Lucas 1

_1-4'Am maye 'am ỹo'oxoraic qataq ñauochaxaua Teófilo:

'Auaỹateeta da mashe qalota som deraxan da ỹa'axat dam souaqaigui co'ollaxa. Somayepi ỹataqta ipagaqchiichigui da ỹiyiñi dam qomi' da'aqtaxaateguema soua ỹataqta hueta'agueta qataq ỹauachiguilo So Jesús co'ollaxa yem chegoqchiguiña. So Jesús ỹama'q soomaye da ỹa'axatre'c de'era na'aqtaxanaxac.

Qaq aỹem nataqa'en mashe semat da ñapaxagueetega 'enauac ye chegoqchiguiña de'era. Qaq ỹoqo'oye ỹaỹamaqchiguiñi ñaqa'en da ỹataqta shiyiñi 'enauac de'era qataq ỹataqta sepagaqchiichigui da yaqto' 'am ishet da 'auaỹaten de'era 'am qaỹa'aqtaxaateguem da ỹataqta 'eesa.

₅So Zacarías maye ntaxaỹaxanaxanec da qaitaxaỹapegue' Ñim lo'onatac 'Enauacna, maye huetaigui so na'a'q co'ollaq so Herodes maye 'amaqtaqaic lta'a na judiopi. Somaye do'onataxaategueua'a aso no'onaxanaxaqui late'erai, ỹalectaigui som ntaxaỹaxanaxanecpi da qaitaxaỹapegue' Ñim Lo'onatac 'Enauacna maye chegoxoguet so Abías. Qaq aso lhua le'enaxat Elisabet, asomaye nataqa'en maiche chegoxoguet so ntaxaỹaxanaxanec le'enaxat Aarón. ₆Aso Elisabet qataq so Zacarías ỹataqta no'o'n da lataxa'c qataq ỹataqta ỹalaxareguet 'enauac na lamaxasoxonaxacpi Ñim Lo'onatac 'Enauacna. ₇Soomaye qaica ca llale'c, cha'aye aso Elisabet sa deco'o, qataq soomaye ỹataqta mashe ỹa'axaiqa.

₈Qaq huo'o so na'a'q co'ollaq ivita so laloqo' da inoxoneuo da do'onataxan nam ntaxaỹaxanaxanecpi maye ỹalectaigui so Zacarías, da do'onataxanot Ñim Lo'onatac 'Enauacna da huaña añi no'onaxanaxaqui late'erai. ₉So ntaxaỹaxanaxanecpi da lataxac naxa qaỹauo'o ca alletaxac da yaqto' qaỹaỹaten ca taalec da pa'aigui na lauel aso no'onaxanaxaqui late'erai da ỹavigaxat ca nchenaxanaxat maye ama na laita da ỹachalec aso nca'atoxonaxalate. Qaq se'eso na'a'q taalec so Zacarías da pa'auo da ỹavigaxat se'eso nchenaxanaxat, ₁₀qaq 'enauac so shiỹaxauapi nqouagaxaueetac, pa'atauga so nqasoxoc aso no'onaxanaxaqui late'erai.

₁₁Nache nque'elaxatta da so lamaxashec Ñim Lo'onatac 'Enauacna nachaxana so Zacarías, netaua'a na aloic aso nca'atoxonaxalate. ₁₂Qaq co'ollaq so Zacarías da ila'a so namaxashec, nache ỹataqta lta'araic da lcolanaxa qataq sa ỹaỹaten ca 'eetec. ₁₃Qalaxaye so namaxashec 'enapeco':

–Zacarías, saishet da 'añi'i, cha'aye Ñim Lo'onatac 'Enauacna hua'aqtega da 'anqouagaxaunaxac. Qaq nagui añi 'arhua Elisabet huo'o qome ca llalec. Qaq camaye 'anagui qome da le'enaxat Juan. ₁₄Da lañoxoc camaye 'am ỹo'otec qome da ỹataqta lta'araic da 'antonaxac, qataq qalota nataqa'en qome na machiguiñi. ₁₅Que'eca 'aỹa'alec camaye ỹataqta 'amaqtaqaic qome naqa'en Ñim Lo'onatac 'Enauacna. Camaye saishet da nỹomgui na lataxa, cha'aye So Saqcha'a Na'añaxac Qui'itta netaigui camaye qom saxanaxa da ñiguiñi.

