Da natamnaxac so nhuo' le'ecpi maye huo'o da laquicoxo
1'Am Nataxala', ña 'auennata'a qome da souaqaigui,
qomi' 'anamata'alo nache 'aumeten da qane'enaguec.
2'Enauac nam qaralamaxat co'ollaxa nagui hueto'ot na chegaqauec shiỹaxauapi,
qataq na qarma'pi co'ollaxa, nagui netaigui na chegaqauecpi.
3Qomi' mashe qaica ca qarta'a nache qomi' saploqpi,
ana qarate'elpi qalaq 'eeta'am ana pa'aipi.
4Na 'etaxat maye ñeỹomaqtapigui qalaq sesheenaxanaqta'a,
qataq na 'epaq nataqa'en sesheenaxanaqta'a.
5Qomi' ñeque'etaxanaxagui da qancanaguec damaye ỹataqta qomi' ipataxayiñi,
ỹataqta ñasamaxañi qalaxaye ỹataqta qaica ca qanmataxac.
6Na egipciopi qataq nam asiiriopi, qalaq sanaqto'oto naua qarhuaxaye da yaqto' sequia'aqtac.
7Som qarta'alpi huo'o co'ollaxa na lasouaxashetpi qaq somayepi mashe ileu,
qalaxaye qomi' taleguete nagui na lasouaxashetpi somayepi.
8Qaq nagui nache maiche qomi' ỹoiqueeta'ape na nlatacpi,
nache qaica ca qomi' isoueeguesopa da lhuaqỹaxac namayepi.
9Sanaxaguet da lchec da qanachaalataxac da yaqto' sanataxa ca qonoq,
na'aictaxa da coleetega't na alaataxaicpi ye toolec 'alhua.
10Na qaro'oc qalaq 'eroigui 'eeta'am aca nqatelaxanaxaqui,
qaq souaxat da ỹaguec na qarqouaxa nache ỹo'ot na qare'eraxa.
11Ye Sión qataq ye huaqta'a't nỹecpi ye Judá,
qalaq qancat co'ollaxa ana ỹepi 'alpi qataq na qa'ampi.
12Som qarataxala'pi qalaq qaicoñerashegue'm co'ollaxa naua lhuaxaye,
qataq so qarqueroxonecpi qalaq qaica ca 'enec qanqa'en.
13Qaq so ỹalleppi maye 'añaxaicpi qalaq qaỹamaxalec da iconnaxaatagui so namaicnaxanaxatpi,
so nsoxoppi qalaq qaica ca la'añaxac souaxat da lsallaxa na 'epaq maye nalonaxanaxatpi.
14Qaq mashe qaica so ỹa'axaiquipi maye hueta'a naxa na ñegueuopi ye huaqta'a't nỹecpi,
qataq mashe sa qaỹa'axaỹa da lo'onaxanaxac so nsoxoppi.
15Da qarquiyaqteỹaxac qalaq mashe qaica ca ntonaxac,
da qarasotaxac maye ỹo'ot naxa da qaramachiguiñi qalaq nmeneguet da qaraquicoxo.
16Aso qanaro'o da qomi' nta'al qalaq naañi,
¡choxoraiqolqa qomi' cha'aye huo'o da qarasouaxashet!
17Qaq souaxat de'era nache daquicota da qarquiyaqteỹaxac,
qataq nquicta'a da napalñi da qarmeenaxanaxac.
18Souaxat da mashe toolec añi qasoxonaxa Sión,
nache nda'a't ana huaxaỹaxapi da coleeteguelec añimaye.
19Qalaxaye 'Am Nataxala', da 'aro'onataxanaxac chochaq tatec qome,
qataq nache 'eetai' qome da 'anso'ootangui añi 'anso'onaxaqui.
20Qaq ¿ta'ainco' da chochaq tatec da qomi' 'aucoua'aisalo?
Qataq ¿ta'ainco' da qaỹoqteguelo naua vi'iye da qomi' 'auala't?
21¡'Am Nataxala', ña qomi' 'aua'aqta'alo qome da 'am she'eguelaxasoqot,
yaqto' 'am she'eguelaxasaxa!
Qataq 'auo'otec qome da qanachaalataxac da 'eeta'am so hua'auchiguiñi co'ollaxa.
22¿Qalqo' mashe imauec peta'a da qomi' 'auasaxare'c,
qataq peta'a ỹataqta qomi' 'aualemataỹalo?
