1Qaq huaña, nache 'enauac se'eso maiche nhuo' le'ecpi da laỹona't, huaña so naponqa' maye nalotta so lasom, maye qailonec da le'enaxat 'etaxat, nache qaiỹaxanot so napaxaguenataxanaq Esdras da ndouec aso lmalate so lqataxacpi Ñim Nataxala', maye ỹanem co'ollaxa so Israel le'ecpi ỹachegoxotchigui so Moisés. 2Qaq nache so la'auaxanec na'a'q so ca'agoxoic siete, nache so ntaxaỹaxanaxanec Esdras, ndouga aso lmalate so nqataxacpi se'eso lapoota'a't ỹalleppi, 'alpi, qataq so ñaqpiolec qataq 'enauac so mashe ỹaỹaten da na'axaỹaxanaxac, 3ime, nache itaxaỹaxan asomaye, chegoqchiguiña so nte'eta nache ivitta'a so na'a'q laiñi, huaña so naponqa' maye datatta so lasom maye qailonec da le'enaxat 'etaxat. Qaq 'enauac se'eso nhuo' le'ecpi maye ỹauaatauo, ỹataqta na'axaỹaxaachiguiñi co'ollaq qaitaxaỹaxaatac so nqataxacpi.4Nache so napaxaguenataxanaq Esdras, nachaañi pelec aso qaỹo'ot napiaxalate. Nache na aloic pa'ata'ague so Matatías, Semá, Anías, Urías, Hilcías qataq so Maseías. Qaq na ne'emaq qalaq pa'ata'ague so Pedaías, Misael, Malquías, Jasún, Jasbadana, Zacarías qataq so Mesulán. 5Qaq so Esdras co'ollaq itaxaỹaxan aso lmalate so nqataxacpi, nache 'enauac so shiỹaxauapi da ỹauaachigui, cha'aye petalec aso lapiaxalate nache 'enauac somayepi da nachaañi. 6Huaña nache so Esdras, ỹanot da llo'oxonnataxanaxac Ñim Lo'onatac 'Enauacna maye Qaica ca Ỹaqalanapec, qaq 'enauac somayepi ỹachaxaashegue'm naua lhuaxaye, ime nache 'enapec: «¡Aja', nache 'eetec, aja' nache, 'eetec!» Ime, nache 'enauac somayepi da ỹa'alyiñi naua l-llecte, nache iviraxata'aguet na latap na 'alhua, nache ỹo'oxoren Ñim Nataxala'.
7Nache so leviitapi Josué, Bani, Serebías, Jamín, Acub, Sabetay, Hodías, Maseías, Kelaía, Azarías, Jozabad, Janán qataq so Pelaía, nache da'aqtaxaatrapeguem so shiỹaxauapi naua lleco so nqataxacpi, qaq so shiỹaxauapi ỹataqta qaica ca ldaxac da na'axaỹaxaatac. 8Nache soomaye ỹataqta ỹataqtegue naqa'en da itaxaỹaxaatrac aso lmalate so lqataxacpi Ñim Lo'onatac 'Enauacna, qataq ỹataqta ỹa'axatteguelo naua lleco, yaqto' ishet da qaỹaỹateeteguet da ntaxaỹaxanataguec asomaye.
9Qaq so shiỹaxauapi co'ollaq huaqchigui so na'aqtacpi maye huetalec aso lmalate so nqataxacpi, huaña nache nỹeetagui. Ỹoqo'oye so nta'a Nehemías, qataq so ntaxaỹaxanaxanec qataq napaxaguenataxanaq Esdras, qataq so leviitapi, maye ỹapaxagueetac so shiỹaxauapi, 'eetega somayepi, 'eeta': «Saishet qome da qanỹiñiitac, qataq da qauaquicoitac, cha'aye ne'ena na'a'q nachena na qoỹanot Ñim Nataxala' maye Qanatamnaxala'ai.»