₁₆Que'eca nogotolec, camaye ỹo'oteguet qome da qalota na Israel le'ecpi da ỹaxaañi da ỹo'ottac na qauemsat, ime, nache ỹalaxaguet Ñim Lo'onatac 'Enauacna. ₁₇Camaye nvi', qom saxanaxa da nvi' ca Nca'alaxaqui maye Lca'aguishec Ñim Lo'onatac 'Enauacna. Qaq de'era na'añaxac saqcha'a maye hueto'ot co'ollaxa so na'aqtaxanaxanec Elías, nachera da hueto'ot qome camaye. Da la'aqtaxanaxac ỹo'oteguet da ca nta'a nmaneto caua llalqa, qataq nam sa ỹalaq ila'a da lsomaxac, nache quegue da lataxac nam ỹataqta ỹalaq. Nataqa'en ỹaỹamaxaañi na Israel le'ecpi da yaqto' ỹataqta lhuotta da ỹaconeguet cam Lca'aguishec Ñim Lo'onatac 'Enauacna.

₁₈Nache so Zacarías 'eetego' so lamaxashec Ñim Lo'onatac 'Enauacna, 'eeta':

–¿Hua'ago' ca 'eetec ca lataxac da yaqto' aỹem ishet da saỹateeta de'era? Cha'aye aỹem mashe aỹem ỹa'axaiqui, nataqa'en añi ihua.

₁₉Nache so namaxashec ỹasateguet somaye, 'eeta':

–Aỹem maye nachaỹem Gabriel, maye so'onataxaatacot Ñim Lo'onatac 'Enauacna. Qaq Ñimaye aỹem namaxa da 'am sa'aqtaxanem de'era no'on 'ara'axaỹaxac. ₂₀Qalaxaye 'am ye saishet da aỹem 'aua'amaqten, qaq nagui qaicaua naua 'ara'aqtaqa. Nato' qom mashe ivita da ipacchigui de'era 'am sa'aqtaxaateguem.

₂₁Qaq 'enauac so shiỹaxauapi maye pa'atauec, iuattaique so Zacarías, somayepi nnattega't da chaq ta'ainec da ỹataqta qaỹaloqteguet so Zacarías da nnoxonec.

₂₂Qaq co'ollaq nnoxonec so Zacarías, nache saishet da detaqa, nachaqrata da ỹauota'aisalo naua lhuaxaye. Nache so shiỹaxauapi ỹaỹaten da so Zacarías huo'o so lauanaqchec.

₂₃Qaq co'ollaq mashe inoxoore'c soua na'axa'te maye lo'onataxanaxaqui' so Zacarías da do'onataxaatapoigui aso no'onaxanaxaqui late'erai, nache somaye ỹe'eguelaxa ca lma'. ₂₄Qaq co'ollaq qaỹata'ague de'era, nache aso lhua hualaxai. Nache asomaye saishet da npa'aueeguesop so lma', choche iviraxattraue'c soua cinco ca'agoxoiqa. Cha'aye asomaye deuennataxaataco', 'eeta': ₂₅«¡Ñim Lo'onatac 'Enauacna aỹem ỹo'otec de'era, yaqto' na shiỹaxauapi saishet da saqca ca naigui naqa'en aỹem!»

₂₆Aso Elisabet mashe ivi' soua seis ca'agoxoiqa da hualaxai, co'ollaq Ñim Lo'onatac 'Enauacna ỹamaxa so lamaxashec Gabriel ye nỹecpi Nazaret, maye huaigui ye 'alhua le'enaxat Galilea, ₂₇da ira'a da la'aqtaxanaxac aso qa'añole le'enaxat María. Asomaye mashe huotaique da huaroneguet so José, maye chegoxoguet so nta'a David.

