So Jesús nataren so ỹale maye sa da'añiigue
1Qaq co'ollaq ime de'era, nache So Jesús qataq huenongui aso nllocta da taitague na le'ego aso lapel da ỹe'eguelaxata ye maiche lalamaxat lma' yem nỹecpi maye le'enaxat Cafarnaúm. 2Qaq huaña yemaye, co'ollaq qairoua'a so ỹale maye sa da'añiigue, qaỹachetalec so lmala'. Qaq So Jesús co'ollaq ila'a da lpi'iỹaxa'c soomaye, nache 'enapega som ỹale, 'eeta':
«¡'Ana'añaxat, 'am ñauochaxaua! Aỹem mashe sapalaxat 'enauac na 'arasouaxashetpi.»
3Qaq huo'o som ỹalectauopi nam dapaxaguenataxaatapeguec na lamaxasoxonaxacpi so Moisés da lhuennataxac, 'eeta': «¿Negue't ca ipettega de'era ỹale? ¿'Eetega peta'a da nachera dam Lo'onatac 'Enauacna? ¡Damaye ỹataqta mpa'aguene' Ñim Lo'onatac 'Enauacna!»
4Qalaxaye So Jesús co'ollaq noma da lhuennataxac somayepi, nache 'enapega, 'eeta': «¿Ta'ainco' ye ỹataqta qauema naua qarhuennataxacolli'? 5Aỹem qaua'aqtaxañim: ¿Chaq negue't ca ỹoqta saqalaq da qoỹenapec? ¿Peta'a da qoỹeeta': ‹Na 'arasouaxashetpi mashe qaỹapalaxat›, huo'otaq da qoỹeeta': ‹Qoñisheguem, ime, qaq 'auqueuoỹapigui'?› 6Qalaxaye nache 'ena'am, Aỹem Shiỹaxaua Llalec qami' ñachaxanalo, da Aỹem ỹataqta huo'o da ỹa'añaxac da ishet da sapalaxat na nasouaxashetpi ana 'alhua.»
Ime, nache So Jesús 'enapega so sa da'añiigue, 'eeta': «Qoñisheguem, 'aunana't na 'aracanec. Ime, qaq 'anqo'ona ca 'arma'.»
7Nache se'eso ỹale maye sa da'añiigue ñesheguem, nache nqo'ona ca lma'. 8Qaq so shiỹaxauapi co'ollaq ỹauaachigui de'era, nache ỹataqta huo'o da la'aalaxa. Nache ỹo'oxoreetac Ñim Lo'onatac 'Enauacna, souaxat da Ñimaye ỹami' de'era na'añaxac 'enauac na shiỹaxauapi.
So Jesús iỹaxana so Mateo
9Qaq So Jesús co'ollaq ca'ai yi'iye, nache ila'a so ỹale le'enaxat Mateo. Somaye nso'ootañi, netaigui aso lo'onataxanaxaqui da ỹacootapeeguet ana nsheetenaqte ca nta'a maye netaña ye Roma. Nache So Jesús 'enapega somaye, 'eeta': «Aỹem 'auca'ategue.»
Nache so Mateo ñesheguem, nache ca'ategue So Jesús.
10Qaq nacheso se'eso na'a'q da So Jesús qataq soua lapaxaguenataqa nqo'oora ca lma' so Mateo da lquia'aqa'. Nataqa'en lquia'axauapi nam laỹepi maye ỹacootapeeguet ana nsheetenaqte ca nta'a qataq na shiỹaxauapi maye qauem da na'aqtaguec. 11Qaq huo'o som ỹalectaigui na fariseopi da ỹauaachigui 'enauac se'eso shiỹaxauapi, nache inattra'apo' soua lapaxaguenataqa So Jesús 'eeta':
–¿Ta'ainco' ñim qami' ỹapaxagueeta'ape ye ishet da nhuana'ai' nam ỹacootapeeguet anam nsheetenaqte ca nta'a qataq nam 'etaxaloxoicpi?
12Nache So Jesús co'ollaq hua'aqchigui da la'aqtac som fariseopi, nache 'enapeco':
–Nam iuen ca natannaxanaq qalaq nachena nam sa no'onpi, saishet da nachena nam no'oitapi. 13'Onaxaic da qoqui, nache qanpogoxoiñiỹapegue' da qauchemaxache cam ỹoqta 'eetapeguec Ñim Lo'onatac 'Enauacna co'ollaq nasaxauec de'era la'aqtac, 'eeta': «Aỹem ñeshetaique da qami' qauchoxoyiñi na shiỹaxauapi, qaq saishet da nachera da Aỹem qandoiua'a aca qarachetaqtaxanaqche.»
