Nalochiguiñi qanqa'en ca npe'lpi maye nanataqa'pi
1Ñim Nataxala' 'enapega so Moisés qataq so Aarón, 'eeta':
2«Na Israel le'ecpi netañalo qome naua loiguiye ca netaña que'eca npe'l maye huaña naxa da qanauane' Ñim Nataxala', qataq ñi 'oonolec ca lpe'l namayepi, nache netasheguem naqa'en aca la'anaqte na maiche lauo' le'ecpi maye chegoxoguet so lta'alpi.
3Nache na chegoxoguet so Judá, ỹanaña qome ca lpe'lpi da pa'aigue da nala' lliguisheguem, nache ỹaatasheguem aca la'anaqte na maiche lalamaxat lauo' le'ecpi. Qataq nalochiguiñi naqa'en ca nalleppi maye lataxala' so Naasón, som llalec so Aminadab. 4Qaq que'eca nalleppi ivi' setenta y cuatro mil seiscientos ye lcata ca ỹalleppi maye ñiyiguishecpi co'ollaq qaỹo'ottac so naneraguec namayepi. 5Qaq nache huaqta'ai' qome ca nalleppi, na maiche nhuo' le'ecpi maye chegoxoguet so Isacar, qaq camayepi nache lataxala' so Natanael, som llalec so Suar, 6qaq que'eca alleppi, ivi' cincuenta y cuatro mil cuatrocientos, ỹalleppi maye ñiyiguishecpi co'ollaq qaỹo'ottac so naneraguec namayepi. 7Nataqa'en huaqta'ai' qome ca nalleppi, nam maiche nalamaxat nhuo' le'ecpi maye chegoxoguet so Zabulón, cam lataxala' so Eliab, som llalec so Helón, 8nache que'eca alleppi ivi' cincuenta y siete mil cuatrocientos, cam ỹalleppi maye ñiyiguishecpi co'ollaq qaỹo'ottac so naneraguec namayepi. 9Nache 'enauac que'eca ñiyiguishecpi ỹalleppi, maye maiche nalamaxat nhuo' le'ecpi maye chegoxoguet so Judá, ivi' ciento ochenta y seis mil cuatrocientos, qaq da ivita da jec, nache camayepi hua'auta'ague da taỹa'ague na Israel le'ecpi.
10Qaq aca la'anaqte na maiche nalamaxat nhuo' le'ecpi, maye chegoxoguet so Rubén, nache netaña qome da pa'aigue da taguiñi. Qaq camayepi, nache lataxala' so Elisur, som llalec so Sedeur. 11Qaq que'eca alleppi ivi' cuarenta y seis mil quinientos cam ỹalleppi maye ñiyiguishecpi co'ollaq qaỹo'ottac so naneraguec namayepi. 12Qataq ca lpe'lpi camayepi, nache huaqta'ai' qome ca nalleppi na maiche nalamaxat nhuo' le'ecpi, maye chegoxoguet so Simeón, qaq camayepi nache lataxala' so Selumiel, som llalec so Surisaday, 13qaq camayepi ivi' cincuenta y nueve mil trescientos, cam ỹalleppi maye ñiyiguishecpi co'ollaq qaỹo'ottac so naneraguec namayepi. 14Nataqa'en ỹa'ayiñi qome ca lpe'lpi, na maiche nalamaxat nhuo' le'ecpi maye chegoxoguet so Gad, qaq camayepi nache lataxala' so Elisaf, som llalec so Reuel, 15qaq camayepi ivi' cuarenta y cinco mil seiscientos cincuenta, cam ỹalleppi maye ñiyiguishecpi co'ollaq qaỹo'ottac so naneraguec namayepi. 16Nache da ima'a't ca netaña que'eca npe'lpi maye lalamaxat na maiche nalamaxat nhuo' le'ecpi, maye chegoxoguet so Rubén, nache ivi' ciento cincuenta y un mil cuatrocientos cincuenta ỹalleppi, qaq camayepi nache ca'attaueegue qome ca hua'auta alleppi.
17Ime, nache jec na leviitapi, nache ỹache qome ca npe'l maye huaña naxa da qanauane' Ñim Nataxala'. Ipacchigui da 'eetec ca netaña co'ollaxa da netangui ca laiñi ca laỹe npe'lpi. Nataqa'en ỹachetac aca la'anaqte ca maiche lauo' le'ecpi.
