So Jesús ỹa'axat da lataxac ca nalate' aca lhua
1So Jesús ca'ai ye Cafarnaúm, nache nqo'ona ye 'alhua le'enaxat Judea qataq yem 'alhuapi maye pa'aigue da nala' lliguisheguem so tala Jordán. Huaña yemaye, nache qalota so shiỹaxauapi qaltaq laponeua'a ca hueta'a. Nache Somaye qaltaq dapaxaguenataxaatac, cha'aye maiche lataxac naxa.
2Nache huo'o so chegaqaigui na fariseopi nqocheneua'a So Jesús, da huotaique huo'o ca ỹe'eguenec lnataxanaxac, nache inattaco' Somaye, 'eeta':
–¿Ishet peta'a ca ỹale da nalate' aca lhua?
3Nache So Jesús 'enapeco':
–¿Negue't ca qami' ỹamaxaleguete co'ollaxa so Moisés?
4Nache somayepi 'enapeco':
–Qomye so Moisés ỹasheetem ca ỹale da ỹalat aca lhua, qalaxaye ỹauo'o aca lmalate da ỹalat acamaye.
5Nache So Jesús 'enapego' somayepi, 'eeta':
–So Moisés ỹiyiñi co'ollaxa de'era lamaxasoxonaxac, souaxat da ỹataqta qaramchiguilo naua qarquiyaqchilli'. 6Qalaxaye dam ỹoqta chegoqchiguiña co'ollaxa, Ñim Lo'onatac 'Enauacna ỹo'ot so ỹale qataq aso 'alo da yaqto' nmayaxau'. 7Qaq ỹoqo'oye ca ỹale ca'aisalo caua lta'al, da yaqto' lmayaxaua aca lhua. 8Huaña, nache caamaye, 'eeta'am da 'oonolec shiỹaxaua. Nache caamaye saishet da 'eeta'ama da dos, nda'a't da 'eeta'am da 'oonolec. 9Ñim Lo'onatac 'Enauacna da ỹauaxaỹaxana't ca ỹale qataq aca 'alo, nache caamaye qaica ca ishet da icolaxachiguilo.
10Qaq co'ollaq mashe huetra'a so lma', nache soua lapaxaguenataqa qaltaq inatta'ape So Jesús, denataxaatrapegue'c de'era. 11Nache Somaye 'enapeco':
«Ca ỹale da ỹalat aca lhua, nache qaltaq huaroneguet aca lỹa 'alo, nache camaye huo'o da lasouaxashet hueto'ot aca hua'auchiguiñi lhua, cha'aye saishet da ipaguelec da lasataxac co'ollaq huarona't. 12Qataq aca 'alo da ỹalat ca lhua, nache huaroneguet ca lỹa ỹale, qaq nataqa'en acamaye huo'o da lasouaxashet hueto'ot ca hua'auchiguiñi lhua.»
So Jesús ỹaalec da no'on la'aqtac so ñaqpiolec
13Nache huo'o aso nate'elpi nauegueua'a so llalaqpi So Jesús, da yaqto' Somaye ỹashel-lec qataq ỹaalec ca no'on la'aqtac. Qalaxaye soua lapaxaguenataqa nlaqtrega asomayepi.
14Qaq So Jesús co'ollaq ỹauaachigui de'era, nache dalemataỹalo soua lapaxaguenataqa. Nache 'eetegalo soomaye, 'eeta':
«Ña qauaqaita'a na ñaqpiolec da Aỹem naua'a, saishet da sa qanashiñiiguet, cha'aye da lo'onataxanaxac Ñim Lo'onatac 'Enauacna, taigui cam 'eeta'am da lataxac ne'ena ñaqpiolec. 15Qaq ỹataqta 'eesa de'era qami' sa'axatema, da ca saishet da 'eeta'am ca nogotolec da ỹaconeguet da lo'onataxanaxac Ñim Lo'onatac 'Enauacna, nache camaye saishet da inoxoneua'a da lo'onataxanaxac Ñimaye.»
16Nache So Jesús naueguela't so ñaqpiolec da nsoqtauo, qataq ỹashel-lec somayepi, nache ỹaalec da no'on la'aqtac.
