So Israel le'ecpi ỹa'axat na lasouaxashetpi
1Qaq so na'a'q veinticuatro se'eso ca'agoxoic siete, nache so Israel le'ecpi qaltaq ỹo'ot so laponaxac da yaqto' nqouaqchet, qataq ỹaatrañi soua sansatte' alogo qataq imeelec na lqaic so alo, 2qataq mashe ime da ca'ai som chegaqauec shiỹaxauapi, nache ỹa'axat so lasouaxashetpi qataq so qauempi maye ỹo'ot co'ollaxa so hua'au lta'alpi. 3Nache ivittrec soua tres horas da somayepi nachattañi co'ollaq ñaq qaitaxaỹaxaatac aso lmalate so lqataxacpi Ñim Nataxala' maye Natamnaxala', qaq soua lỹa't tres horas nache huaiguilo somayepi da ỹa'axat so lasouaxashetpi, ime nache ỹo'oxoren Ñim Nataxala'. 4Qaq ime, nache soua leviita: Josué, Binuy, Cadmiel, Sebanías, Binui, Serebías, Bani qataq so Quenani, soomaye huenotshereguemec co'ollaxa aso napiaxalate, nache na'axanneque naua la'aqtaqa da natamnot Ñim Lo'onatac 'Enauacna. 5Qaq soua leviita Josué, Cadmiel, Binuy, Hasabnías, Serebías, Hodías, Sebanías qataq so Petajías, na'axanneque naua la'aqtaqa, nache 'eeta': «Qanachaachiñi, nache qavio'oxoyiñi Ñim Nataxala' maye Qanatamnaxala'ai, qavio'oxoyiñi da le'enaxat Ñim Nataxala', maye nache 'eetai' da qaica ca loga't, nache 'eetai' qome da qaỹo'oxoreetac da le'enaxat Ñimaye, dam le'enaxat maye qaica ca 'ena'am da llo'oxoyec, qataq da ño'oxonnataguec.»
6Qaq huaña, nache 'enauac somayepi natamen, 'eeta': 'Am, maye nache 'amta Nataxala'. 'Am, maye 'aro'onatac na piguem qataq nam ỹataqta pa'asheguem na piguem, qataq 'enauac ana huaqaañipi. Nataqa'en 'aro'onata ana 'alhua, qataq 'enauac na huetalecpi anamaye, qataq aso auaxai qataq 'enauac na huetangui asomaye. 'Am maye 'aỹa'anem da lca'alaxa na 'aro'onatacpi, qaq ỹoqo'oye ana huaqaañipi maye neto'ot na piguem 'am ỹo'oxoreetac.
7'Am Nataxala' maye Qanatamnaxala', maye nache 'am da 'arca'aguishec co'ollaxa so Abram, qataq nache 'am da 'anqateguesop co'ollaxa ye 'alhua Ur, maye lma' so caldeopi, nache 'anaralaxat da le'enaxat Abraham. 8Cha'aye 'auaỹateeta da ỹataqta 'am pi'iỹa'a, nache 'auo'ot so 'anaỹamaxataxac da 'anaỹamaxate' somaye, nache 'auachaxanapeguem ca chegoxoguetpi somaye da 'aỹa'anem ye na'alhua ye cananeopi, hitiitapi, amorreopi, fereseopi, jebuseopi, gergeseopi. Nache ỹataqta 'aupacchigui da 'ara'aqtac, cha'aye 'am nache 'eetai' da 'aupacchigui naxa na 'ara'aqtacpi. 9Qaq 'am 'auauaachigui co'ollaxa da nque'eenaxac, so hua'au qarta'alpi co'ollaq netaña ye Egipto, qataq 'aua'axaỹa da nachoxonnaxac somayepi co'ollaq huaña so loigue aso Auaxai Togaxarai. 10Nache 'anamaxa co'ollaxa so lta'araic nhuaxanaguec so nta'a ye Egipto, qataq so lamaxashecpi qataq 'enauac som shiỹaxauapi maye lma' yi'iye 'alhua, cha'aye 'auaỹaten da ỹataqta lta'araic nque'eenaxac naqa'en so Israel le'ecpi. Qaq ỹoqo'oye ỹataqta lta'araic da 'año'oxonnataguec, ivitta'a nagui. 11Qataq ỹauaachigui 'anqa'en somayepi co'ollaq 'auỹoracache so 'etaxat aso auaxai, da yaqto' deqaqattague so llegueta som 'aralamaxat nhuo' le'ecpi, qaq som Egipto le'ecpi maye icaatac somayepi qalaq imoolec 'anqa'en so 'etaxat, nache 'eeta'am ca coma' da iyiiñi ivittaña na ỹoqta pa'aguiñi aso auaxai. 12Qaq ye na'a'q nache qoquetaigui so lo'oc da 'auauecta'aguet somayepi, qaq ye pe qalaq qoquetaigui so norec le'eraxa, nache 'aucoỹatta'ague da taỹa'ague somayepi.