Cha'aye Aỹem ñanac da seỹaxana nam 'etaxaloxoicpi, da yaqto' sauo'o ỹapaxaguenatacpi, qaq saishet da nachena nam 'eetega da no'on da lataxac.
Qainat So Jesús da chaq 'eetec ca lataxac ca shiỹaxaua da nqouaqchet
14Soua lapaxaguenataqa so nachelaxanataxanaq maye le'enaxat Juan nareua'a So Jesús. Nache inatta'ape, 'eeta':
–Qomi' qataq na fariseopi ỹataqta qalota naxa da ñeqouaqchetaqtac, ¿Qaq ta'ainco' naua 'arapaxaguenataqa ye saishet da nache 'eetec de'era?
15Nache So Jesús 'enapeco':
–Cam ncoyeguenatacpi da ỹalegueua'a ca naronaxac camayepi saishet da daquicotac da huo'otaq ñaq qanayeeta'aguet ca auonaxaua. Qalaxaye da ivita que'eca laloqo' da qaỹauec que'eca auonaxaua. Huaña nache que'eca ncoyeguenatacpi ishet da ỹaayiñi naua anogo maye nasouaxaqui' qataq huaña, nache ishet da nqouaqchet.
16Da huo'o aca togoshe npoto da huo'otaq colaqa'ague, nache saishet da qaỹapannaxana ca dalaxaicolec. Cha'aye da qaiỹo aca npoto, nache cam lapannaxat maye dalaxaicolec ỹe'eguena't, nache ishet da icolaxata'ague aca npoto ltoxoi, huaña qaq nquigaxattec ca ltoxo.
17Qataq nataqa'en saishet da qaicoyigui aca shiguiỹac lo'oc ltoxoi ca lataxa maye dalaxaicolec. Cha'aye ca dalaxaicolec lataxa da ỹashiiyigui, nache ishet da ỹachipiaxata'ague aca lo'oc, nache ca lataxa qataq aca lo'oc caamaye deqa't. Qaq ỹoqo'oye ca dalaxaicolec lataxa, camaye qaỹachagui aca shiguiỹac lo'oc maye dalaxaale, yaqto' caamaye nache 'eetai'salo da saishet da ne'e'n.
Aso llale so Jairo qataq aso 'alo maye ipoteua'a na laỹe so lapo' So Jesús
18Qaq So Jesús co'ollaq ñaq da'aqtaxaatac, nache nvi' so 'oonolec lataxala' na judiopi, nache ỹa'aroto naua l-llectel Somaye. Nache 'enapega, 'eeta':
«¡Aye ỹale cheta'ague da ileu! Qalaxaye 'am da 'anqo'ona da 'auashel-lec, nache ayemaye ishet da qaltaq nca'alec.»
19Nache So Jesús ñesheguem da ca'ategue somaye, qaq nnaicapegueto soua lapaxaguenataqa.
20-21Qaq se'eso nqa'aic maye quetegueto soomaye hueta'a aso 'alo maye mashe ivi' naua doce vi'iye da anactac na ltago'q. Qaq co'ollaq ỹauaategue So Jesús, nache asomaye deuennataxaatac, 'eeta': «Da seshet da sepoteua'a na laỹe so lapo' So Jesús, nache aỹem no'oita qome.» Huaña nache asomaye nquigueua'a So Jesús queteuo'oguet na l-laq, nache choche qapio'olec da iviraua'alo naua llaxaata so lapo' Somaye. 22Qalaxaye So Jesús namatapec, nache ila'a asa'aso 'alo. Nache 'enapega, 'eeta':
«Saishet da leetapigui ye 'arhuel, cha'aye dam 'arpi'iỹaxac Ñim Lo'onatac 'Enauacna nachera dam huo'omshe 'am no'oita.»
Huaña, nache asomaye ỹataqta no'oita.
23Qaq So Jesús, nache queta choche ivittaua'a so lma' so lataxala' na judiopi, qaq co'ollaq ỹoqta ivireua'a, nache ila'a som nvique lo'opi da naỹamaxattac da huotaique da devicnaxaalec aso qa'añole da qailareñi, qataq so qalota shiỹaxauapi ỹataqta na'alaqtapiguiñi da nnoinaxac. 24Nache So Jesús 'enapega somayepi, 'eeta':
«Qapa'aiuec qome. Cha'aye ayem nogotole saishet da ileu, ayemaye choche do'ocheta.»
