1Da la'aqtaxanaxac so Nehemías, som llalec so Hacalía, 'eeta': Huetoigui so ca'agoxoic Quisleu so vi'i veinte, co'ollaq soota'a ye huaqta'a't nỹecpi ye Susa, 2qaq vichigui co'ollaq nvita yemaye so ỹaqaỹa Jananí, nnaictagueto soua shiỹaxau' maye chegoqra'a ye Judá. Huaña nache senataxaatapeguec ye Jerusalén, qataq so laỹepi judiopi maye ỹet co'ollaxa da nanoxonaguec da qaỹauega ye Babilonia. 3Nache soomaye aỹem da'aqtaxaarem, 'eeta': «Qomye na ỹet co'ollaxa da nanoxonaguec, nache no'onalec yi'iye 'alhua Jerusalén, yemayepi ỹataqta ỹaguec da lachoxoyec qataq da ne'enaguec. Qataq so lpaqtaxat yemaye ỹataqta nlachiguiñi qanqa'en, qataq so lasompi ỹataqta ỹavicta souaxat so norec.»
4Qaq can sa'aqchigui de'era nache ñeso'ooñi da ñeỹen, nache huo'oi soua na'axa'te da huo'o da ỹaquicoxo qataq ñeqouaqchet, qataq ñatameetacot Ñim Lo'onatac 'Enauacna maye ilotague' na piguem. 5Nache sheeta': «'Am Nataxala', maye 'Aro'onatac 'Enauacna maye qoneto'ot na piguem, 'am 'amaqtaqaic qataq chaqaic, maye 'aupacchiguilo naua 'anaỹamaxataxaco, qataq sa 'anapacalec ca 'am ỹauotec, qataq ỹalaxagueta naua 'aramaxasoxonaxaco. 6Nagui, 'am ñachoxonnot da 'ana'axaỹaxana da ñatamnaxac, cha'aye maiche aỹem 'aramaxashec, ỹoqo'oye ye na'a'q qataq ye pe 'am seỹaxaatacot da 'anqouaguec na 'aralamaxat Israel le'ecpi. Cha'aye saỹateeta da aỹem qataq na ỹalaqpi maye salegaqtaigui, namayepi huo'o da qarasouaxashet 'am hueto'ot. 7Qomi' ỹataqta qauem na so'otaqpi, qataq saishet da salaxasoxoguet na 'aramaxasoxonaxacpi maye qomi' 'anema co'ollaxa, 'auachegoxotchigui so 'aramaxashec Moisés. 8Ña 'auennata'a qome so 'ara'aqtac maye 'aỹa'anem co'ollaxa so 'aramaxashec Moisés, 'eeta': Da huo'otaq huo'o ca qarasouaxashichi nache qami' selagaxaaleguete qome ana 'alhua. 9Qalaxaye nataqa'en qonapec da huo'otaq qomi' 'am she'eguelaxasoxoguet, qataq ỹataqta so'ota'q naua 'aramaxasoxonaxaco, nache na'aictaxa da ñelagaxataq, qataq seviraqa'a ca qaỹoqta 'alhua, qalaxaye ishet da qomi' 'alaỹona't, qataq qomi' 'auauegalo ye 'alhua maye 'arca'aguishec da qomi' 'aỹa'analeguete.
10Cha'aye maiche qomi' 'aramaxashecpi, qataq qomi' 'aralamqa'ate maye qomi' 'anqateeguesopa co'ollaxa ye Egipto, qomi' 'auroleguete da qaica ca 'ena'am 'ara'añaxac. 11'Am Nataxala', 'am ñachoxonnot da ñaq 'auqoche'eguet de'era ñatamnaxac, qataq da nachoxonnaxac ne'ena 'aramaxashecpi, cha'aye huo'o da lyaxa da 'am ỹo'oxoren. Qataq 'am seỹaxanot da yaqto' ne'ena 'aramaxashec ỹañoxot ca 'eetapeguec, qataq ivira'a da ñim nta'a ishet da aỹem ilo'oguet qataq aỹem ỹanem ca lqouagaxanaqtaic.»