13Ime, qataq 'aunotec nache qonetasheguema na pa'asheguem añi qasoxonaxa Sinaí, qataq 'autaxaỹapegue' somayepi co'ollaq qoneto'ot na piguem, qataq 'aỹa'anem so ỹaỹamaqchigui lataxacpi, qataq so no'oitegue 'arqataxacpi, qataq naua ỹaỹamaqchiyiñi lataxaco qataq naua 'aramaxasoxonaxaco. 14Qataq 'auapaxaguenec da huo'o naq 'enec naqa'en ye na'a'q mataxaqui, qataq chegoqchigui so 'aramaxashec Moisés da 'aỹa'anem na 'aramaxasoxonaxacpi, qataq naua 'alapaxayiñi lataxaco, qataq na 'arqataxacpi. 15Qataq 'anamaxa so nallec maye chegoqo'ot na piguem da yaqto' vi'iguet na lqouaxa, qataq 'aỹa'anem so 'etaxat 'auachegoxotaigui aso coma', da yaqto' vi'iguet so laquip lamaic. Qataq 'aỹa'anem ye 'alhua, maye 'auachaxanapeguem co'ollaxa da 'aỹa'anem.
16Qalaxaye somayepi qataq so hua'au qarta'alpi, ỹataqta na'amqaanaxaicpi, qataq sa ỹalaxagueta naua 'aramaxasoxonaxaco. 17Nache saishet da 'am na'axaỹaxana, qataq saishet da ntoueeta'ac so qaica ca 'ena'am da llo'oxoyec, maye 'auo'otec somayepi. Nache ỹataqta 'am saỹalaxaguet, ivitta'a da ỹauo'o so ỹaneuo lataxala' da yaqto' ỹe'eguelaxata da nlataguec somayepi ye Egipto. Qalaxaye 'am saishet da 'aualat co'ollaxa somayepi, cha'aye 'am Atamnaxala', 'am choxonnataxanaxaic, qataq sa da'angui añi 'arquiyaqte, qataq qaỹoqchiguinguit da 'aralemataic, cha'aye ỹataqta lta'araic da 'arauotaxanaqtaic. 18Nataqa'en ivira'a da ỹo'ot so le'enaqtac huaca llalec chegaqaigui so lcat, nache somayepi 'eeta': ¡'Ena na qanatamnaxala'ai maye qami' nqateeguesopa ye Egipto! Qaq na'aictaxa da ỹataqta lta'araic de'era qauem maye ỹo'ot, 19qalaxaye saishet co'ollaxa da 'aualatalec ye toolec 'alhua, nda'a't da 'auauecta'aguet ye na'a'q qataq ye pe, souaxat da ỹataqta lta'araic da 'arauotaxanaqtaic. Ỹoqo'oye saishet da ca'ai 'anqa'en somayepi so lo'oc, maye ỹachaxaata'ague' da llec ye na'a'q, qataq ye pe nache icoỹattalec so norec le'eraxa, da yaqto' ỹauaategue so llec. 20Nataqa'en 'aỹa'anem so Saqcha'a 'Ara'añaxac maye ỹo'ot da laỹaanataxanaxac. Qataq saishet da 'avia'axaneguet da 'auquiỹa'axaateguec so nallec maye chegaqasheguem le'enaxat maná, qataq so 'etaxat da yaqto' ỹa'axaneguet da laquipegaxanaxac. 21Qataq ivittrec soua cuarenta vi'iye da 'auquia'axaatac, qataq saishet da huo'o ca iueetaique 'anqa'en co'ollaq huetalec so toolec 'alhua. Nataqa'en saishet da ltoi' soua alogo, qataq saishet da ivira'a da nalaua't naua lapia'ate.
