Mateo 21

₁So Jesús qataq soua lapaxaguenataqa ivilda ye nỹecpiolec maye le'enaxat Betfagué, huaña nache vi'iiguet co'ollaq ivildot añi qaỹoqotcheguemec 'alhua maye nanqa' ana Olivo, qaq mashe saqaỹapeque ye nỹecpi ye Jerusalén. ₂Qaq co'ollaq ivilda yemaye, nache So Jesús 'enapegalo soua dos lapaxaguenataqa, 'eeta':

«Qanqo'oñiita yi'iye nỹecpi maye yo'oqotta. Qaq qom choche qaunoxoñiỹoigui yemaye, nache qauloỹalec añi 'ashena qaicoñettai', huaqta'ai' ñetai' llalec. Nache qausoiuec qome, nache Aỹem qanaviquiỹa. ₃Qaq da huo'o ca qami' ina't qalaq qoñiỹapega qome camaye, qoñiita': ‹Ñi Qarataxala' iue'n naamaye, qalaxaye saqaỹaloq qome da ñe'eguelaxataq.›»

₄Qaq 'eetec de'era Somaye, yaqto' ipacchigui da ỹa'axat co'ollaxa so la'aqtaxanaxanec Ñim Lo'onatac 'Enauacna co'ollaq ỹiyiñi de'era maye, 'eeta':

₆Nache soua lapaxaguenataqa je'c tareua'a so nỹecpi da ỹo'o't dam damaxasoxoolec So Jesús. ₇Nache qanavigui' aso 'ashena qataq so llalec, nache qaỹachaleguete soua npo'ote, nache So Jesús huenotsheguem. Ime nache jec da taua'a ye Jerusalén. ₈Nache som shiỹaxauapi maye ỹataqta qalota, somayepi ipiguingui so nqa'aic na lapo'pi. Qataq huo'o na iquesoxouec ana laue ana chaic, nache ỹachangui so nqa'aic da ỹauotaique lapiaxala' Somaye. ₉Nache 'enauac nam shiỹaxauapi maye hua'auta qataq nam nca'ataxaatauo ỹataqta ỹa'alaqtagui, 'eeta':

₁₀Nache So Jesús co'ollaq mashe inoxoneua'a ye nỹecpi ye Jerusalén, nache 'enauac nam shiỹaxauapi maye netaigui yemaye ỹataqta huo'o da le'elaxa. Nache qalota na denataxaatac, 'eeta':

–¿Negue't de'era ỹale?

₁₁Nache som shiỹaxauapi maye nnaictague' So Jesús, 'eeta':

–¡Qomye damaye le'enaxat Jesús maye la'aqtaxanaxanec Ñim Lo'onatac 'Enauacna! Damaye chegaqa'a ye Nazaret maye huaigui ye 'alhua Galilea.

₁₂Qaq So Jesús co'ollaq inoxoneua'a ye nỹecpi ye Jerusalén, nache nqo'ona aso no'onaxanaxaqui late'erai. Huaña, nache Somaye ỹo'orauec 'enauac som nmenaxaicpi qataq som desheenaxatega na nmenec. Qataq ỹamaxañi so nmenaxala'pi som nmenaxanaxaatega't ana alom na shiỹaxauapi, da nmenaxaatapeeguet ana alom añi no'onaxanaxaqui late'erai qataq ỹasaqtega't aso laỹe' so qaimeetac qoto'pi. ₁₃Nache 'enapeco': «Naua ñiyigui'she la'aqtaqa Ñim Lo'onatac 'Enauacna, 'eeta': ‹Na ima', namaye da qaiỹaxana qalaq qouagaxaunaqa'›. Qalaxaye qami' qauo'ochec namaye da nqañoxotaqa' na cachaxaicpi.»

₁₄Ime, nache huo'o so qanamaicpi qataq som saishet da queuoỹapigui' naua'a So Jesús, nache Somaye nataren 'enauac somayepi.

