Lucas 16

₁So Jesús nataqa'en 'enapegalo soua lapaxaguenataqa, 'eeta':

«Huo'o so ỹale ỹataqta sallaxanec. Qaq somaye huo'o so ipataxaguet da ilo'ogue naqa'en so lma'. Nache qaỹa'aqtaxaneua'a somaye da se'eso ilotague' naqa'en so lma', choche ỹa'ashaxan de'era lsallaxa. ₂Nache se'eso na'aco' iỹaxaneuga somaye, nache 'enapega, 'eeta': ‹¿Chaq hua'ague ca 'eetec da aỹem qana'axateua'a, souaxat 'am? Ña 'analoqna't qome da 'aro'onataxanaxac. Ime, qaq aỹem 'andoua'a. Cha'aye saishet qome da queta da 'am 'aulotague' ye ima'.›

₃Nache se'eso ilotague' so nma' deuennataxaatac, 'eeta': ‹¿Chaq hua'agom ca sheetec nagui, cha'aye ñi ña'aco' saishet da ỹauo'o ca ỹo'onatac? Ye aỹem qaica ca ỹa'añaxac da so'onataxan na 'alhua, qataq ỹataqta huo'o da icoxo da choche sashelaxaatac. ₄Aja', sanata nagui da sheetec, da yaqto' huo'o qome ca aỹem ỹaconeguet da saua'a ca lma', qom ivita da qaica ca ỹo'onatac.›

₅Nache iỹaxaatauga ñi 'oonolec som neto'ot aso lavigaxaiste som na'aco'. Nache som la'auaxanec inat, 'eeta': ‹¿Negue't aca neto'ot 'aravigaxaiste so ña'aco'?› ₆Nache somaye 'enapeco': ‹Qomye cien aso laỹe' na lli'i ana oliiva aso ỹavigaxaiste.› Nache som ilotague' so nma', 'eeta': ‹'Ana ana 'aravigaxaiste lmalate; 'auỹalapegue' qome da 'anso'ooñi, ime qaq 'anquigaxaañi, 'iyiñi aca cincuenta.› ₇Ime, qataq inat so lỹa, 'eeta': ‹Qaq 'am, ¿negue't aca 'aravigaxaiste?› Nache somaye, 'eeta': ‹Qomye cien aso naloqnaxaqui na trigo.› Nache som ilotague' so nma', 'eeta': ‹'Ana ana 'aravigaxaiste lmalate; 'anquigaxaañi, 'iyiñi qome aca ochenta.›

₈Huaña, nache so 'aco' saishet da iqoleguet da se'eso lhuataxanaxanec maye qauem, somaye ỹataqta sa nqalat da huo'o ca ỹo'ot. Qaq 'era da 'eetec nam ỹauotec nam huetalec ana 'alhua, namayepi ỹataqta sa nqalat da huo'o ca ỹo'otec ca lỹa, qaq saq 'ena'am nam huetaigui na yo'oqchiguiñi.

₉Qaq ỹoqo'oye qami' seqatalo da qauo'onataxañiỹa ana alom na shiỹaxauapi maye ỹachegoxotaigui da latenataxanaxac, da yaqto' huo'o ca qanauochaxauai, yaqto' qom ivita da imeuo ana anom, nache Ñim Lo'onatac 'Enauacna qami' ỹaconegueta da piguem.

