Miqueas 5

₁Qalaxaye nagui 'am Jerusalén, ña 'auqataxanai' ca 'arpaqtaxanaxat,

cha'aye mashe 'am qaicoleesop, qataq sa qaỹala'ac qome da qaiuaxan ñi lataxala' na Israel le'ecpi.

₂Qaq 'am Belén, Efrata maye 'am saq 'amaqtaq

da 'aualectaigui nam nhuo' le'ecpi na Judá,

qalaq nache 'am chegoxoigui cam nataxala' qome na Israel,

maye chegoxoguet so ỹataqta hua'auchiguiñi nhuo' le'ecpi.

₃Qaq ỹoqo'oye Ñim Nataxala' ỹaxanec nam lalamaxatpi,

nache ivitta'a ca na'a'q da deco'o aca 'alo, maye taỹa'a da ñiguiñi ca llalec.

Huaña qome nache na no'onañipi co'ollaxa,

ỹe'eguelaxa da ỹaleeguet na lqaỹañecpi Israel le'ecpi maye noxonecpi co'ollaxa.

₄Qaq camaye nachaañi qome da ilo'ogue nam lalamaxat lauo' le'ecpi,

ỹauota'a da la'añaxac qataq da la'amaqchec Ñim Nataxala' maye Natamnaxala'.

Qaq huaña, nache ỹataqta qaica ca machaqca namayepi,

cha'aye da la'amaqchec Ñimaye ivira'a qome ca ỹataqta pa'atec ana 'alhua.

₅Qaq camaye ndoi' qome ca qarlagaxayec.

Qaq qom anac nam asiiriopi da huenoxotaua'a nam qana'alhua,

qataq nam qarma' lta'araicpi, nache qomi' samaxaso'q caua siete nataxala'ate,

qataq caua ocho 'amaqtaqaiqa nataxala'ate,

₆da yaqto' ỹauota'a ca lainecpi da ilaxachigui ye Asiria maye na'alhua so Nimrod,

nache caamaye qomi' nca'alaxateeguesopa nam asiiriopi

da ỹa'axasoxoolec nam loga'tpi nam qana'alhua,

qataq inoxotaua'a nam qana'alhua.

₇Qaq nam no'onañi lauo' le'ecpi so Jacob,

qom ỹalectaigui na ỹotta'a't shiỹaxauapi

qalaq 'eeta'am qome na 'aỹa maye namaq Ñim Nataxala',

qataq 'eeta'am na auot da talec ana huouepi,

maye saishet da iuatta'a ca 'eetapeguec na shiỹaxauapi.

₈Qaq nache 'eetec nam no'onañipi lauo' le'ecpi so Jacob qom ỹalectaigui na ỹotta'a't shiỹaxauapi,

qalaq 'eeta'am ca llon da ỹalectaigui nam huauec shiguiỹacpi,

qataq ca llon llalec da nlecchiguingui aca qaguetapi, nache icolaxattac,

qataq ilaxachigui nache saishet da huo'o aca ỹetauec da nca'altauec naqa'en.

₉Qaq 'era da qonetec 'Am Nataxala', qom 'aulaxachigui

qataq da 'anlaxaañe 'enauac nam 'am ipa'agueetacpi.

₁₀Da la'aqtac Ñim Nataxala', 'eeta': Que'eca na'a'q, aỹem salauat qome na 'arelo caipi,

qataq selaxachigui ana 'analaataxaquipi naigonapi.

₁₁Qataq nlachiguiñi ñaqa'en nam huaqta'a't nỹecpi na 'ana'alhua,

qataq selaxachigui 'enauac nam 'aye'eguenaxaquipi.

₁₂Qataq imeuo qome ñaqa'en 'enauac nam 'iyaxaic lo'opi,

qataq 'enauac nam ilaua'alo naua nhuennataxaco.

₁₃Qataq selaxachigui nam 'anatamnaxala'pi qataq nam ne'enaqtacpi coma',

yaqto' saishet da 'avi'eguelaxa da qaltaq 'anatameetacot

nam ne'enaqtacpi maye maiche 'aro'onatacpi.

₁₄Qataq 'am ñeqateeguesop nam lqui'ipi aso Asera,

qataq nlachiguiñi ñaqa'en nam 'aralamaxat huaqta'a't nỹecpi.

₁₅Qaq huaña nache yo'oq qome da ỹayeloxo da sepalaique ivi'

da she'eguelaxateguet nam shiỹaxauapi maye saishet da aỹem ỹalaxaguet.