Marcos 12

₁'Era dam 'oonolec nam laloqnaxanaxatpi So Jesús naxa da ivita da ỹapaxaguen na shiỹaxauapi, 'eeta':

«Huo'o so ỹale ỹauo'o so lanaxanaqa' maye nanqa' ana uva. Ime, nache mpaxateua'a, qataq ỹo'ot aso no'onataxaqui da qaỹo'ot na lataxa, qataq ỹo'ot aso nalloxolate da yaqto' ishet da qaỹalletalec 'enauac se'eso nanaxanaqa'. Qaq co'ollaq ime, nache huo'o so ỹa'aalaxanaxanec da do'onataxaalec naqa'en se'eso lanaxanaqa'. Nache somaye jec.

₂Qaq co'ollaq iviteuga so laloqo' da qanqat ana ala ana nañiguishe, nache so lalamaxat se'eso nanaxanaqa' ỹamaq so lamaxashec, da yaqto' iỹaxanot se'eso 'onataxanaxaicpi, da icolaxateuga acam talec somaye qanqa'en. ₃Qalaxaye se'eso 'onataxanaxaicpi ỹaconeua'a somaye nache iuaxaatac, qataq ỹe'eguelaxat, qaica ca ỹami'.

₄Nache se'eso lalamaxat so nanaxanaqa' qaltaq ỹauo'o so lỹa ỹamaq, qalaxaye somaye nataqa'en qaisheueetac qataq qaỹasaqtalec na coma', qataq qaiuaxangui na lqaic.

₅Nache se'eso lalamaxat so nanaxanaqa' qaltaq ỹamaq so lỹa lamaxashec, qalaxaye somaye qaỹalauat. Qaq co'ollaq ime, nache qaltaq qalota so ỹamaq lamaxashecpi, qalaxaye huo'o na qaiuaxaatac somayepi, qataq huo'o na qaỹalauat.

₆Qaq somaye, nachaqsota so lalamaxat llalec da no'onañi som ỹataqta lauotaxat. Nache somaye ipa'axaatec da ỹamaq, cha'aye 'enapeco': ‹Ñimaye qome ỹataqta huo'o naq 'enec qanqa'en.›

₇Qalaxaye som 'onataxanaxaicpi 'enapeco': ‹'Ena cha'aguet nam talec qome da lalamaxat na nanaxanaqa' qom ileu ca lta'a. Namaye salauataq yaqto' qomi' taleguete ne'ena nanaxanaqa' da qaralamaxat.›

₈Nache so ỹalleppi ỹaconeua'a so nsoqolec, nache ỹalauat. Ime, nache qaỹasaxaueegue da laỹe so nanaxanaqa'.

₉Qaq ¿chaq negue't ca qaupicheetega da ỹo'ot so lalamaxat se'eso nanaxanaqa'? Aỹem qami' sa'aqtaxanema: somaye nqo'ona se'eso nanaxanaqa', nache ỹalauat se'eso ỹalleppi. Ime, nache ỹami' se'eso nanaxanaqa' ca laỹepi shiỹaxauapi.

₁₀¿Saishet peta'a da qantooñic dam nanettalec ana nere maye huetalec na la'aqtacpi Ñim Lo'onatac 'Enauacna maye, 'eeta'?:

₁₂Nache som lataxala'pi so ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq som dapaxaguenataxaatapeguec na namaxasoxonaxacpi maye chegoqo'ot so Moisés qataq som lataxala'pi na judiopi, noma da So Jesús ỹo'ot se'eso daloqnaxana da 'eetega somayepi. Qaq ỹoqo'oye somayepi ỹauotaique da ỹaconeua'a. Qalaxaye saishet da ỹañoxot, cha'aye ñe'etega na shiỹaxauapi. Nache qaỹa'aqta'a So Jesús, nache qanayeca'ai.

