Mateo 15

₁Huo'o som chegaqaigui na fariseopi qataq nam dapaxaguenataxaatapeguec na lamaxasoxonaxacpi so Moisés maye chegoqta'ague da Jerusalén inattac So Jesús, 'eeta':

₂–«¿Ta'ainco' naua 'arapaxaguenataqa ye saishet da quetelec dam lataxac som hua'au qarta'alpi? ¿Ta'ainco' naamaye da saishet da ipaguelec da lataxac da qaiỹoi' naua nhua'q da deque'e ca shiỹaxaua?»

₃Nache So Jesús denataxan, 'eeta':

–«Qami' nataqa'en ¿ta'ainco' ye saishet da qaualaqaileguete naua lamaxasoxonaxaco Ñim Lo'onatac 'Enauacna, nda'a't da maiche qoquiitague' da maiche qarataxaqui? ₄Cha'aye Ñim Lo'onatac 'Enauacna, 'eeta': ‹Ỹataqta huo'o naq 'enec 'anqa'en ca 'arta'a qataq aca 'arate'e›, qataq nataqa'en, 'eeta': ‹Ca shiỹaxaua da sa iyacnapec ca lta'a huo'otaq aca late'e, qalaq camaye qaỹalauat.›

_5-6Qalaxaye qami' qoñiitega, da ca 'oonolec da yaqto' saishet da sa ỹalaxaguet Ñim Lo'onatac 'Enauacna, nache 'enapega ca lta'a, 'eeta': ‹Saishet da 'am setauan, cha'aye 'enauac na aỹem hueto'ot mashe sogote da sanot Ñim Lo'onatac 'Enauacna, ivira'a ana aỹom.›

Qami' saishet da qaualaqaiguet da lamaxasoxonaxac Ñim Lo'onatac 'Enauacna, nda'a't da qoquiitague' da maiche qarataxaqui. ₇¡Qami' ỹataqta qami' tenataxanaxaiqa! Ñim Lo'onatac 'Enauacna ỹataqta 'eesa co'ollaxa so la'aqtac, chegoqchigui naqa'en so la'aqtaxanaxanec le'enaxat Isaías maye, 'eeta':

₁₀Nache So Jesús iỹaxana so shiỹaxauapi da nquigueuo, nache 'enapega, 'eeta':

–Ña qana'axaỹaxañiỹa da ỹa'aqtac, qataq no'on da Aỹem qauaỹaañiteguet: ₁₁Saishet da nachena nam chec ca shiỹaxaua da ishepaxanaqchet da nachaalataxac da datato'ot Ñim Lo'onatac 'Enauacna. Dam ishepaxanaqchet da nachaalataxac ca shiỹaxaua nachera dam lsheunaxanaxac qataq naua qauema la'aqtaqa maye chegaqaiguilo na alap.

₁₂Nache soua lapaxaguenataqa So Jesús nquiguereua'a Somaye nache 'eetrega, 'eeta':

–Na fariseopi ỹataqta dalemata can hua'axaỹa de'era 'ara'aqtac.

₁₃Qalaxaye So Jesús 'enapeco':

–Ñi Ita'a ỹo'otec qome na fariseopi da 'eeta'am ca ilotague' ca nañiguishe lma' da napoc aca qo'oipaq maye saishet da ỹaañi co'ollaxa: nmachitcheguem na lpa'a', ime nache ỹasaxauec. ₁₄Qaq ỹoqo'oye saishet qome da qauqocheetega na fariseopi: cha'aye namayepi 'eeta'am ca sanauaañi da ỹauecta'aguet ca lỹa sanauaañi, qaq cam sanauaañi da huo'otaq ỹauecta'aguet cam 'eeta'am sanauaañi, nache caamaye ishet da 'enauaque da tayingui aca nshere.

₁₅Nache so Pedro inat So Jesús, 'eeta':

–Ña qomi' 'aua'aqtaxanema cam naigui de'era 'aualoqnaxaatega, quiye can 'aua'axattac cam deshepaxanaqtaxan da qaỹatato'ot Ñim Lo'onatac 'Enauacna.

₁₆Nache So Jesús 'enapeco':

–¿Qache nataqa'eno' da qoñiita saishet da qauaỹachiñi de'era? ₁₇'Enauac nam sacheguenaq qataq ñeỹomaxagui tangui añi qara'am, ime, qaq huenoxonec. _18-20Qalaxaye na shiỹaxauapi da qauema naua la'aqtaqa, qaq 'eetec de'era cha'aye namayepi qauemaicpi qataq nache 'eetai' da iuennatega da qauem: 'eeta'am ca yo'oqchigui dalaataxan, qataq 'eeta'am ca ncachetague' aca sa lhua, qataq ỹo'ot na qauem, decache, isheueetac ca lỹa shiỹaxaua, qataq ỹatenachet. Qaq Ñim Lo'onatac 'Enauacna saỹaỹamaxaren namayepi da ỹo'oxoreetac Ñimaye. Qalaxaye ỹoqta 'eesa da camachaqca cam ishet da ỹo'oxoren Ñimaye na'aictaxa da saishet da iỹoi' naua lhuaxaye.

