Da nhuaxanaguec ye Samaria
1Qaq 'era da la'aqtac Ñim Nataxala' maye ỹanem co'ollaxa so Miqueas maye lma' ye Moréset, maye huaigui so lauanaqchec co'ollaq ila'a ye Samaria qataq ye Jerusalén, huetoigui co'ollaxa da lo'onataxanaxac so Yotán, Ajaz qataq so Ezequías maye nta'al ye Judá.
2Ñaq qana'axaỹaxañiỹa de'era,
'enauac qami' nhuo' le'ecpi,
qataq 'enauac qami' shiỹaxauapi
maye qoñeetalec ne'ena 'alhua,
Ñim Nataxala', maye netaña añi
lalamaqte qui'itta atamnaxaqui,
nacheñi ñim da'aqtaxan
qome da qami' dataỹa'agueta.
3Cha'aye Ñim Nataxala' anac
qome chegoqchiguiña yem lma',
nache petañi da quetalec na
ỹataqta pa'asheguem ana qasoxonaxapi.
4Qaq ana qasoxonaxapi quiguiñi
qome souaxat da pelec Ñimaye,
'eeta'am ana dapic lapa da qaỹasaxangui
ca norec nache quiguiñi.
Qaq nam ca'amapega't 'alhuapi qalaq colaxagui qome,
'eeta'am na 'alhua da ichec ca ỹataqta
chaxaguet la'auaxac na 'etaxat.
5Qaq 'enauac huo'o qome de'era
ỹasouaxat da nam chegoxoguetpi so
Jacob ỹataqta sa ỹalaq,
qataq souaxat na lasouaxashetpi
na nhuo' Israel le'ecpi.
Cha'aye huaña ye Samaria co'ollaxa
da saỹalaq nam chegoxoguetpi so Jacob.
Qataq ye Jerusalén nalec naqa'en nam
saq'en natamnaqa'pi nam Judá le'ecpi.
6Qaq ỹoqo'oye ye huaqta'a't nỹecpi
ye Samaria nlachiguiñi ñaqa'en qome,
huaña, nache ishet da qoỹaalec
ana nañiguishe uvapi.
Qaq na lalamaxat coma'pi yemaye
laguelec ñaqa'en qome ye ca'amegue,
huaña nache yo'oqchiguiña
ñaqa'en na lo'oxonaxala'pi.
7Qataq dolachigui 'enauac nam natamnaxala'pi,
qataq ỹavicta 'enauac anam
natamnaxalatepi qo'oipaq lamopi.
Nache aỹem ñelaxatchiguiñi
qome nam natamnaxala'pi,
cha'aye namayepi chegaqaigui ana
nsheetenaqte ana quisheguetaxaipi,
huaña qome nache qaltaq ỹe'eguelaxa
ñaqa'en da nsheetenaqte
da quisheguetaxac.
Da nachoxonnaxac so Miqueas
8Qaq souaxat de'era nache aỹem
ñeỹeetac qome souaxat da lta'araic ỹaquicoxo,
qataq qaicaua caua ỹapela'ate da
sequeuotapigui' qataq sootauec,
qataq sheeta'am na qa'alaq da dalacotac
qataq na mañec llalec da nỹeetac.
9Cha'aye da lque'emaxa ye
Samaria ỹataqta qaica ca lata'
nache ivira'a ye Judá,
qataq ivitta'a ye Jerusalén,
yem hueta'a nam ỹalamaxat ihuo' le'ecpi.
10Qaq de'era saishet qome da
qaua'aqtaxañim na lma' ye Gat,
qataq saishet qome da qanỹeñiitac,
nacherata da qancogaigui qome
na namoxoỹaxa souaxat da
qanqui'iqui da huaña ye Bet Leafrá.
11¡Qaq qami' Safir le'ecpi,
qom qami' qaỹauegalo ca ỹaqa'a 'alhua,
qalaq qoviitauec qome qataq lta'araic da qara'agaxai!
¡Qaq na lma' ye Zanán qalaq saishet
qome da huenoxonec!
¡Qaq na lma' ye Betesel qalaq huo'o da
nnoinaxac nache qaica ca qami' itaua'n!
12Qaq na lma' ye Marot qalaq
ncocateguiñi qome souaxat da nqui'ic,
nache iuattaique da nvita ca lamaicỹaxac,
cha'aye Ñim Nataxala' namaq da qauem
nache iviraua'a naqa'en ye ñegueuo ye Jerusalén.
13Qaq qami' maye qarma'ai na Laquis,
ñaq qaucoñeyeeua'a ana naigonapi na caipi,
cha'aye nache qami' chegoqchiguilo da
lasouaxashet ye Sión,
qataq nache qami' chegoqchiguilo da
ỹataqta sa ỹalaq na Israel le'ecpi.
14Qaq ỹoqo'oye qoquiỹa'ai qome ye Moréset Gat.
Qaq ye huaqta'a't nỹecpi ye Aczib,
yemaye 'eeta'am qome aca nqoina
da yaqto' qaỹachiguiñi na nta'alpi ye Israel.
15Qaq qami' maye qarma'ai na Maresa,
qaltaq huo'o qome ca qami' ñamaxalo
da yaqto' qami' loxonqa,
nache na ỹataqta nca'aguishecpi Israel le'ecpi
qalaq datauec qome nache
ỹe'eguenoigui na auacpi ye Adulán.
16Qaq qami' maye qarma'ai na Sión,
qanamarequiite' qome naua qarqaigolle'
souaxat da qanqui'iqui,
souaxat nam qaỹa'alquipi maye
ỹataqta qarauotaxache,
nache ỹataqta qanamarequiite'
naua qarqaigolle'
nache ivira'a da ỹataqta qami'
qui'itaiqa qoñeeta'am ca teguesan,
cha'aye na qaỹa'alquipi qaỹauega
qome ca ỹaqa'a 'alhua.
