Lucas 13

₁Qaq nachesoua se'esoua na'axa'te da huo'oi soua nvi't, nache da'aqtaxaatrapeguem So Jesús, da so nta'a Pilato ỹalecneguet na ltago'q so lalaatac shiỹaxauapi maye lma' ye 'alhua Galilea nam ltago'q som shiguiỹacpi, maye ỹauotaique da ỹavigaxat da lachetaqtaxanaxat. ₂Nache So Jesús 'enapeco':

–¿Qami' peta'a qaupi'itaxañiitega da se'eso shiỹaxauapi, qaỹo'otec de'era souaxat da ỹapactec da 'etaxaloxoicpi, qaq saq 'ena'am na laỹepi maye lma' ye 'alhua Galilea? ₃'A'i, saishet. Qami' nataqa'en qom saishet da qaỹa'axañiire'c naua qano'onataxacolli', qaq nataqa'en qaullivi qoñiita'am da l-leuaxa somayepi. ₄¿Qaupi'itaxañiitega peta'a da se'eso dieciocho, maye ileu co'ollaq hua'axañi aso naue maye naña ye Siloé, da somayepi talec de'era, cha'aye ỹoqta ỹapactec da lasouaxashet qaq saq 'ena'am na laỹepi maye netaña ye Jerusalén? ₅¡'A'i, saishet! Qami' nataqa'en da saishet da qanaralaxache da qarataxaqui, qataq da sa qaualaqaiguet Ñim Lo'onatac 'Enauacna, nache nataqa'en qaullivi, qoñiita'am da l-leuaxa somayepi.

₆Nache So Jesús ỹauo'o so daloqnaxana, 'eeta':

«Huo'o so ỹale huo'o aso lañiguishe higo, maye ñaxattalec so lanaxanaqa'. Qaq huo'o so na'a'q, nache jec da demeenaxana, qalaxaye saishet da huo'o aca ỹanata ala. ₇Ime, nache 'enapega som ỹale maye ilotague' som lanaxanaqa', 'eeta': ‹Mashe ivi't naua tres vi'iye, da aỹem ñe'eguelaqta'a ara'ara qo'oipaq da ñe'eguena'a aca ala, qalaq ỹataqta ỹauano' da huo'o aca sanata. Qaq no'on da 'auquesoq aramaye. Cha'aye shaco' da netalec yi'iye 'alhua.› ₈Qalaxaye som ilotague' se'eso 'alhua 'enapeco': ‹'Am ña'aco', no'on da nachaqnata ne'ena vi'i da 'aua'aqta'a aramaye, aỹem ñesherot qome aramaye, qataq secorot ca lata'. ₉Qaq saiuena'a da ishet da huo'o aca ala aramaye ne'ena dalaxaic vi'i. Qaq qom huo'otaq saishet da huo'o aca ala, qaq ishet qome da qaiquesoq.›»

₁₀Huo'o so na'a'q mataxaqui, nache So Jesús dapaxaguenataxaatac, huetaigui asom napaxaguenaxaqui na judiopi. ₁₁Qaq ỹalectauo aso 'alo maye mashe ivi' naua dieciocho vi'iye da sa no'on. Huo'o som saqcha'a na'añaxac leguemaxaic maye qollemai naqa'en, nache asomaye saishet da ỹalamaqatcheguem. ₁₂Nache So Jesús co'ollaq ila'a, nache iỹaxana. Qaq 'enapega, 'eeta':

–'Am 'alo, nagui 'am huesoueeguesop da 'aralolaxa.

₁₃Nache ỹashel-lec asomaye, huaña, nache asomaye ishet da nlaxaasheguem, nache ỹo'oxoreetac Ñim Lo'onatac 'Enauacna. ₁₄Qalaxaye som ilotague' asom paxaguenaxaqui ỹataqta dalemata, souaxat So Jesús da datannaxangui so na'a'q mataxaqui. Nache 'enapega so shiỹaxauapi, 'eeta':

–Huo'oi mque' naua seis na'axa'te, maye ishet da qaỹo'onataxanguilo. Qaq nachenauactaxa huetoiguilo da qauanaqui, da yaqto' qami' qanatare'n, qaq saishet da nacheye ye na'a'q mataxaqui.

₁₅Nache So Jesús ỹasat, 'eeta':

–Qami' maye qoñiitega da qami' 'eesora, ¿peta'a saisheto' da huo'o ca 'oonolec da qoñiita da isouec ca lauegaxanaxala' huaca, huo'otaq ca lalo 'ashena, ca na'a'q mataxaqui da yaqto' ỹauegaxasom da nỹomaxan? ₁₆Qaq ara'ara 'alo ye maiche llale so Abraham, qaq so pa'aguenataxanaxaic ye icoñetta'aguet aramaye de'era nalolaxa, nagui mashe ivi' naua dieciocho vi'iye, qaq ¿peta'a saisheto' da qaisoueeguesop de'era lalolaxa aramaye ne'ena na'a'q mataxaqui?

₁₇Qaq co'ollaq 'enapec de'era So Jesús, nache 'enauac nam depa'aguenataxaatac ỹataqta huo'o da la'aloxo. Qaq nam shiỹaxauapi, qalaxaye 'enauac huo'o da ntonaxac, souaxat nam ỹauaachigui ỹo'otpi So Jesús maye qaica ca 'ena'am da llo'oxoyec.

