So 'etaxat maye chegaqaigui aso coma'
1Qaq so la'auaxanec ca'agoxoic se'eso vi'i, nache so Israel le'ecpi ivita ye toolec 'alhua ye Zin, nache naña co'ollaxa ye Cades. Qaq nache huaña yemaye da ileu aso María, qaq nache qailareña yemaye.
2Qaq souaxat da qaica ca 'etaxat, nache laỹona't co'ollaxa so shiỹaxauapi da yaqto' 'enapega so Moisés qataq so Aarón, 3nache 'eetega so Moisés, 'eeta':
¡'Onaxaictoxo' co'ollaxa da nataqa'en seleuaq, da shenaqta'am so qarqaỹañecpi maye ỹalauat Ñim Nataxala'! 4¿Ta'ainco' ye qanaviquiuga na toolec 'alhua ne'ena nhuo' le'ecpi maye lalamaxat Ñim Nataxala'? ¿Peta'a qansheetaique da seleuaqaña namaye qataq na qana'atetpi? 5¿Ta'ainco' ye qomi' qanqacheueeguesopa co'ollaxa ye Egipto, nache qomi' qanaviquiugalo ne'ena 'alhua maye ỹataqta qauem? Ne'ena 'alhua, namaye saishet da huo'o ca qoỹaalec, qaca aca higo, uva, granada, qataq qaica ca 'etaxat da yaqto' ñiỹomaxagui.
6Nache so Moisés qataq so Aarón quera'ai co'ollaxa se'eso shiỹaxauapi, nache tareua'a so ñegueuo so npe'l, huaña nache ỹa'alyiñi na l-llecte, iviraxatra'agueta naua lata'pi na 'alhua. Qaq huaña nache da llo'oxoyec Ñim Nataxala' nachaxanalo soomaye. 7Nache Ñim Nataxala' 'enapega so Moisés, 'eeta':
8'Auacona qome aca nashelte, nache 'am qataq ñi 'arqaỹa Aarón qalaỹoñiỹa't qome na shiỹaxauapi. Nache ỹauaachigui 'anqa'en da qonapega añi coma' da ỹanem namayepi ca 'etaxat, qaq huaña nache 'auauaachigui añi coma' da chegaqaigui ca 'etaxat, nache nỹomigui na shiỹaxauapi qataq na na'atetpi.
9Nache so Moisés ỹacona aso nashelte maye netaña ye lanataqa' Ñim Nataxala', nache ipacchigui da lamaxasoxonaxac Ñimaye. 10Nache so Moisés qataq so Aarón laỹona't naqa'en so shiỹaxauapi, huaña so loigue aso coma', nache so Moisés, 'eeta': ¡Ña qana'axaỹaxañiỹa da ỹa'aqtac, qami' maye sa qaualaqai! ¿Peta'a isheto' da npaxanec ñaqa'enaq na 'etaxat ana'ana coma' da yaqto' qanỹomiigui? 11Qaq co'ollaq ime, da la'aqtac so Moisés, nache ỹachaxaasheguem aso nashelte. Nache dos da iuaxaneua'a aso coma', nache ỹataqta lta'araic so npaxanec 'etaxat. Qaq huaña nache nỹom se'eso shiỹaxauapi qataq so na'atetpi. 12Nache Ñim Nataxala' 'enapega so Moisés qataq so Aarón, 'eeta':
«Qaq souaxat da saishet da huo'o ca qarpi'iỹaxaqui Aỹem, qataq saishet da Aỹem qavio'oxoyiñi da ỹauaachigui qanqa'eñi na Israel le'ecpi, nache saishet qome da qarỹaiteuo ne'ena shiỹaxauapi qom inoxoneua'a ye 'alhua maye sanem namayepi.»
13Qaq se'eso npaxaatauec 'etaxat huaña co'ollaxa ye Meribá, maye qaỹamata'ac cotaqa', yem huaña co'ollaxa so Israel le'ecpi da quetega Ñim Nataxala'. Nache Ñimaye ỹachaxana somayepi da qui'itta lataxac.
