So Jesús ỹamaq so setenta y dos laỹepi lapaxaguenatacpi
1Qaq co'ollaq ime de'era, nache So Jesús lca'aua'a so setenta y dos laỹepi lapaxaguenatacpi, nache ỹamaq somayepi dostega't naqa'en, da ỹa'auaxaata'a 'enauac na naña na saq 'amaqtaq nỹecpiolec qataq naua lỹa't 'aleu' maye taỹa'alo Somaye. 2Nache 'enapego', 'eeta':
–Qalota nam iuen da huenoxoneua'a da lo'onataxanaxac Ñim Lo'onatac 'Enauacna, qalaxaye saq 'amaqtaq nam ỹa'axatec da no'on na'axaỹaxac. Qaq ỹoqo'oye, no'on da qauỹaxañiỹot Ñim Lo'onatac 'Enauacna da ỹamaq nam laỹepi maye Aỹem ca'attague' da yaqto' ỹa'axatem da no'on na'axaỹaxac ne'ena shiỹaxauapi. 3Qoqui nagui, qalaxaye maxatchaxa qome, cha'aye Aỹem qami' sama'q sheeta'am ca ỹamaq ca qagueta llalec da quichiguingui na dequi'iỹapecpi.
4Saishet da qauache aca qo'omi qataq caua qarachoxonaxaquilli' qataq caua lỹa't qarapela'achilli'. Qataq saishet da huo'o ca qaumiilec da qoviita'a da qauquinaxañiitac na nqa'aic. 5Qaq da huo'o ca qaviyeeua'a nỹec, qalaq qauquiñi 'enauac ca hueta'a que'eca nỹec, qauachaxañi da qaryaqai da que'eca nỹec no'on da taỹa'ague. 6Qaq que'eca hueta'a ca nỹec da ỹaconeguet de'era no'on, nache de'era qaryaqai ipacchigui. Qaq da sa ỹaconeguet camayepi, nache de'era qaryaqai saishet da ipac. 7Saishet da qa'aiteua'alo na nỹecpi. Nachaqrata da qoviỹa'a ca 'oonolec nỹec, nache qolliqui qataq qanỹomiigui cam qami' qoỹanema, cha'aye ca 'onataxanaxaic saishet da sa qaisheeten da lo'onataxanaxac.
8Qaq da huo'o ca qaviyiỹa nỹecpi da qami' ỹaconegueta, nache qolliqui 'enauac cam qami' qaiquia'axaneque, 9qanatayiñi 'enauac nam sa no'onpi maye hueta'a camaye, qataq qaua'aqtaxañim da lo'onataxanaxac Ñim Lo'onatac 'Enauacna da mashe nayeetai'. 10Qalaxaye da qaviyeeua'a ca saq 'amaqtaq nỹecpiolec, qaq da huo'otaq saq qami' ỹaconegueta, nache qanqo'oñiuga ca nqa'aic, nache qoñiita': 11«Qomi' saishet da qami' saqtegueua'alo. Ỹoqo'oye ivira'a na namoxoỹaxa nam qarmaye maye taleguete naua qarapia'ate, namaye sechegoxosoxouec. Qalaxaye qami' iuen da qauaỹaañi de'era, 'eeta': Mashe nayeetai' da lo'onataxanaxac Ñim Lo'onatac 'Enauacna.» 12Qaq ỹataqta 'eesa de'era qami' sa'axatema da que'eca pa'atec na'a'q, Ñim Lo'onatac 'Enauacna ỹauo'o ca lta'araic nhuaxanaguec que'eca shiỹaxauapi, napacalec da nhuaxanaguec co'ollaxa so shiỹaxauapi maye lma' so nỹecpi ye Sodoma.
So shiỹaxauapi maye sa da'amqaanataxan
13So Jesús nataqa'en, 'eeta':
«Qami' maye qoñiitaña na nỹecpi Corazín ¡ỹataqta qauem da qa'aita'ague! ¡Nataqa'en qauem da tata'ague na shiỹaxauapi maye netaña ye nỹecpi Betsaida! Cha'aye nam so'otpi maye sa qaỹauanapega maye qami' huaiguilo, taxa da so'ot da huaigui ye nỹecpi ye Tiro qataq ye Sidón, nache salcoshe'eguectaxa da yeemaye naralaxa't da lataxa'c. Qataq ỹaayiñi naua alogo maye qaica ca lya'c qataq imeeleguete naua lqaigo da ỹachaxan da ntogotaxac. 14Qaq ỹataqta 'eesa de'era qami' sa'axatema da que'eca na'a'q qom qanmit 'enauacna, qalaq qami' ỹactec ca qauacoñiiguet qanhuaxanaguiiqui, saq 'ena'am yeemaye. 15Qami' maye qoviita'a na nỹecpi Cafarnaúm, ¿qaupi'itaxañiitega peta'a da qami' qaỹaconegueta da piguem? 'A'i, saishet nachaqrata da qami' qaỹamaxañalo cam ỹapac qaỹoqchiguiña nhuaxanaqa' na 'etaxaloxoicpi.»
