Da ltelaqtaxanaxac So Jesús
1Nache So Jesús 'enapega so shiỹaxauapi qataq soua lapaxaguenataqa, 'eeta':
2Nam dapaxaguenataxaatapeguec na namaxasoxonaxacpi qataq nam fariseopi, namayepi nachena nam ỹataqta ỹaỹaten da ỹa'axategue da llec na lamaxasoxonaxacpi so Moisés. 3Qaq ỹoqo'oye qami' iuen da qauo'oche 'enauac cam la'aqtac namayepi, qalaxaye saishet qome da qauo'oche nam ỹo'ottac namayepi, cha'aye da ỹauo'o ye dapaxaguenataxanec, qalaq namayepi ỹaqa'a na ỹo'ottac. 4Cha'aye namayepi ỹauo'o na damaxasoxoolec ỹataqta alaqaic da ishet da qaipaqueelec, qalaxaye saishet da ỹo'ot ca qapio'olec na'añaxataxac da yaqto' ishet da ipaqueelec namayepi. 5Qaq ỹo'ot 'enauac ne'ena namayepi, cha'aye nshetaique da na shiỹaxauapi huo'o da la'aalaxa. Ỹoqo'oye ỹauo'o natai' lereguishecpiolec ỹachegoxotaigui ana nere maye huetalec na la'aqtacpi Ñim Lo'onatac 'Enauacna, ime nache ỹauo'o aso laỹe' lo'ocole qataq ỹauo'o so lquet, nache ishet da ỹaxachigui na lqaic da ỹaatelec na latap huo'otaq na lhuaq. Nache nquigaxattauec ye lcata asa'aso laỹe' qataq ỹo'ot na lasoviaxanatac naua loga'te naua alogo da yaqto' na shiỹaxauapi ipettega da ỹataqta ỹalaxaguet Ñim Lo'onatac 'Enauacna. 6Qataq da nqo'oneua'a ana napaxaguenaxaqui na judiopi qataq na naponaxacpi, nache ỹataqta ỹaỹamaxareeta da huo'o naq 'enec qanqa'en, 'ena'am da ỹataqta 'eesa da 'amaqtaqaic. 7Qataq ỹataqta ỹaỹamaxareeta da na shiỹaxauapi da huo'o naq 'enec da iquin da huaña ca menaqa', qataq da qaiỹaxana qalaq qoỹeeta' napaxaguenataxanaqpi.
8Qalaxaye qami' saishet qome da qauacheeta'a na shiỹaxauapi da qami' iỹaxanalo qalaq 'eetega qami' napaxaguenataxanaqpi. Cha'aye 'enauac da qoñiita qami' nqaỹañecpi, qaq 'oonolec na Qanapaxaguenaxala'ai. 9Qataq saishet qome da huo'o ca qauamachiỹa'ac qarta'ai, cha'aye 'oonolec Ñi Qarta'ai maye Lo'onatac 'Enauacna qataq imattalecna. 10Qataq saishet qome da qauayiñi na shiỹaxauapi da yaqto' qami' ỹamata'aque da qami' nataxala'ate, cha'aye Aỹem maye Aỹem Lca'aguishec Ñim Lo'onatac 'Enauacna Aỹem 'oonolec da Qarataxala'ai. 11Qaq cam 'amaqtaqaic da qoñiita qalaq nacheca ca huetague' na laỹepi. 12Cha'aye cam ipettega da nataỹaña da la'amaqchec na laỹepi, nache camaye qaỹo'otec da qaica ca la'amaqchec. Qaq nam sa na'amaqten, qalaq nachena na qaỹamata'ac da 'amaqtaqaic.
¡Ỹataqta qauem da qa'aita'ague!
