So ỹale maye qalota so netaigui saqcha'a na'añaxac leguemaxaicpi
1So Jesús qataq soua lapaxaguenataqa ỹa'axasoxoorelec aso lapel ye Galilea, nache ivittra ye 'alhua maye saqaỹapeque ye nỹecpi ye Gerasa. 2-6Qaq yemaye naña so pannaqa', qaq nache hueta'a so ỹale maye huo'o so netaigui saqcha'a na'añaxac leguemaxaicpi. Qaica ca ishet da nllañi na'aictaxa da qaicoñetaxana na ncoñetaxanaxat lcat. ¡Qaq qalota naxa da qaicoñerai' qataq qaỹauo'oi naua lshetaxaqui' lcat naua lapia'ate! Qalaxaye, nache 'ena'am ỹataqta ỹachipiaxattac na lquet qataq ỹacagaxa't naua lshetaxaqui' naua lapia'ate. ¡Qaica ca ishet da dataỹa'aguet somaye souaxat da lchec qataq da la'añaxac! Ye na'a'q qataq ye pe, quetapeguelec aso qaỹoqotcheguemec 'alhuapi qataq ana huachiquipi, ỹa'alaqtai' qataq ntoqootague' na coma'pi, ỹoqo'oye ỹataqta dolata na lo'oc.
Qaq co'ollaq ñaq huenotteguec So Jesús aso nllocta, nache se'eso ỹale chegoqteua'a so pannaqa', qaq co'ollaq ila'aguet So Jesús da ña qaỹata'aguet, nache nqalgaqa'aguet, nache ỹa'aroto naua l-llectel Somaye.
7-8Nache So Jesús 'enapega so saqcha'a na'añaxac leguemaxaic, 'eeta':
–¡'Am saqcha'a na'añaxac leguemaxaic, qoca'ai ne'ena ỹale!
Nache se'eso saqcha'a na'añaxac leguemaxaic, na'axannec da la'alaxac da ỹasateguet Somaye, 'eeta':
¿Ta'ainco' ye aỹem 'atapegueua'a, 'am Jesús, maye 'am Llalec Ñim Lo'onatac 'Enauacna maye 'amaqtaqaic? ¡Saishet da 'auauo'o ca ñeque'eenaxac! ¡Ñimaye aỹem ỹauaachigui nagui da 'am seỹaxaatacot da saishet qome da 'auauo'o ca ñeque'eenaxac!
9Nache So Jesús inat somaye, 'eeta':
–¿Ca 'eetec ca 'are'enaxat?
Nache somaye ỹasat, 'eeta':
–Aỹem ỹe'enaxat da Qalota, cha'aye shenaqta'am ca qalota alleppi da sonaqtaigui ne'ena ỹale. 10Aỹem 'anqouaguec, nagui 'am ñachoxoreetot da saishet da ỹaqa'a ca qomi' 'auamaxaguelo.
11Qaq huo'o aso saqaỹapeque lcomaraxalate se'eso qanayeuta'a, netalec aso qalota cos late'epi deque'etac. 12Nache se'eso saqcha'a na'añaxacpi leguemaxaic nachoxoreetacot So Jesús, 'eeta':
¡Qomi' 'aua'aqta'alo qome da saxaigui aye cos late'epi!
13Nache So Jesús ỹasheetem somayepi. Nache se'eso saqcha'a na'añaxacpi leguemaxaicpi ca'ai se'eso ỹale, nache taigui aso cos late'epi. Qaq asomayepi ỹataqta nqalgaqangui so tocot, nache tangui aso lapel, choche ivitta'a da 'ogaxaipi.
14Qaq som ilotague'pi aso cos late'epi, somayepi taua'a so shiỹaxauapi maye netaigui se'eso nỹecpi, nache da'aqtaxanem 'enauac da qanayeuaigui. Nache anac so shiỹaxauapi da yaqto' ỹaỹaten ca 'eetec de'era. 15Qaq co'ollaxa qaivita ca hueta'a So Jesús, nache qaila'a so ỹale maye huo'o co'ollaxa so netaigui saqcha'a na'añaxac leguemaxaicpi da nso'ootañi, somaye mashe huo'oi soua alogo qataq ỹataqta ỹaỹamaqta. Nache so shiỹaxauapi ỹataqta ñi'i.
16Qaq som shiỹaxauapi maye ỹauaachigui de'era ỹo'otec So Jesús se'eso ỹale, somayepi da'aqtaxaatapeguem 'enauac so laỹepi shiỹaxauapi. 17Qalaxaye somayepi 'enapega So Jesús da taỹa ca lỹa 'alhua.
18Qaq So Jesús co'ollaq huenotteguengui aso nllocta, nache se'eso ỹale maye huo'o co'ollaxa so netaigui saqcha'a na'añaxac leguemaxaicpi, nachoxoreetacot So Jesús da ishet da ca'attague'. 19Qalaxaye So Jesús 'enapego' somaye, 'eeta':
–'Avi'eguelaxaua'a qome ca 'arma', nache 'aua'aqtaxanem ca 'arhuo' le'ecpi qataq ca 'anauochaxauapi, 'enauac da 'am ỹo'otec Ñim Lo'onatac 'Enauacna, qataq da 'eetec da lchoxonnataxanaxa da qoneta.
20Nache se'eso ỹale jec, nache quetot da da'aqtaxanem 'enauac nam netaleguete soua 'aleu' ye Decápolis, ỹa'axattac 'enauac dam ỹo'otec So Jesús somaye. Nache se'eso shiỹaxauapi na'axaỹaxaatega somaye, nache ỹataqta ỹa'aalatapeguec de'era.
