Da 'eetec ca saishet da qui'itta
1Ñim Nataxala' 'enapega so Moisés qataq so Aarón, 'eeta':
2«Qoñiỹapega na Israel le'ecpi, qoñiita':
Da huo'o ca ỹale, da huo'o ca lalolaxa ñi logoxoshet, nache camaye saishet da qui'itta. 3Qataq da huo'o na lli'i ñi logoxoshet huo'otaq saishet, qalaxaye camaye ñaqaiyeta saishet da qui'itta.
4Nache 'enauac na mala'pi maye nnaalec camaye, qataq 'enauac ca nso'oolecpi, saishet da qui'itta.
5Ỹoqo'oye camachaqca shiỹaxaua da ipoteua'a ca lmala' que'eca sa no'oita, nache camaye iuen da iỹoi' caua alogo qataq nachel, qalaxaye camaye saishet da qui'itta ivitta'a da pe.
6Qataq 'enauac ca nso'oolec ca nso'onqa' que'eca ỹale, nache camaye iuen da iỹoi' caua alogo qataq nachel, qalaxaye camaye saishet da qui'itta ivitta'a da pe.
7Qataq camachaqca shiỹaxaua, da ipoteua'a que'eca ỹale maye huo'o da lalolaxa ñi logoxoshet, camaye iuen da iỹoi' caua alogo qataq nachel, qalaxaye camaye saishet da qui'itta ivitta'a da pe.
8Qaq que'eca ỹale maye huo'o na lli'i ñi logoxoshet da huo'otaq nqaigoqot ca shiỹaxaua maye no'oita, nache que'eca shiỹaxaua iuen da iỹoi' caua alogo qataq nachel, qalaxaye camaye saishet da qui'itta ivitta'a da pe.
9Qataq 'enauac aca naualatepi maye iueetac que'eca shiỹaxaua saishet da qui'itta.
10Qataq da huo'o ca ipoteua'a ca nogoxoshetpi maye nso'oolec que'eca ỹale, nache saishet da qui'itta ivitta'a da pe.
Qataq ca shiỹaxaua da huo'otaq ỹache ca camachaqca que'eca nogoxoshetpi, nache camaye iuen da iỹoi' caua alogo qataq nachel, qalaxaye camaye saishet da qui'itta ivitta'a da pe.
11Qaq que'eca dalolaxaic, da sa iỹoi' naua lhua'q, nache 'enauac ca ipoteua'a camaye, iuen da iỹoi' caua alogo qataq nachel, qalaxaye saishet da qui'itta ivitta'a da pe.
12Qataq 'enauac aca naco'oñapi 'alhua maye ipoteua'a camaye, iuen da qailaxachigui. Qaq ca chegaqaigui na 'epaq, nache choche qaiỹo qaỹauota'a ca 'etaxat.
13Qaq da vi'iiguet na lli'i ñi logoxoshet que'eca ỹale, nache camaye iuata'a da inoxoorec caua siete na'axa'te da ỹo'ot da nqui'itaxatta. Ime, nache iỹoi' caua alogo qataq nachel, nachela ca 'etaxat maye qaỹachegoxotangui ca npaxaatasheguem, ime, nache qui'itta. 14Qaq da ivireuga ca na'a'q ocho, nache ỹaconalo caua dos qoto' lta'araiqa, huo'otaq caua dos qoto' llalqa. Ime, nache taua'a ye ñegueuo ñi npe'l maye huaña naxa da qanauane' Ñim Nataxala', nache ỹanema ca ntaxaỹaxanaxanec. 15Nache camaye ỹaneuo ca 'oonolec da yaqto' nachetaqtaxanaxat maye sa imauaq da qaỹavigaxat, qaq ca lỹa nache nachetaqtaxanaxat qaỹavigaxatta, qataq ỹauaachigui naqa'en Ñim Nataxala' da ỹo'ot da qui'itta naqa'en que'eca ỹale.
16Qaq ca ỹale da maiche anactac ana lmale, nache camaye iuen da nachel, iỹota 'enauac na lo'oc ỹauota'a ca 'etaxat, qalaxaye camaye saishet da qui'itta ivitta'a da pe.
