Lucas 19

₁So Jesús co'ollaq ivireua'a ye Jericó, nache quichiguingui so nỹecpi. ₂Qaq se'eso nỹecpi hueta'a so sallaxanec le'enaxat Zaqueo. Somaye lataxala' nam ỹacootapeeguet ana nsheetenaqte ca nta'a maye netaña ye nỹecpi ye Roma. ₃Qaq somaye nshetaique da ỹauatton So Jesús. Qalaxaye saishet da ỹañoxot da ilo'ot, souaxat somaye da huaxarenaqolec, qataq ỹataqta qalota so shiỹaxauapi. ₄Nache somaye hua'au nqalgoqta, cha'aye nshetaique da ỹauatton So Jesús. Ime, qaq quisheguemec aso qo'oipaq late'erai maye nangui som nqa'aic maye tateuga So Jesús. ₅Qaq So Jesús co'ollaq nlectot aso qo'oipaq maye huetasheguemec somaye, nache ilasheguemec. Nache 'enapega, 'eeta':

–'Am Zaqueo, sa 'anaỹaloxon qome da 'aunotec, cha'aye Aỹem na na'a'q soua'a ca 'arma'.

₆Nache so Zaqueo ỹataqta sa naỹaloxon da huenotec, nache qalota da ntonaxac da ỹauegueua'a ca lma' So Jesús. ₇Qaq co'ollaq qaỹauaachigui de'era, nache qanayectega, qoỹeeta': «So Jesús qache ishet da taua'a ye lma' so ỹale maye 'etaxaloxoic.» ₈Qaq co'ollaq ime da nquia'axac, nache nachaañi so Zaqueo, nache 'enapega So Jesús, 'eeta':

–'Am Ỹataxala', aỹem qome secolaxatchiguingui na laiñi da isallaxa. Ime, qaq sanem nam choxoraqpi. Qaq da huo'otaq huo'o ca secachiỹot, nache cuatro da she'eguelaxalec da she'eguelaxatot camaye cam secachiỹa.

₉Nache So Jesús 'enapeco':

–Nagui na na'a'q, 'am qataq 'enauac nam hueta'a na 'arma' qanca'alliiuec, cha'aye nataqa'en maiche 'am llalec so Abraham. ₁₀Cha'aye Aỹem Shiỹaxaua Llalec, ñanac da ñimitaique qataq ñeca'alaxatec nam shiỹaxauapi maye qaỹoqtaique naqa'en Ñim Lo'onatac 'Enauacna.

₁₁Qaq So Jesús co'ollaq mashe saqaỹapeque ye nỹecpi ye Jerusalén. Nache so shiỹaxauapi maye na'axaỹaxaatega Somaye, ipi'itaxaatega da Ñim Lo'onatac 'Enauacna mashe ivita ca laloqo' da ilo'ogue 'enauacna. ₁₂Nache So Jesús ỹauo'o da daloqnaxana, 'eeta':

