Da lle'eguelaxasoxoc so chegoxoguetpi so Rubén, Gad qataq so laỹe som chegoxoguetpi so Manasés
1Qaq huaña, co'ollaxa nache so Josué iỹaxaneuga so maiche nhuo' le'ecpi maye chegoxoguetpi so Rubén qataq so Gad, qataq so laỹe so maiche nhuo' le'ecpi maye chegoxoguetpi so Manasés, 2nache 'enapega, 'eeta': «Qami', ỹataqta qaupaquiichigui 'enauac na lamaxasoxonaxacpi so Moisés, maye lamaxashec Ñim Nataxala', qataq ỹataqta qaualaqaiguet 'enauac nam qami' samaxaleguete. 3Qaq nache 'enauaque se'esoua na'axa'te da saishet da qaualache na qarqaỹaipi, nache ivitta'a nagui, qataq ỹataqta qaupaquiichigui da qaualaqaiguet 'enauac na lamaxasoxonaxacpi Ñim Nataxala' maye Qanatamnaxala'ai. 4Qaq nagui Ñimaye ipacchigui da ỹan la'aqtac co'ollaxa, qataq nam qarqaỹaipi mashe huo'o da l-lagaxayec, qaq ỹoqo'oye nagui qavi'iguelaqaiỹalo qome naua qaranataqa'achilli' qataq ye qana'alhuai maye pa'aỹa'ague da yo'oxoñi so tala Jordán, maye qami' ỹanema co'ollaxa so Moisés, maye lamaxashec Ñim Nataxala'. 5Qalaxaye nacherata da qami' seqaaleguete da ỹataqta qaupaquiichiguilo qome 'enauaque naua 'ena'ape naua namaxasoxonaxaco qataq naua nqataxaco, maye qami' ỹanema so Moisés, maye lamaxashec Ñim Nataxala' maye 'eeta': Ỹataqta qauauochec Ñim Nataxala' maye Qanatamnaxala'ai, qataq nache 'eetai' qome da qoquiiteguelo naua lleco Ñimaye, qataq da qaualaqaigueta naua lamaxasoxonaxaco, qaq nacheñita qome da qoquiitegue, qataq ỹataqta qaumachiỹo'ot da qarquiyaqteỹaxaqui, qataq da qanachaalataxaqui da qauo'onataxañiitacot Ñimaye.»
6Qaq co'ollaq ime de'era, nache so Josué, ỹanem da lqouagaxanaqtaic somayepi, huaña nache nquine', nache somayepi ỹe'eguelaxa so lma'pi.
7Qaq so 'oonolec laỹe se'eso maiche nhuo' le'ecpi maye chegoxoguetpi so Manasés, so Moisés ỹanem co'ollaxa so 'alhua maye huaigui ye 'alhua ye Basán. Qaq so lỹa laỹe se'eso maiche nhuo' le'ecpi maye chegoxoguet so Manasés, so Josué ỹanem so na'alhua maye ỹalectaigui so na'alhuapi so Israel le'ecpi, maye pa'aỹa'ague da avit so Jordán. Nache so hua'auchiguiñi se'eso nhuo' le'ecpi ỹanem da lqouagaxanaqtaic, nache ỹamaq da ỹe'eguelaq. 8Nache 'enapega, 'eeta': «Qami' nagui qavi'iguelaqaiỹa ye qana'alhuai, qalaxaye qauacheetec da lta'araic qarsallaqai, qataq na qalota qareloipi, qataq na oro, plata, bronce, qataq na laỹe lcatpi, qataq na qalota qorogoxoche. Qalaxaye qauachichi qome na qarqaỹaipi, nache qaỹa'añim ca laỹe ne'ena qarhuotaxanaxache maye lalamaxat co'ollaxa so qampa'aguenaxauaipi.»