17Qaq da camachaqca nogoxot huo'otaq lo'oc da huagui aca lmale, nache camaye iuen da qaiỹo, qaỹauota'a ca 'etaxat, qalaxaye saishet da qui'itta ivitta'a da pe.
18Qataq ca ỹale da hue'eguet aca 'alo, nache caamaye iue'n da nache'l, iỹoi' na lo'o'c ỹauota'a ca 'etaxat, qalaxaye caamaye saishet da qui'itte' iviraiguilo da pe.
Da nqataxac aca 'alo da huo'o da na'axac
19Qaq aca 'alo da ivita da huo'o da na'axac, nache acamaye saishet da qui'itta inoxootrec caua siete na'axa'te.
Qataq camachaqca shiỹaxaua da ipoteua'a acamaye, nache saishet da qui'itta ivitta'a da pe.
20Qataq 'enauac ca nnaalecpi huo'otaq ca nso'oolec acamaye, ishet da dalolaqtaxan.
21Qataq camachaqca shiỹaxaua da ipoteua'a ca lmala' acamaye, nache iuen da iỹoi' caua alogo qataq nachel, qalaxaye camaye saishet da qui'itta ivitta'a da pe.
22Qataq ca shiỹaxaua da ipoteua'a ca nogoxoshetpi maye nso'oolecpi acamaye, nache iuen da iỹoi' caua alogo qataq nachel, qalaxaye camaye saishet da qui'itta ivitta'a da pe. 23Qataq ca shiỹaxaua maye ipoteua'a ca huetalec ca lmala', huo'otaq ca nso'onqa' acamaye, nache camaye saishet da qui'itta ivitta'a da pe.
24Qaq ca ỹale da hue'eguet acamaye, nache camaye nataqa'en saishet da qui'itta caua siete na'axa'te, qataq 'enauac ca mala'pi maye nnaalec camaye saishet da qui'itta.
25Qaq aca 'alo da queta da anactac na ltago'q sa ipaiguilo naua ca'agoxoiqa da na'axac, qataq qaỹaloqta da vi'iiguet na ltago'q, huo'otaq da ỹapacraue'c naua na'axa'te da na'axac, nache acamaye saishet da qui'itta.
26Ỹoqo'oye 'enauac ca mala'pi maye do'ochiỹalec, qataq ca nso'onqa'pi aca anactac na ltago'q, nache saishet da qui'itta, cha'aye 'eeta'am da ỹataqta huo'o da na'axac.
27Qaq ca shiỹaxaua da ipoteua'a que'eca nogoxoshetpi, nache camaye iuen da iỹoi' caua alogo qataq nachel, qalaxaye camaye saishet da qui'itta ivitta'a da pe.
28Qaq da ivita da vi'iiguet na ltago'q acamaye, nache iuata'alo da inoxoorec caua siete na'axa'te, ime nache qaltaq ipactegue da qui'itta. 29Qaq da ivireuga ca na'a'q ocho, nache ỹaconalo caua dos qoto' lta'araiqa, huo'otaq caua dos qoto' llalqa, nache iroua'alo ca ntaxaỹaxanaxanec huaña ye ñegueuo ñi npe'l. 30Nache camaye, ỹaneuo ca 'oonolec da yaqto' nachetaqtaxanaxat maye sa imauaq da qaỹavigaxat, qaq ca lỹa nache nachetaqtaxanaxat maye qaỹavigaxatta. Qaq 'era da 'eetec ca ntaxaỹaxanaxanec da ỹauaachigui naqa'en Ñim Nataxala', da ỹo'ot da qui'itta naqa'en aca 'alo souaxat da ime da anactac na ltago'q.
31Qaq 'era da qoñiitec da ivita'aguet qanqa'eñi na Israel le'ecpi ca saishet da qui'itta, yaqto' saishet da ileupi souaxat da sa iren, qataq na'aqchet ye ỹanataqa'.»
32Qaq 'era da nqataxac da huo'o ca ỹale maye anactac na lli'i ñi logoxoshet, qataq ca maiche anactac ana lmale, nache ỹo'ot da saishet da qui'itta souaxat de'era hueta'ac, 33qataq na 'alpi maye huo'o da na'axac, qataq ca ỹale huo'otaq aca 'alo da anactac na lli'i na lauel, qataq cam ỹale maye hue'eguet aca 'alo da huo'o da na'axac.