22Nataqa'en 'aỹa'anem da lo'onataxanaxac so nta'alpi qataq ỹotta'a't shiỹaxauapi, qataq 'analoqñigui so 'alhuapi, qataq deuotaxanec 'anqa'en so na'alhuapi so Og qataq so Sijón, som nta'al co'ollaxa ye Jesbón qataq ye Basán. 23Qataq 'aỹa'anem da ỹataqta qalota so llalaqpi somayepi, 'eeta'am ana huaqaañipi maye neto'ot na piguem, qataq 'aunoxonaqcheteua'a ye 'alhua maye 'auachaxanapeguem co'ollaxa da 'aỹa'anem so hua'au lta'alpi. 24Qaq so llalaqpi somayepi huenoxoneua'a co'ollaxa se'eso 'alhua, ime nache nalec da yaqto' ỹauo'o lalamaxat. Qataq ỹauaachigui 'anqa'en co'ollaq 'oxonec so Canaán le'ecpi qataq so lta'alpi qataq so shiỹaxauapi maye netalec se'eso 'alhua, da yaqto' maiche ỹoiqueetac ca ỹataxaateuga somayepi. 25Qataq loxonec so huaqta'a't nỹecpi maye ỹotta'a't naua nañalo maye huo'o so lpaqtaxat, qataq so ỹoqta no'on 'alhuapi, qataq so nỹecpi maye nlaqchigui so nogoxoshetpi, qataq aso nshere 'etaxat laỹe', qataq nañiguishe uva lma'pi qataq so oliivosat, qataq aso qalota qo'oipaqpi maye huo'o ana ala. Qataq deque'etacpi nache ivitta'a da comaraxaicpi, qataq chaxaraicpi, souaxat da ỹacootalec so chegaqaigui da 'arqouagaxanaqtaic.
26Qalaxaye somayepi saishet da 'am ỹalaxaguet, nda'a't da 'am dataỹa'aguet, qataq sa ỹaconeguet na 'arqataxacpi, qataq ỹalauat so 'ara'aqtaxanaxanecpi maye 'eetega naxa somayepi da 'am ỹe'egueloqot, qalaxaye somayepi ỹataqta 'am inogoqchet. 27Ỹoqo'oye 'aỹa'aneguet da la'añaxac so npa'aguenaxauapi, da yaqto' ỹo'ot da nque'eenaxac somayepi. Qaq co'ollaq huaigui da nque'eenaxac, nache 'am iỹaxanot da yaqto' 'atauan, qaq se'eso lỹaxanaxac iviro'ot na piguem, nache 'aua'axaỹa co'ollaxa, qaq souaxat da lta'araic 'archoxonnataxanaxa nache 'anamaxa so lca'alaxaquipi da yaqto' nca'alaxateeguesop da la'añaxac so npa'aguenaxauapi.
