Mateo 13

₁Qaq nacheso se'eso na'a'q da So Jesús ca'ai so nỹec maye hueta'a, nache taxaama na loigue aso lapel late'erai ye Galilea, huaña yemaye nache nso'ooñi, nache dapaxaguenataxan. ₂Qaq souaxat da ỹataqta qalota so shiỹaxauapi laponeua'a cam hueta'a Somaye da na'axaỹaxana, nache So Jesús huenooñigui aso nllocta da nso'ootangui asomaye da dapaxaguenataxan. Qaq se'eso shiỹaxauapi hueto'ot na loigue aso lapel.

₃Nache So Jesús ỹataqta qalota na dapaxaguenataxanec, ỹauota'a na laloqnaxanaxatpi, nache ỹauo'o da daloqnaxana, 'eeta':

₄«Huo'o so ỹale huenoxonec da ỹaañi ana ala na trigo. Qaq co'ollaq mashe danaxaatac, nache huo'o aso lañiguishe ala taalec so nqa'aic. Qaq co'ollaq qaỹata'ague, nache anac ana qoỹopi, nache chec aso lañiguishe alapi.

₅Qaq aso laỹepi lañiguishe ala, qalaq taalec som 'alhua maye ỹalliigui na coma'. Nache saqaỹaloq da ñaxat na trigo, cha'aye saq qaỹaña souaxat da ỹaguec na coma'. ₆Qalaxaye aso nañiguishe sa qaỹa'ague da lca'alaxa cha'aye qaicaua caua lpa'aye qataq ỹavic co'ollaq nnoxoosheguem añi nala'.

₇Qaq aso laỹepi lañiguishe ala, qalaq taalec so nache 'eetai' naxa da lañaxataqa' ana huoue maye huo'o ana le, nache asom ỹaxat co'ollaq ñaxatsheguem nache ipataxañi aso nañiguishe, nache saishet da ỹashenem da no'on da lañaxataxac.

₈Qalaxaye aso laỹepi lañiguishe ala taalec som 'onaxaic 'alhua, nache ỹataqta 'onaxaic da alaỹaxac, qaq co'ollaq qanqat, nache huo'o ana ivi' ana cien ana ala, qataq huo'o ana ivi' ana sesenta, qataq huo'o ana ivi' ana treinta.

₉¡Qaq qami' da ỹoqta 'eesa da huo'oi naua qartelai lauacolli', nache no'on da qana'axaỹaxañi!»

₁₀Nache soua lapaxaguenataqa nquiguereua'a So Jesús. Nache inatta'ape, 'eetra':

–¿Ta'ainco' da huo'o ye 'aua'aqtaxanem na shiỹaxauapi, qalaq 'auauota'a na 'araloqnaxanaxatpi?

₁₁Nache So Jesús 'enapeco':

Aỹem qami' sa'aqtaxaatema dam saqcha'a lataxac da lo'onataxanaxac Ñim Lo'onatac 'Enauacna, qalaxaye na shiỹaxauapi qalaq saishet da saỹaanaxanaxanec. ₁₂Cha'aye nam cara'ac da huo'o da lauattonaxanaxac dam saqcha'a lo'onataxanaxac Ñim Lo'onatac 'Enauacna qalaq qanquigaxatec da lauattonaxanaxac. Qalaxaye nam saishet da ỹaỹaten da saqcha'a lo'onataxanaxac Ñim Lo'onatac 'Enauacna, nache Ñimaye ỹo'otec namayepi da icoua'ai dam saq 'amaqtaq maye ỹaỹaten. ₁₃Qaq ỹoqo'oye da sapaxaguen na shiỹaxauapi, nache sauo'o ye saloqnaxana; yaqto' na'aictaxa da demeenaxatac qalaq 'eeta'am da saishet da nauaañi, qataq na'aictaxa da hua'aqtac qalaq saishet da ivira da ỹaỹaten. ₁₄Yaqto' ỹataqta ipacchigui co'ollaxa dam ỹa'axat Ñim Lo'onatac 'Enauacna chegoqchigui naqa'en so la'aqtaxanaxanec le'enaxat Isaías co'ollaq, 'eeta':

₁₆Qalaxaye qami' maye qami' ỹapaxaguenataqa Ñim Lo'onatac 'Enauacna qami' ỹaaleguete da lqouagaxanaqtaic, cha'aye qauauañiichigui qataq qaua'aqaichigui da ỹa'aqtaxanaxac. ₁₇Cha'aye qalota co'ollaxa so la'aqtaxanaxanecpi Ñim Lo'onatac 'Enauacna qataq som no'on da lataxac shiỹaxauapi da huotaique da ỹauaachigui de'era maye qami' qaumiiñitac, qataq dam qaua'aqaitega, qalaxaye somayepi saishet da ỹañoxot.

