Marcos 2

₁Qaq co'ollaq mashe huo'oi soua na'axa'te, nache So Jesús qaltaq ỹe'eguelaxa ye nỹecpi ye Cafarnaúm. Qaq co'ollaq choche qaỹaỹaten da hueta'a ca nma', ₂nache qalota so shiỹaxauapi jec da yaqto' qanauane' Somaye. Qaq somayepi ye ỹataqta qalota, ỹoqo'oye ivitta'a da qaica ca ndaqa' ca lasom. Nache So Jesús cot da ỹa'axattac da no'on na'axaỹaxac.

₃Nache nataqa'en nvildeua'a se'eso nỹec soua cuatro shiỹaxau'. Soomaye nacootragui so mala' huetalec so ỹale maye sa da'añiigue. ₄Qalaxaye souaxat da ỹataqta qalota so shiỹaxauapi, nache soomaye huenoldesheguemec na l-laq so nỹec, nache ỹauo'o so lauatrac. Nache tachiguingui naqa'e'n so sano'on maye huetalec so lmala'.

₅Nache So Jesús co'ollaq ila'a da lta'araic lpi'iỹaxa'c soua ỹale't, nache 'enapego' so sano'on, 'eeta':

«'Am ỹalcolec, nam 'arasouaxashetpi nagui 'enauac sapalaxat.»

₆Qalaxaye som dapaxaguenataxaatapeguec na namaxasoxonaxacpi maye ỹalectauopi, co'ollaq hua'aqchigui da 'enapec So Jesús, nache ipa'axaatauo da lhuennataxac, 'eeta': ₇«¿Ta'ainco' dam da', ye nache 'eetec da la'aqtac? Damaye ỹataqta isheueetac Ñim Lo'onatac 'Enauacna, ye qaica ca ishet da ỹapalaxat ca nasouaxashet, nachaqñita Ñimaye.»

₈Qalaxaye So Jesús ỹaỹaten co'ollaxa da lhuennataxac somayepi, nache 'enapego', 'eeta':

«¿Ta'ainco' ye qarhuennataqai de'era? ₉Aỹem qaua'aqtaxañim ¿negue't ca ỹactec da saqalaq da qairolec? ¿Peta'a da qoỹeeta': Na 'arasouaxashetpi 'enauac qaỹapalaxat, huo'otaq da qoỹeeta': Qoñisheguem, 'auacona na 'armala' nache qojec? ₁₀Qalaxaye nagui qami' ñachaxanalo, Aỹem maye Aỹem Shiỹaxaua Llalec, huo'o da ỹa'añaxac ana'ana 'alhua da sapalaxat na nasouaxashetpi.»

Ime, nache 'enapego' so ỹale maye sa da'añiigue, 'eeta': ₁₁«Qoñisheguem, 'auacona na 'armala', nache 'anqo'ona ca 'arma'.»

₁₂Nache saqaỹaloq da ñesheguem se'eso ỹale qaỹauaachigui 'enauac, nache ỹacona so lmala', nache ca'ai cam qanayeuta'a. Qaq co'ollaq qaỹauaachigui de'era, nache ỹataqta qaỹo'oxoreetac Ñim Lo'onatac 'Enauacna qoỹeeta':

«¡Ỹataqta saỹauano' da sauanaqchigui ca 'eeta'am de'era!»

₁₃Qaq co'ollaq ime de'era, nache So Jesús qaltaq taxaama so loigue aso lapel ye Galilea. Nache qalota so shiỹaxauapi da naỹa Somaye, nache So Jesús ỹapaxagueetac somayepi.

₁₄Qaq co'ollaq ime da lapaxaguenataxanaxac, nache jec, qaq co'ollaq queta, nache ila'a so Mateo som llalec so Alfeo, somaye nso'ootañi hueta'a ca lo'onataxanaqa' maye huañacnaxa da na shiỹaxauapi isheeten so nta'a maye netaña ye Roma. Nache So Jesús iỹaxana somaye, 'eeta':

«Aỹem 'auca'ategue.»

Nache so Mateo sa naỹaloxon da ñesheguem, nache ca'ategue.

₁₅Qaq co'ollaq qaỹata'ague, nache So Jesús qataq soua lapaxaguenataqa deque'eta'ape, hueta'a ca lma' so Mateo. Nache qalota som ỹacootapeeguet ana nsheetenaqte ca nta'a maye hueta'a ye Roma, qataq na 'etaxaloxoicpi maye nagui ca'attague' So Jesús, nataqa'en qaiỹaxana da nquia'axauapi.