13Nache So Jesús 'enapega som fariseopi qataq som dapaxaguenataxaatapeguec na namaxasoxonaxacpi, 'eeta':
¡Ỹataqta qauem da qa'aita'ague qami' tenataxanaxaicpi! Cha'aye qami' qauapoigui ñi lasom dam lo'onataxanaxac Ñim Lo'onatac 'Enauacna, da yaqto' saishet da huo'o ca inoxoneuo. Qalaxaye ivira'alo qami' saishet da qaunoxoñiiuo, qataq saishet da qauashiñim da inoxoneuo nam nshetaique da inoxoneuo. 14[¡Ỹataqta qauem da qa'aita'ague qami' fariseopi maye qoñiitega qami' 'eesora! Cha'aye qami' ỹataqta qui'itchiguilo qanqa'eñi naua lma'ate ana pa'aipi, qataq qanqañoxochiỹoigui da qauo'oche da logoraic qanatamnaxaqui, qaq souaxat de'era nache qami' ỹataqta lta'araic qome ca qanhuaxanaguiqui.]
15¡Ỹataqta qauem da qa'aita'ague qami' tenataxanaxaicpi! Cha'aye qami' ỹataqta qa'aiteua'alo naua nma'ate qauauoitaique da huo'o ca qami' queguelo, qaq da qauanachiỹa nache camaye ỹataqta qauo'ochec da ỹataqta ỹactec da nhuaxanaguec qom qaỹasaxaña ca nhuaxanaqa' na 'etaxaloxoicpi, qaq saq 'ena'am da qoñiita.
16¡Ỹataqta qauem da qa'aita'ague! Cha'aye qami' taxa maye qauapaxaguiñi na shiỹaxauapi da ỹalaxaguet Ñim Lo'onatac 'Enauacna, qalaxaye qami' ye sa qauaỹaañi cam qoñiitec: «Nachaqrata da qauapaxaguiñic ca shiỹaxaua da ỹan ca la'aqtac da huaigui añi no'onaxanaxaqui, qalaq ishet da nlaxaañi. Qalaxaye da huo'otaq ỹan ca la'aqtac da 'eetega ỹaneua'a añi no'onaxanaxaqui late'erai ca oro, nache camaye iuen da ỹataqta ipaqueelec ca la'aqtac.»
17¡Qami' ỹataqta qaica ca qauaỹaañiỹapec qataq qami' 'oopaiqa! Cha'aye saisheto' peta'a da qauloỹa'a da añi no'onaxanaxaqui da napacalec da la'amaqchec ca oro, qataq añi no'onaxanaxaqui nachañi añi ỹo'ot da ca oro huo'o da lyac da hueto'ot Ñim Lo'onatac 'Enauacna.
18Nataqa'en qauapaxaguenataxañiiteguec da huo'o ca shiỹaxaua da ỹan ca la'aqtac chegoqchigui da la'añaxac añi nca'atoxonaxalate maye netaña añi no'onaxanaxaqui late'erai, qalaq camaye ishet da sa ipaguelec ca la'aqtac. Qalaxaye da huo'otaq ỹan ca la'aqtac da ỹachegoxotchigui da la'añaxac ana nachetaqtaxanaqte, qalaq camaye iuen da ỹataqta ipaqueelec ca la'aqtac. 19¡Qami' qaica ca qauaỹaañiỹapec! Cha'aye añi nca'atoxonaxalate maye qaỹachalec naxa ana nachetaqtaxanaqte da qoỹanot Ñim Lo'onatac 'Enauacna, añimaye napacalec da la'amaqchec aca nachetaqtaxanaqte, qataq nachañi añi ỹo'ot da huo'o da la'amaqchec aca nachetaqtaxanaqte da hueto'ot Ñim Lo'onatac 'Enauacna. 20Cha'aye ca shiỹaxaua da huo'o ca ỹachaxanapec, qataq ỹan ca la'aqtac da chegoqchigui da la'añaxac añi nca'atoxonaxalate maye netaña añi no'onaxanaxaqui late'erai, nache camaye saishet da nachaqañeta añi nca'atoxonaxalate da chegoqchigui da la'añaxac, nacherata da imauec nataqa'en cam huetalec añimaye. 21Qataq da huo'o ca ỹan ca la'aqtac da chegoqchigui da la'añaxac añi no'onaxanaxaqui late'erai, nache camaye saishet da nachaqañeta añi no'onaxanaxaqui late'erai da chegoqchigui ca la'añaxac, maye nataqa'en Ñim Lo'onatac 'Enauacna maye hueta'a añimaye. 22Nataqa'en cam ỹan ca la'aqtac da chegoqchigui da la'añaxac na pa'asheguem, nache nataqa'en chegoqchigui ca la'añaxac Ñim Lo'onatac 'Enauacna, cha'aye nache hueta'a Ñimaye.