₁₃Qaq co'ollaq ime, nache huo'o so qaỹamaxa So Jesús som chegaqaigui na fariseopi, qataq som quetague'pi so nta'a Herodes, da qaỹauotaique da qaỹe'eguen So Jesús, da yaqto' ishet da qaỹachegoxotchigui da qaỹauo'o ca lasouaxashet. ₁₄Nache somayepi jec, nache inat So Jesús, 'eeta':

–'Am Napaxaguenataxanaq, qomi' saỹaanaq da nache 'eetai' naxa da saishet da saq 'en ca 'aua'axat, qataq saishet da 'auqochetega cam maiche 'eetapeguec na shiỹaxauapi, nachaqrata da ỹataqta 'aulotelec da 'arapaxaguenataxanaxac, qataq nache 'eetai' da qoqueto'ot da qomi' qonetegalo da ỹataqta salaxasoxoguet Ñim Lo'onatac 'Enauacna. Ñaq 'auauo'o nagui ca 'ara'aqtac. ¿Ỹaỹamaqchiguiñi peta'a da sesheetenaq ñim lta'a na nta'alpi maye netaña ye Roma?

₁₅Qalaxaye So Jesús ỹaỹaten da somayepi choche ye'eguenataxaatac, nache ỹasategueto', 'eeta':

–¿Ta'ainco' da qauauoitaique da Aỹem qavi'iguiñi? Ñaq Aỹem qandoiua'a aca 'oonole ana anom lcatole, maye nsheetenaxanaqte.

₁₆Nache qairoua'a aso 'oonole anom lcatole, nache inatta'ape soomaye, 'eeta':

–¿Negue't ca lqui'i qataq negue't le'enaxat ye huetalec ana'ana?

Nache somayepi, 'eeta':

–Qomye ñim lta'a na nta'alpi maye netaña ye Roma.

₁₇Nache So Jesús 'enapego' somayepi, 'eeta':

–Qaỹa'añim qome ñim lta'a na nta'alpi cam maiche lalamaxat ñimaye, qataq Ñim Lo'onatac 'Enauacna qaỹa'añim ca maiche lalamaxat.

Nache co'ollaq qaỹa'axaỹa da la'aqtac So Jesús, nache somayepi ỹataqta lta'araic da la'aalaxa.

₁₈Huo'oi soua chegoqraigui nam saduceopi taỹa So Jesús, qaq souaxat namayepi ye saishet da ỹa'amaqten da na leuaxaicpi qaltaq ỹe'eguelaxalec da nca'alec. Nache inattaco' So Jesús, 'eeta':

₁₉–'Am Napaxaguenataxanaq, so Moisés ỹiyiñi co'ollaxa da huo'otaq huo'o ca ỹale da ileu, qaq no'oichigui aca lhua, qalaxaye qaica ca llalec, nache ca lqaỹa na'asa iuen da huaroneguet acamaye, da yaqto' huo'o naqa'en ca llalec som lqaỹa maye saqca. Qaq nache ipacchigui dam nanettañi namaxasoxonaxac, da que'eca ñalaqpi, nache llalaqpi som qaica lqaỹa qataq ỹache da le'enaxat.

₂₀Cha'aye na souaqta'a huo'oi soua siete nqaỹa't. Som ỹe soomaye huaron, qalaxaye somaye ileu co'ollaq ñaq saxanaqca ca llalec. ₂₁Nache som lqaỹa maye lpa'axaua, somaye huaroneguet aso llo'oxoua. Qalaxaye somaye nataqa'en ileu, qataq qaica ca llalec. Ime, qataq jec so lỹa lqaỹa, qalaxaye nache 'ena'am. ₂₂Qaq 'enauaque se'esoua siete nqaỹa't huaronegueta asomaye, qalaxaye saishet da huo'o ca llalec ñi 'oonolec. Qaq pa'atec, nache ileu nataqa'en aso 'alo.

₂₃Qaq qom ivita ca laloqo' da Ñim Lo'onatac 'Enauacna qaltaq nca'alaxatec na leuaxaicpi, nache ¿chaq negue't ca ỹoqta lhua asa'aso 'alo, cha'aye 'enauac se'eso siete nqaỹañecpi mashe huaroneguet asomaye?

