¿Negue't ca ỹoqta ỹactec da la'amaqchec?
1Qaq se'eso na'a'q soua lapaxaguenataqa So Jesús nquiguereuo, nache inattrac Somaye, 'eetra':
–¿Chaq negue't ca ỹoqta ỹactec da la'amaqchec nam huetaigui da lo'onataxanaxac Ñim Lo'onatac 'Enauacna?
2Nache So Jesús iỹaxana so 'oonolec nogotolec, nache nachaalataxangui na laiñi soomaye, 3nache 'enapeco':
–Ỹoqta 'eesa de'era qami' sa'aqtaxanema, da yaqto' qaunoxoñiiua'a da lo'onataxanaxac Ñim Lo'onatac 'Enauacna, nache qami' iuen da qanaralaxache da qarataxaqui, nache qoñiita'am na nogotolec. 4Cha'aye da qanayeetaigui da lo'onataxanaxac Ñim Lo'onatac 'Enauacna, nache ca shiỹaxaua maye 'amaqtaqaic nacheca cam 'eeta'am ne'ena nogotolec. 5Qataq ca souaxat da Aỹem quetague' da ỹaconeguet ca 'oonolec nogotolec 'ena'am ne'ena, nache camaye Aỹem ỹaconeguet.
Da taỹa'aguet ca shiỹaxaua da ỹo'otec da ca'ai da lpi'iỹaxac ca lỹa
6Qalaxaye da huo'o ca ỹo'otec nam saq 'amaqtaqpiolec maye Aỹem ca'attague' da ỹaxanec da lpi'iỹaxac Aỹem, nache camaye no'on taxa da qaicoñera'aguet na lqosot ca coma' lta'araic, ime nache qaỹasaxangui na laiñi aca auaxai.
7Qalota na lataxaguesat ana 'alhua da ỹo'oteguet na shiỹaxauapi da saishet da ỹalaxaguet Ñim Lo'onatac 'Enauacna, qataq qaica ca lataxac da huo'otaq qaivita'aguet. Qalaxaye ¡ỹataqta qauem da taỹa'ague cam ỹo'otec ca lỹa da sa ỹalaxaguet Ñim Lo'onatac 'Enauacna!
8Qaq ỹoqo'oye cam ỹo'ot na 'arhuaq huo'otaq na 'arapia' da huo'otaq 'am ỹaueeguet da sa 'aualaxaguet Ñim Lo'onatac 'Enauacna, qaq no'on da 'aucheguec, nache 'auỹotaxateueegue da 'auasaxauec. Cha'aye ỹaỹamaqchiguiñi da 'aunoxoneua'a da nca'alaxa, na'aictaxa da 'oonolec na 'arhuaq huo'otaq na 'arapia', qalaxaye saq 'ena'am da 'am qaỹasaxangui ca norec maye nhuaxanaqa' na 'etaxaloxoicpi da nalota't naua 'arhua'q qataq naua 'arapia'ate. 9Qataq cam ỹauaachigui añi 'ara'aite, da huo'otaq 'am ỹo'otec da sa 'aualaxaguet Ñim Lo'onatac 'Enauacna, qaq no'on da 'anqat, nache 'auỹotaxateueegue da 'auasaxauec. Cha'aye ỹaỹamaqchiguiñi da 'aunoxoneua'a da nca'alaxa, da 'oonole añi 'ara'aite, qalaxaye saq 'ena'am da 'arỹaueegueto naua 'ara'ai'te, da 'am qaỹasaxangui ca norec maye nhuaxanaqa' na 'etaxaloxoicpi.
10-11Qantooñita'ac qome de'era: saishet qome da qauo'otañi ca 'oonolec nam saqca ca la'amaqchec. Cha'aye Aỹem qami' shenapegalo da na lamaxashecpi maye 'amaqtaqaicpi Ñim Lo'onatac 'Enauacna ilotague' namayepi.
