Mateo 10

₁Nache So Jesús ỹataxana't soua doce lapaxaguenataqa. Nache ỹanem da la'añaxac ñi 'oonolec soomaye, da yaqto' ishet da ỹo'orauec na saqcha'a na'añaxac leguemaxaicpi, qataq da nataren 'enauac nam ỹotta'a't nalolaxasat.

₂Qaq 'enaua naua le'enaqa'ate soua doce lapaxaguenataqa So Jesús maye lca'aua'alo da ỹauo'oi lamaxa'she: Simón da le'enaxat lỹa Pedro, qataq so lqaỹa Andrés; nataqa'en so Santiago qataq so lqaỹa Juan, maye llalqa so Zebedeo; ₃qataq so Felipe, Bartolomé, Tomás qataq so Mateo som ỹacootapeeguet co'ollaxa ana nsheetenaqte ca nta'a; Santiago som llalec so Alfeo; qataq so Tadeo; ₄Simón som chegaqaigui nam dataỹa'aguet naxa na nta'alpi qataq so Judas Iscariote som ỹaneuo co'ollaxa So Jesús.

₅So Jesús ỹama'q soua doce lapaxaguenataqa, qaq ỹanema da lqataxac, 'eeta':

Saishet qome da qanqo'oñiỹalo na 'aleu' maye netaleguete nam saishet da judiopi. Nataqa'en saishet qome da qanqo'oñiiua'a nam nỹecpi maye huaigui ye 'alhua Samaria. ₆Nachaqrata qome da qanqo'oñiỹa nam Israel le'ecpi maye 'eeta'am aca qagueta isomtac.

₇Nache qaua'aqtaxañim de'era na'aqtaxanaxac maye, 'eeta': «Da lo'onataxanaxac Ñim Lo'onatac 'Enauacna mashe saqaỹaloq da nvita ne'ena.»

₈Qataq qanatayiñi nataqa'en na sa no'onpi. Qataq qanca'alaxacheeuec nam mashe ileupi. Qataq qanatayiñi nam nchega na lo'oc, qataq qauo'oyiỹauec na saqcha'a na'añaxac leguemaxaicpi maye netaigui na shiỹaxauapi. ¡Qataq saishet da qauỹaxañiỹaique aca lasheue nam qauo'oche, cha'aye de'era na'añaxac maye qauo'onataxañiitega damaye chegoqo'ot Ñim Lo'onatac 'Enauacna qataq choche qami' qoỹaatema!

₉Qataq saishet da qauache aca qo'omi, ₁₀qataq ca laỹe' ca qo'oqoi na nqa'aic. Qataq saishet da qauache caua qarashelchelli' qataq caua lỹa't qo'ogolli'. Cha'aye 'enauac na 'onataxanaxaicpi saishet da sa qoỹami' da lquia'axac.

₁₁Qataq da huo'o ca qaviyeeua'a nỹecpiolec, huo'otaq ca lta'araic nỹecpi, nache qanmichiỹaique ca shiỹaxaua maye ishet da qami' ỹaconegueta qataq npe'et. Qaq nacheca qoviỹa'a ca lma', choche ivitta'a da qaltaq qoqui. ₁₂Qaq da qaviyeeua'a que'eca nỹec, nache qauquinaxañi, qoñiita': «Huo'o qome da qarlagaxayiqui.» ₁₃Qaq cam lalamaxat que'eca nma', da huo'otaq ỹaconeguet, nache qano'onaxachiỹa'aguet de'era qarquinaxanaxaqui maye naigui da nlagaxayec. Qalaxaye da saishet da ỹaconeguet, nache qami' saishet da huo'o ca qarasouaxashechi.

₁₄Qaq da huo'otaq huo'o ca 'oonolec nma' huo'otaq ca nỹecpiolec da saishet da qami' ỹaconegueta qataq da saishet da qami' na'axaỹaxanalo, nache qoquiỹa'ai camaye. Ime, nache qauchegoqoiuec na namoxoỹaxa naua qarapia'achilli', qaq damaye la'anaxat da sa qami' qaỹaconegueta. ₁₅Qaq ỹataqta 'eesa de'era qami' sa'aqtaxanema da qom ivita que'eca na'a'q da qanmit 'enauacna, nache ca nhuaxanaguec que'eca shiỹaxauapi ỹataqta napacalec qome da nhuaxanaguec som shiỹaxauapi maye netaña co'ollaxa so nỹecpi le'enaxat Sodoma qataq Gomorra.