₂₄Nache So Jesús 'enapeco':

–Qami' qausomiỹapec, cha'aye saishet da qauaỹachiñi' naua nanettaleguete ana nere maye huetalec na la'aqtacpi Ñim Lo'onatac 'Enauacna qataq da la'añaxac Ñimaye. ₂₅Cha'aye qom ivita da qaltaq qanca'alaxatec na leuaxaicpi, nache ca ỹale qataq aca 'alo saishet da huaron, cha'aye 'enauac da 'eeta'am da lataxac na namaxashec piguem le'ecpi. ₂₆Qaq de'era lataxac da qaltaq qanca'alaxatec na leuaxaicpi, qalaq ¿saisheto' peta'a da qautaxaỹaxañi aso lere so Moisés, qataq yem hueta'a da na'aqtaguec aso qo'oipaqole maye 'ettaigui, qalaxaye saishet da ỹoqta ỹavic asom netaigui co'ollaxa Ñim Lo'onatac 'Enauacna da detaqtague' so Moisés? Co'ollaq Ñimaye 'enapeco': «Aỹem maye Nachaỹem Natameetacot co'ollaxa so Abraham, qataq so Isaac qataq so Jacob som 'auachegoxogueta.» ₂₇Qaq ỹoqo'oye Ñim Lo'onatac 'Enauacna saishet da natameetacot na leuaxaicpi, nachaqnata nam nca'altauecpi, cha'aye Ñimaye 'enauac nca'altauec naqa'en na shiỹaxauapi. ¡Qaq ỹoqo'oye qami' ỹataqta qausomiỹapec!

₂₈Qaq huo'o so 'oonolec nam dapaxaguenataxaatapeguec na namaxasoxonaxacpi hua'aqchigui da la'aqtaxanaxac So Jesús co'ollaq na'aqtaxaatague' so saduceopi. Qaq co'ollaq ila'a da ỹataqta ỹaỹamaqchiguiñi da lasataxac So Jesús, nache nqocheneua'a Somaye nache inat, 'eeta':

–¿Negue't ca ỹactec da la'amaqchec nam namaxasoxonaxacpi?

₂₉Nache So Jesús 'enapeco':

–Dam hua'auchiguiñi qataq dam ỹactec da la'amaqchec nam namaxasoxonaxacpi, 'eeta': «¡Qana'axaỹaxañiỹo' qome, qami' Israel le'ecpi! Ñim Lo'onatac 'Enauacna, nachaqñita 'oonolec Lataxala' na Israel le'ecpi. ₃₀Ỹataqta 'auauotec qome Ñim Nataxala' maye Lo'onatac 'Enauacna, qataq ỹataqta 'aumato'ot da 'arquiyaqteỹaxac, qataq da 'anachaalataxac, qataq da 'arhuennataxac, qataq da 'ara'añaxac.» ₃₁Qaq da lỹa maye 'eeta'am damaye, 'eeta': «'Auauotec ca 'arqaỹa, 'eeta'am 'anqa'en da 'arauotaxanaqtaic da maiche 'anachaalataxac.» Qaq qaica ca lỹa namaxasoxonaxac da ỹactec da qaỹalaxalec da 'ena'ama ne'enaua dos.

₃₂Nache som dapaxaguenataxaatapeguec na namaxasoxonaxacpi 'enapeco':

–'Am Napaxaguenataxanaq, ỹataqta 'eesa de'era 'ara'aqtac, da 'oonolec Ñim Lo'onatac 'Enauacna da qomi' lalamaqa'ate, qaica ca lỹa da 'eeta'am Ñimaye. ₃₃Qataq iuen da sauotaxac Ñimaye, imauec da qarquiyaqteỹaxac, qataq sauotaxac na qarqaỹañicpi, 'eeta'am da 'eetec da qarauotaxanaqtaic da maiche qanachaalataxac. Qaq ne'enaua namaxasoxonaxaco ỹataqta qaica ca 'ena'ama da la'amaqche'c, saq 'ena'am da qaỹalaxaguet nam maiche lapaxañipi na shiỹaxauapi.

₃₄Nache So Jesús co'ollaq ila'a da so dapaxaguenataxaatapeguec na namaxasoxonaxacpi da ỹataqta ỹaỹamaqchiguiñi da la'aqtac, nache 'enapego', 'eeta':

–Saishet da 'am qaỹoqta da lo'onataxanaxac Ñim Lo'onatac 'Enauacna.

