2Qonapega qome na Israel le'ecpi da ndoreuo caua doce nashelte, qalaxaye ñi 'oonolec na lataxala'pi ndouo aca 'oonole nashelte. Nache 'erelec qome añi 'oonole na le'enaxatpi namayepi. 3Qaq aca lashelte so Leví nache 'erelec so le'enaxat so Aarón, cha'aye 'enauac na nataxala'pi huo'o ana maiche lalamaqte lashelte. 4Nache acamayepi 'anaña ye sa qaỹapeque añi arca maye laỹe' da ñaỹamaxataxac, maye netaigui ñi npe'l maye huaña naxa da qami' ñauaneto. 5Qaq aca nashelte maye nañaxatec qome, nachaca aca lashelte ca lleca'aguishec, huaña qome nache vi'iiguet da qami' quetegueleguete ne'ena shiỹaxauapi.
6Nache so Moisés da'aqtaxanem co'ollaxa de'era so Israel le'ecpi, nache ñi 'oonolec so nataxala'pi, ỹaneuo añi 'oonole lashelte. Nache nataqa'en ỹalectauo aso lashelte so Aarón. 7Nache so Moisés ỹachaña ye lanataqa' Ñim Nataxala' asomayepi, so npe'l maye huaña naxa da qanauane' Ñimaye. 8Qaq so lỹa na'a'q, nache so Moisés taua'a so npe'l maye netaña aso arca maye laỹe' da aỹamaxataxac. Nache co'ollaq ỹamata'a aso nashelte maye lalamaqte na chegoxoguetpi so Leví, asom huetalec da le'enaxat so Aarón, qaq asomaye ñaxatec qataq huo'o aso lauoxo, nache huo'o aso ala almendra maye mashe ỹeta. 9Nache so Moisés nqatec 'enauac asa'aso nasheltepi maye netaña ye lanataqa' Ñim Nataxala', nache irouga so Israel le'ecpi da yaqto' ỹataqta ỹauaachigui da 'eetec asomayepi, nache ñi 'oonolec se'eso nataxala'pi ỹacona aso maiche lalamaqte lashelte.
10Nache Ñim Nataxala' 'enapega so Moisés, 'eeta': Aye lashelte so Aarón 'avi'eguelaxateua'a qome ye sa qaỹapeque ye netaña añi arca maye laỹe' da ñaỹamaxataxac. Nache 'auachaña da yaqto' la'anaxat ne'ena ñalaqpi maye saỹalaq. Yaqto' nache tachiguiña da aỹem quetapeguelec, qataq qaica ca ileu qome.
11Nache so Moisés ỹo'ot 'enauac dam ỹamaxalec Ñim Nataxala'. 12Nache so Israel le'ecpi 'enapega so Moisés, 'eeta':
¡Qomi' mashe seqataq, ỹataqta seqataq! Qataq seleuaq qome! 13Cha'aye camachaqca shiỹaxaua da taua'a ye lanataqa' Ñim Nataxala', nache ileu, ỹoqo'oye 'enauac da shenaqta seleuaq qome.