Qaỹaloqnaxana aso qagueta maye isomapec
12Qami' ¿ca 'eetec ca qarhuennataxaqui? Da huo'otaq huo'o ca 'oonolec da qoñiita da huo'o aca cien lalo qaguetapi, qaq da huo'otaq noma da isomapec aca 'oonole, qaq ¿peta'a saisheto' da no'onaxatalec aca qaỹoqotcheguemec 'alhua aca noventa y nueve qaguetapi, ime, nache jec da nmitaique aca 'oonole maye isomapec? 13Qaq da huo'otaq mashe ỹanata, nache camaye ỹataqta ỹactec da ntootapeguec aso 'oonole qagueta, saq 'ena'am da ntootapeguec aso noventa y nueve maye saishet da isomapec. 14Qaq 'era da 'eetec nataqa'en ñi Qarta'ai maye neta'ague da piguem, da sa ỹaỹamaxaren da deqat ca 'oonolec ne'ena maye qaica ca la'amaqchecpi qataq da nache 'eetai' da qaỹoqta Ñimaye.
Da lataxac da qaichoxoren ca nqaỹa
15Da huo'o ca 'oonolec nam Aỹem ca'attague' da 'am ỹo'otec ca qauem, qaq no'on da 'andote' camaye da 'aua'aqtaxanem ca lsomaxac. Qaq camaye da huo'otaq 'am ỹalaxaguet, nache 'am qaltaq 'araueguec camaye. 16Qalaxaye camaye da saishet da 'am ỹalaxaguet, nache 'am 'auỹaxana ca 'oonolec, huo'otaq caua dos nam Aỹem ca'attague'pi yaqto' 'ara'aqtaxanaxau'. Cha'aye ana nere maye huetalec na la'aqtacpi Ñim Lo'onatac 'Enauacna, dapaxaguenataxanec da huo'o ca 'eeta'am de'era, nache qaiue'n caua dos huo'otaq caua tres da da'aqtaxa'n. 17Qaq camaye da saishet da ỹalaxagueta caua 'ara'aqtaxanaxau', nache 'am ishet da 'aua'aqtaxanem na 'amqaanataxanaxaicpi. Qaq da saishet da ỹalaxaguet namayepi, nache camaye 'eeta'am qanqa'en ca saishet da ỹa'amaqten Ñim Lo'onatac 'Enauacna, huo'otaq cam ỹacootapeeguet ana nsheetenaqte ca nta'a maye netaña ye Roma.
18Qaq ỹataqta 'eesa de'era qami' sa'axatema, da ca qami' sa qauashiñi ana 'alhua, qalaq nataqa'en Ñim Lo'onatac 'Enauacna maye imattalecna saishet da ỹashen. Qataq cam qami' qauashiñiita ana 'alhua, qalaq nataqa'en Ñim Lo'onatac 'Enauacna ỹasheeta.
19Nataqa'en ỹataqta 'eesa da huo'otaq huo'oi caua dos da qoñiita, nagui da ñaq qoviita'a ana 'alhua da huo'otaq ỹataqta na'aqtaxaachiguilo ca iỹaxaaraique da iỹaxanot Ñim Lo'onatac 'Enauacna maye imattalecna, nache Ñimaye ỹanema caamaye ca iỹaxaatraique. 20Cha'aye cam huetra'a caua dos, huo'otaq tres da qoñiita da na'aqtaxaatapiguilo da ỹe'enaxat, nache Aỹem soota'agueta caamaye.
21Nache so Pedro nquigueua'a So Jesús, nache inat 'eeta':
–'Am Ỹataxala', da huo'o ca 'oonolec nam ỹaqaỹañicpi maye ỹa'amqaanataxanaxauapi da aỹem ỹo'otec ca qauem, nache ¿chaxan lcate' da she'eguelaxalec da sechoxoren camaye? ¿Peta'a siete da she'eguelaxalec da sechoxoren?
22Nache So Jesús 'enapeco':
–Saishet da siete da 'avi'eguelaxalec da 'auchoxoren ca 'arqaỹa. Maye 'am iuen da chochaq tatec da 'archoxonnataxanaxa camaye.