16Ime, nache So Jesús 'enapegalo soua lapaxaguenataqa, 'eeta': «Camachaqca ca qami' na'axaỹaxanalo, qaq nache Aỹem maye Aỹem na'axaỹaxana. Qaq cam sa qami' ỹaconegueta, qaq nache Aỹem maye saq Aỹem ỹaconeguet; qaq cam saq Aỹem ỹaconeguet, qaq nacheñi Ñim Lo'onatac 'Enauacna maye sa ỹaconeguet Ñim Aỹem namaq.»
Da lle'eguelaxasoxoc som setenta y dos napaxaguenatacpi
17Qaq som setenta y dos napaxaguenatacpi maye ỹamaq co'ollaxa So Jesús ỹataqta machiguiñi co'ollaq ñe'eguelaq. Nache da'aqtaxaatac, 'eeta':
¡'Am Qarataxala', ivira'a na saqcha'a na'añaxac leguemaxaicpi ỹataqta qomi' ỹalaxagueta da shenaqapega da seroxolec da 'are'enaxat!
18Nache So Jesús 'enapeco':
–Aja', Aỹem sauaachigui da naañi so pa'aguenataxanaxaic, chegoqtot na piguem, 'eeta'am na nqashelgaxa. 19Aỹem qami' sanema da na'añaxac, da yaqto' na na'araxanaqpi qataq na pe'elaqtoicpi saishet da qami' ique'emaqche't, qataq da yaqto' qanaviqui so pa'aguenataxanaxaic maye qami' ipa'agueeta'ape. 20Qalaxaye saishet da qantoñiitapeguec da mashe qami' ỹalaxagueta na saqcha'a na'añaxac leguemaxaicpi, nachaqrata qome da qantoñiitapeguec da mashe qoỹettauo da qare'enaxache da piguem.
So Jesús ỹo'oxoreetac Ñim Lo'onatac 'Enauacna
21Huaña, nache So Saqcha'a Na'añaxac Qui'itta ỹo'ot da ntonapigui' So Jesús, nache Somaye 'enapeco':
«'Am Ita'a maye 'aulotague' na piguem qataq ana 'alhua 'am sanot da ỹo'oxonnataxanaxac, cha'aye 'auachaxana de'era na ñaqpiolec qaltaq nam 'ena'am namayepi. Qalaxaye saishet da 'auachaxana na lta'araic da lauattonaxanaxac, qataq ỹaanaxanaxaicpi, cha'aye nachera dam maiche 'arhuennataxac 'am Ito'olec.»
22Ime, nache So Jesús 'enapego' so shiỹaxauapi maye hueta'aguet Somaye, 'eeta': «Ñi Ita'a Aỹem imato'ot 'enauac na lataxacpi, qataq qaica ca Aỹem ỹauattoota da 'ena'am Ñimaye. Qataq Aỹem maye Aỹem Llalec, ỹataqta sauattoota Ñim Ita'a maye Lo'onatac 'Enauacna, qaica ca shena'am qataq maiche lleca'aua'a cam shiỹaxaua maye sauotaique da ỹauatton Ñimaye da 'ena'am Aỹem.»
23Qaq So Jesús co'ollaq nda'ato soua lapaxaguenataqa, nache 'enapegalo, 'eeta': «Ỹataqta qauamaichiguiñi qami' maye qauloỹa'a 'enauac nam yo'oq nagui. 24Cha'aye qalota co'ollaxa som la'aqtaxanaxanecpi Ñim Lo'onatac 'Enauacna qataq som ilotague' so Israel le'ecpi, huo'o da lyaxa da ỹauaachigui qataq hua'aqchigui dam qami' qauloita'a qataq qaua'aqaichigui nagui, qalaxaye somayepi sa ỹañoxot.»
Qaỹaloqnaxana so lma' ye 'alhua Samaria
25Huo'o so dapaxaguenataxaatapeguec na namaxasoxonaxacpi nquigueua'a So Jesús da yaqto' inat da ishet da ỹasateguet so lnataxanaxac maye ỹataqta alaqaic, nache 'eeta':
–'Am Napaxaguenataxanaq, ¿chaq negue't ca iuen da so'ot da yaqto' saconeguet ca nca'alaxa maye chochaq tatec?
26Nache So Jesús ỹasateguet somaye, 'eeta':
–¿'Auaỹaten peta'a nam nanettalec ana lereguishepi so Moisés?
27Nache som dapaxaguenataxaatapeguec na namaxasoxonaxacpi, 'eeta':
–«Ỹataqta 'auauotec Ñim Nataxala' maye Lo'onatac 'Enauacna, ỹataqta 'aumato'ot 'enauac da 'arquiyaqteỹaxac, 'arca'alaxa, 'ara'añaxac qataq 'enauac da 'arhuennataxac, nataqa'en ỹataqta 'auauotec ca 'arỹa, 'eeta'am da 'arauotaxanaqtaic da maiche 'anachaalataxac.»