10Qaq so Esdras nataqa'en, 'eeta': «Qoquiiuo qome nache qauqui'i, qollequi ca ỹoqta no'on nallec, qataq qanỹomigui ca ama lataxa, qataq qauachichi qome ca ỹapac qaica ca aloq, cha'aye ne'ena na'a'q qoỹanot Ñim Nataxala'. Qaq saishet qome da qauaquicoitac, cha'aye da l-lagaxayec Ñim Nataxala' nachera da qara'añaxac.»
11Qaq nataqa'en so leviitapi, icochaqtac 'enauac se'eso nhuo' le'ecpi, 'eeta': Saishet da qanỹeñeetac. Saishet da qauaquicoitac, cha'aye ne'ena na'a'q qoỹanot Ñim Nataxala'.
12Huaña nache 'enauac se'eso nhuo' le'ecpi, jec da ỹo'ot so lquia'axac, nỹomtac qataq ỹachet som qaica ca aloq, nache ỹataqta machiguiñi souaxat da qaỹaỹateeteguet se'eso napaxaguenataxanaxac.
Qaiuennate so na'a'q maye qanayenaigui so nauecañi nỹecpiolec
13Qaq so lỹa na'a'q nache so lataxala'pi so ñalaqpi, ntaxaỹaxanaxanecpi qataq so leviitapi, laỹona't da yaqto' dataiguet so napaxaguenataxanaq Esdras da yaqto' napaxaguenalo naua lleco so nqataxacpi. 14Nache qailalec da Ñim Nataxala' ỹamaxalec co'ollaxa so Moisés da ivittec da huaigui so ño'oxonnataxanaxac se'eso ca'agoxoic siete, nache so Israel le'ecpi iuen da naigui so nauecañi nỹecpiolec. 15Qaq ỹoqo'oye qaỹa'axatem 'enauac so netaña so huaqta'a't nỹecpi maye ỹotta'a't naua nañalo, qataq ye Jerusalén de'era namaxasoxonaxac, 'eeta': «Qaỹeesheguemec qome aye qasoxonaxapi nache qandoiuo aca lcoue ana olivo, arrayán, qataq aca chaic laue, huo'otaq aca camachaqaca lỹa qo'oipaq da yaqto' qaipacchigui da 'enapec naua nqataxaco.»
16Ỹoqo'oye 'enauac so shiỹaxauapi jec da ilaique aso qo'oipaq lcouepi, ime, nache ñi 'oonolec somayepi ỹo'ot so nauecañi nỹecolec. Nache huo'o so ỹanalec so pa'asheguem so lma', qataq huo'o so ỹanalec so nqasoxoc, qataq huo'o so ỹanalec se'eso naponqa', naña aso atamnaxaqui maye lalamaqte Ñim Lo'onatac 'Enauacna, qataq so lasom so naponqa' maye qailonec da le'enaxat 'etaxat, qataq so lasom so naponqa' le'enaxat Efraín. 17Nache 'enauac se'eso shiỹaxauapi maye ñe'eguelaq co'ollaxa chegaqa'a ye Babilonia, ỹo'ot so lma'piolec nauecañi ime, nache naigui somayepi. Cha'aye nache chegoqta'a co'ollaq ñaq huo'o so Josué, som llalec so Nún, da so Israel le'ecpi saishet da ỹo'ot de'era, ỹoqo'oye ỹo'ot so ỹataqta lta'araic lquia'axac. 18Qaq se'eso nquia'axac lta'araic nache imattrec soua siete na'axa'te, qaq ye 'oonolec na'a'q, nache huaigui da so Esdras itaxaỹaxa'n naxa soua lqataxaco Ñim Lo'onatac 'Enauacna. Qaq co'ollaq ivireuga so na'a'q ocho, nache qaỹo'ot so lta'araic naponaxac da yaqto' qaỹo'oxoren Ñim Lo'onatac 'Enauacna, nache qaipacchigui se'eso namaxasoxonaxac.