₁₆De'era no'onataxanaxac maye qami' samaxaleguete da qauo'oche, damaye huo'o da lchec. Damaye 'eeta'am aca qagueta da qaỹamaxa ca hueta'a na qalota shiguiỹacpi maye dequi'iỹapec. Qaq ỹoqo'oye qami' lhuotte' qataq qanloitec qoñiỹa'am ca na'araxanaq qalaxaye nataqa'en qami' huesote' qoñiita'am na qoto'pi.

₁₇Qataq maxatchaxa, cha'aye qami' qoỹaneua'alo qome na nta'alpi, da yaqto' qami' qaiuaxaata'ape da huaigui ana napaxaguenaxaquipi na judiopi. ₁₈Qataq ivira'a qome da qami' qaỹauegueua'alo nam ilotegueto naua 'aleu', qataq na lta'alpi namayepi da yaqto' Aỹem qaua'axache da qauataito'ot namayepi, qataq nam chegaqauec, cha'aye qami' ỹapaxaguenataqa.

₁₉Qom ivita da qami' qoỹaneua'alo ne'ena nta'alpi, nache saishet da leetapigui ye qarvilli souaxat da sa qauaỹachiñi cam 'eetec cam qartaxaỹaxaqui, cha'aye Ñim Lo'onatac 'Enauacna qami' ỹanema cam qartaxaỹaxaqui. ₂₀Cha'aye saishet da nache qami' da qautaqai. Cha'aye som Saqcha'a La'añaxac Ñim Lo'onatac 'Enauacna, nacheso som qami' detaxaiguilo.

₂₁Ñi 'oonolec cam nqaỹañecpi maiche ỹaneuo ca lqaỹa da qaỹalauat, qataq caua nta'al maiche ỹaneuo caua llalqa, qataq caua ñalqa iloquiaxaata'ape caua lta'al iviraxattra'a da ỹalaua't. ₂₂Qataq 'enauac qome nam shiỹaxauapi ỹataqta qami' nquiỹalo, souaxat da Aỹem qoquiitague'. Qalaxaye cam Aỹem pi'iỹa'a choche ivitta'a ca loga't da nachaalataxac nache Aỹem ñeca'alaxatec .

₂₃Qaq ca shiỹaxauapi maye hueta'a ca nỹecpiolec da huo'otaq qami' icana'ape qataq da huo'otaq qami' sa iyacna'ape, nache qananeltaxañi da qanqo'oñiỹa ca laỹepi nỹecpiolec. Cha'aye ỹoqta 'eesa de'era qami' sa'aqtaxanema da Aỹem Shiỹaxaua Llalec, ñe'eguelaq qome ñanactaigui da la'añaxac Ñim Lo'onatac 'Enauacna qom saxanaxa da qaumache da 'enauac qaviyiỹa na nỹecpiolec na lma' na Israel le'ecpi.

₂₄Ca napaxaguenatac saishet da napacalec da la'amaqchec ca napaxaguenaxala', nataqa'en ca namaxashec saishet da napacalec da la'amaqchec ca na'aco'. ₂₅Ỹoqo'oye ca napaxaguenatac ishet qome da machiguiñi da ivi' da 'eeta'am ca napaxaguenaxala', qataq cam choche namaxashec da ivi' da 'eeta'am ca na'aco'. Cha'aye na shiỹaxauapi da huo'otaq Aỹem iỹaxana, qaq 'eetega da Aỹem pa'aguenataxanaxaic, nache, ¿chaq 'eetec ca lỹaxanataxanaxac da qoñiita maye qami' ỹapaxaguenataqa?