9Qaq 'era da 'eetec co'ollaxa so maiche nhuo' le'ecpi maye chegoxoguetpi so Rubén, Gad, qataq so laỹe so maiche nhuo' le'ecpi maye chegoxoguetpi so Manasés, da ca'ai so laỹepi Israel le'ecpi co'ollaq huaña ye Silo, maye huaigui ye 'alhua Canaán, da yaqto' ỹe'eguelaxa so maiche lalamaxat na'alhua maye huaigui ye Galaad, nache qaipacchigui da lamaxasoxonaxac Ñim Nataxala', maye chegoqchigui naqa'en co'ollaxa so Moisés.
Aso nca'atoxonaxalate maye ỹo'otteua'a da cotaxac
10Qaq so maiche nhuo' le'ecpi maye chegoxoguetpi so Rubén, Gad, qataq so laỹe so maiche nhuo' le'ecpi maye chegoxoguetpi so Manasés, co'ollaq ivita so tala Jordán, co'ollaq ñaq netaigui ye 'alhua Canaán, nache somayepi nauaxaỹaxaasheguem co'ollaxa aso nca'atoxonaxalate naña naqa'en ye loigue so tala. 11Nache som laỹepi Israel le'ecpi, la'axaỹaxac co'ollaxa da so maiche nhuo' le'ecpi maye chegoxoguetpi so Rubén, Gad qataq so laỹe so maiche nhuo' le'ecpi maye chegoxoguetpi so Manasés, nauaxaỹaxaasheguem co'ollaxa aso nca'atoxonaxalate, huaña so loigue so Jordán maye sa qaỹapeque yem loga't ye 'alhua Canaán, maye na'alhua so Israel le'ecpi, 12qaq co'ollaq choche ỹaỹaten de'era so Israel le'ecpi, nache ỹo'ot so laponaxac huaña ye Silo, da yaqto' nqo'ona somayepi da iloquiaxan. 13Qalaxaye hua'auñi da qaỹamaq co'ollaxa so Finés, som llalec so ntaxaỹaxanaxanec Eleazar, da yaqto' nqo'ona ye hueta'a se'eso maiche nhuo' le'ecpi maye chegoxoguetpi so Rubén, Gad qataq som laỹe so maiche nhuo' le'ecpi maye chegoxoguetpi so Manasés. 14Nache somaye nnaictagueto soua diez lataxala'ate so Israel le'ecpi, maye ñi 'oonolec soomaye, nache lataxala' so maiche nalamaxat nhuo' le'ecpi. 15Nache 'enauac somayepi da nqo'ona ye Galaad, maye netaña so maiche nhuo' le'ecpi maye chegoxoguetpi so Rubén, Gad, qataq so laỹe so maiche nhuo' le'ecpi maye chegoxoguetpi so Manasés, nache 'eeta':
16«'Enauac na nhuo' le'ecpi maye lalamaxat Ñim Nataxala' denataxaatac, 'eeta': ‹¿Ta'ainec da qauatenachichi Ñim Natamnaxala' na Israel le'ecpi? ¿Ta'ainco' da qaỹa'axañiiuec Ñimaye, da qanauaxaỹaxañiisheguem añi nca'atoxonaxalate da yaqto' qauataiỹa'aguet Ñim Nataxala'? 17¿Peta'a sa lta'araico' so qarasouaxashet maye huaña co'ollaxa ye Peor, maye ñaq 'eetalec da saishet da qomi' qui'itte' souaxat da ỹataqta qalota so ileu ne'ena nhuo' le'ecpi maye lalamaxat Ñim Nataxala'? 18Qaq ¿peta'a saisheto' da nache tachiguiña damaye, ye qami' qaltaq qaỹa'axañiiuec da qoquiigue Ñim Nataxala'?› Cha'aye da qauataiỹa'aguet nagui Ñim Nataxala', nache Ñimaye qonte' dalemataỹa qome 'enauac na Israel le'ecpi. 19Cha'aye da qaupichiitega da nshepaxan ne'ena 'alhua maye qami' taỹoto, nache qanqo'oñiỹa ye qana'alhua maye lalamaxat Ñim Nataxala', maye netaña ñi lpe'l maye huañacnaxa da qanauane' Ñimaye. Nache qauacoñiỹa ca 'alhua maye huaigui ye qana'alhua. Qalaxaye saishet qome da qauataiỹa'aguet Ñim Nataxala', qataq qomi', da qanauaxaỹaxañiishiguem aca lỹa nca'atoxonaxalate, cha'aye mashe huo'o añi nca'atoxonaxalate maye lalamaqte Ñim Nataxala' maye Qanatamnaxala'. 20Qataq qantooñita'ac qome da lasouaxashet so Acán, maye llalec so Zeraj, co'ollaq ỹacona so mashe qoỹan da 'enauac da qailaxachigui, qaq souaxat de'era lasouaqtaxanaxac nache Ñim Nataxala' dalemataỹa co'ollaxa 'enauac na Israel le'ecpi. ¡Qataq so Acán saishet da nachesota da ileu souaxat se'eso lasouaxashet!»