₁₅Qaq som lataxala'pi so ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq som dapaxaguenataxaatapeguec na namaxasoxonaxacpi, somayepi co'ollaq ỹauaachigui de'era saqaỹauanapega maye ỹo'ot So Jesús qataq co'ollaq hua'aqchigui so ñaqpiolec da ỹo'oxoreetac So Jesús maye Lca'aguishec Ñim Lo'onatac 'Enauacna. Nache ỹataqta dalemata, ₁₆Nache somayepi 'enapega So Jesús, 'eeta':

–¿'Am peta'a 'aua'aqtega dam 'eetega nam ñaqpiolec?

Nache So Jesús 'enapeco':

–Aja', sa'aqtega. Qalaxaye qami' ¿saishet peta'a da qautaxaỹaxañi naxa da 'enapec naua ñiyigui'she la'aqtaqa Ñim Lo'onatac 'Enauacna maye, 'eeta'?:

₁₇Nache So Jesús ca'ai ye nỹecpi ye Jerusalén, nache taỹa ye nỹecpi ye Betania da lo'ochaqa' se'eso pe.

₁₈Qaq so nte'etom so lỹa na'a'q co'ollaq ỹe'eguelaxaua'a ye Jerusalén So Jesús, nache co'ollaq huangui so nqa'aic, nache nomteguet da huo'o na lqouaxa, ₁₉nache ila'a aso higo lcheyec maye netaua'a na laỹe so nqa'aic. Nache nqo'oota asomaye, qalaxaye co'ollaq mashe ivirot, nache ila'a da qaca aca ala, ndotec ana laue. Nache So Jesús ỹauo'o so ỹasaxalec qauem la'aqtac da nlaxa asa'aso higo lcheyec, 'eeta':

«¡Nagui nache tachiguiña da saishet qome da huo'o ca alaỹaxac da qoneta!»

Huaña, nache asa'aso higo lcheyec deqaqa. ₂₀Qaq co'ollaq ỹauaachigui de'era soua lapaxaguenataqa, nache ỹataqta huo'o da la'aalaqa', nache inattrac So Jesús, 'eetra':

–¿Chaq hua'ague ca 'eetec ara higo lcheyec ye saqaỹaloq da deqaqa?

_21-22Nache So Jesús 'enapeco':

–Ỹataqta 'eesa de'era qami' sa'axatema, da ỹoqta 'eesa da huo'o ca qarpi'iỹaxaqui qataq saishet da qauqolliguichi da la'añaxac Ñim Lo'onatac 'Enauacna, nache 'enauac cam qauỹaxañiỹaique da qauoita'a da qanqouagaxaunaxaqui, nache ishet da huo'o. Nataqa'en ishet da ivira'a da qauo'oche dam so'otec ara higo lcheyec, qataq ishet da ỹactec ca qauo'oche da huo'otaq qoñiỹapega ana qaỹoqotcheguemec 'alhua da, qoñiita': «Qoca'ai ne'ena qonetaña, ime, qaq 'angui aso auaxai», qaq de'era qara'aqtaqui ỹataqta ipacchigui.

₂₃Nache So Jesús huenoxoneua'a aso no'onaxanaxaqui late'erai. Qaq co'ollaq ña dapaxaguenataxaatac, nache nqo'oneua'a Somaye som lataxala'pi so ltaxaỹaxanaxanecpi na shiỹaxauapi da qaitaxaỹapegue' Ñim Lo'onatac 'Enauacna qataq som nqueroxonecpi maye lataxala'pi so judiopi. Nache inattac Somaye, 'eeta':

–¿Negue't cam 'am ỹanem da 'ara'añaxac da huo'omshe 'auo'ot 'enauac de'era?

_24-25Nache So Jesús 'enapeco':

–Aỹem nataqa'en qami' sena't. ¿Negue't ca ỹanem da la'añaxac so Juan maye nachelaxanataxanaq da yaqto' dachelaxanataxan? ¿Peta'a nacheñi Ñim Lo'onatac 'Enauacna, huo'otaq ca lỹa shiỹaxaua? Da qauasacheeguet de'era inataxanaxac, nache Aỹem nataqa'en qami' sa'axatema cam Aỹem ỹanem da ỹa'añaxac da so'ot 'enauac de'era qauauañiichigui.