₁₀Cam 'onaxaic da na'aqtaguec, souaxat cam saq 'amaqtaq maye ilotague', qaq nache 'ena'am no'on da na'aqtaguec da ilo'ogue ca qalota; qaq cam qauem da na'aqtaguec da ilotague' cam saq 'amaqtaq, qaq nache 'ena'am qauem da na'aqtaguec da ilo'ogue ca qalota. ₁₁Qaq qami' da saishet da qauaỹachiñi da qauloỹeegue cam saq 'amaqtaq qataq qaica ca naigui, 'eeta'am aca anom maye qaỹachegoxotaigui da natenataxanaxac, qaq ¿negue'to' ca ishet da qami' pi'iỹa'alo da qami' ipataxaleguete cam ỹataqta huo'o ca naigui? ₁₂Qataq da huo'otaq qauem da qana'aqtaguiqui da qauloitague' cam saishet da qaralamaxache, qaq ¿ca 'eeteco' da Ñim Lo'onatac 'Enauacna da qami' ipataxaleguete da qauloỹeegue cam iqataxaatapigui' Ñimaye da qaralamaxache qome?

₁₃Qaica ca namaxashec da ishet da do'onataxanoto caua dos na'aco'ye, cha'aye ishet da 'oonolec ca ỹauotec saq 'ena'am ca lỹa. Qataq ishet da ỹalaxaguet ca 'oonolec qaq ca lỹa qalaq saishet da ỹalaxaguet. Qaq nache 'eetec nataqa'en, da saishet da qaỹo'onataxanot Ñim Lo'onatac 'Enauacna qataq da nsallaxa.»

₁₄Nache hua'aqtega 'enauac de'era nam fariseopi maye ỹataqta lqopitaxat da nsallaxa, nache ỹe'eetac So Jesús. ₁₅Nache So Jesús 'enapeco':

«Qami' maye nacheqami' choche qanachaxañiitega 'enauac na shiỹaxauapi da qami' no'o'n, qalaxaye Ñim Lo'onatac 'Enauacna ỹauatto'n naua qarquiyaqchilli'. Cha'aye cam ỹamata'ac nam shiỹaxauapi da 'eetega 'amaqtaqaic, qaq nacheca cam ỹataqta ỹaỹemec Ñim Lo'onatac 'Enauacna.

₁₆Choche ivitta'a co'ollaq nvi' so Juan da na shiỹaxauapi, iuen da ỹalaxaguet na namaxasoxonaxacpi maye chegoqo'ot so Moisés qataq nam lapaxaguenataxanaxacpi som la'aqtaxanaxanecpi Ñim Lo'onatac 'Enauacna. Qalaxaye nagui, nache qaỹa'axat da no'on na'axaỹaxac maye ỹa'axat da lo'onataxanaxac Ñim Lo'onatac 'Enauacna, qaq 'enauac na shiỹaxauapi ỹataqta lta'araic da na'añaxataxac da huotaique inoxoneua'a damaye.

₁₇Qalaxaye ỹactec da saqalaq da ishet da nlaguiñi na piguem, qataq ana 'alhua, qaq saq 'ena'am na namaxasoxonaxacpi, cha'aye qaica ca saq ipacchigui cam ỹa'axat ñim 'oonolec namayepi.

₁₈Ca ỹale da huo'otaq nalate' aca lhua, ime, qaltaq huaroneguet aca lỹa 'alo, nache camaye huo'o da lasouaxashet. Qataq cam huaroneguet aca 'alo maye nalate' ca lhua, nataqa'en camaye huo'o da lasouaxashet.»

So Jesús nataqa'en 'enapeco':

₁₉Huo'o co'ollaxa so ỹale ỹataqta sallaxanec, somaye ỹaatrañi naua no'oñi anogo, qataq qaica ca 'ena'ama. Qaq somaye ỹo'ottac 'enauaque naua na'axa'te da lta'araic lquia'axac. ₂₀Qalaxaye so nasom somaye, hueta'a so ỹale maye choxoraq le'enaxat da Lázaro. Somaye ỹataqta imoota na lo'oc na lli'i na lquesaxa, qaq huo'o som ndoua'acnaxa da hueta'a yemaye, ₂₁qaq anac naxa na pioxoppi, da napitac na lli'i na lo'oc somaye. Qaq se'eso choxoraq, ỹataqta ỹaguec na lqouaxa, ỹoqo'oye nshetaique da chec na lsoche na nallec maye naañi se'eso lquia'axala' som sallaxanec.