So ỹale sallaxanec detaqtague' So Jesús
17Qaq So Jesús co'ollaq queta, nache nvi' so ỹale nqalgoqtalec Somaye. Nache ỹa'aroto naua l-llectel, nache inattac So Jesús, 'eeta':
–'Am Napaxaguenataxanaq maye 'am soxoraic, Aỹem 'aua'aqtaxanem ¿negue't ca so'ot da yaqto' Aỹem taỹot ca nca'alaxa maye qaica ca loga't?
18Nache So Jesús 'enapeco':
–¿Ta'ainco' ye qonetega da Aỹem soxoraic? Ye saqca ca soxoraic, 'oonolec Ñim Lo'onatac 'Enauacna maye soxoraic. 19'Am 'auaỹateeta na namaxasoxonaxacpi maye, 'eeta': Saishet da 'aualaataxan; qataq saq ishet da sa 'aupaguelec ca 'arasataxac co'ollaq 'auaron, qataq saishet da 'aucache, qataq saishet da 'auatenataxan da yaqto' 'auo'otec ca sa ỹaỹamaxañi ca lỹa shiỹaxaua, qataq saishet da choche 'avi'egueetac ca 'arỹa, 'aualaxaguet qataq 'antela'a ca 'arta'a qataq aca 'arate'e.
20Nache se'eso ỹale 'enapeco':
–'Am Napaxaguenataxanaq, 'enauac ne'ena namaxasoxonaxacpi, mashe so'ottac chegoqchiguiña co'ollaq ñaq aỹem nogotolec.
21Nache So Jesús ỹamato'ot somaye, nache ỹataqta huo'o da lauoche, nache 'enapego', 'eeta':
–Huo'o da saxanaxa da 'auo'ot. Qojec qome 'aumen 'enauac na 'am hueto'otpi, ime nache 'aỹa'anoigui na choxoraqpi aca lasheue. Yaqto' Ñim Lo'onatac 'Enauacna, 'am ỹami' ca lta'araic 'araueguec da piguem. Ime, nache 'auanac da 'aualegoigui nam Aỹem ca'attague'pi.
22Qalaxaye so ỹale co'ollaq hua'axaỹa de'era, nache ỹataqta ỹaquicoqchet, ime, nache jec ỹataqta daquicota, cha'aye ỹataqta sallaxanec.
23Nache So Jesús ỹamataiguilo soua lapaxaguenataqa, nache 'enapegalo, 'eeta':
–¡Ỹataqta huo'o da lqalaic ca sallaxanec da ỹaconeguet Ñim Lo'onatac 'Enauacna da ỹauo'o lta'a!
24De'era na'aqtac ỹataqta ỹe'elaqche't soua lapaxaguenataqa So Jesús. Qalaxaye Somaye qaltaq ỹe'eguelaxalec da la'aqtac, 'eeta':
–Qami' ñauochaxau', ¡ỹataqta huo'o da lqalaic da qainoxoneua'a da lo'onataxanaxac Ñim Lo'onatac 'Enauacna! 25Ỹataqta qaica ca lqalaic aca nauanaxanaxa da tachiviigui qanqoỹen ca lauac aca qana, qalaxaye ca sallaxanec ỹataqta huo'o da lqalaic da inoxoneua'a da lo'onataxanaxac Ñim Lo'onatac 'Enauacna.
26Nache soua lapaxaguenataqa ỹataqta huo'o da le'elqa' co'ollaq hua'aqchiguilo de'era la'aqtac So Jesús, nache maiche nnattega't, 'eetra':
–Qaq ¿negue'tom qone' ca ishet da nca'alec?
27Nache So Jesús ỹamataiguilo soomaye, nache 'enapegalo, 'eeta':
–Nam shiỹaxauapi saishet da ỹañoxot de'era, qalaxaye Ñim Lo'onatac 'Enauacna ishet cha'aye Ñimaye qaica ca ỹaqalanapec.
28Nache so Pedro 'enapego' Somaye, 'eeta':
–'Auennata'a qome da qomi' mashe ño'onaxataqchigui 'enauac nam qomi' hueto'oto, nache 'am seca'ataxague.