18Qaq aca la'anaqte ca lpe'lpi na maiche nalamaxat nhuo' le'ecpi, maye chegoxoguet so Efraín, nache pa'aigue qome da nala' lliguiñi. Qaq camayepi nache lataxala' so Elisama, som llalec so Amiud, 19nache camayepi ivi' cuarenta mil quinientos ca ỹalleppi maye ñiyiguishecpi co'ollaq qaỹo'ottac so naneraguec namayepi. 20Qaq camayepi, nache huaqta'ai' qome na maiche nalamaxat nhuo' le'ecpi, maye chegoxoguet so Manasés, qaq camayepi nache lataxala' so Gamaliel, som llalec so Pedasur, 21qaq camayepi ivi' treinta y dos mil doscientos cam ỹalleppi maye ñiyiguishecpi co'ollaq qaỹo'ottac so naneraguec namayepi. 22Qaq camayepi, nache huaqta'ai' na maiche nalamaxat nhuo' le'ecpi maye chegoxoguet so Benjamín, qaq camayepi, nache lataxala' so Abidán, som llalec so Guidoní, 23nache camayepi ivi' treinta y cinco mil cuatrocientos cam ỹalleppi maye ñiyiguishecpi co'ollaq qaỹo'ottac so naneraguec namayepi. 24Nache da ima'a't ca netaña que'eca npe'lpi maye maiche nalamaxat nhuo' le'ecpi maye chegoxoguet so Efraín, ivi' ciento ocho mil cien ca ỹalleppi, qaq camayepi qome nache ca'attaueeguelo caua dos lma'ate ca alleppi maye hua'auta.
25Qaq aca la'anaqte ca lpe'lpi na maiche nalamaxat nhuo' le'ecpi maye chegoxoguet so Dan, nache pa'aigue qome da sheu', qaq camayepi nache lataxala' so Ajiezer, som llalec so Amisaday, 26qaq camayepi ivi' sesenta y dos mil setecientos, cam ỹalleppi maye ñiyiguishecpi co'ollaq qaỹo'ottac so naneraguec namayepi. 27Qaq camayepi qome, nache huaqta'ai' na maiche nalamaxat nhuo' le'ecpi maye chegoxoguet so Aser, qaq camayepi nache lataxala' so Pagiel, som llalec so Ocrán, 28qaq camayepi ivi' cuarenta y un mil quinientos cam ỹalleppi maye ñiyiguishecpi co'ollaq qaỹo'ottac so naneraguec namayepi. 29Qaq camayepi, nache huaqta'ai' qome na maiche nalamaxat nhuo' le'ecpi maye chegoxoguet so Neftalí, qaq camayepi nache lataxala' so Ajirá, som llalec so Enán, 30qaq camayepi ivi' cincuenta y tres mil cuatrocientos, cam ỹalleppi maye ñiyiguishecpi co'ollaq qaỹo'ottac so naneraguec namayepi. 31Nache da ima'a't ca netaña que'eca lpe'lpi, na maiche nalamaxat nhuo' le'ecpi maye chegoxoguet so Dan, nache ivi' ciento cincuenta y siete mil seiscientos ỹalleppi, qaq camayepi nache pa'atec da jec, qataq ca'attaueegue aca maiche na'anaqte namayepi.»
32Qaq 'eso so Israel le'ecpi, maye ñiyiguishecpi co'ollaxa, qataq ỹataqtac so maiche chegoxoguet lta'alpi. Maye netaña se'eso npe'lpi, ivi' seiscientos tres mil quinientos cincuenta ỹalleppi. 33Qaq so leviitapi, saishet da qoỹereua'a aso le'enaxat lmalate so laỹepi Israel le'ecpi, nache qaipacchigui da lamaxasoxonaxac co'ollaxa Ñim Nataxala', co'ollaq 'enapega so Moisés.
34Nache so Israel le'ecpi, ipacchigui da ỹo'ot 'enauac na lamaxasoxonaxacpi Ñim Nataxala' maye ỹamaxalec co'ollaxa so Moisés. Nache so lpe'lpi somayepi ỹataqtac ana maiche na'anaqte, qataq nache 'eetec da jec, nache ỹataqtac ñi 'oonolec na maiche lauo' le'ecpi maye chegoxoguet so lta'alpi.