₁₈Nataqa'en So Jesús 'enapeco':

–¿Negue'tom ca 'ena'am ñaqa'en da lo'onataxanaxac Ñim Lo'onatac 'Enauacna? ¿Chaq negue'tom ca saloqnaxana? ₁₉Damaye, 'eeta'am aca ala ana le'enaxat mostaza da ca shiỹaxaua ỹacona, ime, qaq ỹaalec ca na'alhua, ime, qaq ñaxat, ivitta'a da 'eeta'am aca qo'oipaq ỹataqta late'erai. Ime, qaq anac nam maỹopi, nache ỹo'ot na lpata'cpi ỹanaguilo naua lcoue.

₂₀So Jesús nataqa'en 'enapeco':

–¿Chaq negue'tom ca saloqnaxanem da lo'onataxanaxac Ñim Lo'onatac 'Enauacna? ₂₁Damaye 'eeta'am peta'a aca ỹasheeraxachigui ca ndaqñiguishec maye ỹacona aca 'alo. Ime, nache ỹasaxaigui ca ldaqñiguishec, nache acamaye ima da ỹasheeraxachigui 'enauac cam ndaqñiguishec.

₂₂So Jesús co'ollaq tata'ague da Jerusalén, nache taỹalec nam nỹecpi qataq nam nañalo nam saq 'amaqtaq nỹecpiolec, nache dapaxaguenataxaatac. ₂₃Nache huo'o so denataxan, 'eeta':

–'Am Qarataxala', ¿saq 'amaqtaq peta'a qome na qanca'alaxatec?

Nache Somaye 'enapeco':

₂₄–Qana'añaxache qome da qaunoxoñiiua'a ñim lasom maye saq 'amaqtaq, cha'aye Aỹem shenapec da ỹataqta qalota qome na nshetaique da inoxoneuo, qalaxaye saishet da ỹañoxot. ₂₅Cha'aye que'eca lma' ca nỹec, da ime da ñesheguem, nache ỹapogui ca lasom ca lma', nache qami' maye qapa'aitauec qauỹaxañiitapegueua'a que'eca lasom. Qaq qoñiita': «'Am Qarataxala', qomi' 'anauategueta.» Qalaxaye camaye ỹasat, 'eeta': «Aque', sa saỹaten ca qauachegoqoita'ague.» ₂₆Huaña, nache qami' qome qoñiita': «Qomi' 'am qarquia'axaua qataq 'am qanỹomaxaua caillaye, qataq 'auapaxaguenataxaatac can huaña ye sonaqtaña qarma'.» ₂₇Qalaxaye camaye qami' 'enapegalo, 'eeta': «Aỹem sa saỹaten ca qauachegoqoita'ague. Aỹem qoquiỹa'ai 'enauac da qoñiita, cha'aye qauo'ocheetac da sa ỹaỹamaxañi.» ₂₈Huaña, nache qami' qanỹiñiitac qome qataq qaunaquiỹa't naua qarvilli' souaxat da qarhuogoqoi, qom qauloỹa'a ca Abraham, Isaac, Jacob qataq 'enauac som la'aqtaxanaxanecpi Ñim Lo'onatac 'Enauacna, qom huetaigui da lo'onataxanaxac Ñimaye. Huaña, nache qami' qaỹamaqraue'c. ₂₉Cha'aye anac qome na shiỹaxauapi maye chegaqa'ague da sheu' qataq da taguiñi qataq na chegaqa'ague da yo'oxoñi qataq da avit, da yaqto' nso'ooñi da deque'e qom netaigui da lo'onataxanaxac Ñim Lo'onatac 'Enauacna. ₃₀Huaña qome, nache huo'o nam nagui nca'ataxaatauo, qaq nachena qome na la'auaxanec, qataq huo'o qome nam nagui la'auaxanec, qaq nachena nam qaipa'axaatec.

₃₁Qaq nacheso se'eso na'a'q da huo'oi soua nvildeuo, chegoqraigui na fariseopi. Nache da'aqtaxaarem So Jesús, 'eetra':

–Qoca'ai qome ne'ena, ten ñi Herodes ỹauotaique damaxasoxoolec da 'am qaỹalauat.

₃₂Qalaxaye Somaye 'enapeco':

–Qauesomiỹa, qaua'aqtaxañim qome aca'aca huaxaỹaxa, qoñiita': «Nagui na na'a'q, qataq qonte' so'orauec na ne'ecpi leguemaxaicpi, qataq ñataren na sa no'onpi, qaq que'eca lỹa na'a'q, nache seme.» ₃₃Cha'aye ỹoqta 'eesa da nagui qataq qonte' qataq que'eca lỹa na'a'q, da Aỹem iuen da shecto'ot da ỹecỹaxac, choche sevitta'a ye nỹecpi ye Jerusalén. Cha'aye nache huaña yemaye da qaỹalauat som na'aqtaxanaxanecpi.

₃₄¡Ỹataqta qauem da qauo'oche qami' maye qoñiitaña ye Jerusalén, cha'aye qaualauache som la'aqtaxanaxanecpi Ñim Lo'onatac 'Enauacna, qataq qauasaqaitalec na coma' som lamaxashecpi maye qami' namaxalo Ñimaye! ¡Ỹataqta huo'o naxa da iyaxa da llaỹona't na 'aỹa'alaqpi, da sheeta'am aca 'olgaxa da nqapaxaalec ca llalaqpiolec, qalaq qami' saishet da qanashiñi! ₃₅Qaq ỹoqo'oye naua qarma'achilli' qome qalaq ỹataqta tooleguete, qaq nache tachiguiña nagui da saishet da Aỹem qanauañi', nato' qom qoñiita': «Ỹataqta no'on qome da llecỹaxac nam nactaigui da le'enaxat Ñim Nataxala'.»