece qataq ñi 'oonolec nache lỹaueegue' so no'onaxapi maye lquia'aqa' na 'atetpi.
20Qaq so laỹe leviitapi maye chegoxoguetpi so Quehat, somayepi taỹot co'ollaxa so huaqta'a't nỹecpi maye huaigui ye na'alhua so maiche nhuo' le'ecpi maye chegoxoguetpi so Efraín. 21Qaq som hualecpi aye qasoxonaxapi ye Efraín, nache qoỹanem ye Siquén, yem huaqta'a't nỹecpi maye lle'eguenaqa' da huo'o ca dalaataxan, qataq ye Guézer, 22Quibsayin qataq ye Bet Jorón, nache ivi' cuatro co'ollaxa se'eso huaqta'a't nỹecpi maye ỹotta'a't naua nañalo, qataq lỹaueegue' so no'onaxapi maye lquia'aqa' na 'atetpi. 23Qaq na maiche nhuo' le'ecpi maye chegoxoguetpi so Dan, nache ỹanem co'ollaxa namayepi ye Elteque, Guibetón, 24Ayalón qataq ye Gat Rimón. Nache ivi' cuatro ne'ena huaqta'a't nỹecpi maye ỹotta'a't naua nañalo, qataq lỹaueegue' na no'onaxapi maye lquia'aqa' na 'atetpi, 25qaq so laỹe so maiche nhuo' le'ecpi maye chegoxoguetpi so Manasés, ỹanem somayepi soua dos huaqta'a't nỹecpi ye Tanac qataq ye Gat Rimón qataq lỹaueegue' so no'onaxapi maye lquia'aqa' na 'atetpi, 26qaq da ima'a't se'eso lalamaxatpi huaqta'a't nỹecpi se'eso quehatiitapi, nache ivi' diez, qataq lỹaueegue' so no'onaxapi maye lquia'aqa' na na'atetpi.
27Qaq so leviitapi maye chegoxoguetpi so Guersón, nache qoỹanema soua dos huaqta'a't nỹecpi maye ỹottecache naua nañalo, qataq lỹaueegue' so no'onaxapi maye lquia'aqa' na 'atetpi, maye lalamaxat co'ollaxa som laỹe so maiche nhuo' le'ecpi maye chegoxoguetpi so Manasés, yem Golán maye netaigui ye 'alhua Basán, da yaqto' qaỹauo'o lle'eguenaqa' da huo'o ca ilamaxata'a da ỹalauat ca lỹa, qataq ye Besterá. 28Qaq so maiche nhuo' le'ecpi maye chegoxoguetpi so Isacar, ỹanem somayepi ye Quisión, Daberat, 29Jarmut qataq ye Enganín. Nache ivi' cuatro se'eso huaqta'a't nỹecpi maye ỹotta'a't naua nañalo, qataq lỹaueegue' so no'onaxapi maye lquia'aqa' na 'atetpi. 30Qaq so maiche nhuo' le'ecpi maye chegoxoguetpi so Aser, nache ỹanem somayepi ye Misael, Abdón, 31Jelcat qataq ye Rejob. Nache ivi' cuatro se'eso huaqta'a't nỹecpi maye ỹotta'a't naua nañalo, qataq lỹaueegue' so no'onaxapi maye lquia'aqa' na 'atetpi. 32Qaq so maiche nhuo' le'ecpi maye chegoxoguetpi so Neftalí, nataqa'en ỹaarec soua tres som huaqta'a't nỹecpi, qataq lỹaueegue' so no'onaxapi maye lquia'aqa' na 'atetpi, yem: Cedes, maye huaigui ye 'alhua Galilea, da yaqto' qaỹauo'o lle'eguenaqa' da huo'o ca ilamaxata'a da ỹalauat ca lỹa, qataq ye Jamot Dor qataq ye Cartán, 33qaq da ima'a't se'eso huaqta'a't nỹecpi maye ỹotta'a't naua nañalo, maye taỹot co'ollaxa so guersonitapi nache ivi' trece, qataq lỹaueegue' so no'onaxapi maye lquia'aqa' na 'atetpi.
34Qaq som no'onañi laỹe leviitapi maye chegoxoguetpi so Merari, nache taỹot qanqa'en so lalamaxat co'ollaxa so chegoxoguetpi so Zabulón, som huaqta'a't nỹecpi ye: Jocneán, Carta, 35Dimna qataq ye Nalal, nache ivi' cuatro se'eso huaqta'a't nỹecpi maye ỹotta'a't naua nañalo, qataq lỹaueegue' so no'onaxapi maye lquia'aqa' na 'atetpi. 36Qaq so maiche nhuo' le'ecpi maye chegoxoguetpi so Rubén, nataqa'en ỹanem somayepi ye Beser, Yahás, 37Cademot qataq ye Mefagat, nache ivi' cuatro se'eso huaqta'a't nỹecpi maye ỹotta'a't naua nañalo, qataq lỹaueegue' so no'onaxapi maye lquia'aqa' na 'atetpi. 38Qaq so maiche nhuo' le'ecpi maye chegoxoguetpi so Gad, nataqa'en ỹanec ye Ramot maye huaigui ye 'alhua Galaad, da yaqto' qaỹauo'o lle'eguenaqa' da huo'o ca ilamaxata'a da ỹalauat ca lỹa, qataq ye Majanayin, 39Jesbón qataq ye Jazer. Nache ivi' cuatro se'eso huaqta'a't nỹecpi maye ỹotta'a't naua nañalo, lỹaueegue' so no'onaxapi maye lquia'aqa' na 'atetpi, 40qaq da ima'a't se'eso huaqta'a't nỹecpi, maye taỹot som chegoxoguetpi so Merari, maye ñaq saxanaxa da huo'o ca qoỹanem co'ollaxa, nache ivi' doce so taỹotpi.
41Qaq se'eso huaqta'a't nỹecpi maye ỹotta'a't naua nañalo maye qoỹanem da lalamaxat so leviitapi, maye huaigui so na'alhuapi so Israel le'ecpi, nache ivi' cuarenta y ocho da ima'a't, qataq lỹaueegue' so no'onaxapi maye lquia'aqa' na 'atetpi, 42maye huaña som sa qaỹapeque ñi 'oonolec se'eso huaqta'a't nỹecpi. Qaq nache 'eeta'ac de'era 'enauac se'eso huaqta'a't nỹecpi.
Ñim Nataxala' ipacchigui da ỹan la'aqtac
43Qaq 'era da 'eetec Ñim Nataxala' da ỹanem co'ollaxa so Israel le'ecpi 'enauac se'eso 'alhuapi, maye ỹachaxanapecot co'ollaxa so hua'au lta'alpi, huaña nache so Israel le'ecpi nalec co'ollaxa se'eso 'alhuapi. 44Nache Ñim Nataxala' ipacchigui so ỹan la'aqtac maye ỹachaxanapeguem co'ollaxa so hua'au lta'alpi somayepi. Huaña, nache huo'o da nlagaxayec 'enauac se'eso 'alhuapi maye qanayeetalec. Nache so mpa'aguenaxauapi na Israel le'ecpi, saishet da ỹañoxot da dataỹa'aguet somayepi, cha'aye Ñim Nataxala' ỹanem da loxonec co'ollaxa somayepi. 45Nache Ñim Nataxala', ỹataqta saishet da chochaq 'oonolec ca sa ipaguelec da ỹo'ot 'enauac nam no'on ỹachaxanapeguem co'ollaxa so Israel le'ecpi.