₂₈Nache so namaxashec taua'a ca hueta'a aso María, nache iquin, 'eeta':

–¡Ñim Lo'onatac 'Enauacna 'am ỹanem da lqouagaxanaqtaic maye ỹataqta no'on! Ñim Nataxala' 'am hueta'aguet.

₂₉Aso María ỹataqta ỹe'elaqchet co'ollaq hua'axaỹa de'era nquinaxanaxac maye ỹataqta saq qaỹauanapega, nache asomaye nnattapeguela't, 'eeta': «¿Chaq 'eetec ca naigui de'era nquinaxanaxac?»

₃₀Nache se'eso namaxashec 'enapeco':

–María, 'am saishet da 'añi'i, cha'aye Ñim Lo'onatac 'Enauacna ỹataqta 'am tatelec da lqouagaxanaqtaic. ₃₁Nagui 'am hualaxai. Ime, qaq huo'o qome ca 'aỹa'alec, nache 'aỹa'anagui qome da le'enaxat Jesús. ₃₂Que'eca nogotolec ivira'a qome da ỹataqta 'amaqtaqaic, qataq camaye qome da nỹaxanataguec 'eeta' «Llalec Ñim Lo'onatac 'Enauacna maye 'amaqtaqaic.» Qaq Ñim Lo'onatac 'Enauacna ỹanagui qome camaye da Nta'a, 'eeta'am naqa'en som David maye chegoxoguet. ₃₃Camaye choche tatec qome da ilotague' na Israel le'ecpi, qaq de'era lo'onataxanaxac da nta'a, damaye qaica ca loga't.

₃₄Nache aso María inat so namaxashec, 'eeta':

–¿Chaq hua'ague ca 'eetec ca lataxac de'era ye aỹem saxanaxa da saron?

₃₅Nache so namaxashec 'enapeco':

–Qomye So Saqcha'a Na'añaxac Qui'itta anac qome da 'am tanguit, nache da la'añaxac Ñim Lo'onatac 'Enauacna maye 'amaqtaqaic 'am ipelteelec. Qaq ỹoqo'oye que'eca nogotolec, camaye da nachaalataxac ỹataqta imato'ot Ñim Lo'onatac 'Enauacna, nache camaye da le'enaxat 'eeta' «Llalec Ñim Lo'onatac 'Enauacna.» ₃₆Nataqa'en añi 'arhuo' lashe Elisabet, na'aictaxa da mashe ỹa'axaino'ole, qalaxaye nataqa'en añimaye huo'o ca llalec. Na shiỹaxauapi ipettega da mashe saishet da huo'o ca llalec, qalaxaye añimaye mashe ivi' naua seis ca'agoxoiqa da hualaxai. ₃₇De'era ỹachaxan da Ñim Lo'onatac 'Enauacna ỹataqta qaica ca ỹaqalanapec.

₃₈Nache aso María 'enapeco':

–Aỹem maiche aỹem l-lata Ñim Qarataxala'. Qaq no'on qome da ipacchigui da la'aqtac maye aỹem ỹami'.

Nache so namaxashec jec.

₃₉Qaq co'ollaq qaỹata'aguelo soua na'axa'te, nache aso María iỹalapigui' da nqo'ona so nỹecpiolec maye netalec asom qaỹoqotcheguemec 'alhua ye Judea. ₄₀Nache taua'a so lma' so Zacarías, nache iquin aso Elisabet. ₄₁Qaq aso Elisabet co'ollaq hua'axaỹa da nquinaxanaxac, nache so nogotolec maye huetaigui na lauel asomaye daỹapec da ntonaxac. Nache aso Elisabet nlaqchigui So Saqcha'a Na'añaxac Qui'itta, ₄₂ime, nache asomaye ỹataqta nlamaxaren da 'enapega aso María, 'eeta':