28Nache So Jesús 'enapeco':
–Aja', ỹaỹamaqchiguiñi da 'arasataxac, 'auo'ot qome de'era, nache 'am taỹot da nca'alaxa maye chochaq tatec.
29Qalaxaye som dapaxaguenataxaatapeguec na namaxasoxonaxacpi saishet da maguiñi souaxat de'era lasataxac So Jesús, nache qaltaq ỹe'eguelaxalec da inat Somaye, 'eeta':
–¿Negue't cam ỹalamaxat iqaỹa?
30Nache So Jesús ỹauo'o so daloqnaxana, 'eeta':
«Huo'o so na'a'q, nache huo'o so ỹale chegoqtasheguema ye Jerusalén, quetague' so nqa'aic maye taỹa'a ye Jericó. Nache huangui so nqa'aic da huo'oi soua cachaxaiqa da nhuo' somaye qataq iuaxaata'ape qataq ỹacona 'enauac so lla'ac qataq icopchaqchet.
31Qaq huaqteguet se'eso na'a'q da quetague' se'eso nqa'aic so 'oonolec nam ltaxaỹaxanaxanec na shiỹaxauapi da qaitaxaỹapegue' Ñim Lo'onatac 'Enauacna. Qalaxaye co'ollaq ila'a, nache napactalec.
32Nataqa'en nateuga yi'iye som ltaua na ntaxaỹaxanaxanecpi, qalaxaye co'ollaq ivita se'eso huaña so ỹale, nache ila'a, qalaxaye nataqa'en napactalec.
33Qaq nataqa'en nateuga se'eso nqa'aic so ỹale maye lma' ye 'alhua Samaria, qaq co'ollaq ila'a se'eso ỹale da huetaiya', nache ỹataqta huo'o da lchoxonnataxanaxa. 34Nache nqo'ona somaye, nache nataren so lque'emaxapi datannaxana na lli'i ana Oliva qataq so lataxa. Ime, qaq ỹauo'o so laxataxat. Qaq co'ollaq ime, nache ỹasaxalec so lalo 'ashena, nache ỹauegueua'a so nỹec maye nanataqa'. Huaña, nache ilotague'.
35Qaq so lỹa na'a'q co'ollaq mashe yaqta'a da jec se'eso Samaria le'ec, nache nqatsheguem aso lsheetenaxanaqte, nache ỹami' som lma' se'eso nanataqa'. Nache 'enapega, 'eeta': ‹'Aulo'ogue qome ne'ena ỹale. Qom huo'o aca ỹacauec lavigaxaiste, qaq maiche sesheeten qom ñe'eguelaq.›
36Qaq So Jesús co'ollaq imat se'eso ỹa'axattac, nache inat som dapaxaguenataxaatapeguec na namaxasoxonaxacpi, 'eeta':
Hua', nagui 'am senat. Se'esoua tres maye quetrague' se'eso nqa'aic ¿chaq negue't ca 'aupeta'a da ỹachaxan da ỹoqta lỹa se'eso shiỹaxaua maye nhuo't soua cachaxaiqa?»
37–Qomye som huo'o da ltaunaxanaxac somaye, qataq ilotague', 'enapeco' som dapaxaguenataxaatapeguec na namaxasoxonaxacpi.
Nache So Jesús 'enapeco':
–'Aue, qojec, nataqa'en 'auo'ot qome de'era.
So Jesús hueta'a so lma' aso Marta qataq aso María
38Co'ollaq taỹa'ague da Jerusalén So Jesús qataq soua lapaxaguenataqa, nache huo'o ye taaleguete nỹecpi. Qaq yemaye, nache hueta'a aso 'alo le'enaxat Marta asomaye ỹaconeguet So Jesús qataq ỹauegueua'a so lma'. 39Qaq se'eso nma', nache hueta'a aso María, asomaye lqaỹa aso Marta. Qaq asomaye nso'ootañi, datato'ot So Jesús, nache na'axaỹaxaatega 'enauac nam ỹa'axattac Somaye. 40Qaq aso Marta, qalaxaye ỹataqta qaica ca ldaqa', cha'aye ỹo'ottac so nallec qataq 'enauac nam laỹepi lo'onatacpi ye lma'. Ỹoqo'oye nquigueua'a So Jesús, nache 'enapega, 'eeta':
–'Am Ỹataxala', ¿ỹataqta qaico' ca taỹapigui 'arhuel ye añi ỹaqaỹa aỹem ndoqteeteguet 'enauac nam ỹo'onatacpi? Qonapega taxa añimaye da aỹem itauan.
41-42Qalaxaye So Jesús ỹasategueto' asomaye, 'eeta':
–Marta, Marta, ¿ta'ainco' ye ỹataqta 'aumatalec da 'arhuogoxo nam chochaqna? Huo'o da 'oonolec maye ỹataqta 'onaxaic. Qaq añi María lca'ateua'a, qaq damaye qaica ca ishet da nqat.