Nache som shiỹaxauapi ỹataqta lashetac So Jesús. 25Qalaxaye co'ollaq mashe qaipa'axanec 'enauac somayepi, nache inoxoneua'a ca hueta'a asomaye So Jesús, nache ỹacona na lhuaq, nache aso nogotole ñesheguem.
26Nache 'enauac yi'iye 'alhua maye hueta'a So Jesús imauec da qaỹaỹaten de'era.
So Jesús natare'n soua dos qanamaiqa
27Qaq co'ollaq ca'ai yi'iye So Jesús, nache ana'c soua dos qanamaiqa. Nache ca'attraueegue Somaye, ỹataqta ỹa'alaqtai'salo, 'eetra':
–¡'Am Jesús, maye 'auachegoxoguet so David maye 'am Lca'aguishec Ñim Lo'onatac 'Enauacna, qomi' 'auchoxore'n!
28Nache soua qanamaiqa ca'attraueegue So Jesús choche iviraxattraua'a ca nỹec, nache co'ollaq maye pa'atrauo, nache So Jesús inatta'ape soomaye, 'eeta':
–¿Qaua'amaqchiñi peta'a da ishet da qami' ñatare'n?
Nache soomaye 'ena'apo':
–Aja', sa'amaqtenaq, 'am Qarataxala'.
29Nache So Jesús ipoteua'alo naua la'ai'te soomaye. Nache 'enapeco':
–Nagui qami' no'oite' souaxat da Aỹem qaua'amaqchiñi.
30Huaña nache se'esoua qanamaiqa ỹe'eguelaxa da qaltaq nauaayiñi. Nache So Jesús 'enapegalo soomaye, 'eeta':
–Saishet qome da huo'o ca qaua'aqtaxañim de'era.
31Qalaxaye co'ollaq choche huenoxoore'c, nache da'aqtaxanem 'enauac nam hueta'a yi'iye 'alhua da ỹo'oteque So Jesús soomaye.
So Jesús nataren so qaicaua naua la'aqtaqa
32Qaq co'ollaq choche je'c soua qanamaiqa, nache huo'oi soua shiỹaxau' naueguereua'a So Jesús so qaicaua naua la'aqtaqa maye huo'o so netaigui saqcha'a na'añaxac leguemaxaic. 33Qaq So Jesús co'ollaq ỹo'orauec se'eso saqcha'a na'añaxac leguemaxaic, nache se'eso ỹale maye qaicaua naua la'aqtaqa ishet da detaqa. Nache so shiỹaxauapi ỹataqta huo'o da la'aalaxa. Nache 'eeta':
«¡Ỹataqta sa ỹauanega da huo'o ca qaỹauaachigui da huangui na Israel le'ecpi da huo'otaq 'eeta'am de'era!»
34Qalaxaye nam ỹalectaigui na fariseopi, 'eeta':
–De'era ỹale do'otaxaatega da la'añaxac som lataxala' nam saqcha'a na'añaxac qauemaicpi, da ỹo'orauec nam saqcha'a na'añaxac leguemaxaicpi.
So Jesús ỹataqta huo'o da lchoxonnataxanaxa na shiỹaxauapi
35So Jesús coleetapigui 'enauac nam nma'ate qataq nam nañalo nam saq 'amaqtaq shiỹaxauapi da dapaxaguenataxaatapoigui ana napaxaguenaxaquipi na judiopi, ỹa'axattac dam no'on na'axaỹaxac maye naigui da ilo'ogue 'enauacna Ñim Lo'onatac 'Enauacna, qataq natareetac 'enauac nam ỹotta'a't lalolaxa qataq da nqui'ic na shiỹaxauapi. 36Qaq co'ollaq ila'a so qalota shiỹaxauapi So Jesús da ca'attague' Somaye, nache ỹataqta ỹaguec da lchoxonnataxanaxa, cha'aye somayepi ỹataqta saỹaỹaten ca 'eetec qataq qaica ca iueelec. 'Ena'am ana qagueta maye qaica ca ilo'ogue.
37Nache So Jesús 'enapegalo soua lapaxaguenataqa, 'eeta':
«'Eesa da ỹataqta qalota nam iuen da inoxoneua'a da lo'onataxanaxac Ñim Lo'onatac 'Enauacna, qalaxaye saq 'amaqtaq nam ỹamaxashecpi da ỹa'axat da no'on na'axaỹaxac. 38Qaq ỹoqo'oye qauỹaxañiỹot qome Ñim Lo'onatac 'Enauacna da namaq ca laỹepi lamaxashecpi, da yaqto' ỹa'axatem dam no'on na'axaỹaxac 'enauac na shiỹaxauapi.»
