So Jesús iquia'axan so cuatro mil shiỹaxauapi
1Huo'o so na'a'q, nache qaltaq ỹe'eguelaxalec da qalota so shiỹaxauapi da lapootapegueua'a So Jesús, qalaxaye qaica ca chec, nache So Jesús iỹaxanalo soua lapaxaguenataqa, nache 'enapegalo, 'eeta':
2–Aỹem ỹataqta huo'o da ichoxonnataxanaxa ne'ena shiỹaxauapi. Cha'aye mashe ivi' naua tres na'axa'te da Aỹem datatecot, qaq namayepi qaica ca chec. 3Qaq da huo'otaq shenapega namayepi da taỹalo naua lma'ate da saxanaxa da deque'e, nache yo'oqta qome da huo'o ca decopche da huangui na nqa'aic, cha'aye namayepi huo'o na ỹataqta qaỹoqta ca chegaqa'ague.
4Nache soua lapaxaguenataqa 'ena'apo':
–Qalaxaye na souaqta'a ye toolec ¿Cam sachegoxotaqa'ague ca nallec da samiaxai', ne'ena qalota shiỹaxauapi?
5Nache So Jesús inatta'apo' soomaye, 'eeta':
–¿Ca lcate' caua nauole maye qami' hueto'oto?
Nache soomaye 'ena'apo':
–Qomye siete.
6Nache So Jesús ỹamaxalec somayepi da nso'ooñi, nache Somaye ỹaconalo soua siete nauole, nache ỹanot da na'achecỹaxac Ñim Lo'onatac 'Enauacna. Qaq co'ollaq ime, nache icolaxachiguilo soua nauole, ime, nache ỹanoiguilo soua lapaxaguenataqa da yaqto' soomaye ỹanoigui so shiỹaxauapi. Nache soomaye ỹo'o't da ỹamaxalec So Jesús.
7Qaq nataqa'en ye huo'oi soua nỹaxayolqa, nache So Jesús ỹan da na'achec, ime, nache nataqa'en damaxasoxoolec da qaimenec.
8Nache 'enauac na ỹalectauo deque'e ivira'a da ỹataqta comaraxaicpi, qataq huo'o so ñi'iỹoxot, nache co'ollaq qalaỹona't, nache ivi' siete soua no'oxonal maye laỹe' na nallec soua nlaxatchiguilo. 9Qaq se'eso deque'etacpi, somayepi hua'c da ivi' cuatro mil shiỹaxauapi.
Qaq co'ollaq ime, nache So Jesús ncoyegueetague' somayepi, 10nache huenongui aso nllocta, lỹata'ape soua lapaxaguenataqa da nqo'oora ye 'alhua Dalmanuta.
Qaiỹaxaatacot So Jesús da yaqto' ỹo'ot ca na'anec maye saqaỹauanapega
11Nache co'ollaq nvi' so fariseopi, nache chegoqtot da ncotatague' So Jesús. Qalaxaye somayepi choche ỹauotaique da ỹe'eguen Somaye da iỹaxanot da ishet da ỹo'ot ca na'anec sa qaỹauanapega da ỹa'axat da So Jesús chegoqo'ot Ñim Lo'onatac 'Enauacna.
12Qalaxaye So Jesús decovi, souaxat da sa ỹaỹamaxaren de'era, nache 'enapeco': «¿Ta'ainco' ye saq ỹet qami' da qauỹaxañiitaique ca na'anec maye sa qaỹauanapega? Ỹataqta 'eesa de'era qami' sa'axatema, da saishet da huo'o ca qami' qoỹanema.»
13Ime, nache So Jesús ca'ai somayepi, nache qaltaq huenooñigui aso nllocta, nache taitague da lỹa le'ego aso lapel.
