Da lo'onataxanaxac so ntaxaỹaxanaxanecpi qataq so leviitapi
1Ñim Nataxala' 'enapega so Aarón, 'eeta':
«'Am qataq na 'aỹa'alaqpi, nataqa'en na 'arhuo' le'ecpi maye chegoxoguet so Leví, qami' qapa'aiỹa'aguet da huo'o ca nasouaxashet ñi npe'l, qataq 'am, nataqa'en naua 'aỹa'alqa, maiche qapa'aỹeeguet da huo'o ca lasouaxashet na ntaxaỹaxanaxanecpi. 2Nataqa'en 'aỹaxana qome nam laỹe 'arhuo' le'ecpi maye chegoxoguet so Leví, maye nataqa'en chegoxoguet so 'arta'a, da yaqto' 'am itauan qataq naua 'aỹa'alqa da qauo'ocheetac na no'onatacpi ñi npe'l maye netaña añi arca maye laỹe' da aỹamaxataxac. 3Nache namayepi ỹo'ot qome 'enauac na 'auamaxalecpi qataq da ilotague' ñi npe'l, qalaxaye saishet da ỹaconeua'a na nogoxoshetpi maye sa qaishetapec, qataq añi nca'atoxonaxalate, yaqto' saishet da ileu namayepi qataq qami'. 4Nache namayepi 'am itauan qome da 'auo'ottac na no'onataxanaxacpi da qonetaña ñi npe'l, qataq na laỹe no'onataxanaxacpi. Qalaxaye saishet da qami' taua'alo ca chegaqauec shiỹaxaua. 5Cha'aye ndotrec qami' da qauloitague' qome 'enauac na sa qaishetapec qataq añi nca'atoxonaxalate. Yaqto' saishet da talec ca nhuaxanaguec na Israel le'ecpi. 6Cha'aye Aỹem sachegoxottoigui co'ollaxa na laỹepi Israel le'ecpi, na 'arqaỹañecpi leviitapi da seỹotauga da yaqto' qana'agaxache. Cha'aye namayepi mashe qaiỹotauga da yaqto' do'onataxaatac da hueta'a ñi npe'l maye naỹonqa'. 7Qaq 'am qataq na 'aỹa'alaqpi maiche qoviỹapegue' qome da qaro'onataxanaxaqui da qami' ntaxaỹaxanaxanaqa, qataq na no'onatacpi añi nca'atoxonaxalate, qataq na pa'auo ñi napoxonaxat. Nache de'era no'onataxanaxac qauo'oche, cha'aye qami' sanaguilo da qami' ntaxaỹaxanaxanaqa. Qaq da huo'o ca ỹacoolec de'era no'onataxanaxac da saishet da qoỹanagui co'ollaxa da ntaxaỹaxanaxanec, nache camaye qaỹalauat.»
Ana ntaunaqte na ntaxaỹaxanaxanecpi qataq na leviitapi
8Ñim Nataxala' 'enapega so Aarón, 'eeta':
«Aỹem, 'am sepa'axana'aguet da 'aulotague' 'enauac na nachetaqtaxanaxatpi maye Aỹem qoỹanot. Nache 'enauac na qaiỹotauga nachetaqtaxanaxatpi maye Aỹem ỹanot na Israel le'ecpi, namaye 'am sanem qataq na 'aỹa'alaqpi da yaqto' qaralamaxache, qaq de'era lataxac nache 'eetai' qome. 9Qaq na nachetaqtaxanaxatpi maye qaỹavigaxat, qaiỹotauga qome da 'am taỹot 'enauac na chegaqaigui na ala na nañiguishec, qataq na sa imauaq da qaỹavigaxat, qataq na nachetaqtaxanaxat da qaỹapalaxat ca nasouaxashet maye Aỹem ỹanot qome na Israel le'ecpi, qataq 'enauac na nachetaqtaxanaxatpi maye sa qaishetapec, namayepi 'aralamaxatpi qome qataq na 'aỹa'alaqpi. 10Nache 'am qataq 'enauac na ỹalleppi, ishet qome da qollequi anamaye, qalaxaye huaña qanqa'eñi ye nqasoxoc ñi npe'l, cha'aye ỹataqta sa qaishetapec.
11Nataqa'en 'am, qataq na 'aỹa'alaqpi ỹalleppi qataq na 'alpi maye ñaq 'am neto'otpi, da qami' sanema qome 'enauac na nachetaqtaxanaxat maye ỹaasheguem da Aỹem ỹanot na Israel le'ecpi, qaq de'era lataxac nache 'eetai' qome. Qataq 'enauac na shiỹaxauapi maye hueta'a ca 'arma' da qui'itta da lataxac, nache ishet da chec anamaye. 12Qataq ana la'auaxana 'ala na nañiguishec ye vi'i, maye Aỹem ndoua'a na Israel le'ecpi, nache 'am sanem nataqa'en na ỹataqta no'on aceite, lataxa, qataq na trigo. 13Qataq 'enauac na la'auaxanec ala na nañiguishec maye Aỹem ndoua'a namayepi, nache 'am sanem da 'aralamaxat, qalaxaye 'enauac ca shiỹaxauapi maye hueta'a ca 'arma' da qui'itta da lataxac, nache ishet da chec anamaye. 14Qaq 'enauac na nachetaqtaxanaxat maye Aỹem ỹanem na Israel le'ecpi, nache 'am sanem da 'aralamaxat.
