Aca 'alo hualaxai, da ỹale ca llalec da ivita da deco'o, nache ivi' siete na'axa'te da saishet da qui'itta, qaq nache 'eeta'am da ivita da huo'o da na'axac. 3Nache que'eca nogotolec maye ñiguiñi, qaỹo'ot ca na'anaxat, qanqat na lqaic lo'oc ñi logoxoshet da ivi' caua ocho na'axa'te. 4Nache acamaye, iuata'alo caua treinta y tres na'axa'te da mashe nqui'itaxatta. Nache saishet da ỹashelligui na nogoxoshetpi maye sa qaishetapec, qataq saishet da huenoxoneua'a ñi npe'l maye lalamaxat Ñim Nataxala', cha'aye saxanaxa da ivita ca laloqo' da nqui'itaxatta. 5Qaq da 'alo aca ñiguiñi llale, nache acamaye catorce na'axa'te da saishet da qui'itta, 'eeta'am da ivita da huo'o da na'axac, qalaxaye nataqa'en iuata'alo caua lỹa't sesenta y seis na'axa'te da nqui'itaxatta.
6Nache da iviraxattrec caua laloxoqui' da nqui'itaxatta, souaxat da lañoxoc ca llalec ỹale huo'otaq 'alo, nache acamaye iroua'a ye ñegueuo ñi npe'l, ca qagueta llalec maye ivi' ca 'oonolec vi'i yaqto' lachetaqtaxanaxat qaỹavigaxatta, qataq ca 'oonolec qoto' llalec huo'otaq ca qoto' lta'araic, yaqto' lachetaqtaxanaxat maye sa imauaq da qaỹavigaxat. Qaq ỹanem ca ntaxaỹaxanaxanec, 7da yaqto' camaye ỹanot Ñim Nataxala' da yaqto' qaỹapalaxat na lasouaxashet acamaye, huaña nache acamaye qui'itta».
Qaq 'era da llec da lañoxoc ca nogotolec huo'otaq aca nogotole.
8Qaq aca 'alo da huo'otaq sa nalolec da desheenaxana ca qagueta, nache acamaye ishet da ỹaareuo caua dos qoto' llalqa, huo'otaq caua dos qoto' lta'araiqa, nache 'oonolec ca lachetaqtaxanaxat qaỹavigaxatta, qaq ca lỹa nache lachetaqtaxanaxat maye sa imauaq da qaỹavigaxat. Nache ca ntaxaỹaxanaxanec ỹanot Ñim Nataxala', da yaqto' qaỹapalaxat na lasouaxashet aca'aca 'alo, huaña nache acamaye qui'itta.