Nache somayepi maiche ncotatega't, 'eeta':

«Da qomi' shenaqapec da nacheñi Ñim Lo'onatac 'Enauacna da ỹami' da la'añaxac so Juan, qaq ỹoqta qome de'era Jesús da qomi' ina't 'eeta': ¿Ta'ainco' qone' ye sa qaua'amaqchiñi? ₂₆Qataq huo'o da qarcolanaxa da shenaqapec da choche shiỹaxaua ca ỹami' da la'añaxac so Juan, cha'aye 'enauac na shiỹaxauapi ỹataqta ỹa'amaqten da somaye la'aqtaxanaxanec Ñim Lo'onatac 'Enauacna.»

₂₇Nache somayepi ỹasateguet So Jesús, 'eeta':

–Aque', sa saỹatenaq.

Nache So Jesús 'enapeco':

–Aỹem nataqa'en saishet da qami' sa'aqtaxanema ca sachegoxota'ague de'era ỹa'añaxac da so'ot de'era.

₂₈Nache So Jesús nataqa'en 'enapeco':

–¿Chaq 'eetec ca qarhuennataxaqui de'era qami' sa'axatema? 'Eeta': Huo'o so ỹale huo'oi soua dos llalqa. Nache 'enapega so llalec ỹe, 'eeta': «'Am ỹalec, qojec qome 'auo'ot ye ỹanaxanqa' maye uva lma'.»

₂₉Nache somaye ỹasat, 'eeta': «¡Qa'aitai', saishet da ashec!»

Qalaxaye co'ollaq qaỹata'ague, nache naralaxat da lhuennataxa. Ime, nache jec da do'onataxan.

₃₀Ime, nache se'eso ỹale qaltaq 'enapega so lỹa llalec na'asa da jec da do'onataxan, nache somaye ỹasato', 'eeta': «¡Aja', 'am ỹataxala' aỹem ashec!»

Qalaxaye se'eso nsoqolec saishet da jec. ₃₁Qaq ¿chaq negue't se'esoua dos ñalqa cam ỹo'ot da 'eetapeguec so lta'a?

Nache som ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq som lataxala'pi na judiopi 'enapeco':

–Qomye som llalec ỹe, 'enapeco' somayepi.

Nache So Jesús, 'eeta':

–Ỹoqta 'eesa de'era qami' sa'axatema, da nam shiỹaxauapi maye qauem da na'aqtaguec, qataq nam ỹacootapeeguet ana nsheetenaqte ca nta'a qataq anam quisheguetaxaipi, namayepi la'auaxanec da inoxoneua'a da lo'onataxanaxac Ñim Lo'onatac 'Enauacna. ₃₂Cha'aye anac so Juan maye nachelaxanataxanaq da yaqto' qami' ỹapaxagueneque ca lataxac da yaqto' no'on da qarataxaqui qataq qaualaqaiguet Ñim Lo'onatac 'Enauacna, qalaq qami' saishet da qaua'amaqchiñi somaye. Qalaxaye nam ỹacootapeeguet ana nsheetenaqte ca nta'a qataq anam quisheguetaxaipi ỹa'amaqten somaye co'ollaxa. Qalaxaye qami' na'aictaxa da qauauañiichigui 'enauac de'era, qalaxaye ñaqaiyeta saishet da qanaralaxache' naua qarhuennataxacolli', nachaqrata da nache qoquiito'ot da saishet da qaua'amaqchiñi somaye.

₃₃Qana'axaỹaxañiichigui de'era saloqnaxana, 'eeta': Huo'o so ỹale lalamaxat so 'alhua, ỹauo'o so lanaxanaqa' uva lma'. Ime, nache npaxateua'a, qataq ỹo'ot aso laỹe' da qanlom na lli'i anamaye, qataq aso lalloxolate, da yaqto' ishet da qaỹalletalec 'enauac se'eso nanaxanaqa'.

