Qoỹoiqueetac da qaỹalauat so Nehemías
1Qaq so Sambalat, Tobías, qataq so Guesén som Arabia le'ec, qataq so laỹepi maye qampa'aguenaxauapi, co'ollaq la'axaỹaxac da mashe ime da qaltaq ño'oxoosheguem so npaqtaxanaxat, qataq mashe qaỹapogui so lauacpi, na'aictaxa da ñaq saxanaxa da qoỹanauo qataq da qaỹe'eguelaxatchiguiña so lma'pi so lasompi. 2Nache so Sambalat, qataq so Guesén, aỹem namaxa so la'aqtac 'eeta': Sauoqtaique da 'am setaxaỹaqapegue' qalaxaye huo'o qome ca sachaqaña ca qartaxaỹaxac, huaña ye nhuoreuapi nma'piolec ye ca'amegue Onó. Qalaxaye da 'eetapeguec somayepi huotaique da aỹem ỹo'otec ca qauem. 3Nache huo'oi soua sama'q da yaqto' 'enapegalo soomaye da ỹataqta semela't, ỹoqo'oye saishet da ashec da setaxaỹapegueto souaxat na ỹo'onatacpi, cha'aye da ashec nache vi'iiguet 'enauac som so'ottacpi. 4Qaq ivi' cuatro da qaỹe'eguelaxalec da aỹem qaicoyeguen, qalaxaye nachesota se'eso 'oonolec ỹasataxac.
5Huaña nache so Sambalat, cinco da aỹem namaxa so lamaxashec nachetac aso lere nauattangui naqa'en, 6qaq so nanettalec asomaye, 'eeta':
«Na shiỹaxauapi ỹa'axattac, qataq ñi Guesén nataqa'en aỹem da'aqtaxaatapeguem, da qami' qataq na judiiopi qano'oxoñeeteguisheguem na npaqtaxanaxat, cha'aye qansheetaique da qauataiỹa'aguet ñi nta'a Artajerjes. Nataqa'en 'am qaỹa'axattac da 'anshetaique da 'am nta'a ye Judá. 7Qataq huo'o na 'aneuo na na'aqtaxanaxanecpi da yaqto' da'aqtaxanem na netaña ye Jerusalén da mashe 'am nta'a yemaye, ỹoqo'oye 'auanac qome da yaqto' setaxaỹaqpigui de'era, ten qom iviro'ot da ỹaỹaten ñi nta'a Artajerjes.»
8Nache aỹem samaxa so ỹa'aqtac 'eeta': «'Enauac ne'ena 'ara'aqtacpi, namaye saishet da 'eesa, cha'aye 'enauac namaye choche 'auachegoxotchiiya' da 'auo'ot.» 9Cha'aye namayepi ỹauotaique da choche qomi' icolanaqche't, da yaqto' saxanaxañi da qaro'onataxanaxac, qalaxaye aỹem seỹaxanot Ñim Lo'onatac 'Enauacna, da aỹem ỹa'añaqchet da yaqto' nache shecto'ot da ỹo'onataxanaxac. 10Ime, nache ñeqo'ona ye lma' so Semaías, som llalec so Delaía, qataq laual so Mehitabel, cha'aye somaye napola't co'ollaxa. Qaq so aỹem ilo'ot nache aỹem 'enapega, 'eeta': «Ñeqo'onaxa qome añi atamnaxaqui maye lalamaqte Ñim Lo'onatac 'Enauacna. Huaña qome nache ñapoxola't, cha'aye mashe ime da 'am qana'aqtaxaatapigui, da ne'ena pe nache 'am qananaỹa da 'am qaỹalauat.» 11Qalaxaye aỹem sheeta': «Cam ỹale maye 'eeta'am aỹem, saishet da datauec, qataq saishet da nqo'ona da nqañoxotoigui aca atamnaxaqui da yaqto' nca'alec. ¡Aỹem saishet da ñeqañoxottapiguiñi!»
12Cha'aye aỹem huo'o da ỹauattonaxanaxac da so Semaías, saishet da ỹoqta 'eesa da detaqtague' Ñim Lo'onatac 'Enauacna, cha'aye so Sambalat qataq so Tobías, isheete'n somaye da yaqto' ỹo'ot de'era. 13Cha'aye somaye qaisheeten da yaqto' aỹem qaicolanaqchet, qataq da huo'o ca isomaxac souaxat da salaxaguet. Huaña nache ishet da aỹem qaisheuen, qataq qauem qanqoỹen ca ña'aqtaguec. 14Qaq huaña nache ñatamnot Ñim Lo'onatac 'Enauacna, sheeta': 'Am Ñatamnaxala', 'antoueeta'ac qome da ỹo'o't soua Sambalat qataq so Tobías, nataqa'en saishet da 'aucoua'ai da ỹo'ot aso na'aqtaxanaxana Noadías, qataq so laỹepi maye nshetaique da aỹem icolanaqche't.
15Qaq se'eso npaqtaxanaxat ime, huetoigui so na'a'q veinticinco so ca'agoxoic le'enaxat Elul, qaq da ima'a't soua huaiguilo da qano'oxootapiguisheguem so npaqtaxanaxat ivi' cincuenta y dos na'axa'te 16Qaq co'ollaq la'axaỹaxac de'era so qomi' ipa'agueeta'ape, nache 'enauac so ỹotta'a't shiỹaxauapi maye qarhuoreuapi ỹataqta huo'o da lcolanaxa. Nache ỹataqta qaica ca na'amqaanaxac, cha'aye ila'a da de'era no'onataxanaxac ỹataqta qomi' itauaata'ape, qataq qomi' hueta'agueta Ñim Lo'onatac 'Enauacna.
17Qaq se'esoua na'axa'te, nache so nataxala'pi maye lma' ye Judá, somayepi ỹataqta queto'ot da na'aqtaxaatague' so Tobías, 18cha'aye somayepi qalota so ỹasateguet da itauan somaye, qataq somayepi ỹo'ot de'era, cha'aye so Tobías maiche laronaxanec so Secanías, som llalec so Araj, qataq souaxat so llalec Johanán, somaye huaroneguet aso llale so Mesulán, som llalec so Berequías. 19Nache da salectauo naxa, nache qaỹo'oxoreetac som Tobías, qataq qaỹa'aqtaxanem 'enauac na ỹa'attacpi. Ỹoqo'oye so Tobías, nache queto'ot da aỹem namaqtega aso lere da aỹem icolanaqchettac.
