1Ñim Nataxala' maye Qaica ca Ỹaqalanapec da la'aqtac, 'eeta': «Mashe nayeetai' ca na'a'q, maye ỹataqta 'eroigui 'eeta'am aca nqatelaxanaxaqui, cam huaigui qome 'enauac na ño'oxonnaxaicpi qataq nam qauemaicpi da ỹataqta ỹavicta. Que'eca na'a'q maye anac qome, ỹataqta ỹavigaxatta qome namayepi, nache qaica ca no'onañi. 2Qalaxaye qami', maye huo'o naq 'enec qanqa'eñi da ỹe'enaxat, dam no'on ỹataxac qalaq 'eroigui qome, 'eeta'am na le'eraxa añi nala', qaq na le'eraxa qalaq nachetac qome da nca'alaxa. Nache qami' qaparenaxañeetac qome, souaxat da qantonaxaqui, qoñeeta'am ca huaca llalaqpi da parenaxaatague' da chegaqaigui aca laỹe'. 3Qaq que'eca na'a'q, maye seqataxaatapigui', qami' ỹataqta qauapiitapigui qome nam qauemaicpi, 'eeta'am qanqa'eñi na namoxoỹaxa. 4Qantoñeeta'aque qome, naua iqataxaco maye sanema co'ollaxa so ỹamaxashec Moisés, co'ollaq huaña añi qasoxonaxa Horeb, naamaye nachenaua na llapaxayiñi lataxaco, qataq ỹamaxasoxonaxaco da yaqto' 'enauac na israel le'ecpi iuen da ỹalaxaleguete. 5Qaq ñaq qauloỹa da: Aỹem qami' ñamaxalo qome ca na'aqtaxanaxanec Elías, qom saxanaxa da nvi' que'eca na'a'q maye lalamaxat Ñim Nataxala', cam na'a'q maye ỹataqta lta'araic qataq chaqaic. 6Qaq camaye, ỹo'ot qome da na nta'alpi nmane' na llalaqpi, qaq da saishet da nmana't namayepi, nache Aỹem ñanac qome da sauo'o ca nhuaxanaguec nam na'alhua, nache ỹataqta imauec da ñelaxatchiguiñi qome.»