₁₆Qalaxaye huo'o so dapaxaguenataxaatapeguec na namaxasoxonaxacpi maye chegaqaigui na fariseopi co'ollaq ỹauaachigui So Jesús da lquia'axaua 'enauac se'eso shiỹaxauapi, nache inatta'ape soua lapaxaguenataqa So Jesús, 'eeta':

–¿Ta'ainco' ñi Qarataxala'ai da dequi'iỹa'ai' nam ỹacootapeeguet ana nsheetenaqte ca nta'a maye neta'ague da Roma, qataq nam shiỹaxauapi maye qauem da na'aqtaguec?

₁₇Qalaxaye So Jesús hua'aqchigui de'era, nache 'enapeco':

–Nam iuen ca natannaxanaq, nachena nam sa no'onpi, qaq saishet da nachena nam no'oitapi. Qaq Aỹem ñanac da seỹaxana nam 'etaxaloxoicpi, da yaqto' ỹe'eguelaqot Ñim Lo'onatac 'Enauacna, qaq saishet da nachena nam 'eetega da no'on da lataxac.

₁₈Qaq huo'o so na'a'q da nqouaqchet nam quetague' so Juan qataq nam quetague' na fariseopi. Nache huo'o so naỹa So Jesús, nache inattac, 'eeta':

–¿Ta'ainco' naua 'arapaxaguenataqa ye saishet da nqouaqche't? Ye nam lapaxaguenatacpi so Juan qataq nam lapaxaguenatacpi na fariseopi ỹo'ottac de'era.

₁₉Nache So Jesús 'enapeco':

–Ca ncoyeguenatacpi da ỹalegueua'a ca naronaxac, camayepi saishet da nqouaqchet da huo'otaq ñaq qanayeeta'aguet ca auonaxaua. ₂₀Qalaxaye da ivita ca na'a'q da qaỹauec camaye, huaña nache nam ncoyeguenatacpi ishet da nqouaqchet.

₂₁Da huo'otaq huo'o aca togoshe npoto da huo'otaq colaqa'ague, nache saishet da qaỹapannaxana ca dalaxaicolec. Cha'aye da qaiỹo aca npoto, nache cam lapannaxat maye dalaxaicolec ỹe'eguena't, nache ishet da icolaxata'ague aca npoto ltoxoic. Huaña, nache nquigaxatec ca ltoxo.

₂₂Nataqa'en saishet da qaicoyingui ca lataxa dalaxaicolec aca laỹe' maye mashe ltoxoi. Cha'aye da ivita da nashiiyisheguem ca dalaxaicolec lataxa, nache ishet da icolaxata'ague acamaye, huaña, nache deqat camaye, nataqa'en aca laỹe'. Qaq ỹoqo'oye iuen da ca dalaxaicolec lataxa, qaicoyingui aca dalaxaale laỹe'.

₂₃Qaq huo'o so na'a'q mataxaqui maye saishet da ishetapec na judiopi, nache So Jesús qataq soua lapaxaguenataqa ỹa'axasoxootrelec so nanqa' na trigo. Nache soua lapaxaguenataqa napoctraña na ala na trigo. ₂₄Nache so chegaqaigui na fariseopi co'ollaq ỹauaachigui de'era, nache 'eetego' So Jesús, 'eeta':

–¡Ña 'aumeten, da ỹo'ottrac naua 'arapaxaguenataqa! ¿Peta'a sa ỹaỹateno' da sa qaishetapec da qanqat na ala na trigo ne'ena na'a'q mataxaqui?

_25-26Qalaxaye So Jesús 'enapego' somayepi, 'eeta':

–¿Ỹataqta saỹauano' peta'a da qautaxaỹaxañi da ỹo'ot so David maye nanettalec ana nere maye huetalec na la'aqtacpi Ñim Lo'onatac 'Enauacna, co'ollaq so na'a'q da so Abiatar lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna? Da so David qataq soua lỹa't huo'o da lta'araic lhuenaxanaqa' qataq ỹataqta iqoua't. Nache somaye pa'aigui so lauo' Ñim Lo'onatac 'Enauacna, nache chec aso nauole maye nda'a't nam ntaxaỹaxanaxanecpi da qaitaxaỹapegue' Ñim Lo'onatac 'Enauacna da ishet da chec, ime qataq ỹache't soua nnaictagueto.

So Jesús nataqa'en 'enapeco':

₂₇–Ye na'a'q mataxaqui maye saishetapec na judiopi, qaỹo'ot co'ollaxa da yaqto' lalamaxat ca shiỹaxaua, qaq saishet da qaỹo'ot ca shiỹaxaua da yaqto' ye na'a'q mataxaqui lalamaxat camaye. ₂₈Qaq ỹoqo'oye Aỹem Shiỹaxaua Llalec, Aỹem chegoqtot ca ỹa'aqtac cam ishet da qaỹo'ot qataq cam saishet da qaỹo'ot ye na'a'q mataxaqui.