Nehemías 12

₁Qaq 'ena na le'enaxatpi so ntaxaỹaxanaxanecpi qataq so leviitapi maye ñe'eguelaq co'ollaxa chegaqa'a ye Babilonia, maye nnaictague' so Zorobabel, som llalec so Salatiel, qataq so Josué:

So ntaxaỹaxanaxanecpi: Seraías, Jeremías, Esdras, ₂Amarías, Maluc, Jatús, ₃Secanías, Rejún, Meremot, ₄Iddo, Ginetón, Abáis, ₅Mijamín, Madías, Bilgá, ₆Semaías, Joyarib, Jedaías, ₇Salú, Amoc, Hilcías qataq so Jedaías. Qaq 'eso som lataxala'pi so ntaxaỹaxanaxanecpi, qataq so maiche lauo' le'ecpi somayepi, co'ollaq ñaq qanayeeta'aguet so Josué.

₈Qaq so leviitapi: Josué, Cadmiel, Serebías, Judá, qataq so Matanías, maye nachesoua som ilotrague' da no'onaxanaxac, da ivita da qaỹo'ot so ño'oxoonataxanaxac, ₉qaq so lqaỹa't soomaye Bacbuquías qataq so Uní, nachesoua soua qaỹatatalguete da qaỹacoolec da no'onataxanaxac.

₁₀Qaq so chegoxoguetpi so Josué, Joyacín, Eliasib, Joyadá, ₁₁Johanán, Jadúa.

₁₂Qaq co'ollaq ña qanayeeta'aguet so Joacín nache so ntaxaỹaxanaxanecpi maye lataxala'pi som ñalaqpi: So llalaqpi so Seraías, nache lataxala' so Meraías, qaq so llalaqpi so Jeremías, nache lataxala' so Jananías, ₁₃qaq so llalaqpi so Esdras, nache lataxala' so Mesulán, qaq so Amarías, nache lataxala' so Johanán, ₁₄qaq so Melicú, nache lataxala' so Jonatán, qaq so llalaqpi so Sebanías, nache lataxala' so José. ₁₅Qaq so llalaqpi so Jarín, nache lataxala' so Adná, qaq so llalaqpi so Merayot, nache lataxala' so Jelcay. ₁₆Qaq so llalaqpi so Iddo, nache lataxala' so Zacarias, qaq so llalaqpi so Ginetón, nache lataxala' so Mesulán, ₁₇qaq so llalaqpi so Abías, nache lataxala' so Zicri, qaq so llalaqpi so Miniamín, qataq so Moadías, nache lataxala' so Piltay, ₁₈qaq so llalaqpi so Bilgá, nache lataxala' so Samúa, qaq so llalaqpi so Semaías, nache lataxala' so Jonatán, ₁₉qaq so llalaqpi so Joyarib, nache lataxala' so Matenay, qaq so llalaqpi so Jedaías, nache lataxala' so Uzi, ₂₀qaq so llalaqpi so Salay, nache lataxala' so Calay, qaq so llalaqpi so Amoc, nache lataxala' so Éber, ₂₁qaq so llalaqpi so Hilcías, nache lataxala' so Jasabías, qaq so llalaqpi so Jedaías, nache lataxala' so Natanael.

₂₂Qaq co'ollaq ña qanayeeta'agueta soua Eliasib, Joyadá, Johanán, qataq so Jadúa, nache huo'o co'ollaxa aso le'enaxat lmalate som leviitapi maye lataxala'pi som ñalaqpi, nataqa'en som ntaxaỹaxanaxanecpi, nache ivitta'a da lo'onataxanaxac so Darío, maye nta'a ye Persias. ₂₃Qaq se'eso leviitapi maye lataxala'pi, som ñalaqpi nache qoỹettalec aso nere maye ỹa'axat da na'aqtaguec so nta'alpi, nache ivitta'a so na'a'q co'ollaq ña qanayeeta'aguet so Johanán, maye laual so Eliasib. ₂₄Nache so lataxala'pi so leviitapi: Jasabías, Serebías, Josué, Binuy, Cadmiel qataq so laỹepi maye datategueta soomaye naxa da qaỹo'ot da ño'oxonnataxanaxac da qoỹanot da 'achecỹaxac Ñim Nataxala', da yaqto' qaipacchigui da llec da lapaxañi so David. ₂₅Qaq soua lasom lo'ol maye ilotrague' so ñegueuopi: Matanías, Bacbuquías, Abdías, Mesulán, Talmón qataq so Acub. ₂₆Qaq 'enauac somayepi nache huetoigui so na'a'q co'ollaq ña qanayeeta'aguet so Joacín, som llalec so Josué, qataq laual so Josadac, co'ollaq huaigui da lo'onataxanaxac da nta'a so Nehemías, qataq so ntaxaỹaxanaxanec qataq napaxaguenataxanaq Esdras.