Ime, nache somaye huo'o so ỹa'aalaxanaxanec 'onataxanaxaicpi se'eso lanaxanaqa'. Ime, nache jec.

₃₄Qaq co'ollaq mashe ivita so laloqo' da qanqat ana ala na nañiguishec, nache somaye huo'oi soua ỹamaq som lamaxashecpi, da yaqto' iỹaxanot se'eso 'onataxanaxaicpi da icolaxateuga cam talec somaye qanqa'en. ₃₅Qalaxaye se'eso 'onataxanaxaicpi ỹaconeua'alo se'esoua namaxa'she. Nache iuaxaatac, qataq huo'o na ỹalauat, qataq huo'o na ỹasaq na coma'.

₃₆Qaq se'eso lalamaxat se'eso nanaxanaqa' qaltaq nquigaxattec so ỹamaq lamaxashecpi. Qalaxaye se'eso 'onataxanaxaicpi qaltaq ỹe'enaxatteguet da 'eetec naqa'en soua hua'auchiyiñi namaxa'she.

₃₇Qaq pa'atec nache somaye ỹamaq so maiche lalamaxat llalec, cha'aye da lhuennataxa, 'eeta': «Ỹoqta qome da qaỹalaxaguet ñi ỹalec.»

₃₈Qalaxaye co'ollaq qaila'aguet se'eso llalec, nache so 'onataxanaxaicpi detaxaỹapega't, 'eeta': «'Ena cha'aguet nam talec qome da lsallaxa so lalamaxat ne'ena nanaxanaqa'. Namaye salauataq yaqto' qomi' taleguete qome na nma'.»

₃₉Nache se'eso ỹalleppi ỹaconeua'a se'eso nsoqolec, nache nqateeguesop se'eso nanaxanaqa', nache ỹalauat.

₄₀Nache So Jesús denataxan, 'eeta':

–Qom ivita da anac se'eso lalamaxat so nanaxanaqa', qaq ¿chaq 'eetec naqa'en se'eso ỹalleppi?

₄₁Nache somayepi ỹasat, 'eeta':

–Qomye se'eso lalamaxat so nanaxanaqa' ỹalauat se'eso 'etaxaloxoicpi ỹataqta sa ichoxonnai'. Ime, qaq ỹanem so lanaxanaqa' ca laỹepi 'onataxanaxaicpi maye ỹataqta ipacchigui da icolaxateuga cam talec som lalamaxat se'eso nanaxanaqa' da iviteuga ca laloqo' da qanqat ana ala na nañiguishec.

₄₂Nache So Jesús 'enapeco':

–¿Qami' peta'a sa ỹauanapego' da qautaxaỹaxañi' naua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna maye, 'eeta'?:

₄₃Qaq ỹoqta 'eesa de'era qami' sa'aqtaxanema da Ñim Lo'onatac 'Enauacna, qami' nqatre'c da yaqto' saishet da qami' ỹalecneua'alo da lo'onataxanaxac, nache ỹami' ca ỹoqta 'enauac ỹalaxaguet damaye. ₄₄Da huo'o ca camachaqca tatelec so coma' maye ỹo'otan co'ollaxa so do'oxonaxaatacpi, nache camaye dolachigui. Qataq se'eso coma' da huo'otaq huo'o ca tatelec, nache ỹataqta dolachigui naqa'en.

₄₅Qaq so lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq so chegaqaigui na fariseopi, co'ollaq hua'axaỹa de'era daloqnaxaatega So Jesús, nache ỹaỹaten da So Jesús 'eetega somayepi. ₄₆Nache somayepi ỹauotaique da icoñi' So Jesús. Qalaxaye huo'o da lcolanaxa na shiỹaxauapi, cha'aye namayepi 'eetega da So Jesús ỹataqta 'eesa da la'aqtaxanaxanec Ñim Lo'onatac 'Enauacna.