₁₈Qaq nagui qana'axaỹaxañiỹa dam naigui som ỹale maye danaxaatac. ₁₉Huo'o na na'axaỹaxaatega da na'aqtaguec da lo'onataxanaxac Ñim Lo'onatac 'Enauacna, qalaxaye ye saishet da ỹaỹaten, nache so pa'aguenataxanaxaic anac, nache ỹo'otec da icoua'ai de'era na'aqtaxanaxac. Qaq 'ena nam 'eeta'am aso nañiguishe ala maye tatelec so nqa'aic.

₂₀Qaq aso nañiguishe ala maye tatelec som 'alhua maye ỹalliigui na coma', qalaq asomaye naigui na shiỹaxauapi maye na'axaỹaxaatega da na'aqtaguec da lo'onataxanaxac Ñim Lo'onatac 'Enauacna, nache saqaỹaloq da ỹasateguet qataq ỹataqta lta'araic da ntonaxac. ₂₁Qalaxaye souaxat da saishet da ỹoqta ỹaỹateeta de'era na'aqtaxanaxac, nache saishet da 'eetai' de'era ntonaxac. Cha'aye da huo'o da ivireguet lqalaic, huo'otaq da sa qaiyacnapec souaxat da ỹalaxaguet Ñim Lo'onatac 'Enauacna, nache saqaỹaloq da icoua'ai de'era na'aqtaxanaxac.

₂₂Nataqa'en huo'o aso nañiguishe ala maye tatelec so lañaxataqa' ana ỹaxat. Qaq asa'aso nañiguishe ala naigui nam shiỹaxauapi maye na'axaỹaxaatega da na'aqtac, qalaxaye saishet da naralaxat da lataxac. Nachaqrata da iuennatega nam lhuenaxanaxapi qataq cam 'eetec da yaqto' ivira'a da sallaxanec.

₂₃Qaq aso pa'atec nañiguishe ala maye tatelec so no'on 'alhua, asomaye naigui nam shiỹaxauapi maye na'axaỹaxana da na'aqtac qataq ỹataqta ỹaỹateeteguet. Qaq namayepi ỹataqta naralaxat da lataxac qataq ỹo'ot ca ỹaỹamaqchiguiñi. Namayepi 'eeta'am asa'aso nañiguishe ala da huo'o ana ivi' cien ana ala, qataq huo'o ana ivi' ana sesenta, qataq huo'o ana ivi' ana treinta.

₂₄So Jesús ỹauo'o da lỹa daloqnaxana, 'eeta':

«Da lo'onataxanaxac Ñim Lo'onatac 'Enauacna 'eeta'am ca ỹale maye ỹaañi aca no'on lañiguishe maye ala na trigo da ỹaalec ca na'alhua. ₂₅Qalaxaye co'ollaq 'enauac da do'ocheta somayepi, nache anac som npa'aguenaxaua. Nache ỹaañi aso huoue le'enaxat cizaña maye 'eeta'am na trigo. Ime, nache jec.

₂₆Qaq co'ollaq mashe ñaxat so trigo, qataq mashe huo'o ana ala, huaña, nache so 'onataxanaxaicpi noma da nataqa'en aso huoue maye le'enaxat cizaña da ñaxat. ₂₇Nache somayepi jec da da'aqtaxanem so lalamaxat se'eso nanaxanaqa', 'eeta': ‹'Am qana'aco', da 'am 'aỹa'aañi aso no'on ala na trigo co'ollaxa, qalaq ¿ta'ainco' da ñaxat nataqa'en ana huoue maye le'enaxat cizaña?›

₂₈Nache so lalamaxat se'eso nanaxanaqa', 'eeta': ‹Souaxai' nacheso som aỹem ipa'agueetac som ỹo'ot de'era.›

Nache so 'onataxanaxaicpi denataxan, 'eeta': ‹¿'Anshetaique peta'a da qomi' ñapogaq ana'ana huoue maye qauem?›

₂₉Qalaxaye somaye 'enapeco': ‹¡Saishet! Ten da qanapoqui ana huoue, nache ishet da l-llasheguemgue' na trigo, cha'aye naamaye 'eeta'a't. ₃₀Qom ivita ca laloqo' da ñeqataq ana ala na trigo, nache huaña da seỹotaqauga na trigo qataq ana huoue maye le'enaxat cizaña. Ñaq qauaqaita'alo ne'enaua dos da ñaxa't. Qom ivita que'eca laloqo' da qanqat ana ala, nache samaq na ỹo'onataxanaxanecpi da yaqto' hua'auñi da napoc ana huoue maye le'enaxat da cizaña, qataq laỹona't da ỹavigaxat. Ime, nache laỹona't na trigo, nache ỹachaigui ñi ỹaponaxanaxaqui. Nache aỹem samaxalec qome ca ỹo'onataxanaxanecpi da ỹa'auaxaañi da nqateua'a ana huoue. Ime, qaq ỹauo'o ana laqtapi da yaqto' ỹavigaxat. Qaq da ime, nache ỹaỹamaxat na trigo da ỹachaigui ca ỹaponaxanaxaqui.›»