Naua lapaxaguenataxanaxaco na fariseopi
14Qaq soua napaxaguenataqa icoua'aisalo co'ollaxa da ỹache' ca alo'q, nachaqasota aso 'oonole nauole da huetangui aso nllocta. 15Nache So Jesús huaqattapegueleguete soomaye, 'eeta':
–Maxatchaxa qome, qarvichiỹa'a ana ỹasheeraxachigui ana nauole maye huetaigui na fariseopi qataq ñi Herodes Antipas.
16Nache soua lapaxaguenataqa maiche nnattega't, 'eetra':
–Yo'oqta da souaxat da saishet da ñachoq aca nauolepi, ỹoqo'oye ishet da la'aqtac de'era.
17Nache So Jesús nomalo soomaye, nache 'enapeco':
–¿Ta'ainco' ye qana'aqtaxañeetapigui da sa qanache aca nauole? ¿Peta'a ñaq 'eetalec da saxanaxa da qauaỹachiñi? Qataq ¿ñaq napotagui peta'a da qantoonaxaqui? 18Da huo'oi naua qara'ai'chilli', qalaq ¿ta'ainco' da saishet da qanauañiiñi? Qataq da huo'oi naua qartelai lauacolli', qaq ¿ta'ainco' ye saishet da qaua'aqai? ¿Saishet peta'a da qantooñic 19se'eso na'a'q co'ollaq sanoigui so cinco mil shiỹaxauapi soua cincole nauole? Qaq ¿chaxan lcate' soua no'oxonal maye laỹe' na nallec soua nlaxatchiguilo so ñi'iỹoxot?
Nache soua napaxaguenataqa 'ena'apo':
–Qomye doce soua no'oxonal.
20Nache So Jesús denataxan 'eeta':
–Qaq can ñecolaxaayiñi soua siete nauole da sequia'axan so cuatro mil shiỹaxauapi, qaq ¿chaxan lcate' soua no'oxonal maye laỹe' na nallec da nlaxatchiguilo so ñi'iỹoxot?
Nache soomaye 'ena'apo':
–Qomye siete soua no'oxonal.
21Nache So Jesús 'enapegalo soomaye, 'eeta':
–¿Qalaq ta'ainco' da ñaq 'eetalec da saishet da qauaỹachiñi?
So Jesús nataren so qanamaic co'ollaq hueta'a ye Betsaida
22Qaq co'ollaq ivilda ye nỹecpi le'enaxat Betsaida, nache huo'oi soua shiỹaxau' naueguereua'a So Jesús so qanamaic, nache nachoxoreetracot Somaye, da yaqto' ỹashel-lec.
23Nache So Jesús ỹacona na lhuaq so qanamaic, nache ỹauegueueegue da laỹe so nỹecpi. Ime, nache ỹa'amiinguilo naua la'ai'te aso la'alle. Ime, nache ỹashel-lec somaye, nache inattaco' da huo'otaq huo'o ca ila'a. 24Nache so qanamaic ỹasato', 'eeta':
–Selota'a na shiỹaxauapi, 'eeta'am ana qo'oipaq, qalaxaye queuotapigui'.
25Nache So Jesús qaltaq ỹe'eguelaxalec da ipoteua'alo naua la'ai'te somaye, nache se'eso ỹale qaltaq ỹe'eguelaxalec da nauaañi.
26Nache So Jesús ỹamaxa ca lma' somaye, nache 'eetega, 'eeta':
–Saishet qome da 'avi'eguelaxaua'a na nỹecpi.
So Pedro ỹa'axat So Jesús da nacheso So Lca'aguishec Ñim Lo'onatac 'Enauacna
27Qaq co'ollaq ime de'era, nache So Jesús nnaictagueto soua lapaxaguenataqa da nqo'oora na saq 'amaqtaq nỹecpiolec maye huaigui ye 'alhua Cesarea maye ilotague' co'ollaxa so Filipo. Qaq co'ollaq huangui so nqa'aic, nache So Jesús inatta'ape soua lapaxaguenataqa, 'eeta':
–¿Chaq negue't ca ipettega naxa Aỹem na shiỹaxauapi?
