Josué 6

₁Qaq so lasom so lpaqtaxat ye Jericó, ỹataqta qaỹapochigui, souaxat da qañi'itapeeguet so Israel le'ecpi, qaq ỹoqo'oye saishet da huo'o ca pa'auo, huo'otaq da npa'auec som netaigui se'eso huaqta'a't nỹecpi. ₂Qalaxaye Ñim Nataxala' 'enapego' so Josué, 'eeta': «Aỹem 'am sanem da 'oxonec ye Jericó, qataq ñim nta'a qataq caueegue' na nalleppi. ₃Qaq 'am qataq na 'analleppi, qoquiitaua'a qome ye 'oonolec na'a'q da qauconñiisop ye huaqta'a't nỹecpi, qaviraxacheetrec qome caua seis na'axa'te. ₄Qaq siete qome caua ntaxaỹaxanaxanaqa maye hua'autra'ague 'anqa'en da taỹa'ague añi arca maye laỹe' da aỹamaxataxac, qaq ñi 'oonolec caamaye huota'a qome aca lasheere peenaq lcoue. Qaq ca na'a'q siete, nache siete qome da qavi'iguelaqailec da qauconñiisop yi'iye huaqta'a't nỹecpi. Qaq que'ecaua ntaxaỹaxanaxanaqa nache quetro'ot qome da ỹashettrapigui caua lasheerel. ₅Nache qom qaua'aqaiỹa da ỹoqta qana'axannec da l-lamaxa aca nasheerepi, nache ỹataqta qana'axanñic qome da qara'alaxaqui, nache ye lpaqtaxat yi'iye huaqta'a't nỹecpi hua'axauec qome. Huaña, nache ñi 'oonolec da qoñiita ỹalamaxatteua'a qome yi'iye huaqta'a't nỹecpi.»

₆Nache so Josué iỹaxaneuga so ntaxaỹaxanaxanecpi, nache 'enapega, 'eeta': «Qauache qome añi arca maye laỹe' da naỹamaxataxac Ñim Nataxala', qataq caua siete da qoñiita hua'aute' da ỹacheta'ape qome caua lasheerel peenaq lcoue.» ₇Nataqa'en 'enapega so nhuo' le'ecpi, 'eeta': «Qauesomiỹa qome, qauconñiisop ye huaqta'a't nỹecpi. Qaq na alleppi maye na'atchiguiñi na lo'ogoxonaxatpi, qalaq hua'auta'ague qome da taỹa'ague añi arca maye laỹe' da naỹamaxataxac Ñim Nataxala'.»

₈Nache 'enauac da qaỹo'ot na damaxasoxoolecpi so Josué. Soua siete ntaxaỹaxanaxanaqa hua'autra'ague da taỹa'ague aso arca maye laỹe' da naỹamaxataxac Ñim Nataxala', ỹashettapiguilo soua lasheerel, qaq aso arca maye laỹe' da aỹamaxataxac nache ca'attaueegue qanqa'en somayepi. ₉Qalaxaye so alleppi maye na'atchiguiñi na lo'ogoxonaxatpi nache hua'auta'ague da taỹa'ague so ntaxaỹaxanaxanecpi, qaq so nca'attauo alleppi qalaq ca'attaueegue aso arca maye laỹe' da aỹamaxataxac, qaq soua ntaxaỹaxanaxanaqa nache quetro'ot da ỹashettrapigui soua lasheerel. ₁₀Qalaxaye so Josué 'enapega so shiỹaxauapi da ỹe'emaqtom nato' qom ivita da 'enapega da ỹa'alaq, nache ỹataqta na'axannec da la'alaxac.

₁₁Nache so Josué 'oonolec naqa'en da coleesop ye huaqta'a't nỹecpi aso arca maye laỹe' da naỹamaxataxac Ñim Nataxala'. Qaq co'ollaq ime, nache qaỹe'eguelaxauga so nanataqa' nache qanayeua'a se'eso pe. ₁₂Qaq so nte'etom so lỹa na'a'q, so Josué ñisheguem, qaq soua ntaxaỹaxanaxanaqa nache ỹacoosopa aso arca maye laỹe' da aỹamaxataxac. ₁₃Nache soua siete ntaxaỹaxanaxanaqa hua'autra'ague da taỹa'ague aso arca maye laỹe' da naỹamaxataxac Ñim Nataxala', qataq nache quete' saishet da vi'iigueta, qataq nache queto'oto da ỹashettrapigui soua lasheerel. Qaq so alleppi maye na'atchiguiñi na lo'ogoxonaxatpi hua'auta'ague da taỹa'ague soomaye, qaq so nca'attauo alleppi qalaq ca'attaueegue aso arca maye laỹe' da aỹamaxataxac. Qaq aso nasheerepi nache queta da l-lamaxa. ₁₄Qaq so lỹa na'a'q nache qaltaq qaicoleesop se'eso huaqta'a't nỹecpi, ime nache qaltaq qaỹe'eguelaxauga so nanataqa'. Qaq nache qanayecto'ot da qaỹo'ottac de'era soua seis na'axa'te.