₃₁So Jesús nataqa'en ỹauo'o da lỹa daloqnaxana, 'eeta':

«Da lo'onataxanaxac Ñim Lo'onatac 'Enauacna, damaye 'eeta'am aca ala ana le'enaxat mostaza maye ỹacona ca shiỹaxaua da ỹaalec ca na'alhua. ₃₂Qaq 'eesa da acamaye ỹataqta saq 'amaqtaq, saq 'ena'am ana laỹe nañiguishe ala. Qalaxaye da ivita da ñaxat, nache ỹataqta napacalec 'enauac ana laỹe nañiguishepi, ivira'a da 'eeta'am ana qo'oipaq maye ỹataqta late'erai. Ỹoqo'oye ana qoỹopi maye huaỹotac ishet da anac, nache ỹauo'o na lpata'c ỹanaigui ana lcouepi.»

₃₃So Jesús nataqa'en ỹauo'o so lỹa daloqnaxana, 'eeta':

«Da lo'onataxanaxac Ñim Lo'onatac 'Enauacna, damaye 'eeta'am aca saq 'amaqtaq ỹasheeraxachigui na ndaqñiguishec 'ayiiña maye ỹacona aca 'alo. Ime, nache ỹalecneguet ca lta'araic ldaqñiguishec, da yaqto' 'enauac ỹasheeraxachigui.»

₃₄Qaq 'enauac ne'ena ỹa'axattacpi So Jesús ỹauota'a na laloqnaxanaxatpi da da'aqtaxaatapeguem na shiỹaxauapi, qaq saishet da sa ỹauo'o na laloqnaxanaxatpi da da'aqtaxaatac. ₃₅Qaq 'eetec de'era yaqto' ipacchigui da ỹiyiñi co'ollaxa so la'aqtaxanaxanec Ñim Lo'onatac 'Enauacna maye, 'eeta':

₃₆Nache So Jesús ncoyeguene' so shiỹaxauapi. Ime, nache taỹa ca nma'. Huaña, nache soua lapaxaguenataqa nquiguereua'a Somaye, nache qoỹeetega, qoỹeeta':

–Ña qomi' 'aua'axatema ca naigui aso qauem huoue maye 'aualoqnaxaatega, asom netalec so nanaxanaqa'.

₃₇Nache So Jesús 'enapeco':

«Som ỹaañi aso no'on lañiguishe ala trigo, qalaq nache Aỹem Shiỹaxaua Llalec. ₃₈Qaq som nanaxanaqa', qalaq nachena nam shiỹaxauapi maye netalec ana 'alhua. Qaq aso no'on nañiguishe maye ala na trigo, qalaq nachena nam shiỹaxauapi maye huetaigui da lo'onataxanaxac Ñim Lo'onatac 'Enauacna. Qaq aso huoue maye le'enaxat cizaña, qalaq nachena nam ỹalaxaguet so pa'aguenataxanaxaic, ₃₉som ỹaalec aso qauem huoue ana 'alhua. Qaq da qanqat na ala so trigo, qalaq naigui qom ivita ca laloqo' da qanmit 'enauacna, qaq som 'onataxanaxaicpi maye nqattac ana ala na trigo, qalaq nachena na lamaxashecpi Ñim Lo'onatac 'Enauacna. ₄₀Qaq de'era 'eetec da qanapoc aso huoue maye qauem qataq qaỹavigaxat, damaye nache 'eetec qome Ñim Lo'onatac 'Enauacna da nmit 'enauacna. ₄₁Aỹem Shiỹaxaua Llalec samaq qome na ỹamaxashecpi da yaqto' nqateeguesop da ỹo'onataxanaxac 'enauac nam shiỹaxauapi maye qauem na ỹo'ottac qataq ỹayen na laỹepi da nataqa'en ỹo'ot ca qauem. ₄₂Qaq na ỹamaxashecpi ỹasaxaña namayepi que'eca nhuaxanaqa' na 'etaxaloxoicpi, huaña nache ỹaguec da nnoinaxac qataq inaga't naua lhue da nqui'ic. ₄₃Qalaxaye nam ỹalaxaguet Ñim Lo'onatac 'Enauacna, namayepi ỹataqta 'eroigui 'ena'am añi nala' qom huetaigui da lo'onataxanaxac Ñim Lo'onatac 'Enauacna. ¡Qami' da 'eesa da huo'oi naua qartelai lauacolli', nache no'on da ỹataqta qana'axaỹaxañi!