So nta'a ye Edom sa ỹashen da qaỹa'axasoxoolec so na'alhua
14Nache so Moisés ỹauo'oi soua lamaxa'she chegoqchiyiña ye Cades, da ỹamaxa da la'aqtac so nta'a ye Edom, 'eeta': «Na 'arqaỹañecpi Israel le'ecpi, da la'aqtac, 'eeta': 'Am 'auaỹaten 'enauac na lqalaicpi maye souaqaigui. 15So hua'au qarta'alpi taỹa co'ollaxa ye Egipto, nache qaỹoqteguelo soua vi'iye da sonaqtaña yemaye, qalaxaye ye Egipto le'ecpi qomi' sa iyacna'ape, 'eeta'am co'ollaxa so hua'au qarta'alpi, 16qaq huaña, nache qomi' seỹaxanaqot Ñim Nataxala', nache Ñimaye hua'axaỹa so qarỹaxanaxac, nache namaq so nale piguem le'ec da qomi' nqateeguesopa ye Egipto. Qaq nagui sonaqtaña na Cades, nam loga't na 'ana'alhua. 17Nache 'am ñachoxonnaqot da qomi' 'auasheetema qome da sa'asoxonaxalec na 'ana'alhua, qalaxaye saishet da sa'axasoxonaxalec na lma' na nañiguishecpi, qataq na lma' ana uva qataq saishet da ñiỹomaxagui na 'etaxat maye le'ec ana nsherepi. Nacherata da qolaqtegue so ỹataqta nqa'aic, saishet da saỹoxosoxouec, choche ivitta'a qome da ime, da sa'axasoxonaxalec na 'ana'alhua.»
18Nache so nta'a ye Edom ỹamaq so la'aqtac, 'eeta':
«¡Saishet qome da qaua'axasoxoñiilec na ña'alhua, cha'aye qom qaua'axasoxoñiilec, nache iỹatec qome na ñalleppi da qami' seloquiaxa'n!»
19Nache so Israel le'ecpi qaltaq 'enapega co'ollaxa somaye, 'eeta':
«Qomi' qolaqtegue qome so nqa'aic, qaq qomi' huo'otaq na qana'atet da ñiỹomaxagui na 'etaxat maye le'ec ana nsherepi, nache sesheetenaq qome aca lasheue namaye. Qaq nacherata da seỹaxanaqtegueua'a da qomi' 'auasheetema da sa'axasoxonaxalec na 'ana'alhua.»
20Qalaxaye da lasataxac so nta'a ye Edom, 'eeta':
«¡Saishet da qaua'axasoxoñiilec namaye!» Nache somaye ca'ata'aguet so Israel le'ecpi ỹauec so ỹataqta 'añaxaic nalleppi, qataq na'atchiguiñi na lo'ogoxonaxatpi, 21nache somaye ỹataqta sa ỹashen da qaỹa'asoxoolec so na'alhua. Nache so Israel le'ecpi dasheuec ỹaqa'a so tateuga nqa'aic.
Da l-leuaxa so Aarón
22Qaq 'enauac so Israel le'ecpi ca'ai co'ollaxa ye Cades, nache taỹa añi qasoxonaxa ye Hor, 23yem sa qaỹapeque ye loga't ye 'alhua Edom, qaq nache huaña yemaye co'ollaq Ñim Nataxala' 'enapega so Moisés qataq so Aarón, 'eeta':
24«Da Aarón mashe sa qaỹapeque ye loga't da nachaalataxac, nache saishet qome da inoxoneua'a ye 'alhua maye sanem na Israel le'ecpi, souaxat da sa qaualaqaiguet so ỹa'aqtac co'ollaq huaña ye Meribá maye huaña da npaxaatasheguem na 'etaxat. 25Qaq 'am Moisés, 'auaviguisheguemec qome ye ỹoqta pa'asheguem añi qasoxonaxa Hor da Aarón qataq da llalec Eleazar, 26qaq nache huaña qome yemaye da 'anqa't daua alogo da Aarón dam ỹaatrañi da ntaxaỹaxanaxanec, nache ỹaayeñi 'anqa'en da Eleazar maye llalec damaye, cha'aye nache huaña qome yemaye, da ileu da Aarón.»
27Nache so Moisés ỹo'ot de'era la'aqtac Ñim Nataxala', qataq ỹauaachigui naqa'en 'enauac so Israel le'ecpi, da tayesheguema aso qasoxonaxa Hor. 28Qaq nache huaña da so Moisés nqa't soua alogo da ntaxaỹaxanaxanec so Aarón, nache ỹaayeñi naqa'en so Eleazar. Qaq nache huaña yi'iye ỹoqta pa'asheguem aso qasoxonaxa da ileu so Aarón. Nache so Moisés qataq so Eleazar ñe'eguelaxayiñi co'ollaxa. 29Qaq so Israel le'ecpi co'ollaq ỹaỹaten da ileu so Aarón, nache ivittrec soua treinta na'axa'te da nỹeeteguelec.