Huaña, nache tachiguiña da saishet da huo'o ca qaltaq inattac So Jesús.

₃₅Qaq co'ollaq ñaq dapaxaguenataxaatac So Jesús huaigui aso no'onaxanaxaqui late'erai, nache Somaye denataxan, 'eeta':

«¿Chaq ta'ainec nam dapaxaguenataxaatapeguec na namaxasoxonaxacpi ye 'eetega da ca Lca'aguishec Ñim Lo'onatac 'Enauacna, camaye chegoxoguet so nta'a David? ₃₆Qantooñita'ac peta'a co'ollaq da So Saqcha'a Na'añaxac Qui'itta ỹa'aqtaxanaxan so David, nache 'enapeco':

₃₇¡Hua'! Ñaq Aỹem qaua'aqtaxañim, ¿ta'ainco' co'ollaxa da so nta'a David da iỹaxana da Lataxala' som Lca'aguishec Ñim Lo'onatac 'Enauacna? Qataq ¿ca 'eeteco' da ca Lca'aguishec Ñim Lo'onatac 'Enauacna da chegoxoguet somaye? ¡Ye so David ỹamata'ac da ỹactec da la'amaqchec, saq 'ena'am somaye!»

Qaq qalota so shiỹaxauapi hueta'a yi'iye da na'axaỹaxaatega So Jesús qataq ỹataqta ỹaỹamaxareeta.

₃₈So Jesús queto'ot da dapaxaguenataxaatac, nache 'enapeco':

«Ỹataqta qarvichiỹa'aguet qome na dapaxaguenataxaatapeguec na namaxasoxonaxacpi, cha'aye namayepi ỹataqta nqopita da 'ena'am da no'otaxac na 'amaqtaqaicpi, qataq da hueta'a ca menaqa' qalaq ỹataqta huo'o da 'enec qanqa'en da qaiquin. ₃₉Qataq da nqo'oneua'a na naponaxac añi napaxaguenaxaqui na judiopi qalaq namayepi lqopitaxat da naña ca ỹo'oxoraq so'onaqa'. ₄₀¡Qaq nachena namayepi na decachetapigui na lma'pi ana pa'aipi, ime naxa, nache ỹo'ot da nqouagaxaunaxac ỹataqta logoraic naqa'en! Qalaxaye Ñim Lo'onatac 'Enauacna ỹataqta ỹactec naqa'en ca nhuaxanaguec namayepi, saq 'ena'am na laỹepi shiỹaxauapi.»

₄₁Huo'o so na'a'q So Jesús huetaua'a aso no'onaxanaxaqui late'erai nso'ootañi, hueta'a ye saqaỹapeque aso laỹe' ana nachetaqtaxanaqte. Nache imeteetac na shiỹaxauapi maye ỹasaqtapiguiñi ana lachetaqtaxanaqte. Qaq ỹataqta qalota nam sallaxanecpi maye ỹaatapegueuo ana qalota alom. ₄₂Nache nvireuo aso pa'ai maye choxoraq. Nache asomaye ỹasaxayiñi souatai' alomio'ole, ỹasaxanguilo aso 'oonole anam laỹe'pi ana nachetaqtaxanaqte. Qaq soomaye ỹataqta saq 'amaqta'q da lashiichiỹaxa'c. ₄₃Nache So Jesús iỹaxanalo soua lapaxaguenataqa, nache 'enapegalo, 'eeta':

–Ỹataqta 'eesa de'era qami' sa'axatema, da asa'aso pa'ai maye choxoraq, asomaye ỹataqta ỹactec aso ỹasaxañi, napacalec 'enauac ana ỹasaxañi na sallaxanecpi. ₄₄Cha'aye 'enauac namayepi ỹasaqtapiguiñi ana lli'iỹoqte. Qalaxaye asomaye na'aictaxa da choxoraq, qalaq nache 'ena'am imatteuo, 'enauac asom huo'o lhuenec lasheue.