₂₇Qaq co'ollaq ivita so laloqo' da qoỹaneuo so lpaqtaxat ye Jerusalén, nache qaỹe'eguenauga so leviitapi maye netañalo soua lma'ate, nache qaỹauegueua'a ye Jerusalén da yaqto' qaỹo'ot so ño'oxonnataxanaxac qataq so no'onaxanaxac, qaỹauota'a aso nviquepi címbalo, arpa qataq aso lira. ₂₈Huaña nache laỹona't se'eso no'onaxanaxanecpi maye chegaqaugalo soua lma'ate maye nañalo ye saqaỹapeque ye Jerusalén, qataq so lauoreuapi nma'piolec ye Netofa, ₂₉qataq som nañapi so nỹecpiolec ye Gilgal, qataq so no'onaxa ye Geba, qataq ye Azmavet, cha'aye se'eso no'onaxanaxanecpi, somayepi ỹa'ayiñi co'ollaxa so lma'piolec, maye nañalo naqa'en naua loiguiye ye Jerusalén. ₃₀Qaq co'ollaq mashe ime da nqui'itaxatta so ntaxaỹaxanaxanecpi qataq so leviitapi, nache nqui'itaxat naqa'en 'enauac so nhuo' le'ecpi, qataq qaiqui'itaxatta nataqa'en so lasompi qataq so npaqtaxanaxat.

