So Israel le'ecpi ỹa'axasoxoolec so tala Jordán
1Qaq co'ollaq ñaq nte'etom so lỹa na'a'q, nache so Josué qataq 'enauac so Israel le'ecpi ca'ai ye Sitín, nache co'ollaq ivita so tala Jordán, qaq saishet da nache ỹa'axasoxoolec, nacherata da hua'a da nmataqa' so loigue. 2Qaq co'ollaq mashe inoxoorec soua tres na'axa'te, nache so nataxala'pi nqo'ona na nanataqa'pi, 3nache 'enapega so Israel le'ecpi, 'eeta':
«Qom qauloỹa'ague na ntaxaỹaxanaxanecpi maye chegoxoguetpi so Leví da ỹachetac aca arca maye laỹe' da naỹamaxataxac Ñim Nataxala', nache qoquiỹa'aisalo qome naua qaranataqa'achilli' nache qauca'achiitelec acamaye. 4Yaqto' ishet da qauaỹachiñi ca qa'aiteuga qome, cha'aye qaica da huo'otaq huo'o ca 'oonolec da qoñiita da mashe tateuga se'eso nqa'aic. Qalaxaye saishet qome da ỹapac sa qauỹochiỹapeque aso laỹe' da aỹamaxataxac, nachaqrato' da qauca'achiitalec asomaye, qalaxaye qami' qaỹoqtegueta qome.»
5Qataq so Josué 'enapego' se'eso nhuo' le'ecpi, 'eeta':
«Ỹataqta qanqui'itaxachiita qome, cha'aye qoyo'oxoñi qauauañiichigui qome da Ñim Nataxala' ỹo'ot ca sa qauauañiỹapega.» 6Qaq huaña nache 'enapega soua ntaxaỹaxanaxanaqa, 'eeta': «Qauacoñiỹa añi arca maye laỹe' da aỹamaxataxac, nache qaua'aviita'ague da taỹa'ague ne'ena nhuo' le'ecpi.»
Nache soua ntaxaỹaxanaxanaqa ỹacoosopa aso laỹe' da aỹamaxataxac, nache hua'autra'ague da taỹa'ague so nhuo' le'ecpi. 7Nache Ñim Nataxala' 'enapega so Josué, 'eeta': «Nache chegoqchiguiña ne'ena na'a'q da sauo'o da 'ara'amaqchec, ỹauaachigui ñaqa'en 'enauac na Israel le'ecpi. Qaq yaqto' namayepi ỹaỹateeta da aỹem ỹataqta 'am soota'aguet, 'eeta'am da 'eetec co'ollaq soota'aguet so Moisés. 8Qaq 'am qome qonapegalo naua ntaxaỹaxanaxanaqa maye ỹachetra'ape añi arca maye laỹe' da aỹamaxataxac, da qom mashe ivildaxaama na loigue so tala Jordán, nache huera'a qome.»
9Huaña nache so Josué 'enapega so Israel le'ecpi, 'eeta': «Ña qanquiquiiuo da yaqto' qana'axaỹañiỹa da la'aqtac Ñim Nataxala' maye Qanatamnaxala'.» 10Maye 'eeta': «'Era da la'anaxat da Ñim Lo'onatac 'Enauacna maye nca'altauec ỹataqta qami' hueta'agueta, qaq nache de'era qa'aita'ague qauauañiichigui naqa'en da ỹo'orauec qome ye Canaán le'ecpi, hitiitapi, heveopi, ferezeopi, gergeseopi, amorreopi, qataq na Jebuseopi. 11Ñaq qauloỹa añim arca maye laỹe' da naỹamaxataxac Ñim Lataxala' 'enauac na huetalec ana 'alhua, añimaye ỹa'axasoxoolec qanqa'en ne'ena tala Jordán da qami' nlectoto qome. 12Qaq ỹoqo'oye nagui qalca'aiua'alo qome caua doce shiỹaxau', ñi 'oonolec caamaye qauachegoxochiỹaigui na doce maiche nhuo' le'ecpi maye chegoxoguet so Israel. 13Nache caua ntaxaỹaxanaxanaqa maye ỹacheta'ape añi arca maye laỹe' da naỹamaxataxac Ñim Lataxala' 'enauac na huetalec ana 'alhua, qom mashe piguinguilo ye 'etaxat, nache se'eso tala colaxagui qome na 'etaxat, nache na 'etaxat maye chegaqasheguem, namaye vi'iiguet qome 'eco' da npaqtaxanaxat.»
14Qaq so Israel le'ecpi co'ollaq ca'ai so lpe'lpi maye lanataxaquipi, da yaqto' ỹa'axasoxoolec so tala Jordán, nache soua ntaxaỹaxanaxanaqa maye ỹacheta'ape aso arca maye laỹe' da aỹamaxataxac, hua'autra'ague da taỹa'ague somayepi. 15Qaq cha'aye naxa da huetoigui ye laloqo' da mashe qanqat ana ala na nañiguishec cebada, nache se'eso tala ipaxaalec, qaq se'esoua ntaxaỹaxanaxanaqa co'ollaq inoxooyingui so tala Jordán, nache naua lapia'ate co'ollaq choche piguinguilo so 'etaxat so loigue so tala, 16nache so 'etaxat maye chegaqasheguem vi'iiguet, nache so laponqa' na 'etaxat huaña yem qaỹoqteuga ye huaqta'a't nỹecpi ye Adam, yem huaqta'ai' ye Saretán. Qaq so 'etaxat maye taỹauga aso Auaxai Leuaxai, nache queta ivitta'a da imeuo. Huaña, nache so Israel le'ecpi ỹa'axasoxoolec so tala daqaqattague so llegueta, tatta co'ollaxa ye datatta ye huaqta'a't nỹecpi ye Jericó. 17Nache 'enauac se'eso Israel le'ecpi ỹa'axasoxoolec so tala Jordán, daqaqattague so llegueta, qalaxaye soua ntaxaỹaxanaxanaqa maye ỹachetrac aso laỹe' da naỹamaxataxac Ñim Nataxala' qalaq nache nachattrañi huetra'a ye laiñi so tala Jordán, nachattraña so deqaqta 'alhua.