–Huo'o so ỹale 'amaqtaqaic, somaye qoỹanagui da nta'a, da ilo'ogue cam hueta'a 'alhua, qaq somaye jec da nqo'ona so lta'a na nta'alpi da yaqto' qoỹanagui da nta'a. Qaq co'ollaq mashe ime da qoỹanagui da nta'a, nache ỹe'eguelaxa cam 'alhua maye chegoqchiguiña da yaqto' ilo'ogue. ₁₃Qaq co'ollaq yaqta'a da jec, nache iỹaxaneugalo soua diez lo'onataxanaxanaqa. Nache ỹami' ñi 'oonolec soomaye aso alom. Nache 'enapegalo', 'eeta': «Qauo'onataxañiỹa qome ana'ana aỹom, qanmiñiitac, choche ivitta'a qome da ñe'eguelaq.» ₁₄Qalaxaye so shiỹaxauapi maye lma' se'eso 'alhua, ỹataqta nquiỹa somaye. Nache ỹauo'o so ỹamaq da ica'ataxanaxaalec somaye da yaqto' 'enapega, 'eeta': «Qomi' sa saỹamaxarenaq ne'ena ỹale da qarta'a.» ₁₅Qalaxaye nache 'ena'am qoỹanagui da nta'a somaye. Ime, nache ñe'eguelaxa so lma'. Qaq co'ollaq mashe nvi', nache damaxasoxoneugalo soua lo'onataxanaxanaqa som ỹanema aso alom, cha'aye nshetaique da ỹaỹaten chaq negue't aca laueque ñi 'oonolec. ₁₆Nache so la'auaxanec nachaateuo, nache 'eeta': «'Am Ỹataxala', ana 'om ivi' ana diez ana dalaxai laueque.» ₁₇Nache so nta'a 'enapeco': «Aja', no'on, ỹaỹamaqchiguiñi, ỹataqta 'am no'on no'onataxanaxanec. Qaq cha'aye ỹataqta 'apactelec da 'auo'ot, dam saq 'amaqtaq maye 'am sepataxalec, qaq nagui sanagui da 'am nataxala' da 'aulo'oguelo caua diez nam 'amaqtaqaic nỹecpi.» ₁₈Qataq anac som nca'attauo, nache 'enapeco': «'Am Ỹataxala', ana 'om ivi' ana cinco ana dalaxai laueque.» ₁₉Qaq nataqa'en so nta'a 'enapega, 'eeta': «'Am nataqa'en 'am sanagui, nagui da 'am nataxala' da 'aulo'oguelo caua cinco nam 'amaqtaqaic nỹecpi.» ₂₀Qataq anac som lỹa, nache 'eeta': «'Am Ỹataxala', 'ana ana 'om. Anamaye choche saỹamaxat, sachalec so hualoxolaỹi, ₂₁cha'aye aỹem huo'o da icolanaxa da qoneta, cha'aye ỹataqta 'am sa qaramchigui da 'auacona ca sa 'aralamaxat, qataq da 'anqat ana ala cam saq 'añiguishec.» ₂₂Nache som nta'a 'enapeco': «'Am no'onataxanaxanec qauemaic. Da maiche 'ara'aqtac, nachera da sachegoxotchigui da sauo'o ca 'anhuaxanaguec. 'Am 'auaỹateetac mque' da aỹem sa qaramchigui da sacona cam sa ỹalamaxat, qataq da ñeqat ana ala cam saq ỹañiguishec. ₂₃Qalaq ¿ta'ainco' ye saq 'aroua'a añim laỹe' ana anom, yaqto' saconeguet acam laueque ana aỹom da ivita da ñe'eguelaxa na ima'?» ₂₄Nache 'enapega nam hueta'a yemaye, 'eeta': «Ña qauacoñiỹa ara'ara anom maye hueto'ot damaye. Ime, qaq qaỹa'añim dam hueto'oto daua diez.» ₂₅Nache somayepi 'enapeco': «'Am qarataxala', qalaxaye damaye mashe hueto'oto daua diez lca'achole.» ₂₆Nache som nta'a 'enapeco': «Aỹem qami' shenapegalo da ca huo'o ca qalota hueto'ot, qalaq camaye ỹactec qanqa'en ca qoỹami'; qaq cam qaica ca hueto'ot, qalaq nache 'ena'am ivira'a da qaiuotaxanec cam saq 'amaqtaq maye hueto'ot. ₂₇Qaq nam aỹem ipa'agueetacpi maye sa ỹaỹamaxaren da aỹem lta'a, qalaq qanaviquiiua'a aỹem. Ime, qaq qaualauache.»

₂₈Qaq co'ollaq ime da nasaxauec de'era So Jesús, nache jec da taigue da Jerusalén. ₂₉Qaq co'ollaq mashe nayeetaua'alo yeua Betfagué qataq ye Betania yem saqaỹapeque añi saqaỹoqotcheguemec 'alhua maye nanqa' ana Olivo. Huaña, nache ỹama'q soua dos lapaxaguenataqa. ₃₀Nache 'enapegalo', 'eeta':

–Qanqo'oñiỹa qome nam saqaỹapeque saq 'amaqtaq nỹecpiolec. Qaq qom qaviyiỹa, nache qauloỹa'a ca 'ashena qaicoñettai'. Camaye saxanaxa da qanayeelec. Qaq qausoiuec qome, nache Aỹem qanaviquiỹa. ₃₁Qaq da huo'o ca qami' ina't da chaq ta'ainec da qausoiuec, nache qoñiita qome da qara'aqtaqui: «Ñim Qarataxala' iuen namaye.»