₄₄Da lo'onataxanaxac Ñim Lo'onatac 'Enauacna, damaye 'eeta'am aca laỹe' ana anom maye qoỹoxotoigui ca 'alhua. Qaq huo'o so shiỹaxaua ilalec asomaye. Nache qaltaq ỹoxooñi, ipagaqchiichiguiña ca lma'. Nache ỹataqta lta'araic da ntonaxac, nache ỹe'eguelaq. Ime, nache imen 'enauac nam logoxoshetpi, nache desheenaxana se'eso 'alhua, da yaqto' lalamaqte aso anom.

₄₅Da lo'onataxanaxac Ñim Lo'onatac 'Enauacna, damaye 'eeta'am ca nmenaxaic maye nmittaique aca perla maye ỹataqta no'on. ₄₆Qaq da huo'otaq ỹanata aca 'oonole maye ỹataqta qalota da lashiichiỹaxac, nache ỹe'eguelaq. Ime, qaq imen 'enauac na logoxoshetpi, nache desheenaxana asomaye.

₄₇Nataqa'en da lo'onataxanaxac Ñim Lo'onatac 'Enauacna, damaye 'eeta'am ca naleguec maye qaỹalliguingui aca auaxai, nache ỹataqta ỹalecta't nam lalliiguishec nỹaqpi. ₄₈Qaq da mashe nlaxagui que'eca naleguec, nache cam ya'acoxoicpi iro'ota na loigue ca 'etaxat. Huaña, nache qanso'oñiisop da qanatogui na nỹaq. Nache nam no'on qaỹachagui aca laỹe', qaq nam qauem, qalaq qaỹalatec. ₄₉Qaq 'era da 'eetec qom ivita ca loga't ana 'alhua, da anac nam namaxashecpi, da yaqto' nqateua'a na qauemaicpi, da nqateeguesop nam no'on da lataxac. ₅₀Nache na qauemaicpi qaỹasaxaña ca nhuaxanaqa' na 'etaxaloxoicpi. Huaña, nache nỹeetac qataq ỹataqta inaga't naua lhue, souaxat da nqui'ic.»

₅₁Nache So Jesús ina't soua lapaxaguenataqa, 'eeta':

–¿Qami' peta'a qauaỹaañi 'enauac de'era sa'axattac?

Nache soomaye 'ena'apo':

–Aja', saỹaanaq 'am Qarataxala'.

₅₂Nache Somaye 'enapeco':

–'Enauac nam dapaxaguenataxaatapeguec na namaxasoxonaxacpi maye chegoqo'ot so Moisés da huo'otaq taigui nam napaxagueetega da lo'onataxanaxac Ñim Lo'onatac 'Enauacna, nache namayepi 'eeta'am ca ỹale da nqo'ona ca lma', nache nqatec na dalaxaicolec qataq nam togoshec logoxoshet.

₅₃So Jesús co'ollaq imat ne'ena laloqnaxanaxatpi maye ỹa'axattac, nache ca'ai ye hueta'a. ₅₄Nache co'ollaq ivita ye maiche lalamaxat lma'. Huaña, nache dapaxaguenataxan co'ollaq huaigui aso napaxaguenaxaqui na judiopi. Nache so shiỹaxauapi ỹataqta huo'o da la'aalaxa nache, 'eeta': «¿Hua'ague ca ỹachegoxota'ague da laỹaanec dam da' ỹale? ¿Ca 'eeteco' damaye da ishet da ỹo'ot nam sa qaỹauanapega?»

Qataq huo'o na 'eeta': ₅₅«Damaye nachera da llalec so José maye qo'oipaq lo'o, qataq aso late'e le'enaxat María, damaye nache lqaỹa't soua Santiago, José, Simón qataq so Judas. ₅₆Qataq soua lqaỹa't 'alol huetra'a na souaqta'a. Qaq ¿ca 'eeteco' da ỹataqta qalota na ỹaỹaten qataq ishet da ỹo'ot na sa qaỹauanapega?»

₅₇Qaica da huo'o ca hueta'a yi'iye da huotaique da ỹaconeguet da lapaxaguenataxanaxac So Jesús. Nache Somaye, 'enapeco': «Ca la'aqtaxanaxanec Ñim Lo'onatac 'Enauacna ỹataqta huo'o naq 'enec qanqa'en 'enauac na pa'aiguelo, qalaxaye ca ỹoqta lma' qataq ca lauo' le'ecpi sa qaỹa'amaqten camaye.»

₅₈Nache So Jesús saq 'amaqtaq so ỹo'ot na'anec da huaña yi'iye qanayeuta'a, cha'aye na shiỹaxauapi sa ỹa'amaqten Somaye.