29Nache So Jesús 'enapeco':
–Ỹataqta 'eesa de'era qami' sa'axatema, da huo'o ca 'oonolec da no'onaxatchigui 'enauac nam hueto'otpi souaxat da Aỹem ca'attague', qataq da ỹa'axat da no'on na'axaỹaxac, nache camaye ỹaconeguet ca nsheetenaguec. Da huo'otaq no'onaxatchigui ca lqaỹañecpi ỹalleppi, huo'otaq lqaỹañecpi 'alpi, lta'a huo'otaq aca late'e, huo'otaq ca llalaqpi, huo'otaq ca na'alhua, 30nache camaye nagui da ñaq hueta'a ana 'alhua, nache cien da ỹe'eguelaxalec da ỹaconeguet ca lma', huo'otaq ca na'alhua, huo'otaq ca llalaqpi qataq na'aictaxa da nataqa'en na mpa'aguenaxauapi da sa iyacnapec camaye. Qaq da ivita ca loga't da nachaalataxac, nache chochaq tatec da hueta'aguet Ñim Lo'onatac 'Enauacna. 31Qalaxaye qalota qome nam nagui 'amaqtaqaicpi, nam qaica ca la'amaqchec qome, qataq qalota nam nagui qaica ca la'amaqchec, nam huo'o qome da la'amaqchec.
So Jesús qaltaq ỹa'axata'a da l-leuaxa
32Soua lapaxaguenataqa ỹataqta sa ỹaỹate'n ca 'eeteque co'ollaq ca'attraueegue So Jesús da taira'ague da Jerusalén. Qaq so laỹepi maye ca'attague' Somaye ỹataqta nlaqchigui da lcolanaxa. Nache So Jesús ñe'eguelqot, nache ndoqnaxaatre'c soua doce lapaxaguenataqa da da'aqtaxanema dam taỹa'a Somaye, 'eeta':
33«Qami' qauaỹaañita da nagui qomi' saxague da Jerusalén. Qaq huaña qome yemaye nache Aỹem Shiỹaxaua Llalec Aỹem qoỹaneua'a na lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq na dapaxaguenataxaatapeguec na namaxasoxonaxacpi. Nache namayepi qome ỹauo'o ca Aỹem ỹasaxalec la'aqtac saq 'en, maye 'eetega ỹasouaxashet cam Aỹem ỹauega ca ñalaataguec qataq Aỹem ỹaneua'a nam chegaqauec shiỹaxauapi, 34yaqto' namayepi qome ỹataqta Aỹem ỹe'en, qataq nqaigoqtaigui na ỹashec, ime, nache Aỹem ỹalauat. Qalaxaye qom mashe inoxoore'c caua tres na'axa'te, nache qaltaq ñeca'alec.»
Dam iỹaxaaraique soua Santiago qataq so Juan
35So Santiago qataq so Juan maye llalqa so Zebedeo maye lapaxaguenataqa So Jesús, nqocheneua'alo Somaye, nache 'enapegalo', 'eeta':
–'Am Napaxaguenataxanaq, sauoqtaique da qomi' 'anqouagueque.
36Nache So Jesús ina't soomaye, 'eeta':
–¿Negue't cam qoñiitapeguec?
37Nache soomaye 'ena'apo':
–Qomye qomi' 'anqouagueque qom mashe ivita da qonetaigui da 'aro'onataxanaxac maye qaica ca 'ena'am da llo'oxoyec, nache no'on da ca 'oonolec da shenaqta nso'oota'ague na 'oic, qaq ca lỹa nso'oota'ague na 'ane'emaq.
38Nache So Jesús ỹasat, 'eeta':
–Qami' sa qauaỹachiñi ca llec da qauỹaxañiitapegueua'a. ¿Qami' lhuotte' peta'a da qanque'etaxañiigui na qauemsat maye Aỹem talec?
39Nache soomaye 'ena'apo':
–Aja', seshetaq.