₃₂Nache je'c soua lapaxaguenataqa, nache ipacchigui 'enauac dam 'enapec So Jesús. ₃₃Nache co'ollaq mashe isotrapegue'c so 'ashena, nache ana'c soua lalamaxa't so 'ashena. Nache denataxaata'ape, 'eetra':

–¿Ta'ainco' ye qausoitapeguec na 'ashena?

₃₄Nache soomaye 'ena'apo':

–Qomye iuen namaye Ñim Qarataxala'.

₃₅Nache qaỹauega somaye So Jesús. Ime, nache ỹasaxaleguete soua lapo'ote soomaye so 'ashena, nache qoỹanaxanaxaalec So Jesús. ₃₆Nache co'ollaq nayeetaua'a ye Jerusalén So Jesús, nache qalota so shiỹaxauapi lapaxangui na lapo'pi so nqa'aic maye tateua'a Somaye. ₃₇Qaq co'ollaq mashe saqaỹapeque asom saqaỹoqotcheguemec 'alhua maye nanqa' ana Olivo, co'ollaq mashe quiguingui so ca'amegue soomaye da nqo'ootra ye Jerusalén, nache huaña da 'enauac nam ỹa'amaqteetac Somaye qataq quetague' ỹa'alaqtagui, souaxat da ntonaxac. Nache ỹo'oxoreetac Ñim Lo'onatac 'Enauacna, souaxat 'enauac nam sa qaỹauanapigui maye ỹo'ot So Jesús da ỹauaachigui somayepi. ₃₈Nache 'eeta':

₃₉Nache nam fariseopi maye ỹalectaigui se'eso shiỹaxauapi, 'eeta':

–'Am Napaxaguenataxanaq, no'on taxa da 'anhuogaxa na 'am ca'attague'pi.

₄₀Qalaxaye So Jesús ỹasateguet 'eeta':

–Ỹataqta 'eesa de'era qami' sa'axatema da nañaxaañi ne'enapi, nache na coma'pi ishet da ỹa'alaq.

₄₁Qaq co'ollaq mashe nayeetaua'a ye Jerusalén, nache co'ollaq ilaua'a yemaye, nache So Jesús nỹeelec som shiỹaxauapi maye hueta'a yemaye. ₄₂Nache 'eeta':

–¡Ỹataqta lta'araic da iyaxa, da nagui qami' qauaỹaañi ca naigui da qoviitaigui da qarlagaxayiqui! Qalaxaye qami' saishet da qauaỹaañi. ₄₃Qalaxaye huo'o qome ca na'a'q, qaq qami' qaviyiỹalo caua na'axa'te maye ỹataqta qauema, qom ca qanpa'aguenaxauai nauaxaỹaxaasheguem ca lpaqtaxanaxat da qami' iconnaxaasopa. Ime, qaq qami' coleesopa, ỹataqta sa ỹauo'o ca qardaqa'ai da qami' iloquiaxa'n. ₄₄Nache qami' ilaxachiguilo ỹataqta qami' nmatchiyiñi. Saishet da huo'o ca 'oonolec da nachattañi na coma'pi maye qarpaqtaxanaxache. Qataq 'enauac da qoñiita qaullivi, qataq qanque'etaxañiigui 'enauac de'era, cha'aye saishet da qaua'amaqchiñi da Ñim Lo'onatac 'Enauacna Aỹem namaq da qami' ñeca'alaxatrec.

₄₅Nache So Jesús inoxonoigui aso no'onaxanaxaqui late'erai. Ime, nache ỹo'orauec 'enauac nam nmeetega'tpi maye huetaigui asomaye. ₄₆Nache 'enapega, 'eeta':

–Naua ñiyigui'she la'aqtaqa Ñim Lo'onatac 'Enauacna, 'eeta': «Na ima', namaye qouagaxaunaqa';» qalaxaye qami' qauo'ochec namaye da nqañoxotaqa' na cachaxaicpi.

₄₇Nache 'enauaque se'esoua na'axa'te So Jesús dapaxaguenataxaatac, huetaigui aso no'onaxanaxaqui late'erai. Qalaxaye nam lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq nam dapaxaguenataxaatapeguec na namaxasoxonaxacpi, qataq nam lataxala' na judiopi, namayepi ilotaique ca lataxac da ishet da ỹalauat So Jesús. ₄₈Qalaxaye saishet da ỹanata ca 'eetec, cha'aye 'enauac nam shiỹaxauapi ỹataqta ỹe'emaqtom da na'axaỹaxaatega Somaye.