Da lỹa noinaxac
1Nachaỹem maye ñauane' co'ollaxa da que'enaxac,
aỹem iuaxaatalec Ñim Nataxala' souaxat da lalemataic.
2Ñimaye aỹem ỹauega nam 'alhuapi maye ỹataqta napalñi,
shectague' naqa'en so nqa'aic maye qaica ca lcoỹaraxat.
3Imauec ye na'a'q, da aỹem ỹe'eguelaxattalec da lhuaxanaxanaxac.
4Nache nquigaxattañi da la'añaxac da ỹapacheỹaxac,
qataq da ỹo'ocỹaxac, qataq ilaxachiguilo naua ipi'ineqa,
5Qataq nauaxaỹaxaasheguem, da aỹem coleesop naqa'en da naquicoxo,
qataq da que'eenaxac, 'eeta'am naqa'en ca npaqtaxanaxat,
6qataq ỹo'ot da sootaigui na napalaxa, 'eeta'am naqa'en aỹem,
so mashe salcoshe'egue da ileupi.
7Aỹem ỹapotaua'a, nache sa seshet da senoxonec, qataq aỹem icoñerai',
decoñetaxana so ỹataqta qapa'atta ncoñetaxanaxat lcat,
8Qaq na'aictaxa da ña'alaqtapiguiñi, da seỹaxaatacot da aỹem itauan,
qalaxaye saishet, da qochetega da ñachoxonnaxac,
9qataq ỹapogui som ỹec, dapoxona so coma',
qataq naralaxat so tateuga som ỹec.
10Ñimaye, 'eeta'am ñaqa'en ca oso da aỹem nqapecto'ot,
qataq ca llon da huotaique da aỹem iloquiaxan.
11Qataq aỹem ỹashoqchenec, da yaqto' aỹem icolaxattac,
nache ỹataqta aỹem nlaxatchigui da icolanaxa.
12Qataq ỹaueguelec so lchecnec,
nache aỹem iloxonaxaatagui aso lchecna.
13Qaq asom lchecnapi maye ỹaỹenec Ñim Nataxala',
ỹataqta ỹa'atchigui añi iquiyaqte.
14Qaq 'enauac nam ihuo' le'ecpi ỹataqta aỹem ỹe'eetac,
qaq nache imauec ye na'a'q da nache aỹemta da aỹem ỹe'eetac.
15Ñim Nataxala', ỹataqta aỹem nlaxatchigui da ñequi'ic,
qataq ỹataqta chem som aỹem nỹomaxangui.
16Qataq aỹem iuaxaneguet ana 'alhua,
qataq ỹo'ot da senactaigui na namoxoỹaxa.
17Nache aỹem ca'ai da nlagaxayec,
qataq secoua'ai dam ỹaỹamaqchiguiñi.
18Nache ivira'a da sepettega da mashe imeuo dam ỹa'añaxac,
qataq dam ñaquitaxac Ñim Nataxala'.
19Qaq naxa da secuennate so ỹaquicoxo, qataq co'ollaq aỹem qaỹalata'a't,
qataq so ñequi'ic qataq ñeque'eenaxac,
20nache da seuennataxaateguelec naxa,
nache ỹataqta qaica ca ỹa'añaxac.
21Qalaxaye huo'o da lỹa maye tachigui iuel,
qaq damaye nachera da aỹem nlaxatchigui da ñaquitaxac:
22Dam lauotaxanaqtaic Ñim Nataxala', qaica ca loga't,
qataq dam lsoxoyec Ñimaye, saishet da imeuo,
23nacheye ye nte'eta qalaq dalaxaic dam lsoxoyec.
¡Qaq ỹataqta qaica ca 'ena'am Ñimaye da sanquic da lataxac!
24Qaq aỹem shenapec naxa, da Ñim Nataxala' nachaqñita 'oonolec ñaqa'en,
qaq ỹoqo'oye aỹem sepi'iỹa'a Ñimaye.
25Ñim Nataxala', ỹauotec cam ỹataqta pi'iỹa'a Ñimaye,
qataq cam ỹataqta nmitaique Ñimaye.
26Qaq ỹataqta no'on da ñe'emaxataq da suetaqa'aguet,
Ñim Nataxala' da qomi' nca'alaxatrec.
27Qataq no'on da ca ỹale nañaneguet
da ỹataqta huesota da lataxac da ña nsoqolec.
28Cam ỹale, iuen da 'eeta'am da ỹataqta ndauec,
qataq choche ñe'emaxat da Ñim Nataxala' damaxasoxon,
29qataq camaye iuen da sana'amaten, qataq nqapaxaneguet na 'alhua,
cha'aye saiuena'a da ñaqauo'o da naquitaxac,
30qataq ỹanem ana lỹa lamelque cam anac da iuaxangui,
qataq ỹaconeguet cam lta'araic nsheunaguec.
31Ñim Nataxala' saishet da nache queta da qomi' ca'aisalo.
32Qaq na'aictoxo' da ỹauo'o da que'enaxac, qalaxaye nataqa'en dechoxonnataxan,
cha'aye da lsoxoyec ỹataqta lta'araic.
33Qaq cha'aye ỹoqta 'eesa da saỹaỹamaxaren da daquicoqtaxan, qataq da ỹauo'o ca nqui'ic na shiỹaxauapi.
