Ñim Nataxala' ỹo'ot qome da nlagaxayec
1Qaq que'ecaua pa'atrec na'axa'te nache añi qasoxonaxa,
maye nalec añi atamnaxaqui maye lalamaqte Ñim Nataxala',
añimaye nachañi añi ỹataqta qaỹoqotcheguema qome,
nache napacalec ana laỹepi qasoxonaxapi.
Nache 'enauac na ỹotta'a't shiỹaxauapi anatega qome añimaye.
2Nache qalota qome na shiỹaxauapi nvira añimaye, nache 'eeta':
«Qolaq saxasheguema añi nqasoxonaxa Ñim Nataxala',
añim nalec añi atamnaxaqui maye lalamaqte Ñim Natamnaxala' so Jacob,
yaqto' Ñimaye qomi' ỹapaxagueneque da nqa'aicỹaxac,
nache qolaqtegue na llecpi Ñimaye».
Cha'aye chegoqchiguiña qome ye Sión da lapaxaguenataxanaxac Ñim Nataxala',
qataq da la'aqtac Ñimaye nache chegoqchiguiña qome ye Jerusalén.
3Ñim Nataxala', nmit qome na ỹotta'a't shiỹaxauapi,
qataq ỹaỹamaxaañe na ncotaxacpi na qalota shiỹaxauapi,
qataq nam hueta'alo nam qaỹoqtalo 'aleu'.
Huaña, nache namayepi nlaxaañi na lainecpi nache ỹo'ot na'arau,
qataq nlaxaañi ana lataquiaxaipi nache ỹo'ot lchegaxanaqtepi.
Ime qome nache qaica ca ỹacona ca lo'ogoxonaxat da yaqto' delogui' ca lỹa shiỹaxaua,
qataq qaica qome ca ỹaconeguet ca napaxaguenataxanaxac da qaỹapaxaguenec da alaataxac.
4Qaq huaña qome nache namayepi ỹataqta qaica ca ñe'etaique,
da hueto'ot ca lpaqal aca maiche lañiguishe uva huo'otaq hiigo da nmatteguec.
¡'Era da la'aqtac Ñim Nataxala' maye qaica ca Ỹaqalanapec!
5Qaq na laỹe ỹotta'a't shiỹaxauapi qalaq quetague' nam maiche natamnaxala'pi,
qomi' qalaxaye nache 'eetai' qome da qolaqto'ot da salaxasoxoguet Ñim Nataxala' maye Qanatamnaxala'.
Ñim Nataxala' nca'alaxatec qome na Israel le'ecpi
6Qaq da la'aqtac Ñim Nataxala', 'eeta':
Que'eca na'a'q, aỹem llaỹona't qome ana ỹalamaqte qaguetapi,
anam seque'emaqchet co'ollaxa, anam laga'tpi qataq anam sa qaiyacnapecpi.
7Qaq anamayepi nache sauaxaỹaxaneguet anam no'onañi co'ollaxa,
qaq nache sachegoxotchigui qome ca shiỹaxauapi maye ỹataqta 'añaxaicpi.
Qaq aỹem Nataxala' selo'ogue qome namayepi,
qom huaña añi qasoxonaxa Sión, nagui qataq nache 'eetai' qome.
8Qaq 'am Jerusalén, maye 'am nalloxolate qataq npaqtaxanaxat ye Sión,
'am 'avi'eguelaxa qome da togoshec 'ara'añaxac,
nache 'am hueta'a qome da la'amaqchec da no'onataxanaxac.
9Qaq nagui, ¿ta'ainco' da ỹataqta 'ana'alaqtapiguiñi,
qoneta'am aca 'alo da deco'otapigui'?
¿Peta'a qaico' ca 'am ilotague' nta'a, qalqo' mashe ileu cam 'auachegoxottacot nam nqataxacpi?
10Qaq 'am huaqta'a't nỹecpi na Sión,
'ancogañi qome, qataq 'ana'alaxañe, qoneta'am 'aca 'alo da deco'otapigui',
cha'aye nache 'am chegaqaigui qome na shiỹaxauapi,
da tauga na no'onaxa da yaqto' nalec, nache ivitta'a ye Babilonia.
Qalaxaye nache huaña qome yemaye da Ñim Nataxala', isouec na lalamaxat nhuo' le'ecpi,
qataq nca'alaxateeguesop da lhuaqỹaxac na npa'aguenaxauapi.
11Qaq nagui huaxaỹa't na qalota ỹotta'a't shiỹaxauapi da 'am dataỹa'aguet,
nache 'eeta': «¡No'ono' da ỹataqta sauanaqchigui da qanauec ye Jerusalén!»
12Qalaxaye ne'ena ỹotta'a't shiỹaxauapi,
sa ỹauatton na lhuennataxacpi Ñim Nataxala',
qataq sa ỹaỹaten nam lapaxañipi lataxacpi Ñimaye,
nache sa ỹaỹaten da Ñimaye laỹona't qome namayepi,
'eeta'am da laỹona't aca naqta ala na nañiguishecpi da huaña ca nchegoxosoxonqa'.
13¡'Am Sión, qoñisheguem qome, nache 'alaxachigui namayepi!
Cha'aye da la'aqtac Ñim Nataxala', 'eeta':
«Aỹem, 'am sanem qome da 'ara'añaxac maye 'eeta'am da la'añaxac ca huaca,
maye lca'ache naua lcoue qataq bronce naua nna'ache,
da yaqto' 'aulaxachigui na qalota shiỹaxauapi,
qataq 'auotaxanec da lsallaxa maye ỹachegoxotaigui da lcachaxac,
nache aỹem 'aỹa'anot, aỹem Nataxala', maye ỹalamaqte 'enauac ana 'alhua».