Qaỹaloqnaxana so namaxashec maye saishet da dechoxonnataxan
23De'era lo'onataxanaxac Ñim Lo'onatac 'Enauacna, damaye 'eeta'am da 'eetec da huaigui co'ollaxa som ilotague' so 'alhua. Se'eso nta'a iỹaxaneuga so lamaxashecpi da huotaique da ỹaỹaten ca 'eetec cam tata'ague da lo'onataxanaxac qataq da naloqna't añi lavigaxaiste somayepi da yaqto' ñi 'oonolec somayepi desheetenaxan.
24Qaq co'ollaq mashe naloqteetega't aso navigaxaiste, nache qanauegueua'a so 'oonolec maye ivi' aso sesenta millones aso anom maye chegaqaigui na lcat plata aso lavigaxaiste. 25Qaq se'eso namaxashec, somaye ye qaca aca alom da desheetenaxana. Nache se'eso nta'a damaxasoxoolec somaye da qaimen, da qaỹauo'o namaxashec lỹaueegue' aso lhua qataq soua llalqa, qataq 'enauac so logoxoshetpi, da yaqto' aca lasheue somayepi ishet da qaisheeten aso lavigaxaiste somaye.
26Qalaxaye se'eso namaxashec, somaye ỹa'aroto naua l-llectel so nta'a, nache nachoxoreetacot, 'eeta': «'Am ỹataxala', ñaq 'auauo'o qome ca iraqa', yaqto' aỹem sesheeten 'enauac añi ỹavigaxaiste maye 'am neto'ot.»
27Nache se'eso nta'a ỹataqta huo'o da lchoxonnataxanaxa somaye nache 'eetega, 'eeta':
«'Am qojec qome, qaica camachaqca; aỹem 'am sechoxoren da choche sapalaxat añi 'aravigaxaiste.»
28Qalaxaye co'ollaq choche huenoxonec da ca'ai so lma' so nta'a se'eso namaxashec, nache natena'aguet so lo'onataxanaxaua maye huo'o aso lavigaxaiste ivi' cien ana anom maye chegaqaigui na lcat plata. Nache ỹaconot na lqosot somaye, nache ivigoqto'ot qataq 'eetega, 'eeta': «¡'Ausheeten nagui añi 'aravigaxaiste!»
29Nache se'eso lo'onataxanaxaua ỹa'alyiñi naua l-llectel, nache nachoxoreetot somaye, 'eeta': «Ñaq 'auauo'o qome ca iraqa' yaqto' ishet da sesheeten 'enauac añi ỹavigaxaiste.»
30Qalaxaye se'eso namaxashec saishet da ỹasateguet, nachaqrata da damaxasoxoolec da qaỹauegueua'a aso ncoñetaxanaxaqui, choche ivitta'a da isheeten 'enauac aso lavigaxaiste somaye.
31Nache soua lỹa't lo'onataxanaxau' co'ollaq ỹauaachigui de'era, nache ỹataqta qalota da nqui'i'c. Nache je'c soomaye da da'aqtaxaareua'a so na'aco' 'enauac de'era.
32Nache se'eso 'aco' damaxasoxoneuga som lamaxashec nache 'enapega, 'eeta': «¡'Am ỹataqta ỹaguec da 'aye'etaxaloxo! Aỹem 'am sechoxoren da sapalaxat 'enauac aso 'aravigaxaiste, cha'aye ỹataqta aỹem 'anachoxoreetot. 33Qaq ¿ta'ainec ye saishet da 'auchoxoren so 'arỹa da 'eeta'am da 'am sechoxoren?»
34Nache se'eso nta'a somaye ỹataqta dalemata, nache damaxasoxoolec da qaỹauo'o ca nhuaxanaguec se'eso lo'onataxanaxanec, choche ivitta'a da ishet da isheeten 'enauac aso lavigaxaiste.
35Nache So Jesús 'enapeco':
«Qaq 'era qome da 'eetec naqa'en da qoñiita ñi Ita'a maye neta'ague da piguem, da huo'otaq ñi 'oonolec saishet da ỹoqta lquiyaqteỹaxac da ichoxoren ca lqaỹa.»