23¡Ỹataqta qauem da qa'aita'ague qami' maye qauapaxaguenataxañiiteguec na namaxasoxonaxacpi qataq qami' fariseopi maye qoñiitega da qami' 'eesora! ¡Qami' tenataxanaxaicpi! Ỹataqta huo'o da qanpogoxoinaxaqui da qaỹa'añiiuo da qarachetaqtaxanaqche añi 'oonole laue ana diez ana nalecnaxanaqte maye le'enaxat menta, qataq anís, qataq ana comino maye qa'añiguishe, qalaxaye qami' saishet da qaualaqaigueta naua lapaxaguenataxanaxaco nam nqataxacpi maye ỹoqta iue'n da qaỹalaxaleguete maye, 'eeta': da no'on nataxac, qataq da qaichoxoren ca nỹa, qataq da qaỹalaxaguet Ñim Lo'onatac 'Enauacna. Qaq ne'enaua tres nachenaua naua iue'n da ỹataqta qaỹo'o't, qalaxaye saishet da nache sa qaỹalaxalec na laỹepi namaxasoxonaxacpi. 24¡Qami' maye qami' nataxala'ate ỹataqta qaica ca qauaỹaañiỹapec! Qaupaquiiteleguete naua lataxaco maye ỹataqta qaica ca la'amaqche'c naua namaxasoxonaxaco, qalaxaye saishet da qaupaquiilec nam ỹataqta huo'o da la'amaqchec namayepi. Qami' qoñiita'am nam nỹomtapigui na lataxa da nqatsheguem ana 'aỹat, qalaxaye 'eeta'am da iuoxonañi ana shiguiỹac le'enaxat nauanaxanaxa maye huetangui ca lataxa.
25-26¡Ỹataqta qauem da qa'aita'ague qami' tenataxanaxaicpi! Qami' choche qaue'enaxache ca shiỹaxaua maye 'onaxaic da lataxac, qalaxaye qami' qauemaiqa, qaica ca ishet da qautauañi, nachaqrata da qaucacheetacot na shiỹaxauapi. ¡Qami' qaica ca qaraỹaanataxanaxaqui! 'Onaxaic da ỹataqta qano'onaxache da qarataxaqui, cha'aye da saishet da nache qoñiitec de'era, nache qoñiỹa'am aca ỹomaxaqui qataq ca nquia'axaqui da qui'itta na pa'auec, qalaxaye ỹataqta nshepaxan na pa'auo. Qalaxaye aca ỹomaxaqui qataq ca nquia'axaqui da qaiỹo na pa'auo, nache ỹoqta 'eesa da imauec da qui'itta.
27-28¡Ỹataqta qauem da qa'aita'ague qami'! Cha'aye qaue'enaxache ca shiỹaxaua no'on da lataxac qataq ỹo'oxoraic, qalaxaye ỹoqta 'eesa da qami' tenataxanaxaiqa qataq qami' qauemaiqa. Qoñiita'am aca huachiqui maye qaỹa'ameeta na pa'auec qataq da qailota'a qalaq ỹataqta qui'itta, qalaxaye nam pa'auo ỹataqta nlaqchigui na npi'inecpi qataq ỹataqta qauem.
