1¡Choxoraicolec 'am huaqta'a't nỹecpi maye 'aramanec da 'aucorec na ntago'q,
qataq 'am nlaqchigui da natenataxanaxac qataq qaica ca 'auyaqueetac,
qataq qaica ca loga't da 'aralaataxanaxac!
2Qaq cheta'aguet na l-lamaxa nam nalashenaxanaxatpi,
qataq ana lasaxannapi ana naigonapi, qataq da l-lamaxa da naloxoyaxac na caipi,
qataq da lacholaxanaxa anam naigonapi.
3Qataq da l-lamaxa nam qanayeetalec caipi,
qataq da lqashelgaxa na ỹeelonecpi, qataq na le'eraxa ana taquiaxaipi.
Qataq nam qalota que'emaxaicpi, qataq nam logosheguem leuaxaicpi.
Nam leuaxaicpi maye qaipogolaxaateguesop.
4Qaq yo'oq 'enauac de'era souaxat da lquisheguetaxac,
anam quisheguetaxaipi maye ỹataqta huo'o da lyac,
qataq ỹaỹaten da dapaxaguenataxanec da ñi'iyaqnataxanaxac,
qataq irolec da lquisheguetaxac qataq da lli'iyaqnataxanaxac da ỹatenachet nam ỹotta'a't shiỹaxauapi.
5Qaq Ñim Nataxala' maye Qaica ca Ỹaqalanapec, 'eeta':
Aỹem soota'a ne'ena da 'am sataỹa'aguet,
nache aỹem ñauatsheguem qome ana 'arpoto,
nache seviraxatasheguema na 'arashec,
yaqto' na ỹotta'a't shiỹaxauapi ỹauaachigui qom qouetauec,
qataq nam nta'alpi ỹauaachigui qome da 'ara'agaxa.
6Nache 'am sasaxalec qome na nshepaxanaxa,
qataq sauo'o da 'ara'agaxa
nache 'enauac 'am qaimeteetac.
7Qaq 'enauac nam 'am ỹauaachigui 'am ca'ai qome nache, 'eeta':
«¡Ye Nínive ỹataqta nlachiguiñi!
¿Chaq negue't ca ichoxoren qome yemaye?
Qataq ¿chaq negue't ca ishet da ỹa'añaqchet yemaye?»
8Qaq ¿peta'a 'anapacalec da lyac ye Tebas,
yem huaqta'a't nỹecpi maye sa qaỹapeque so tala Nilo,
qataq coleesop na ỹataqta qalota 'etaxat,
nache aso auaxai mpaxateua'a yemaye,
qataq na 'etaxat nache lpaqtaxanaxat yemaye?
9Qaq ye Etiopía qataq ye Egipto,
nache chegoqtecot da qaica ca loga't la'añaxac yemaye,
qataq na lma' ye Fut, qataq ye Libia nataqa'en ltauapi.
10Qalaxaye ñaqaiyeta ye Tebas le'ecpi noxonecpi co'ollaxa,
nache qaỹauega ye ỹaqa'a 'alhua,
qaq natai' llalaqpi qalaq qaiuaxaneguet na 'alhua
da huaña ana lamaqai na nqa'aicpi,
qaq nam shiỹaxauapi maye huo'o naq 'enec
qalaq qanallichigui,
qataq lcat qanqa'en na lquetpi nam lataxala'pi namayepi.
11Qaq 'am Nínive, nataqa'en 'am qaitaqchet qome
nache 'am qaỹapoua'a,
huaña qome nache 'anmittaique ca 'anqañoxotaqa'
souaxat na 'anpa'aguenaxauapi.
12Qaq 'enauac nam 'aye'eguenaqa'pi,
'eeta'am qome aca nañiguishe higo
maye nlaqchigui ana ỹeta ala,
qaq da qaỹacholaxan nache naañi,
nache chec na shiỹaxauapi.
13Qaq nam 'analleppi qalaq 'eeta'am qome na 'alpi,
qaq nam ñegueuopi nam 'ana'alhua
qalaq nauattaiguipi,
da yaqto' pa'auo nam 'anpa'aguenaxauapi,
cha'aye ca norec nlaxaañi qome na lpaqtaxat nam ñegueuopi.
14Qaq na'aictaxa da 'auqataxanai'
ca 'etaxat da yaqto' saishet da 'am qaivireua'a,
qataq da 'anquigaxatec da 'ara'añaxac,
qataq da 'auapiguingui ca nshaxa
da yaqto' 'auo'ot na losoc,
qataq da 'anquigaxatec na le'eraxa aca 'arqatelaxanaxaqui.
15Qalaxaye nache huaña qome da 'am ỹavigaxatta ca norec,
qataq ca ỹeelonec 'eeta'am qome aca shiiquioxoi
da ỹataqta 'am nlaxatchiguiñi.
¡Qaq na'aictaxa da 'anquictauec
da qoneta'am ana shiiquioxoipi!
¡Qataq da qoneta'am na pelgaxanaqpi!
16Qataq 'anquigaxatec na 'armenaxanaxanecpi,
ye lcata qalaq ỹataqta napacalec ana huaqaañipi,
qaq ana shiiquioxoi qalaq ishet da naralaxat da lo'oxoỹaxac,
qataq ishet da huaỹo.
17Qaq na 'arauanaxanaxanecpi
qalaq 'eeta'am ana shiiquioxoi,
qataq nam ilotague' na 'analleppi
'eeta'am aca napal shiiquioxoipi,
da nvi' na latomaxa nache lapono'ot na lpaqtaxat na nỹecpi,
qaq da nnoxoosheguem añi nala' nache jec,
qalaq qaica ca ỹaỹaten cam taigue.
18¡'Am nta'a na Asiria, na 'aramaxashec nataxala'pi qalaq do'ochaañi!
Qaq nam 'amaqtaqaicpi lataxala' na 'analleppi qalaq nmatteguec,
qaq na 'analleppi qalaq laguelec ana qasoxonaxapi,
nache qaica ca anac da laỹona't namayepi.
19¡Qataq qaica ca lata' da 'aracagaxa,
qataq saishet da qanataren da 'arque'emaxa!
Qaq 'enauac nam ỹaỹaten de'era qauem maye qouaigui,
namayepi ỹataqta iuaxana't naua lhua'q da ntonaxac,
cha'aye, ¿negue't cam sa nque'etaxangui nam chochaq tatec
qauem maye 'auo'ottacpi co'ollaxa?