₂₁Nache So Jesús ca'ai yi'iye hueta'a, nache taỹa so 'alhua maye saqaỹapeque ye Tiro qataq ye Sidón. ₂₂Nache huo'o aso 'alo maye lma' yi'iye 'alhua asom chegaqaigui nam iỹaxana naxa na judiopi qalaq Cananeo, asomaye naua'a So Jesús, nache na'axanneque naua la'aqtaqa, 'eeta':

–¡'Am Ỹataxala' maye 'am Lca'aguishec Ñim Lo'onatac 'Enauacna, aỹem 'auchoxoren qome aỹem 'autauan! ¡Añi ỹale huo'o so netaigui saqcha'a na'añaxac leguemaxaic maye ỹo'ottac da lta'araic nque'eenaxac!

₂₃Qalaxaye So Jesús saishet da ỹasateguet asomaye. Nache soua lapaxaguenataqa ana'c da nachoxoreetracot Somaye, 'eetra':

–Ña 'auqocha'actaxa, ten, qomi' nca'attaleguete anamaye ỹa'alaqtai'.

₂₄Nache So Jesús 'enapeco':

–Ñim Lo'onatac 'Enauacna Aỹem namaq da ndotec na Israel le'ecpi da setauan, cha'aye namayepi 'eeta'am aca qagueta maye isomtac.

₂₅Qalaxaye aso 'alo nquigueua'a So Jesús, nache ỹa'aroto naua l-llectel Somaye, nache 'eeta':

–¡'Am Ỹataxala', aỹem 'autauan!

₂₆Nache So Jesús 'enapeco':

–Saỹaỹamaxañi da qaỹacona ca aloq na ñalaqpi, ime, qaq qaỹasaxaigui ca pioxoppi.

₂₇Qalaxaye asomaye 'enapeco':

–¡Aja', 'eesa, 'am Ỹataxala'! Qalaxaye ivira'a nataqa'en na pioxoppi ishet da chectac nam aloq lsoche maye naañi cam lquia'axala' ca na'aco'pi.

₂₈Nache So Jesús 'enapeco':

–¡'Am 'alo, ỹataqta 'eesa da lta'araic da 'arpi'iỹaxac Ñim Lo'onatac 'Enauacna! Qaq ỹoqo'oye nagui ỹataqta ipacchigui qome da 'arquiquiaxac.

Qaq co'ollaq choche qoỹan da na'aqtac, nache aso llale no'oita.

₂₉So Jesús ca'ai yi'iye hueta'a, nache co'ollaq iviraxaama ye loigue aso lapel ye Galilea. Ime, nache tasheguemec aso sa qaỹoqotcheguemec 'alhua, nache nso'ooñi. ₃₀Nache ỹataqta qalota so shiỹaxauapi nauga ca hueta'a Somaye, nauectauo nam qaica ca lche lỹa, qataq nam sanauaañi, qataq na qaicaua naua la'aqtaqa, qataq na qaica ca lhuaq lỹa, qataq qalota na laỹepi sa no'onpi. Nache qairoua'a So Jesús, nache Somaye nataren 'enauac somayepi. ₃₁Ỹoqo'oye so shiỹaxauapi ỹataqta huo'o da la'aalaxa, souaxat da ỹauaachigui somayepi da 'enauac no'oita. Huaña, nache qaỹo'oxoreetac Ñim Lo'onatac 'Enauacna maye Lta'a nam Israel le'ecpi.

₃₂Nache So Jesús iỹaxanalo soua lapaxaguenataqa. Nache 'enapegalo, 'eeta':

–Ỹataqta huo'o da ichoxonnataxanaxa ne'ena shiỹaxauapi, cha'aye mashe ivi' naua tres na'axa'te da Aỹem hueta'aguet, qataq namayepi ye qaica ca aloq. Qaq Aỹem sa saỹamaxaren da huo'otaq samaq namayepi da huo'otaq saxanaxa da deque'e, cha'aye saiuena'a da huo'o ca decopche da huangui na nqa'aic.

₃₃Nache soua lapaxaguenataqa 'ena'apo':

–Qaq ¿hua'ago' ca shenaqtec da sanataxa cam aloq nam ỹataqta qalota shiỹaxauapi ye nam souaqta'a ye toolec?

₃₄Nache So Jesús 'enapeco':

–¿Ca lcate' caua nauole 'ayiiña maye qanacheeta'ape?

Nache soomaye 'ena'apo':

–Qomye siete qataq yeua nỹaq llalqa.

₃₅Nache So Jesús ỹamaxalec so shiỹaxauapi da nso'ona'aguet na 'alhua. ₃₆Ime, nache ỹaconalo soua siete nauole 'ayiiña qataq soua nỹaxaye, nache ỹanot da na'achecỹaxac Ñim Lo'onatac 'Enauacna. Ime, nache ncolaxaayiñi, nache ỹanema soua lapaxaguenataqa. Qaq soomaye nache ỹanoiguilo so shiỹaxauapi. ₃₇Nache 'enauac somayepi deque'e qataq ivira'a da ỹataqta comaraxaicpi. Ime, nache qalaỹona't so ñi'iỹoxotpi, nache ivi' soua siete no'oxonal maye laỹe' na nallec soua nlaxatchiguilo. ₃₈Qaq som deque'epi ivi' cuatro mil ỹalleppi, qalaxaye saq qanaloqten so 'alpi qataq so ñaqpiolec. ₃₉Qaq co'ollaq ime, nache So Jesús ncoyeguene' so shiỹaxauapi, nache huenongui aso nllocta, nache taỹa ye 'alhua le'enaxat Magdala.