28Nache soua lapaxaguenataqa 'ena'apo':
–Qomye huo'o na 'eetega da 'am Juan maye nachelaxanataxanaq; qataq huo'o na 'eetega da 'am Elías. Qataq huo'o nam ipettega da 'am 'oonolec som hua'au la'aqtaxanaxanecpi Ñim Lo'onatac 'Enauacna.
29Nache So Jesús inatta'apo' soomaye, 'eeta':
–Qaq qami', ¿negue't ca qaupicheetega Aỹem?
Nache so Pedro 'enapeco':
–Qomye nache 'am maye 'am Lca'aguishec Ñim Lo'onatac 'Enauacna.
30Nache So Jesús huaqattegueleguete soomaye da saishet da huo'o ca da'aqtaxaarem, da nacheso So Lca'aguishec Ñim Lo'onatac 'Enauacna.
So Jesús ỹa'axata'a da l-leuaxa
31So Jesús da'aqtaxanema soua lapaxaguenataqa dam taỹa'a da ivireguet Somaye, 'eeta':
«Aỹem Shiỹaxaua Llalec ỹataqta qalota qome da ñeque'eenaxac. Aỹem ỹo'orauec na lataxala'pi na shiỹaxauapi qataq na lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq nam dapaxaguenataxaatapeguec na namaxasoxonaxacpi. Qataq ivira'a da Aỹem qaỹalauat, qalaxaye qom mashe inoxoore'c caua tres na'axa'te, nache qaltaq ñeca'alec.»
32Qaq souaxat da So Jesús ye ỹataqta ỹa'axatta de'era taỹa'a, nache so Pedro iỹotauga Somaye, nache nlaxa souaxat de'era la'aqtaxanaxac. 33Qalaxaye So Jesús namatapec da ỹamataiguilo soua lỹa't lapaxaguenataqa, nache nlaxa so Pedro, 'eeta':
«¡'Am Pedro de'era 'artaxaỹaxac qoneta'am so pa'aguenataxanaxaic! ¡Aỹem qoca'ai, cha'aye sa 'auaỹaten da 'eetapeguec Ñim Lo'onatac 'Enauacna! De'era 'arataxac 'eeta'am ca choche shiỹaxauatto.»
34Qaq co'ollaq ime de'era, nache So Jesús iỹaxanalo soua lapaxaguenataqa, qataq so shiỹaxauapi. Nache 'enapego', 'eeta':
«Da qami' qauauoitaique da qami' ỹapaxaguenataqa, nache iuen da qaucoviỹa'ai cam maiche qoñiitapeguec. Qataq iuen da qami' lhuotte' da qanañañi da qami' qaiuaxanegueta ca qanpe'enaxaqui qataq qauo'oche cam shenapec. 35Cha'aye da nachaqrata da qampogoxoiñeetapegue' da qauauoitaique da qanca'alliiuec, nache deqat da qanachaalataxaqui. Qalaxaye da qanañañi da qaỹa'añi da qanachaalataxaqui souaxat da qaua'axacheetac da no'on na'axaỹaxac, nache qami' qanca'alaxatre'c. 36Qaica ca naigui ca shiỹaxaua da nauec 'enauac nam huetalec ana 'alhua, cha'aye damaye ỹauega da deqat da nachaalataxac. 37Qataq qaica ca ishet da ỹan ca shiỹaxaua, da yaqto' nca'alaxatec da nachaalataxac.
38Da qaualliquiitaigui ne'ena shiỹaxauapi maye 'etaxaloxoicpi qataq saishet da ỹaconeguet Ñim Lo'onatac 'Enauacna, nache saishet da Aỹem qaua'aquiiteguelec qataq naua ỹa'aqtaqa. Qaq da Aỹem qaua'aquiilec, nache nataqa'en Aỹem Shiỹaxaua Llalec qami' sa'agueleguete qom ñe'eguelaq da ñanactaigui da la'añaxac Ñim Ita'a qataq na lamaxashecpi.»