21Huaña, nache so maiche nhuo' le'ecpi maye chegoxoguetpi so Rubén, Gad, qataq so laỹe so maiche nhuo' le'ecpi maye chegoxoguetpi so Manasés, ỹasateguet co'ollaxa se'eso lataxala'pi so Israel le'ecpi, nache 'eeta':
22«Ñim Nataxala' maye Lo'onatac 'Enauacna maye nataỹaña 'enauac na atamnaxala'pi, Ñimaye ỹaỹaten da saishet da so'otaq de'era da yaqto' sataỹaqa'aguet huo'otaq da qolaqa'ai Ñimaye. Qaq Ñimaye ỹaỹaten de'era, qataq 'enauac da qami' ỹaỹaanaxanaxaneque, qaq da huo'otaq saq 'en de'era, ¡nache qomi' ỹalaua't nagui! 23Qaq da huo'otaq ñauaxaỹaxanaxasheguem añi nca'atoxonaxalate da yaqto' qolqa'ai Ñim Nataxala', nache sanaqot ca atamnaxala' maye saq 'en aca qarachetaqtaxanaqte maye qaỹavigaxatta, qataq aca qarachetaqtaxanaqte ala na nañiguishec, huo'otaq aca qarachetaqtaxanaqte maye qanhuaachigui, nache Ñim Nataxala' nacheñi ñi qomi' nmi't qome. 24Qomi' ñauaxaỹaxanaxasheguem añi nca'atoxonaxalate, cha'aye sauoqtaique da que'eca na'a'q na qaỹa'alquipi saishet qome da 'enapega na qoyalaqpi, da 'eeta': ‹¡Qami' saishet da Qanatamnaxala'ai Ñim Nataxala' maye Natamnaxala' na Israel le'ecpi! 25Ñim Nataxala' ỹo'ot so tala Jordán da yaqto' qomi' iỹotaugalo nache saishet da qami' salegaxagueta, qami' maye qauachegoqoiguet so Rubén qataq so Gad. Nache qoñiita qome: ¡Qami' saishet da Qanatamnaxala'ai Ñim Nataxala'!› Huaña qome, nache ca qaỹa'alquipi ỹo'otec qome da saishet da huo'o da 'enec naqa'en Ñim Nataxala' ca qoyalaqpi. 26Qaq ỹoqo'oye qomi' qarhuennataxa da ñauaxaỹaxanaxasheguem añi nca'atoxonaxalate, qalaxaye saishet da sauoqtaique da sanaqot aca qarachetaqtaxanaqte qaỹavigaxatta Ñim Nataxala', huo'otaq aca lỹa nachetaqtaxanaqte, 27nacherata da sauoqtaique da la'anaqte da qoñiita qataq da shenaqta qataq na maiche qaralamaxat qoyalaqpi, cha'aye qomi' nataqa'en sho'oxorenaqtac Ñim Nataxala', qataq da sanaqtacot Ñimaye aca qarachetaqtaxanaqte maye qaỹavigaxatta, qataq ana nachetaqtaxanaqte da qaỹapalaxat nam nasouaxashetpi, qataq ana qanhuaachigui. Huaña qome nache na qaỹa'alquipi saishet da 'enapega na qoyalaqpi da 'eeta': ‹Qami' saishet da Qarataxala'ai Ñim Nataxala'.