₂₂Qaq huo'o so na'a'q, nache se'eso ỹale maye choxoraq ileu. Nache anac na lamaxashecpi Ñim Lo'onatac 'Enauacna da ỹauega ca ndaqa' maye ỹataqta ỹo'oxoraq, cam hueta'a nataqa'en so Abraham maye chegoxoguet somaye. Qaq co'ollaq qaỹata'ague, nache nataqa'en ileu so ỹale maye sallaxanec. Nache co'ollaq qailareñi, ₂₃nache taỹa ca nhuaxanaqa' na 'etaxaloxoicpi, huaña, nache ỹataqta ỹaguec da nque'eenaxac. Qaq huaña yemaye, nache ila'a so Abraham ỹataqta sa qaỹoqotcheguema, qataq so Lázaro nso'ootañi huaqta'ai' somaye.

₂₄Nache so sallaxanec iỹaxana so Abraham, 'eeta': «'Am ita'a Abraham, aỹem 'auchoxoren. 'Anamaq na Lázaro, da yaqto' ipet na llaxaata lsheenec ca 'etaxat da yaqto' ipet na ỹachaxat. Ten ỹapactec da ñeque'eenaxac da sootangui ne'ena norec.» ₂₅Qalaxaye so Abraham ỹasategueto' somaye, 'eeta': «'Am ỹalec, 'auennate co'ollaq ña qanca'alliitauec, qaq 'am 'auaỹamaqchiguiñi, qaq ñi Lázaro qalaq qauem da llecỹaxac. Qaq ñimaye nagui hueta'a ne'ena qalaq huo'o da lamaicỹaxac, qaq 'am qalaq 'anmeneguet da huo'o da 'anque'eenaxac. ₂₆Qaq saishet da nachaqrata de'era, cha'aye huo'o nam ỹataqta sa qaỹoqchiguiñi tocot lta'araic maye npaxatta'agueta qami' nataqa'en qomi'. Qaq ỹoqo'oye saishet da huo'o ca chegoqchegueena'a da tañecna, qataq saishet da huo'o ca chegaqañecna da nasheguema ne'ena souaqta'a.» ₂₇Nache som sallaxanec 'enapeco': «Abraham, 'am ñachoxonnot nagui da 'auamaq ñi Lázaro da nqo'ona ye qarma', ₂₈da yaqto' da'aqtaxanema caua cinco ỹaqaỹa't, da caamaye da saishet da ỹaxaare'c da ỹo'ottrac da qauem, nache ishet nataqa'en da nvilda'a ne'ena que'eenaqa'.» ₂₉Qalaxaye so Abraham ỹasateguet somaye, 'eeta': «Caua 'arqaỹa't mashe hueto'oto ana nere maye huetalec na la'aqtacpi Ñim Lo'onatac 'Enauacna. Qalaq ¿ta'ainco' da saishet da itaxaỹaxa'n? Qataq ¿ta'ainco' da saishet da ỹalaxagueta?» ₃₀Nache som ỹale sallaxanec ỹasat, 'eeta': «Aja' 'am ito'olec Abraham, ¡Qalaxaye damaye saishet da nachaqrata lataxac! Cha'aye da huo'o ca qaltaq nca'aleeguesop nam leuaxaicpi da nqo'onalo caamaye, nache ỹoqta 'eesa ñaqa'en da caamaye ishe't da ỹe'eguelaqoto Ñim Lo'onatac 'Enauacna.» ₃₁Qalaxaye so Abraham 'enapeco': «Da saishet da ỹalaxaguet so Moisés qataq som la'aqtaxanaxanecpi Ñim Lo'onatac 'Enauacna, qaq ¡hua'aguectoxo' da ishet da ỹalaxaguet da huo'o ca qaltaq nca'aleeguesop na leuaxaicpi!