₁₅Qaq so na'a'q siete, nache somayepi no'ottasheguem da qaltaq coleesop se'eso huaqta'a't nỹecpi, nache ỹe'enaxatchigui da 'eetec soua lỹa't na'axa'te, qalaxaye se'eso na'a'q, nache siete da ỹe'eguelaxalec da coleesop somaye. ₁₆Nache soua ntaxaỹaxanaxanaqa co'ollaq mashe ivi' siete da ỹe'eguelaxalec da ỹashiiyigui soua lasheerel, nache so Josué 'enapega so shiỹaxauapi, 'eeta': «¡Qaua'alqai! Cha'aye Ñim Nataxala', qami' ỹanema ne'ena huaqta'a't nỹecpi. ₁₇Qaq ne'ena huaqta'a't nỹecpi, qataq 'enauac na huetaiguipi, ỹataqta qanlaxatchiguiñi qome da qoỹanot Ñim Nataxala', cha'aye nache lamaxasoxonaxac Ñim Nataxala'. Qalaxaye nachacata aca Rajab maye quisheguetaxai da qauchoxoyiñi qome da nachaalataxac, qataq 'enauac cam ỹe'egueneua'a ye lma', cha'aye acamaye ỹoxooyiñi co'ollaxa soua qaramaxa'ashe da nmeenaxara ne'ena. ₁₈Qalaxaye qami' ỹataqta qarvichiỹa'a qome da huo'o ca qauacoñiỹa, cha'aye Ñim Nataxala' ỹan da 'enauac qanlaxatchiguiñi namayepi. Cha'aye qom huo'o ca qauacoñiỹa, nache qailaxachigui ye lanataqa'pi na Israel le'ecpi qataq huo'o qome ca lta'araic qanque'eenaxac. ₁₉Qalaxaye 'enauac na lcat plata, oro, qataq 'enauac na no'onataxanaxatpi maye chegaqaigui na bronce huo'otaq na laỹe lcatpi, namayepi qoỹanot qome Ñim Nataxala', nache qaỹachaigui ca laỹe' na lalamaxatpi Ñim Nataxala'.» ₂₀Huaña nache so nhuo' le'ecpi ỹa'alaq nache soua ntaxaỹaxanaxanaqa ỹashiiyiguilo soua lasheerel. Nache so nhuo' le'ecpi co'ollaq hua'axaỹa da l-lamaxa soua nasheerel, nache ỹataqta na'axannec da la'alaxac, nache so lpaqtaxat se'eso huaqta'a't nỹecpi hua'axauec. Huaña nache somayepi inoxotaua'a se'eso huaqta'a't nỹecpi nache loxonec. ₂₁Ime, nache irolec so ỹeelonec da ỹalauat 'enauac so ỹalleppi, 'alpi, nsoxoppi qataq so ỹa'axaiquipi. Nataqa'en so nauegaxanaxala' huacapi, qaguetapi, qataq 'ashenapi. Nache ỹataqta 'enauac da nlachiguiñi naqa'en.

₂₂Qalaxaye so Josué 'enapegalo soua dos lamaxa'she maye demeenaxara co'ollaxa se'eso 'alhua, 'eeta': «Qanqo'oñiiua'a ca lma' aca'aca quisheguetaxai, nache qanqacheeuec qataq 'enauac ca lalamaxatpi, nache qaupaquiichigui som qaỹa'añim qara'aqtaqui co'ollaxa.» ₂₃Nache soomaye pa'areuo nache nqatrec aso Rajab, qataq so lta'a, late'e, lqaỹañecpi qataq 'enauac so lalamaxat lauo' le'ecpi asomaye, nache ỹaueguereuga so naloteuga so lanataqa' so Israel le'ecpi. ₂₄Qaq co'ollaq ime, nache so Israel le'ecpi ỹavigaxat 'enauac se'eso huaqta'a't nỹecpi qataq 'enauac so huetaiguipi. Qaq nachesota so lcat plata, oro, qataq so chegaqaigui na bronce, qataq so no'onataxanaxat lcatpi, somaye qaỹachaña so naỹamaqtaqa' nam lalamaxatpi Ñim Nataxala'. ₂₅Qalaxaye so Josué ichoxoren da nachaalataxac aso Rajab, qataq 'enauac so lalamaxat lauo' le'ecpi, qataq so logoxoshetpi, cha'aye asomaye ỹoxooyiñi co'ollaxa soua dos lamaxa'she somaye maye demeenaxara co'ollaxa se'eso 'alhua Jericó. Qaq nache se'eso na'a'q chegoqchiguiña da so lalamaxat lauo' le'ecpi aso Rajab, lauoreuapi so Israel le'ecpi ivitta'a nagui.

₂₆Huaña nache so Josué ỹauo'o so ỹan la'aqtac, 'eeta': «Ỹataqta qauem qome ca talec ca shiỹaxaua qom nshetaique da ỹe'eguelaxalec da no'oxoosheguem ne'ena huaqta'a't nỹecpi na Jericó. Cha'aye Ñim Nataxala', talec naqa'en qome da nhuaxanaguec que'ecaua llalqa que'eca shiỹaxaua qom no'oxoosheguem ne'ena huaqta'a't nỹecpi qataq qom ỹanauo ca lasom.»

₂₇Qaq Ñim Nataxala' ỹataqta hueta'aguet so Josué, ỹoqo'oye da llo'oxoyec somaye imattalec se'eso 'alhua maye qanayeetalec.