Nache So Jesús 'enapeco':
–Ỹataqta 'eesa qome da qami' lta'araic da qanque'eenaxaqui, qoñiỹa'am Aỹem. 40Qalaxaye da qanso'ona'ague da aỹoic qataq da ñe'emaq, damaye saishet da Aỹem chegoqtot da san, cha'aye damaye mashe sogote da Ñim Lo'onatac 'Enauacna iqataxaatapigui' cam talec.
41Nache soua lỹa't diez lapaxaguenataqa co'ollaq ỹaỹate'n dam dequictapegueua'alo soua Santiago qataq so Juan, nache qaỹalemataỹalo soomaye. 42Nache So Jesús iỹaxanalo 'enauaque soomaye, nache 'enapegalo, 'eeta':
–Qami' qauaỹaañita da lataxac na nataxala'pi maye ilotague' na shiỹaxauapi ana 'alhua, namayepi saishet da huo'o ca ỹashenem da huo'o ca ỹo'ot da huo'otaq saishet da qaisoxon. Nataqa'en na nataxala'pi maye ỹo'oxoraicpi na 'alhuapi, ỹataqta ỹachelec da la'añaxac ñi 'oonolec nam hueta'a que'eca 'alhua. 43Qalaxaye da qoñiita, saishet qome da qoñiitec de'era. Nachaqrata da huo'o ca nshetaique da 'amaqtaqaic, nache camaye iuen da huapegue' na laỹepi, 44qataq da huo'o ca 'oonolec da qoñiita da nshetaique da la'auaxanec, nache camaye iuen da lamaxashec 'enauac na laỹepi. 45Aỹem Shiỹaxaua Llalec, nache ỹataxac de'era, sa ñanaỹa ana 'alhua da yaqto' Aỹem qanhualaxaueetapegue', nachaqrata da Aỹem ñeualaxaueetac, qataq ñanac da sesoueeguesop na lasouaxashetpi na shiỹaxauapi, qataq san da ñachaalataxac da lasheue damaye.
So Jesús nauaañi naqa'en so Bartimeo
46So Jesús qataq soua lapaxaguenataqa ivildeua'a ye nỹecpi ye Jericó. Qaq co'ollaq mashe quera'ai yemaye, nache qalota so shiỹaxauapi ca'attague' Somaye. Nache huo'o so qanamaic le'enaxat Bartimeo somaye llalec so Timeo nso'ootañi netaua'a na laỹe so nqa'aic dashelaxaatac. 47Qaq somaye co'ollaq hua'axaỹa'aguet So Jesús maye Nazaret le'ec da nateuga ye hueta'a, nache somaye ỹa'alaq, 'eeta':
–¡'Am Jesús, maye 'am Lca'aguishec Ñim Lo'onatac 'Enauacna, aỹem 'auchoxoren qome, aỹem 'autauan!
48Nache so shiỹaxauapi qanlaqtego' so qanamaic, qataq qoỹeetega da de'enaxaatai', qalaxaye somaye qaltaq nquigaxattec da la'alaxac, 'eeta':
–¡'Am Ỹataxala', maye 'am Lca'aguishec Ñim Lo'onatac 'Enauacna aỹem 'auchoxoren, aỹem 'autauan!
49Nache So Jesús vi'iiguet, nache 'enapeco':
–Ña qauỹaxañiỹa ñimaye.
Nache qaiỹaxana so qanamaic, nache qoỹeetega, qoỹeeta':
–Saishet da 'añi'i, qoñisheguem 'auanac, cha'aye 'am nỹaxana damaye.
50Nache so qanamaic ỹasaxauec so lapo', nache nparenaxaasheguem da nqo'ona So Jesús. 51Nache So Jesús inattac somaye, 'eeta':
–¿Negue't ca 'anshetaique da 'am so'otec?
Nache se'eso qanamaic 'enapeco':
–'Am Napaxaguenataxanaq, aỹem 'avi'eguelaxatem da qaltaq ñauaañi.
52Nache So Jesús 'enapeco':
–Nagui ishet da qojec, mashe 'am no'oita, cha'aye huo'o da 'arpi'iỹaxac Ñim Lo'onatac 'Enauacna.
Huaña, nache se'eso qanamaic ishet da qaltaq nauaañi, nache ca'ategue So Jesús.
