Aso nachetaqtaxanaqte qaỹavigaxatta
1Ñim Nataxala', iỹaxana so Moisés huaña so npe'l maye huaña naxa da qanauane' Ñimaye, nache 'eeta':
2«Qonapega qome na Israel le'ecpi, da huo'o ca 'oonolec namayepi da Aỹem ỹanot ca lachetaqtaxanaxat shiguiỹac, nache ndouo ca huaca, qagueta huo'otaq quetaq.
3Nache que'eca shiguiỹac maye ỹaneuo da lachetaqtaxanaqte da qaỹavigaxatta, da huo'otaq huaca, nache ỹauota'a ỹale, qataq qaica ca lque'emaxa yaqto' ỹaỹamaxareeta Ñim Nataxala'. Ime, nache iroua'a ye ñegueuo ñi npe'l maye huaña naxa da qanauane' Ñimaye. 4Qaq nache huaña yemaye da ỹashel-lec na lqaic que'eca shiguiỹac, yaqto' que'eca shiguiỹac qaỹaỹamaxareeta. Qataq nache chegoqchigui da qaỹapalaxat na lasouaxashetpi que'eca shiỹaxaua. 5Ime, nache ỹalauat, ipelecot na lqosot que'eca huaca llalec, huaña naqa'en ye lanataqa' Ñim Nataxala', qaq ñeua llalqa so Aarón maye ntaxaỹaxanaxanaqa da qaitaxaỹapegue' Ñimaye, nache ỹacoora ca ltago'q que'eca shiguiỹac nache icoroto naua laỹel añi nca'atoxonaxalate maye netaña ye ñegueuo ñi npe'l. 6Qaq ca ỹaneuo que'eca shiguiỹac da lachetaqtaxanaxat qaỹavigaxatta, camaye nacheca ca nqat ca lo'oc qataq npilliguiñi. 7Nache ca ntaxaỹaxanaxanecpi ỹo'o't ca norec, ỹachalec añi nca'atoxonaxalate, qataq nache ỹasaqtraua'q ca lalonaxat 'epaq que'eca norec. 8Ime, nache ỹachalec que'eca 'epaqpi 'ettaigui maye huetalec añi nca'atoxonaxalate, ca laỹepi que'eca shiguiỹac maye mashe qanpilliguiñi, qataq ca lqaic, qataq ca lcheta ca lauel le'ecpi. 9Ime, nache que'eca ỹaneuo ca lachetaqtaxanaxat qaỹavigaxatta, camaye nacheca ca iỹo ca lauel le'ecpi qataq caua lapia'ate que'eca shiguiỹac, ỹauota'a ca 'etaxat, qaq ca ntaxaỹaxanaxanec ỹavigaxat 'enauac camaye, ỹachalec añi nca'atoxonaxalate. Cha'aye nachetaqtaxanaxat maye qaỹavigaxat, yaqto' da ama laitaỹaxac ỹamaateguet Ñim Nataxala'.
10Qaq da huo'o ca ỹaneuo ca qagueta huo'otaq quetaq da lachetaqtaxanaxat qaỹavigaxatta, nache camaye ỹauota'a ỹale qataq qaica ca lque'emaxa, 11qataq da ipelecot na lqosot, nache ỹachaña da pa'aỹa'ague da sheu' añi nca'atoxonaxalate, huaña naqa'en ye lanataqa' Ñim Nataxala'. Nache ñeua ntaxaỹaxanaxanaqa maye chegoxogueta so Aarón, icoroto naua laỹel añi nca'atoxonaxalate ca ltago'q que'eca shiguiỹac. 12Ime, nache npilliguiñi que'eca shiguiỹac, nache ca ntaxaỹaxanaxanec ỹachalec ca 'epaqpi maye 'ettaigui qataq huetalec añi nca'atoxonaxalate que'eca laỹepi maye npilliiguishecpi, qataq lỹateuaq naqa'en ca lqaic, qataq ca lcheta ca lauel le'ecpi. 13Ime, nache que'eca ỹaneuo ca lachetaqtaxanaxat, camaye nacheca ca iỹo ca lauel le'ecpi, qataq caua lapia'ate que'eca shiguiỹac, ỹauota'a ca 'etaxat, qaq ca ntaxaỹaxanaxanec nache ỹavigaxat 'enauac camaye ỹachalec añi nca'atoxonaxalate, cha'aye nachetaqtaxanaxat maye qaỹavigaxat, yaqto' da ama laitaỹaxac ỹamaateguet Ñim Nataxala'.
14Qaq da huo'o ca ỹanot ca lachetaqtaxanaxat qaỹavigaxatta Ñim Nataxala' da huo'otaq maỹo, nache ỹauota'a ca qoto' lta'araic, huo'otaq ca qoto' llalec. 15Nache ca ntaxaỹaxanaxanec iroua'a añi nca'atoxonaxalate, nache inoxonec ca lqaic, nache ỹavigaxat ỹachalec añi nca'atoxonaxalate. Qaq da ime da nlom na ltago'q da icorot na 'oonolec laỹe añi nca'atoxonaxalate, 16qataq nqat qome aca lqotaqui, qataq ca lauel le'ec qataq ca laue, nache ỹasaxangui añi laỹe' na alo maye pa'aigue da nala' lliguisheguem añi nca'atoxonaxalate. 17Ime, nache inoxongui na laiñi, ỹauattchiguilo naqa'en naua laua't que'eca qoto', nache ca ntaxaỹaxanaxanec ỹachalec ca 'epaqpi maye 'ettaigui huetalec añi nca'atoxonaxalate. Cha'aye nachetaqtaxanaxat maye qaỹavigaxat, yaqto' da ama laitaỹaxac ỹamaateguet Ñim Nataxala'.»
