Da lataxac na ntaxaỹaxanaxanecpi
1Ñim Nataxala' 'enapega so Moisés, 'eeta':
«Qonapega qome na ntaxaỹaxanaxanecpi maye chegoxoguet ñi Aarón, qoneta':
Saishet qome da na'aqchet da qui'itta lataxac namayepi ca leuaxaic, maye maiche qarhuo'oi le'ec souaxat da ipoteua'a, 2nacherata da ileu aca lalamaqte late'e, huo'otaq lta'a, llalec, huo'otaq llale ca lqaỹa, 3huo'otaq aca lqaỹa ñaq ndotega't maye neto'ot camaye, cha'aye ñaq saxanaxa da huaron. 4Cha'aye qami' lataxala'ate na nhuo' le'ecpi, ỹoqo'oye qui'itta qanqa'eñi da qarataxaqui qataq saishet da nshepaxan.
5Namayepi nataqa'en saishet qome da nmatta na laue na lqaic, qataq saishet da ichec ana lqa' laue, qataq saishet da ipelectac na lo'oc souaxat da lasouaxac. 6Nacherata da ỹataqta nañan da do'onataxanot Ñim Natamnaxala', qataq saishet da ỹe'enai' da le'enaxat, cha'aye namayepi nachena na ỹaneuo ca nallec, qataq aca laỹe nachetaqtaxanaqtepi maye qaỹavigaxat da qoỹanot Ñim Nataxala'. Qaq ỹoqo'oye namayepi iuen da ỹataqta qui'itta naqa'en da lataxac.
7Qataq namayepi saishet da huo'o ca huaroneguet aca quisheguetaxai, huo'otaq aca mashe ỹauana na ỹale, huo'otaq aca qaỹalat, cha'aye namayepi qaỹaconeua'a da ỹataqta nalemaqte' da do'onataxanot Ñim Natamnaxala'. 8Ỹoqo'oye namayepi ỹataqta ntela'aguet na ishet da ishepaxanaqchet, cha'aye namayepi nachena na ỹaneuo ca nallecpi maye qoỹanot Ñim Atamnaxala'. Qaq ỹoqo'oye namayepi iuen da qui'itta da lataxac, cha'aye Aỹem Nataxala', qui'itta da ỹataxac, qataq qami' so'oteque da qami' qui'itte' da qarataxaqui.
9Qaq aca llale ca ntaxaỹaxanaxanec da ỹacona da nquisheguetaxac, nache acamaye ỹe'en ca lta'a, nache iuen da nca'altauec qanqa'en da qaỹavigaxat.
Da lataxac ca lataxala' na ntaxaỹaxanaxanecpi
10Qaq ca lataxala' na ntaxaỹaxanaxanecpi maye qoỹami' da ỹataqta huo'o da 'enec da ỹaayiñi caua alogo na ntaxaỹaxanaxanec, chegoqta'a co'ollaq qaicorelec na lqaic ca aceite, nache camaye saishet da isotagui na laue, qataq saishet da colaqta'ape naqa'en caua alogo da yaqto' la'anaxat ca lasouaxac. 11Qataq saishet da taua'a ca hueta'a ca leuaxaic, na'aictaxa da lta'a, huo'otaq late'e, yaqto' saishet da na'aqchet. 12Qataq saishet qome da ca'ai ca nanataqa' maye lalamaxat Ñim Nataxala', qataq saishet qome da ỹo'ot ca ne'enaguec, cha'aye camaye mashe sogote da qaicorelec ca aceite da yaqto' nalemaqte' da do'onataxanot Ñim Nataxala'. Qaq 'era da ỹa'aqtac, Aỹem Nataxala'.
13Ỹoqo'oye da huaron camaye, nache huaroneguet aca 'alo maye saxanaxa da ỹauana ca ỹale. 14Qataq saishet qome da huaroneguet aca pa'ai, huo'otaq aca qaỹalat, huo'otaq aca mashe ỹauana na ỹale, huo'otaq aca quisheguetaxai. Nacherata da huaroneguet aca saxanaxa da ỹauana na ỹale, qataq chegoxoguet na maiche lauo' le'ecpi, 15yaqto' saishet da huo'o ca ne'enaguec ca chegoxoguetpi camaye, da netangui ca nhuo' le'ecpi. Cha'aye Aỹem Nataxala', sanagui camaye da yaqto' nalemaqte' da Aỹem do'onataxanot.»
Nam saishet da iviraxataua'a da ntaxaỹaxanaxanec ca shiỹaxaua
16Ñim Nataxala' 'enapega so Moisés, 'eeta':
17«Qonapega qome ñi Aarón, da saishet qome da huo'o cam 'oonolec cam chegoxoguetpi, da huo'o ca lque'emaxa da ỹaneuo ca nachetaqtaxanaxat nallec da ỹanot Ñim Nataxala'. 18Qataq saishet da ntaxaỹaxanaxanec ca huo'o ca lque'emaxa souaxat da sa nauaañi, huo'otaq huaỹoraxaic, huo'otaq sa ỹaỹamaq da lashiguiỹaxac, nache saishet da nachaateuo camaye. 19Nataqa'en da huo'otaq huacagaxaiqa naua lapia'ate huo'otaq naua lhuaxaye, 20huo'otaq vi'iỹa'a't, huo'otaq huaxarenaqolec, huo'otaq 'omaleguete naua la'ai'te, huo'otaq quesaxaic, qalqo' huo'o ana nasheguem na lo'oc, huo'otaq da qauema naua lola. 21Qaq ỹoqo'oye ca huo'o ca lque'emaxa cam chegoxoguetpi ñi Aarón, nache saishet da nachaateua'a Ñim Nataxala'. Qataq saishet qome da ỹaneuo ca nallec nachetaqtaxanaxat maye qaỹavigaxat, da qoỹanot Ñim Lo'onatac 'Enauacna. 22Qalaxaye camaye, ishet da chec aca nauole 'ayiiña, qataq aca laỹepi nachetaqtaxanaqte maye ishet da qanallec. 23Qalaxaye saishet da inoxoneua'a ye pa'auo ñi napoxonaxat ye ñegueuo ñi lpe'l, qataq saishet da taua'a añi nca'atoxonaxalate, cha'aye camaye huo'o ca lque'emaxa, nache saishet da ishepaxanaqchet ye ỹanataqa'. Cha'aye Aỹem Nataxala' maye sanem camayepi da Aỹem do'onataxanot.»
24Nache so Moisés ipagaqteetot som na'aqtacpi so Aarón, qataq so llalaqpi, qataq 'enauac so Israel le'ecpi.