Aso llale so Jairo, qataq aso 'alo maye ipoteua'a so lapo' So Jesús
21So Jesús co'ollaq ivittague da lỹa le'ego aso lapel netangui aso nllocta, nache hua'a so loigue, cha'aye qalota so shiỹaxauapi da laponeua'a Somaye.
22Huaña, nache nvi' so ỹale le'enaxat Jairo, som 'oonolec nam lataxala'pi aso napaxaguenaxaqui na judiopi. Qaq so Jairo co'ollaq ila'a So Jesús, nache ỹa'aroto naua l-llectel iviraxata'aguet na latap na 'alhua, 23nache ỹataqta nachoxoreetot, 'eeta':
–Aye ỹalole mashe ileetapigui'. 'Onaxaictaxa da aỹem 'anqouaguec da 'anqo'ona ye ima' da 'auashel-lec ayemaye yaqto' no'oita qataq nquic da nachaalataxac.
24Nache So Jesús ca'ategue so Jairo. Qalaxaye qalota so shiỹaxauapi lapona't, nache ca'ategue So Jesús. 25Qaq se'eso shiỹaxauapi huo'o aso 'alo ca'attaigui somayepi sano'on, qaq asomaye mashe ivi' naua doce vi'iye da anactac na ltago'q. 26Qaq asomaye ỹataqta salcoshe'egue da isheetetac na natannaxanaqpi, qalaxaye somayepi qaica ca ishet da nataren asomaye, nachaqrata da nquicta'aguet da qauem asomaye.
27-28Asa'aso 'alo hua'aqtapeguelec naxa da qaỹa'axattac So Jesús, nache da lhuennataxa, 'eeta': «Da choche sepoteua'a ca lapo', nache aỹem no'oita qome.» Ỹoqo'oye co'ollaq ila'a So Jesús, nache nshiyigui so shiỹaxauapi da nquigueua'a Somaye queteuo'oguet na l-laq, nache ipoteua'a so lapo'. 29Huaña, nache asomaye vi'iiguet na ltago'q, nache nomteguet da no'oita.
30Nache So Jesús nomteueegue da jec so la'añaxac laỹe. Nache Somaye ỹamataigui so shiỹaxauapi, nache denataxan, 'eeta':
–¿Negue't ca ipoteua'a na ipo'?
31Nache soua lapaxaguenataqa 'eetegalo' Somaye, 'eetra':
–'Am 'auaỹaten mque' da na shiỹaxauapi 'am npataxagui, qalaq ta'ainco' da 'aunataxaatac da qoneta': «¿Negue't cam Aỹem ipoteua'a?»
32Qalaxaye So Jesús queto'ot da demeenaxatapiguiñi da huotaique da ila'a cam ipoteua'a Somaye. 33Qaq asa'aso 'alo ỹaỹaten dam huaigui. Nache jec da nqo'oneua'a Somaye, nache ỹa'aroto naua l-llectel, nache ỹataqta da'aqtaxaatem 'enauac dam huaigui. 34Nache So Jesús 'enapego' asomaye, 'eeta':
–'Am ỹalole, 'am no'oita, cha'aye huo'o da 'arpi'iỹaxac Ñim Lo'onatac 'Enauacna. 'Aue qome, qojec, saqca ca da, mashe 'am no'oita.
35Qaq co'ollaq ña detaqtac So Jesús, nache huo'oi soua nvi't, chegoqra'a ca lma' so Jairo, nache qaỹa'aqtaxanem somaye qoỹeeta':
–¡Aye 'aỹa'ale mashe ileu! ¡Shacou da 'auauec da Napaxaguenataxanaq!
36Qalaxaye So Jesús saishet co'ollaxa da qocha'a de'era na'aqtaxanaxac, nachaqrata da 'enapego' so Jairo, 'eeta':
–Saishet qome da 'añi'i; nachaqrata da 'auauo'o ca 'arpi'iỹaxac.
37Nache Somaye saishet da huo'o ca nasheneguet, nachaqsouate' so Pedro qataq soua nqaỹa't Santiago qataq so Juan. 38Qaq co'ollaq mashe ivildeua'a ca lma' so Jairo, nache ila'a so shiỹaxauapi da lliỹa't, qataq nỹeetagui qataq ỹa'alaqtagui. 39Nache So Jesús inoxonoigui ca nỹec, nache 'enapego' somayepi, 'eeta':
–¿Ta'ainco' ye ỹataqta qaua'alqaitagui qataq qanỹeñiitagui? Aye nogotole saishet da ileu, ayemaye choche do'ocheta.
40Qalaxaye so shiỹaxauapi ỹe'eetac So Jesús. Nache Somaye damaxasoxoolec da qaipa'axanec 'enauac somayepi. Ime, nache ỹauec so lta'a qataq aso late'e aso nogotole qataq soua tres lapaxaguenataqa, nache inoxooreua'a ca hueta'a aso nogotole. 41Nache ỹacona na lhuaq asomaye, nache 'enapega ỹauota'a na la'aqtac na arameo, 'eeta':
–¡Talitá, cum!
De'era na'aqtac naigui da, 'eeta': «'Am nogotole, 'am shenapega, qoñisheguem.» 42Huaña, nache asa'aso nogotole maye mashe ivi' naua doce vi'iye da llaxa, asomaye ñesheguem qataq queuoỹapigui'. Nache so shiỹaxauapi co'ollaq ỹauaachigui de'era, nache ỹataqta lta'araic da la'aalaxa.
43Qalaxaye So Jesús ỹataqta sa ỹala'ac da huaqattega da saishet da huo'o ca qaỹa'axatem de'era. Ime, nache damaxasoxoolec da qaiquia'axan aso nogotole.