29¡Choxoraiqolqa qami' tenataxanaxaiqa, cha'aye ỹataqta qauem da qa'aita'ague! Cha'aye qami' qano'oxoñiisheguem na coma'pi da yaqto' saishet da qaucoviỹa'ai na le'enaxatpi so la'aqtaxanaxanecpi Ñim Lo'onatac 'Enauacna maye mashe ileupi, qataq qauauo'oi na llo'oxoraxat nam shiỹaxauapi maye no'on da lataxac. 30Ime, nache qoñiita': Da souaqtaigui taxa se'eso na'a'q, nache saishet taxa da salegaqaua'a som ỹalauatpi som la'aqtaxanaxanecpi Ñim Lo'onatac 'Enauacna. 31Qalaxaye da qarataxaqui ỹoqta 'eesa da 'eeta'am somayepi. 32¡Qaq no'on da qami' ỹataqta qaumacheeta dam ỹo'ot co'ollaxa som hua'au qarta'ailpi!
33¡Qami' ỹataqta qami' tenataxanaxaicpi qataq qami' qauemaicpi! Ỹataqta qami' qauemaiqa qoñiỹa'am na lshenataxanaxa na na'araxanaq. ¡Qaq ỹoqo'oye ỹataqta sa qami' ỹe't ca qanhuaxanaguiiqui da qami' qaỹasaxañalo ca nhuaxanaqa' na 'etaxaloxoicpi! 34Aỹem samaq qome ca ỹa'aqtaxanaxanecpi qataq ca ỹaanaxanaxaicpi qataq ca napaxaguenataxanaqpi. Qalaxaye huo'o qome ca qaualauache camayepi qataq qauaxañiiguet ca npe'enaxaqui; qataq huo'o qome na qauaxañiitac da huaigui ana qanapaxaguenaxaqui, qataq huo'o qome ca laỹepi da qaviraxachiỹa'a na laỹepi nỹecpi da qaucañiitac. 35Qaq ỹoqo'oye qami' qome qarasouaxashechi da nalaataguec 'enauac nam no'on da lataxac maye huetalec ana 'alhua, chegoqchiguiña da l-leuaxa so Abel, choche ivitta'a da l-leuaxa so la'aqtaxanaxanec Ñim Lo'onatac 'Enauacna le'enaxat Zacarías som llalec so Berequías. Se'eso na'aqtaxanaxanec qaualauache co'ollaq vichiguinguilo na laiñi ye netaña añi no'onaxanaxaqui late'erai qataq añi nca'atoxonaxalate. 36Qaq ỹataqta 'eesa de'era qami' sa'axatema da 'enauac da qoñiita qaỹauo'o qome ca qanhuaxanaguiiqui souaxat de'era.
So Jesús nỹeelec so Jerusalén
37¡Qami' shiỹaxauapi maye qoñiitaña na Jerusalén! ¡Qami' shiỹaxauapi maye qoñiitaña na Jerusalén! Qami' qaualauache co'ollaxa so la'aqtaxanaxanecpi Ñim Lo'onatac 'Enauacna qataq so lamaxashecpi maye qami' namaxalo Ñimaye. Aỹem ỹataqta qalota naxa da sauotaique da qami' ñepaxattaleguete da sheeta'am aca 'olgaxa da ltelaxa ca llalaqpi da nqapaxaatalec, qalaxaye qami' saishet da Aỹem qauaqaita'a. 38¡Qaq ñaq qauloỹa da toolec qome naua qarma'achilli'! 39Cha'aye ỹoqta 'eesa de'era qami' sa'aqtaxanema da chegoqchiguiña nagui da saishet da ỹoltaq Aỹem qauloỹa'a, choche ivita'a qome da qoñiita': «Ỹataqta no'on da llecỹaxac nam Lca'aguishec Ñim Lo'onatac 'Enauacna, maye nactaigui da le'enaxat Ñimaye.»
