So nachelaxanataxanaq Juan da'aqtaxaatapeguelec ye toolec 'alhua
1Qaq co'ollaq mashe qaỹoqteguelo soua vi'iye, nache so nachelaxanataxanaq le'enaxat Juan tauga da da'aqtaxaatapeguelec ye toolec 'alhua maye huaigui ye Judea. 2Qaq da la'aqtaxanaxac somaye 'eeta':
«Qavi'eguelaqaỹot Ñim Lo'onatac 'Enauacna, cha'aye da lo'onataxanaxac Ñimaye da ilo'ogue 'enauacna mashe saqaỹaloq da yo'oq.»
3Qaq se'eso Juan nacheso som ỹiyiñi co'ollaxa so la'aqtaxanaxanec Ñim Lo'onatac 'Enauacna le'enaxat Isaías, co'ollaq 'eeta':
«Huo'o da nvilỹaxac qaỹa'aqtega
chemaqtapeguelec ye toolec 'alhua:
‹Qauqataxañiỹai' qome ca nqa'aic Ñim Nataxala'.
¡Ỹataqta qano'onaxacheetegue qome ca llec!
¡Saishet qome da huo'o ca npaxateguet!›»
4Qaq naua alogo so Juan no'oxonqa, chegaqaigui na laue ana shiguiỹac le'enaxat nauanaxanaxa, qataq so nsaataxaqui lo'oc. Qataq chectac ana shiiquioxoi qataq na dapic maye aviaq le'ec.
5Nache qalota so anac da na'axaỹaxana somaye nam chegaqaua'a ye Jerusalén, qataq 'enauac som netalec ye 'alhua Judea, qataq so saqaỹapigui 'aleu' so tala Jordán. 6Nache somayepi ỹa'axa't naua lasouaxashe'ete da ỹaxaare'c, nache so Juan nachelaxangui so tala Jordán.
7Qalaxaye so Juan co'ollaq ila'a da ỹataqta qalota so chegaqaigui na fariseopi qataq so chegaqaigui na saduceopi da anac da huotaique da nachelaxan, nache somaye 'enapega, 'eeta':
«¡Qami' maye qoñiita'am da lataxac ca na'araxanaq! ¿Qaupicheetega peta'a da qami' ỹe't da lhuaxanaxanaxac Ñim Lo'onatac 'Enauacna maye naỹa'acna? 8Ỹataqta qauachaxañiita da qarataxaqui da qaỹa'axañiiue'c naua qauema maye qauo'ocheeta'ape. 9Qataq saishet qome da tatapigui qarvilli da qoñiita': ‹Qomi' maiche qomi' llalaqpi so Abraham.› Cha'aye qami' shenapegalo da Ñim Lo'onatac 'Enauacna, ishet da ivira'a da ỹachegoxotaigui ne'ena coma'pi ca ỹataqta llalaqpi so Abraham. 10Aca qachepe mashe lhuotta da iquesoxoñot ana qo'oipaqpi. Qaq 'enauac anam 'epaqpi maye saishet da no'on ana ala, nache anamayepi qaiquesoqot. Ime, qaq qaỹasaxangui ca norec.
11Qaq 'eesa da aỹem nagui qami' ñachelaxanguilo na 'etaxat, qaq damaye naigui da qami' qaỹa'axañeere'c naua qauema maye qauo'ocheeta'ape. Qalaxaye cam aỹem nca'attalec, camaye dachelaxanataxana qome So Saqcha'a Na'añaxac Qui'itta qataq ca norec. Qaq camaye ỹataqta ỹactec da la'añaxac, saishet da sheeta'am. Na'aictoxo' da choche aỹem l-latac ỹataqta saishet da ñaloua'a. 12Qaq camaye lasoqta'a ca lchegoxosoxonaxat, da yaqto' ichegoq na trigo da nqat na lvi. Ime, qaq ỹachaigui ca laỹe'. Qaq na lvi qalaq ỹavigaxat, ỹasaxangui ca norec maye saishet da 'om.»
So Juan nachelaxan So Jesús
13Qaq huaña, nache anac So Jesús, chegoqta'a ye 'alhua Galilea da naỹa ye tala Jordán, yem hueta'a so Juan, da yaqto' so Juan nachelaxan Somaye. 14Qalaxaye so Juan co'ollaq cheta'ague, nache sa ỹaỹamaxaren da nachelaxan Somaye. Nache 'enapego' So Jesús, 'eeta':
–Aỹem maye iuen taxa da aỹem 'anachelaxan, qalaq ¿ta'ainco' ye aỹem 'auanaỹa da 'auauotaique da 'am ñachelaxan?
15Qalaxaye So Jesús 'enapeco':
–'Onaxaic da 'auo'ot nagui de'era. Cha'aye qomi' iuen da sepagaqtelec dam la'aqtac Ñim Lo'onatac 'Enauacna.
Nache so Juan ỹaỹamaxareeta, 16nache nachelaxan. Qaq So Jesús co'ollaq ca'ai so 'etaxat, nache ila'a na piguem da nauatoigui, nache ỹauaateguet So Saqcha'a La'añaxac Ñim Lo'onatac 'Enauacna da naỹaña Somaye 'eeta'am da lataxac na qoto'. 17Qataq qaỹa'axaỹa so na'aqtac chemqot na piguem, 'eeta':
«'Era da ỹalamaxat Ỹalec damaye ỹataqta ỹauotaxat, qaq ỹoqo'oye ỹataqta ñetootapeguec.»