34Da saqaichoxonnai' da qaỹasottapigui nam ncoñeteguishecpi ana 'alhua,
35qataq da ỹauaachigui Ñim 'Amaqtaqaic da saqaipaguelec,
nam lapaqtañi lataxacpi maye npaxaalec cam shiỹaxaua,
36qataq da qaỹashaxanec da ỹaỹamaqchiguiñi lataxac da huo'o ca qaỹo'ot,
nache damaye ỹataqta saỹaỹamaxaren Ñim Nataxala'.
37¿Negue't ca ishet da ỹa'axata'a cam taỹa'a da yo'oq,
da saishet da nacheñi Ñim Nataxala' da ỹamaxalec?
38¿Saisheto' peta'a da saq chegoqtot Ñim 'Amaqtaqaic,
'enauac nam no'on qataq nam qauem?
39Cam shiỹaxaua da 'etaxaloxoic,
¿qaq negue'to' cam nachoxoreetapeguem da ña nca'altauec?
40Qaq no'on da ñimitaq da maiche qarataxac,
nache qaltaq she'eguelaxasoqot Ñim Nataxala'.
41Sanaxam Ñim Lo'onatac 'Enauacna maye neto'ot na piguem,
dam qarhuennataxac qataq nam qanatanmaxacpi.
42Qomi', huo'o nam qarasouaxashetpi, qataq saishet da salaxasoq,
qaq ỹoqo'oye saishet da qomi' 'auchoxore'n.
43Qomi' 'auconnaxasopa da 'arayeloxo, qataq qomi' 'aucana'ape,
¡nache saishet da qomi' 'auchoxore'n da qomi' 'aualaua't!
44'Anqañoxotoigui na lo'oc na piguem,
da yaqto' saishet da 'aua'axaỹa da qanatamnaxac.
45Nache qomi 'auo'oteque da ỹataqta qomi' qaiqaigalo,
shenaqta'am ca lasogoñi, da salegaqta'aguet na shiỹaxauapi.
46'Enauac nam qampa'aguenaxauapi da detaqa,
qalaq qauema naua la'aqtaqa da qomi' detaqtegalo.
47Da qarcolanaxa qataq da qanqoinaguec qataq da qomi' qanlaxatcheyeñi,
damaye nachera da qomi' taleguete.
48Naua ỹache' qalaq huecolde'c, naguinguilo naua ỹamelque,
co'ollaq semeteetac da nlaguiñi som ỹauotaxat nỹecpi.
49Naua ỹa'ai'te qalaq qaica ca nmataqa',
cha'aye qaica qome ca aỹem ỹa'añaqchet,
50choche ivitta'a ca na'a'q da Ñim Nataxala' maye neto'ot na piguem, qomi' namata'alo.
51Naua ỹa'ai'te qalaq ỹataqta ỹaquicoqche't da ñachaalataxac,
souaxat da semeteetac da nque'eenaxac nam 'alpi,
maye hueta'a ye huaqta'a't nỹecpi maye ima'.
52Nam ñepa'aguenaxauapi qaica ca huo'omshe aỹem icaatac,
qaq huotaique da aỹem ỹaconeua'a sheeta'am naqa'en ca qoỹo,
53nache huotaique da ñeca'altauec naqa'en da aỹem ỹapogoña,
qataq da ỹapogui so ỹeguesheguem dapoxona so coma'.
54Na 'etaxat qalaq ỹataqta imauec da aỹem ỹapolec,
nache shenapec «'ena'amso' da nache ỹoga't ne'ena.»
55Aỹem seỹaxana da 'are'enaxat 'Am Nataxala',
co'ollaq sootaña na pa'aguiñi añi ỹataqta qaỹoqchiguingui nshere,
56qaq 'Am 'aua'axaỹa co'ollaxa da ivilỹaxac,
qataq saishet da sa'auqocha'a da ñachoxonnaxac.
57So na'a'q co'ollaq 'Am seỹaxana, nache aỹem 'auanaỹa,
nache aỹem qonapega qoneta': «Saishet da 'añe'e.»
58'Am Nataxala' aỹem 'aueelec co'ollaxa,
nache 'anca'alaxatec da ñachaalataxac.
59'Am Nataxala', 'Am maye 'aumeteetac,
dam qauem maye aỹem qaỹo'otec,
¡ñaq aỹem 'aueelec!
60'Am 'aumeteetac da lyaxa namayepi da ipalaique lvi',
qataq 'enauac nam lapaxañipi namayepi da yaqto' aỹem dataỹa'aguet.
61'Am Nataxala', 'ana'axaỹaxaatega co'ollaxa da lsheunaxanaxac namayepi,
qataq 'enauac nam lapaxañipi da yaqto' aỹem dataỹa'aguet,
62qataq 'Am 'auaỹaten na ltaxaỹaxacpi nam ñepa'aguenaxauapi,
da ỹataqta imauec ye na'a'q da qauema naua la'aqtaqa da aỹem detaqtega.
63¡Ñaq 'aumeten 'enauac na ỹo'otpi namayepi,
damaye ỹo'ot da ñe'enaguec!
64'Am Nataxala', talec 'anqa'en namayepi cam nsheetenaguec na ỹo'ottac.
65'Aỹa'anem da qaramchigui da lquiyaqteỹaxac,
qataq talec 'anqa'en ca qauem namayepi.
66¡'Am Nataxala', 'aucanapec qome namayepi,
'aurolec da 'arayeloxo, nache ỹataqta pal 'anqa'en da huetalec ana 'alhua!