₂₆Qaica qome ca qayi'iitega. Cha'aye qaica ca qoỹoxottañi da huo'otaq sa qaỹanata, qataq 'enauac nam saqcha'api ivira'a da qaỹaỹaten. ₂₇Da huo'o ca sa'axat da huaigui na napalaxa, qalaq qaua'axacheeuec qom qoviitaigui ca yo'oqchiguiñi. Qataq da huo'o ca qami' ño'otaxaatoto ỹa'aqtac qalaq qaua'axachem 'enauac na shiỹaxauapi. ₂₈Saishet da qañi'iỹai na shiỹaxauapi maye ishet da ilaxachigui da qaro'ocỹaxaqui, qalaxaye saishet da ilaxachigui dam saqcha'a qarca'alaqai. Nachaqrata da qañi'iỹai Ñim Lo'onatac 'Enauacna maye ishet da ilaxachigui qataq ỹasaxauga ca nhuaxanaqa' na 'etaxaloxoicpi da qaro'ocỹaxaqui qataq da qarca'alaqai maye saqcha'a.

₂₉Caua dos qoỹolqa da qaime'n, nache aca lasheue 'oonole lcatole. Qalaxaye saishet da ileu' caamaye da Ñim Lo'onatac 'Enauacna maye Qarta'ai saishet da la'aqtac. ₃₀Qaq ivira'a na laue ñi 'oonolec da qoñiita, Ñim Lo'onatac 'Enauacna ỹaỹaten ye lcata. ₃₁Qaq ỹoqo'oye saishet qome da qayi'iitac, cha'aye qami' ỹataqta qanapacỹalec da lashiichiỹaxac cam qalota qoỹopiolec.

₃₂Qaq qami', da qaua'aqtaxañim na laỹepi shiỹaxauapi da Aỹem qoquiitague', nache Aỹem nataqa'en sa'aqtaxanem Ñim Ita'a da 'eesa da Aỹem qoquiitague'. ₃₃Qalaxaye da qaua'aqtaxañim na shiỹaxauapi da saishet da Aỹem qoquiitague', nache nataqa'en Aỹem sa'aqtaxanem Ñim Ita'a da saishet da Aỹem qoquiitague'.

₃₄Saishet qome da qaupicheetega da Aỹem ñera'a ana 'alhua da nlagaxayec. Aỹem saishet da ñeroi' da nlagaxayec, nachaqrata da cotaxac qataq na lqalaiguesat. ₃₅Aỹem ñanac da yaqto' ca ñalec maiche npa'aguene' ca lta'a, qataq aca ñale maiche npa'aguene' aca maiche late'e, qataq aca nate maiche npa'aguene' aca lachoro. ₃₆Cam ỹataqta qanpa'aguenaxauai, nacheca ca maiche qaralamaxache qarhuo'oi le'ec.

₃₇Ca ỹactec da ỹauotec ca lta'a, huo'otaq aca late'e, da saq 'ena'am naqa'en Aỹem da lauoche, huo'otaq cam ỹactec da ỹauotec ca llalec, huo'otaq aca llale, da saq 'ena'am naqa'en Aỹem da lauoche, nache camaye saishet da ỹalamaxat. ₃₈Qataq cam Aỹem quetague' da huo'otaq saishet da lhuennataxa da na'aictaxa da Aỹem ileetalec, nache camaye saishet da ỹalamaxat. ₃₉Qaq ca nshetaique da maiche nca'alaxatec da maiche nachaalataxac, nache camaye deqat. Qalaxaye ca saishet da iteetega da nachaalataxac souaxat da Aỹem quetague', nache camaye nca'alec.

₄₀Da huo'o ca shiỹaxaua da qami' ỹaconegueta, nache camaye nataqa'en Aỹem ỹaconeguet. Qaq cam shiỹaxaua da Aỹem ỹaconeguet, nache camaye nataqa'en ỹaconeguet Ñim Lo'onatac 'Enauacna maye Aỹem namaq.

₄₁Qaq cam ỹaconeguet cam la'aqtaxanaxanec Ñim Lo'onatac 'Enauacna, nache camaye ỹaconeguet cam nsheetenaguec maye 'eeta'am aca nsheetenaqte cam na'aqtaxanaxanec.

Qaq cam ỹaconeguet ca no'on shiỹaxaua, qaq cha'aye camaye no'on, qaq camaye da qaisheeten, nache 'eeta'am qanqa'en aca lasheue cam no'on shiỹaxaua.

₄₂Qataq camachaqca shiỹaxaua, da huo'otaq ỹami' ca ỹataqta atom 'etaxat ca 'oonolec nam saq 'amaqtaqpiolec maye Aỹem quetague', qaq camaye ỹataqta huo'o qome da nsheetenaguec.