28Qalaxaye naxa da huo'o da l-lagaxayec, nache qaltaq ỹe'eguelaxalec da ỹo'ot na qauem maye sa 'auaỹamaxaren, huaña qataq 'aỹa'aneguet so npa'aguenaxauapi da yaqto' loxonec somayepi. Qalaxaye da qaltaq 'am iỹaxanot naxa, nache 'am maye qoneto'ot na piguem, 'auchoxoren somayepi nache 'aua'axaỹa, nache qaltaq 'anca'alaxatec. 29Qataq 'auamaxalec da ỹalaxaleguete naua 'arqataxaco, qalaxaye somayepi ỹaguec da na'amqaanaxac nache 'am sa ỹalaxaguet, qataq sa ỹalaxalec na 'aramaxasoxonaxacpi, nache dataỹa'aguet na lataxacpi maye 'alapaxañi, maye ỹo'ot da lca'alaxa cam ỹalaxalec namayepi, qalaxaye somayepi ỹataqta saỹalaq, nache 'am saiqocha'a, qataq ỹoqta qaramchiguilo naua lqaigo, nache 'am sa na'axaỹaxana. 30Qataq qaỹoqteguelo soua vi'iye da 'anhualaxaueetague' somayepi, qataq 'auachegoxotchigui da lta'araic 'ara'añaxac, qataq so 'ara'aqtaxanaxanecpi da 'anhuoxoqtega somayepi qalaxaye ỹoqta 'am sana'axaỹaxana, ỹoqo'oye qaltaq 'aỹa'aneguet da lhuaqỹaxac so npa'aguenaxauapi, maye lma' yi'iye 'alhua. 31Qalaxaye souaxat da lta'araic 'arauotaxanaqtaic, nache saishet da 'aulaxachigui somayepi, qataq saishet da 'aualat, cha'aye 'am maye Atamnaxala', ỹataqta 'am huotaxanaqtaqaic qataq 'am choxonnataxanaxaic.
32Qaq ỹoqo'oye 'am Qanatamnaxala', Atamnaxala' maye 'amaqtaqaic, 'añaxaic, qataq ncolanaxat, maye 'aupacchigui da 'anaỹamataxac qataq da nache 'eetai' da 'arauotaxanaqtaic ne'ena 'aralamaxat nhuo' le'ecpi, saishet qome da saq 'amaqtaq 'anqa'en da 'aulotagui da nque'eenaxac so qarta'alpi, qarataxala'pi, ntaxaỹaxanaxanecpi, na'aqtaxanaxanecpi, qataq so hua'au qarta'alpi qataq 'enauac na nalamaxat nhuo' le'ecpi, chegoqchiguiña se'eso na'a'q da lo'onataxanaxac so nta'alpi ye Asiria, nache ivitta'a nagui. 33Qalaxaye saishet da saỹaỹamaxañi de'era qomi' 'auo'oteque qanhuaxanaguec, cha'aye no'oitegue da lataxac da huo'o ca 'auo'ot, qomi' qalaxaye 'itchiguiñi da qomi' 'etaxaloxoiqa. 34So qarta'alpi qataq so qarataxala'pi, nataqa'en so ntaxaỹaxanaxanecpi qataq so hua'au qarta'alpi, saishet co'ollaxa da ỹalaxagueta naua 'arqataxaco, qataq saishet da na'axaỹaxanalo naua 'aramaxasoxonaxaco, qataq nam 'avitaqteetega saỹaỹamaxañi. 35Qalaxaye co'ollaq ñaq hueto'ot da lo'onataxanaxac da nta'a qataq hueto'ot da nsallaxa, qataq netalec so 'onaxaic 'alhua maye 'aỹa'anem co'ollaxa, qalaxaye ñaqaiyeta saishet da 'am ỹo'oxoren, qataq saishet da ỹaxaarec naua qauema no'onataxaco.
36Qaq ỹoqo'oye nagui, choche qomi' nlataqa ne'ena 'alhua maye 'aỹa'anem co'ollaxa so hua'au qarta'alpi, da yaqto' machiguiñi da chectac so ala so lañiguishec, qataq huetalec 'enauac da naỹamaxa. 37Qaq na ala na nañiguishec maye sa qoue qalaq taỹot nagui na nta'alpi maye qomi' ỹamaqta'ape, souaxat na qarasouaxashetpi. Cha'aye namayepi 'añaxaicpi, nache maiche ỹoiqueetac ca ỹataxaateugalo qomi' qataq na qana'atecpi. Qaq ỹoqo'oye ỹataqta lta'araic da qaraquicoxo.
38Qaq souaxat de'era souaqaigui, nache qomi' so'otaq de'era qanaỹamaxataxac maye ỹataqta qoỹeyiñi, nache nanereñi na qarataxala'pi, leviitapi, qataq na ntaxaỹaxanaxanecpi.