› 28Cha'aye qomi' tachigui qarhuel da que'eca na'a'q, qom huo'o ca qomi' 'enapegalo, huo'otaq na qoyalaqpi, nache qomi' shenaqapega da imeten da lataxac añi nca'atoxonaxalate maye lalamaqte Ñim Nataxala' maye nauaxaỹaxaasheguem co'ollaxa so qarta'alpi, qalaxaye saishet da ỹo'ot da yaqto' ỹavigaxat aca nachetaqtaxanaqte qaỹavigaxatta, huo'otaq aca laỹepi nachetaqtaxanaqtepi, nacherata da choche la'anaqte naqa'en da qoñiita qataq da shenaqta. 29Qaq Ñim Nataxala' qomi' sa ỹashenegueta qome da sataỹaqa'aguet huo'otaq da qolaqa'ai Ñimaye, cha'aye qomi' ñauaxaỹaxanaxasheguem añi nca'atoxonaxalate, qalaxaye saishet da sachaqalec aca qarachetaqtaxanaqte maye qaỹavigaxatta, huo'otaq aca qarachetaqtaxanaqte ala na nañiguishec, huo'otaq ca lỹa qarachetaqtaxanaxat. Cha'aye qomi' saỹatenaqta da 'oonole añi nca'atoxonaxalate maye lalamaqte Ñim Nataxala' maye Qanatamnaxala', maye netaña ñi npe'l maye huañacnaxa da qanauane' Ñim Nataxala'.»
30Qaq so ntaxaỹaxanaxanec Finés, qataq soua lataxala'ate so maiche nalamaxat nhuo' le'ecpi, maye nnaictagueto somaye, co'ollaq hua'aqchigui de'era la'aqtac so maiche nhuo' le'ecpi maye chegoxoguetpi so Rubén, Gad, qataq so laỹe so maiche nhuo' le'ecpi maye chegoxoguetpi so Manasés, nache soomaye ỹataqta ỹaỹamaxareeta de'era. 31Huaña co'ollaxa, nache so Finés, som llalec so ntaxaỹaxanaxanec Eleazar, 'enapego' somayepi, 'eeta':
«Nagui saỹatenaqta da Ñim Nataxala' qomi' hueta'agueta, cha'aye qami' saishet da qauauoitaique da qauataiỹa'aguet Ñimaye, nache qomi' qanca'alaxacheueeguesopa da lhuaxanaxanaxac Ñim Nataxala'.»
32Huaña co'ollaxa nache so Finés qataq soua nnaictagueto somaye, nquine' somayepi, nache ca'ai ye 'alhua Galaad da yaqto' ỹe'eguelaxa ye Canaán, maye netaña so laỹepi Israel le'ecpi. Huaña co'ollaxa, nache qaỹa'aqtaxanem so Canaán le'ecpi 'enauac de'era la'aqtac so maiche nalamaxat nhuo' le'ecpi, 33nache ỹaỹamaxareeta de'era la'aqtac somayepi, nache qaỹo'oxoren Ñim Lo'onatac 'Enauacna. Huaña co'ollaxa nache saishet da qaitaxaỹa da qailoquiaxan so maiche nhuo' le'ecpi maye chegoxoguetpi so Rubén, qataq so Gad, huo'otaq da qailaxachigui 'enauac so na'alhuapi. 34Qaq so chegoxoguetpi so Rubén qataq so Gad ỹanagui da «Nhuennataqte» asa'aso nca'atoxonaxalate. Cha'aye somayepi 'enapeco': «Ana'ana nca'atoxonaxalate ỹa'axat qome da Ñim Nataxala' da nacheñi Ñim Lo'onatac 'Enauacna.»