–Ñim Lo'onatac 'Enauacna ỹactec da 'am ỹanem lqouagaxanaqtaic, qaq saishet da qoneta'am na laỹepi 'alpi. Nataqa'en na 'aỹa'alec qome ỹanem da lqouagaxanaqtaic. ₄₃Qaq ¿negue't aỹem da aỹem 'anamaqtega, 'am maye 'am late'e Ñim Ỹataxala'? ₄₄Cha'aye can choche sa'axaỹa da 'arquinaxanaxac, nache na nogotolec maye huetaigui na iuel daỹapec souaxat da ntonaxac. ₄₅¡Ñim Lo'onatac 'Enauacna 'am talec naqa'en da lta'araic lqouagaxanaqtaic, cha'aye 'aua'amaqten dam ỹachaxanapec!

₄₆Nache aso María 'enapeco':

₅₆Nache aso María no'onaisop aso Elisabet, iviraxattre'c soua tres ca'agoxoiqa. Qaq co'ollaq ime, nache ỹe'eguelaxa ca lma'.

₅₇Qaq co'ollaq ñiguiñi so llalec aso Elisabet, ₅₈nache 'enauac na lauoreuapi qataq nam lauo' le'ecpi ỹataqta lta'araic da ntonaxac, cha'aye qaila'a Ñim Lo'onatac 'Enauacna da ỹataqta lta'araic da lauotaxanaqtaic.

₅₉Qaq co'ollaq mashe ivi' soua ocho na'axa'te, nache qairouo so nogotolec da qaỹauo'o so la'anaxat na lo'oc. Nache nam hueta'a yi'iye ỹauotaique da ỹanagui Zacarías maye le'enaxat so lta'a. ₆₀Qalaxaye aso Elisabet 'enapeco':

–«¡Saishet! Namaye le'enaxat qome da Juan.»

₆₁Nache somayepi 'enapeco':

–¿Ta'ainco'?, ye qaica ca le'enaxat de'era nam 'arhuo' le'ecpi.

₆₂Nache qainattaco' so Zacarías qaỹauota'aisalo naua nhua'q da chaq negue't ca ne'enaxat maye huotaique da ỹanagui so nogotolec. ₆₃Nache so Zacarías iỹaxanaique so leraxanaxala'. Nache ỹerelec so 'eeta': «Namaye le'enaxat Juan.» Nache 'enauac qaỹa'aalatapeguec de'era. ₆₄Nache huaña nataqa'en co'ollaxa da so Zacarías qaltaq ỹe'eguelaxalec da huo'oi naua la'aqtaqa, nache ỹo'oxoreetac Ñim Lo'onatac 'Enauacna.

₆₅Huaña, nache 'enauac se'eso lauoreuapi ỹataqta huo'o da la'aalaxa, qataq nataqa'en 'enauac som netalec se'eso saqaỹoqotcheguemec 'alhua ye Judea, da qaica ca lỹa qana'aqtaxaatapigui, nachaqrata de'era. ₆₆Qaq ỹataqta deuennataxaatac 'enauac nam ivirauga da ỹaỹaten de'era, qataq nnattega't, 'eeta': «¿Chaq 'eetec qome ca taỹa'a se'eso nogotolec?» Cha'aye 'enauac da qaỹaỹaten da Ñim Lo'onatac 'Enauacna hueta'aguet somaye.

₆₇So Zacarías ỹataqta nlaqchigui So Saqcha'a Na'añaxac Qui'itta. Nache ỹan da la'aqtac, 'eeta':

₈₀Nache so nogotolec Juan nquictasheguem da llaxa qataq lta'araic da la'añaxac saqcha'a maye chegoqo'ot Ñim Lo'onatac 'Enauacna. Somaye netauga so toolec 'alhua, choche ivitta'a so na'a'q co'ollaq Ñim Lo'onatac 'Enauacna ỹamaq da ỹache de'era la'aqtaxanaxac, da da'aqtaxanem na Israel le'ecpi.