15Qataq 'enauac na la'auaxanec llalec na Israel le'ecpi, qataq na la'auaxanec llalec na na'atetpi maye Aỹem ỹanot, nache 'am sanem qome da 'aralamaxat. Qalaxaye ca la'auaxanec llalec na shiỹaxauapi, qataq ca la'auaxanec llalec na shiguiỹacpi maye saishet da qanallec, 'auỹaxanaique qome aca lasheue da yaqto' nmeneguet 'anqa'en. 16Qalaxaye da mashe ivi' ye 'oonolec ca'agoxoic da ñiguiñi ca qoỹaneuo, nache qaisheeten aca lasheue camaye maye ivi' aca cinco lcat plata, maye ivi' doce gramos añi 'oonole, maye nachañi añi lasheue da qaisheeten ñi npe'l. 17Qalaxaye ca la'auaxanec llalec ana huaca, qagueta, qataq na quetaq, saishet da huo'o ca lasheue da nmeneguet 'anqa'en. Cha'aye namaye qaiỹotauga da ỹalamaxat, nache qaỹalauat qome, qaq na ltago'q, nache qaiquetegaxaalec añi nca'atoxonaxalate, qaq na lcheta qaỹavigaxat da nachetaqtaxanaxat, yaqto' da ama laitaỹaxac ỹamaateguet Ñim Nataxala'. 18Qalaxaye ca lapat 'am taỹot qome ca ltogue lapat maye qoỹaasheguem da nachetaqtaxanaxat da Aỹem qoỹanot, qataq ca ltele'eta aloiguishec. 19Nache 'enauac qome na iỹotauga lachetaqtaxanaxat da Aỹem ỹanot na Israel le'ecpi, nache 'am taỹot qome, qataq naua 'aỹa'alqa ỹale't, qataq naua 'alol maye ñaq 'am neto'oto. Qaq 'era da lataxac maye nache 'eetai' qome da qaỹo'ottac. Nache de'era ñaỹamaxataxac da 'am ñaỹamaxate' maye 'eeta'am da qaỹalecnaxana ca toue, damaye nache 'eetai' qome da 'auo'ottac 'am qataq cam 'am chegoxoguetpi.»
20Ñim Nataxala' qaltaq 'enapega so Aarón, 'eeta':
«Qaq na na'alhua namayepi, qaica qome ca 'am taỹot da 'aralamaxat, qataq saishet da 'anhuanaua'a namayepi. Cha'aye nachaỹem da Aỹem 'aralamaxat, qataq 'am talec qome na seqataxaatapigui' qom 'aualectaigui na Israel le'ecpi. 21Qaq na leviitapi, sanem qome da lalamaqte ana diezmo maye Aỹem ỹanem na Israel le'ecpi, da nsheetenaqte ñaqa'en da lo'onataxanaxac souaxat da huetague' na no'onatacpi maye huaña ñi npe'l maye naỹonqa'. 22Qaq na laỹe Israel le'ecpi qalaq saishet qome da taua'a ñi npe'l maye naỹonqa', cha'aye lasouaxashet da taua'a, qaq ishet da maiche nasouaxaala't da ileu. 23Qaq nachaqnata na leviitapi da huetague' qome na no'onatacpi ñi npe'l maye naỹonqa', qaq da huo'o ca ỹasouaxat, nache maiche nasouaxaala't. Qaq 'era da lataxac maye nache 'eetai' qome da ỹo'ottac ca 'am chegoxoguetpi. Qaq na leviitapi saishet qome da huo'o ca lalamaxat da ỹalectaigui na Israel le'ecpi. 24Cha'aye na leviitapi, sanem da lalamaqte ana diezmo maye chegaqaigui nam ala na nañiguishecpi maye Aỹem ỹanot na Israel le'ecpi. Ỹoqo'oye shenapega co'ollaxa namayepi da saishet da huo'o ca sanem da lalamaxat ne'ena 'alhua na Israel.» 25Ñim Nataxala' qaltaq 'enapega so Moisés, 'eeta': 26«'Aua'aqtaxanem qome na leviitapi, da ivita da ỹaconeguet aca diezmo, maye ỹaneuo na Israel le'ecpi, nache iỹotauga ca 'oonolec maye chegaqaigui ca diez da yaqto' Aỹem ỹanot. 27Qaq que'eca iỹotauga nache 'eeta'am qome da 'eetec naxa na Israel le'ecpi da ỹaneuo natai' iỹotauga trigo qataq na lataxa. 28Qaq de'era 'eetec na Israel le'ecpi, da ỹanem na leviitapi ana ndiezmo, nache 'eetec nataqa'en na leviitapi da iỹotauga nam Aỹem ỹanot, nache ỹanem so ntaxaỹaxanaxanec Aarón. 29Nache 'enauac ca nachetaqtaxanaxat maye ỹaconeguet namayepi, iỹotauga qome ca 'oonolec laỹe da Aỹem ỹanem, qalaxaye ỹaconeua'a ca ỹataqta no'on. 30Qaq nataqa'en qonapega qome, qoneta': ‹Da ime da iỹotauga ca ỹataqta no'on da Aỹem ỹanot, nache ca no'onañi trigo qataq ca lataxa qalaq 'eeta'am naqa'en da maiche lalamaxat. 31Qataq ishet da chec camayepi maicheye ca netaña. Cha'aye nachera da nsheetenaguec souaxat da ỹo'ottac na no'onatacpi ñi npe'l maye naỹonqa'. 32Qaq da ime da iỹotauga ca ỹataqta no'on da Aỹem ỹanot, nache ishet da chec ca no'onañi, qalaxaye saishet da huo'o ca lasouaxashet, cha'aye da 'eetec de'era, nache saishet da na'aqchet na lachetaqtaxanaxatpi na Israel le'ecpi, qataq saishet da huo'o ca ileu.›»