₃₁Huaña, qaq aỹem Nehemías, shenapega so nataxala'pi ye Judá, da huenotsheguemec so pa'asheguem so npaqtaxanaxat, qataq dos soua lpa'axaco ñaqa'en so 'onaxanaxaicpi. Qaq so 'oonolec lpa'axac somayepi nache inoicchiguiñi quetalec so npaqtaxanaxat maye taỹa'ague da aloiguishec maye pa'aỹa'ague so lasom maye qailonec lma' na lasoguiñi. ₃₂Qaq so Osaías nache ca'attaueegue so do'onaxaatacpi, nnaictague' so laỹepi so nataxala'pi ye Judá; ₃₃Azaráis, Mesulán, ₃₄Judá, Benjamin, Semaías, qataq so Jeremías. ₃₅Nataqa'en nnaictague' so ntaxaỹaxanaxanecpi maye ỹauota'a aso lasheerepi: Zacarías, Jonatán, Semaías, Matanías, Micaía, zacur qataq so Asaf, ₃₆nataqa'en soua lỹa't lauo' lashe' Semaías, Azarel, Milalay, Guilalay, May, Natanael, Judá, qataq so Jananí, qaq soomaye nache ỹacheta'ape aso nviquepi maye lalamaqte so David, maye nale Ñim Lo'onatac 'Enauacna. Qaq nache qaica'attaueegue so Esdras. ₃₇Qaq co'ollaq qaivita so lasom maye nalotta so naña aso 'etaxat laỹe', nache qanayiguisheguemgue so napiaxala'pi maye taỹasheguema, so huaqta'a't nỹecpi maye lalamaxat so David, nache qanlectelec so pa'asheguem so lma' lta'araic somaye, nache qaivittauga so qailonec lasom na 'etaxat, maye pa'aỹa'ague da nala' lliguisheguem. ₃₈Qaq so laỹepi 'onaxanaxaicpi tateuga so pa'aỹa'ague da ne'emaq, qaq aỹem nache satataueegue somayepi, ñenaictague' so laỹepi so nataxala'pi, nache senoigaqchiguiñi qolaqtelec se'eso npaqtaxanaxat, sachegosoqchiguiña aso nalloxolate maye qailonec da le'enaxat nqatelaxanaxaquipi, nache seviraqtauga so qalotegue npaqtaxanaxat. ₃₉Ime nache ñelegaqtelec so lasom le'enaxat Efraín, qataq so lasom le'enaxat Jesana, qataq so lasom maye qailonec da llegueuo na nỹaq, qataq aso nalloxolate maye qailonec da le'enaxat Jananel, qataq aso nalloxolate maye qailonec da le'enaxat Cien, nache seviraqta'a so lasom maye qailonec da llegueuo ana qaguetapi. Huaña nache souaqa'a so lasom so nhuataxanaxanecpi. ₄₀Huaña nache soua dos so 'onaxanaxaicpi hua'alo soua maiche lpa'axaco aso atamnaxaqui maye lalamaqte Ñim Lo'onatac 'Enauacna. Qaq nache sheetec nataqa'en aỹem qataq so laỹepi nataxala'pi maye ñenaictague'pi. ₄₁Qaq soua ntaxaỹaxanaxanaqa maye ỹashettrapigui aso nasheerepi: Eliaquín, Maseías, Miniamin, Micaía, Elioguenay, Zacarías, Jananías, ₄₂Maseías, Semaías, Eleazar, Uzi, Johanán, Malquías, Elam, qataq so Ezer. Qataq so no'onaxanaxanecpi maye lataxala' so Izrahías, somayepi ỹataqta do'onaxan. ₄₃Qaq se'eso na'a'q qalota so qoỹaneuo nachetaqtaxanaxat da qaỹavigaxat, nache somayepi ỹataqta lta'araic da ntonaxac, cha'aye Ñim Lo'onatac 'Enauacna ỹanem da ntonaxac, nataqa'en ntootapigui' so 'alpi qataq so ñaqpiolec, ỹataqta lta'araic se'eso tonaxac ye Jerusalén, ỹoqo'oye ivira'a da hua'aqtac so qaỹoqta.

₄₄Qaq se'eso na'a'q nache huo'o so qalca'aua'api shiỹaxauapi da ilo'ogue so naỹamaqtaxaqui so qoỹaneuo nachetaqtaxanaxatpi, maye la'auaxanec ala so nañiguishec qataq aso diezmo da yaqto' qaỹachaigui somaye, yaqto' qaipacchigui da lataxac som qoỹaneuo maye chegaqa'a so huaqta'a't nỹecpi da yaqto' qoỹanem so ntaxaỹaxanaxanecpi qataq so leviitapi. Qaq so netaña ye Judá ỹataqta machiguiñi souaxat de'era lo'onataxanaxac so ntaxaỹaxanaxanecpi qataq so leviitapi. ₄₅Qaq somayepi nataqa'en so 'onaxanaxaicpi qataq so lasom lo'opi, nacheso so ỹo'ottac naxa da no'onaxanaxac qataq da ño'oxonnataxanaxac, da qaỹo'oxoren Ñim Lo'onatac 'Enauacna qataq da 'eetec da huo'o na qaiqui'itaxatta, nache qaipacchigui da lapaxañi so David, qataq so llalec Salomón. ₄₆Cha'aye soua hua'au' vi'iye maye huetoiguilo da ña qanayeeta'aguet so David, qataq so Asaf, nache huo'o naxa so lataxala'pi so no'onaxanaxanecpi qataq so ilo'ogue da no'onaxanaxac, qataq da qoỹanot da 'achecỹaxac Ñim Lo'onatac 'Enauacna.

₄₇Qaq se'esoua na'axa'te maye huetoiguilo so Zorobabel qataq so Nehemías, nache 'enauaque soua na'axa'te da so Israel le'ecpi ỹanem naxa so 'onaxanaxaicpi, qataq lasom lo'opi qataq so leviitapi aso lachetaqtaxanaqte, qaq nache 'eetec naqa'en da huo'o ana ỹanem so chegoxoguetpi so Aarón.